PA Kategorial GBKP Tgl. 11 - 17 Agustus 2019

PA MORIA GBKP TGL. 11 - 17 AGUSTUS 2019

Pdt. Larena br. Sinuhadji (Nd. Rey Rapha Tarigan)

Ogen : Galati 5:13-15

Tema : KEBEBASEN GUNA KINIULIN

Tujun : Gelah Moria :

1) Meteh kebebasen si imaksudken Paulus

2) Ngisi kemerdekaan (kebebasen) alu ndahiken dahin-dahin si mehuli

Secara keseluruhen surat Paulus man perp. Galati ilumbaken gelah tuhu-tuhu ieteh kalak si enggo tek man Yesus subuk kalak Yahudi entah pe non-Yahudi (Yunani) maka syarat si penting sebage kalak Kristen labo kerna Undang-undang (Taurat) Musa (sunat, mantangken piga-piga pangan) tapi tek man Yesus. Arah kita tek man Yesus maka kita enggo iperdameken ras Dibata, bebas i bas kuasa dosa, kuasa Iblis ras e kerina perkuah ate Dibata man banta. Sabab paksa si e berkembang i tengah-tengah perpulungen i ja sada kearusen ngkikutken Undang-undang Musa  maka enggo ikataken Kristen si tuhu-tuhu.

Perikop ogenta sendah ibere judul “Jagalah kebebasenndu’ (terj. TB-LAI “Kemerdekaan Kristen”). Kebebasen si enggo ibereken Tuhan arus mampu ipertanggungjawabken ras iaplikasiken alu mehuli. Ay. 1, “Kita enggo bebas genduari sabab Kristus enggo mbebasken kita! Erkiteken si e tetaplah bagi kalak bebas, janah ola nai kam nggit itindih pasangen bagi budak”. Bahkan tegas Paulus ngatakenca, “Adi pelepasndu diirindu isunatken, e nuduhken maka Kristus la lit ertina man bandu”.

Secara khusus bahan PA-ta mulihi ipertegas Paulus maka perpulungen e enggo bebas (merdeka) sabab enggo ipilih Dibata arah kita tek man Yesus. Tapi sijaga maka kebebasen e ola sempat kebablasen (ate-ate) je nari jadi alasen si erbahanca geluhta ikuasai peraten dagingta (terj. TB-LAI nina, “Tetapi janganlah kamu mempergunakan kemerdekaan itu sebagai kesempatan untuk kehidupan dalam dosa”). Si arus idalanken perpulungen e me nggeluh i bas sikeleng-kelengen. Bere maka keleng ate si njemba-njemba kam guna nggeluh sisampat-sampaten. Sabab undang-undang pe si ibereken Tuhan man Musa i bas kerehen Yesus enggo ipersada ku bas sada pedah, “Kelengilah temanndu manusia bagi kam ngkelengi dirindu”. Intina kemerdekaan, kebebasen i bas dosa mabai kita nggeluh sikelengen-kelengen sada ras si debanna alu la ibatasi golongen, suku, tingkat sosial, pendidiken rsd. La lit nari belat-belat. Tapi adi i bas kegeluhenta selaku kalak si tek pe sikaraten dingen siatahen sada paksa waktu bakal kernep nge persadanta e. E maka arus tetap metenget.

Puji Tuhan labo hanya kita bebas i bas kuasa dosa tapi pe i bas penjajahen bangsa si deban i ja i bas tgl. 17 Agustus enda kita merayakan 74 tahun Indonesia merdeka. Patut kita ngataken bujur, pelin-pelin perkuah ate Tuhan man banta, e maka arus sipakeken kegeluhenta selaku kalak si bebas (merdeka) alu bertanggung jawab ula ate-ate. Lebe sigejapken kita enggo merdeka maka geluhlah sebage kalak si enggo merdeka : semangat, lit keriahen ukur, sura-sura si mehuli tetap ilakoken (arus beda nggeluh sebage budak dosa ras genduari Tuhan jadi tuanta la nari Iblis ), ertina si ngena ate Dibata tetap sidalanken. Lebe i tengah jabu, sebage nande, bapa, anak si perbahanenna memerdekakan kalak si deban. Ula kari ku jelma si deban mehuli kita, ramah, tapi anak-anakta mbiar man banta. Ku darat dalam rangka pencitraan. Enggo pasti adi si e siusur-usur tading timai kehancuren i bas jabu. Bage pe biak-biak si la mehuli sidalanken denga (emosi, membully, memfitnah) keberadaanta jadi sinanggel man kalak. Yeremia 29:7, sebage kalak si tek i ja pe kita ringan arus tetap berperan aktif i tengah-tengah bangsanta, erdahin ras ertoto guna kiniulin bangsanta tanda tetap siisi kemerdekaan e alu mehuli. Merdeka!