PA Kategorial GBKP Tgl. 25 - 31 Agustus 2019

PA MAMRE GBKP TGL. 25 - 31 AGUSTUS 2019

Nrs. Pdt. L. Sinuhadji (Bp. Rey Rapha Tarigan)

(HUT MAMRE GBKP)

Ogen : 1 Raja-raja 3:7-14

Tema : BAPA SI ERDIATE

Tujun : Gelah Mamre :

1) Ngangkai perbahanen si pentar. 2) Ngasup jadi bapa si erdiate.

I bas PA-ta sekali enda, radu ras kita erlajar arah Salomo anak Daud, raja si peduaken bangsa Israel kenca Daud. Judul i bas perikop ogenta sekali enda e me “Salomo ertoto mindo kepentaren” (bhs. Ind. “Doa Salomo memohon hikmat”). Sope seh ku bagin pemindon Salomo, ituriken maka Salomo enda tangtangna memang sekalak si erkeleng ate man Tuhan janah iikutkenna kerina pedah bapana Daud. Iberekenna contoh si mehuli man rayatna i bas ia ersembah man Dibata. Ibahanna persembahen tutungen si mehulina man Dibata i Gibeon, batar-batar si terberitana kel paksa si e. Adi sioge i bas 2 Kron. 1:2-3 nari jelas je ituriken maka iperentahken Salomo kerina kepala pegawai pasuken seribu ras seratus, kerina pegawai pemerentah, kerina kepala keluarga, dingen kerina rayat, guna radu ras lawes ku ingan pertoton i Gibeon. Ipergunakenna kuasa si lit bas ia guna ngelakoken si mehuli e me ersembah man Tuhan Dibata.

Kenca bage ituriken maka i bas berngi e teridah Tuhan man Salomo i bas nipi. Adi bas 2 Kron. 1:7 ituriken maka i bas berngi e icidahken Dibata BaNa mana Salomo. Ertina memang sengaja Dibata encidahken DiriNa man Salomo, mungkin erkiteken iidah Dibata ketutusen ras keleng atena man Dibata. Isungkun Dibata Salomo niNa, “Kai atendu Kubereken man bandu?” Labo mis ikataken Salomo kai si atena ibereken Dibata man bana, tapi leben Salomo ngataken bujur man Dibata erkiteken keleng ate Dibata si la erkeri-kerin nandangi bapana Daud seh asa Salomo iangkat jadi raja. Janah iakuina maka tahta kerajan Israel si ialokenna e labo bekas gegeh beluhna tapi erkiteken Dibata nge si milih ras mereken tahta kerajan Israel e man bana. Tuhu-tuhu icidahken Salomo kiniteruken ukurna i lebe-lebe Dibata.

Kai si ipindo Salomo man Dibata? I bas ay. 9 ikataken Salomo nina, “Berekenlah man bangku kepentaren ngerajai bangsaNdu alu kebujuren ras kebeluhen mbedaken si bujur ras si jahat”, si e kerina ipindoken guna ngaturken bangsaNa si mbelin labo guna kepentingen Salomo secara pribadi. I bas terj. TB-LAI, “Berikanlah kepada hambaMu ini hati yang faham menimbang perkara untuk menghakimi umatMu dengan dapat membedakan antara yang baik dan yang jahat, sebab siapakah yang sanggup menghakimi umatMu yang sangat besar ini?” Kepentaren i jenda e me “hati yang faham menimbang perkara” entah pe “hati yang siap mendengar dan mentaati” kerina si jadi peraten Dibata. Ituriken maka meriah kel ukur Tuhan erkiteken pemindon Salomo enda ndai labo pemindon si semal bagi mindo umur si gedang entah pe kematen musuh-musuhna. Emaka nina Dibata, “Kubereken kepentaren ras pengerti man bandu lebih asa si lit i bas kalak si enggo leben entah si pudin asa kam”. Labo terjeng je saja, ibereken Dibata bonus man Salomo e me kebayaken ras kemulian segedang-gedang geluhna lebih asangken kebayaken ras kemulian raja-raja si deban. Selain si e, ibahan Dibata gedang umur Salomo adi iikutkenna ras ipakena kata bage pe undang-undang Dibata.

PA-ta sendah i bas rangka HUT Mamre. Tema si seh man banta e me “Bapa si erdiate” alu tujun gelah Mamre ngangkai perbahanen si pentar ras ngasup jadi bapa si erdiate. Erdiate man ise? Si pemena lebe tentuna erdiate man Tuhan Dibata si enggo mereken nafas geluhta ras enggo mereken kerina si jadi kebutuhenta sedekah geluhta. Salomo mereken teladan man banta maka ia sekalak si erkeleng ate man Dibata. Erkeleng ate ras erdiate akap kami sedalanen, kalak si erkeleng ate enggo pasti mediate, janah kalak si mediate enggo pasti lit kekelengen bas ia. Keleng ate man Dibata erbahanca relasi Salomo ras Dibata tuhu-tuhu mehuli. Relasi si mehuli ras Dibata erbahanca Salomo jadi sekalak si lit bas ia karakter-karakter si mehuli, umpamana mehamat man orang tuana, tutus ia ersembah (beribadah) man Dibata, meteruk ukurna i lebe-lebe Dibata janah lalap ia ngataken bujur man Dibata.

Si peduaken, erdiate nandangi kalak si deban. Raja Salomo mereken teladan man banta i bas ia mindo kepentaren man Dibata. Kepentaren si ipindona e labo guna kepentingen dirina sendiri tapi guna ngaturken bangsa Dibata si mbelin. I bas si e tentuna arus kita mindo gegeh man Dibata gelah ipengasupNa kita mpelebeken kepentingen kalak si deban asangken kepentingenta. Akap kami makana ipindo Salomo kepentaren man Dibata sebab la ia ngasup alu gegehna ngaturken bangsaNa si mbelin.

Si peteluken, erdiate nandangi diri sendiri. Kepentaren i bas Dibata nari bagi si enggo ijelasken i datas e me “hati yang siap mendengar dan mentaati” kerina si jadi peraten Dibata guna kiniulin dirinta sendiri. Erdiate nandangi diri sendiri e me iteh kita kai si terbaik guna diri sendiri baik secara fisik, mental, rohani, rsd. I bas si e tentuna arus kita mengkondisiken geluhta alu mehuli. Umpamana, selektif i bas mengkonsumsi pangan ras inemen gelah tetap sehat. Selektif i bas kai si ioge ras sipelajari gelah tuhu-tuhu erbahanca perukurenta mehuli. Selektif i bas pergaulenta gelah ula ncedai dirinta sendiri. Adi keadaan dirinta sehat, perukuren positif, optimis, penuh semangat, emaka tingkat mediatenta man Dibata bage pe man kalak si deban si lit i sekelewetta semakin berkualitas.

Selamat HUT ninta man Mamre GBKP (tgl. 26 Agustus si pe - 26 tahun - ken). Mari radu ras sitotoken gelah Mamre GBKP semakin berkualitas i bas kai pe, i japa pe ringan, ras kai pe pendahinna, gelah gelar Dibata termulia arah kehadiren Mamre GBKP. Tuhan si mpegegehi kita.