PJJ GBKP Tgl. 11 - 17 Agustus 2019

PJJ GBKP TGL. 11 - 17 AGUSTUS 2019

Pdt. Larena br. Sinuhadji (Nd. Rey Rapha Tarigan)

Tema : IBEBASKEN GUNA MBEBASKEN (Matius 18:23-35)

(HUT Kemerdekaan RI 74 Tahun)

Perikop ogenta sendah ibere judul “Perumpamaan kerna ngalemi kalak si ersalah”, adi i bas terj. TB-LAI nari nina “Perumpamaan tentang pengampunan”. Ibenai alu penungkunen Petrus man Yesus, “O Tuhan piga kali banci kualemi seninangku si ersalah man bangku? Cukup pitu kali?” Man Petrus enggo cukup melala kel kesabaren ras kekelengenta ibereken man kalak si ersalah banta alu ngalemi seh pitu kali. Bahkan umumna kita mereken kesempaten telu kali ngenca, maka lit lagu pop si iendeken Trio Ambisi, “Satu kali kau sakiti hati ini masih kumaafkan. Dua kali kau sakiti hati ini juga kumaafkan, tapi jangan kau coba tiga kali, jangan oh janganlah, cukuplah sudah cukuplah sudah jangan kau ulangi lagi!” Ertina lagu enda nekankenca ula sempat telu kali, la nari lit pintu maaf man banta. Tapi nina Yesus, labo cukup pitu kali, tapi pitu puluh kali pitu kali, ertina, la ersibar, la lit batasna.

E maka ituriken Yesus kerna Kinirajan Surga si ipebali ras sekalak raja si erkira atena ras juak-juakna, i ja lit utangna man raja erjuta-juta (terj. Bhs. Ind. e me 10.000 talenta. 1 talenta = 6.000 dinar, berarti total 60.000.000 dinar. 1 dinar e me upah pekerja sada wari. Kalau saja diperkirakan 100.000 sehari, berarti 60.000.000 dikali 100.000 sama dengan 6 Triliun). Tapi perbahan la ia ngasup nggalari utangna e, e maka isuruh raja gelah idayakenna dirina ras ndeharana rikutken anak-anakna bage pe erta-ertana guna nggalari utang-utang e. Juak-juak enda mindo perkuah ate raja gelah sabar raja nimaisa maka pagi igalarina nge utangna e kerina. Tapi lebih asa si e ibereken raja, labo hanya kesabaren nimai juak-juak e seh ngelunasi utang-utangna tapi isasapken raja utang juak-juakna e ras isuruhna mulih. Luar biasa!

Tapi asum ia i bas perdalanen mulih, jumpa ia ras juak-juak si deban si rutang man bana piga-piga ribu (terj. Bhs. Ind. e me 100 dinar = 1 dinar upah pekerja sehari = 100.000 X 100 = 10.000.000). Adi irupiahken 10 juta ngenca utang temanna e man bana (6 Triliun banding 10 Juta). Tapi uga perbahanenna man temanna e? Itangkapna dingen icekikna temanna e gelah banci galarina utangna e. Seri ras perbahanenna ndai man raja, e maka temanna ndai pe mindo kesabaren man bana maka pasti igalarina nge utangna e. Tapi la ia nggit sabar, itamakenna temanna e ku penjara seh bali utangna e. Kedungenna seh berita enda man raja, sebab ipeseh teman-temanna si deban si ceda atena ngenehen perbahen juak-juak si enggo ngaloken kekelengen bas raja nari. Merawa kel raja man bana janah itamakenna juak-juak e ku penjara seh igalarina utangna kerina.

E maka iujungi Yesus alu perkataan si menjadi inti i bas perikop enda, “Bage nge ibahan BapangKu i surga man bandu kerina adi la kin ialemindu seninandu terus ku bas pusuhndu”. Ertina arus kita ngalemi salah kalak man banta terus ku pusuhta, labo terjeng seremonial, formal bas biber ngenca tapi la seh ku pusuh. Sabab bage kin umumna bas kita, terlebih lit istilah “purpursage” bas budayanta dalam rangka rekonsiliasi adi lit terjadi konflik antara dua belah pihak. Si mekatep terjadi terjeng seremonial gelah enggo iban tapi la kita siap ikoreksi adi kin lit memang salahta guna jadi pelajaren wari-wari ku lebe enda. Piah perdamen e la seh ku pusuh terjeng biber ngenca seh makana adi “terluka ka sekali nari” si gelgel pe ionggar-onggar denga.

Karakter si apai ateta sipilih, karakter raja entah karakter juak-juak? Dosanta si mbue enggo ialemi Tuhan Yesus i bas IA mate i kayu persilang arah si e njemba kita guna banci ngalemi salah kalak man banta alu la ersibar. La lit istilah “tidak ada pintu maaf bagimu”. Perbahanen si la mehuli man banta ciga ateta tapi jelma e si arus sikelengi, bagi Krisus tetap ngkelengi kita, bahkan 99 biri-biri itadingkenna guna ndarami sekalak biri-birina si bene (bdk. Mat.18:10). Kita enggo ibebasken Tuhan, ialemi Tuhan maka kita pe arus mbebasken ras ngalemi salah kalak man banta. Pedauh i bas kita nari istilah “sada mata wari pe ateku lang”, “tek-tek ketang”, “sakit kel ukurku bana, dumpang perkaslah min ia”, ertindih-tindih dosa siban kita erkiteken la kita nggit ngalemi ndai. Situhuna secara fisik ras tendi kita nge si rugi. Pusuh ras ukurta setiap jumpa ras imbangta ndai gara, nembeh, ngilas, lalit damena pusuhta. Banci ka menimbulkan pinakit tensi tinggi, lever, susah tidur, rsd. Berikanlah pengampunan uga pe sakitna perbahanen kalak banta, alu tetap kita mindo Kesah Si Badia erdahin bas kita.

Janah i bas Tgl. 17 Agustus 2019 kita merayakan Indonesia Merdeka 74 tahun. Bangsanta merdeka erkiteken perkuah ate Tuhan. Adi enggo kita imerdekaken Tuhan, kita pe arus memerdekaken kalak. Ula isalahgunaken kemerdekaan si enggo ibereken Tuhan alu ngelakoken perbahanen si la mehuli. Meriah ukurta enggo kita merdeka i bas penjajah bangsa asing bage pe kuasa dosa. Maka asa ngasupta tetaplah silakoken perbahanen bage biakna kalak si enggo merdeka. Biak-biak si mehuli, si positif (berbuat baik, nampati teman, erdahin alu mehuli selaku warga negara si mehuli, bereken kontribusinta si positif man negaranta sekecil apapun). Yeremia 29:7 nina “Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap”. I tengah jabu, lingkungen bage pe perpulungen ula erkiteken perbahanenta mbiar kalak, kitik ukur kalak (geluhna la nari merdeka, la nari dame). Pengerananta ras perbahanenta menjatuhkan, menyepeleken, menyakiti. Sibeda-bedaken dirinta ras kalak si deban, sabab siakap kita kalak berkelas temanta la selevel ras kita, rsd. Piah dungna temanta ndai pe minder ergaul ras kita. Kita ibebasken guna banci mbebasken kalak si deban, temanta, keluarganta rsd. Tuhan si mpegegehi kita kerina.