PJJ GBKP Tgl. 28 Juli - 3 Agt. 2019

PJJ GBKP TGL. 28 JULI - 3 AGT. 2019

Pdt. Larena br. Sinuhadji (Nd. Rey Rapha Tarigan)

HUT SAITUN

(PJJ KEPKEPEN GBKP RG. BUKIT RAYA PEKANBARU)

Tema : IKAWALI DINGEN ITEGU-TEGU TUHAN
(Masmur 37:23-26)

Judul perikop Masmur 37 e me “Kedungen kalak jahat dingen kalak bujur”, adi i bas terj. TB-LAI, nina “Kebahagiaan orang fasik semu”. Rikutken judul i bas bahasa Karo maka pasti lit kedungenna, subuk kiniulin ras kejahaten si ilakoken kita. Sepanjang bindu 37 melala icidahken kai si bakal ialami kalak si jahat (ay. 2a,9,15,17a,20,22b,28c,36,38), ras uga si bakal ialami kalak si tetap ngelakoken kebenaren i bas geluhna. E maka Firman Tuhan memotivasi kita gelah ula morah ateta nandangi kalak jahat entah pe surut ukurta ngelakoken si mehuli, tetaplah silakoken si mehuli sabab Dibata ietehNa kai pe si ilakoken kita.

Secara khusus dalam rangka mperingeti HUT Saitun 28 tahun ilumbaken man banta, maka kalak si tetap ngelakoken kinibujuren tetap ikawali dingen itegu-tegu Tuhan geluhna (terj. TB-LAI : Hidupnya berkenan kepada Allah). Ertina, dalankenna kai si ngena ate Dibata. Guling pe ia la mekelek sabab Tuhan si negu-negu ia. Ertina, tetap lit perbeben ialami kalak si ernalem ras ndalanken si ngena ate Dibata, tapi Tuhan tetap masu-masu geluhna. Tuhan nampati dingen mpegegehi ia i bas mentasi erbage perbeben i bas kegeluhenna. Dingen i bas pengalamen geluh Pemasmur isaksikenna uga penemani ras pemasun-masun Tuhan nandangi kalak si bujur. Mulai kin kitik-kitikna nari seh enggo ia metua, la enggo idahna kalak bujur itadingken Tuhan, entah kempuna jadi pemindo-mindo. Bahkan kebalikenna, kesusuren kalak bujur, seh ku kempuna tetap ipake Tuhan jadi pasu-pasu (berkat), mpepaler pasu-pasu man kalak si deban. Sebab tetap idalankenna kekelengen, melumbar mere dingen nampati kalak si man sampaten.

Pemasmur si enggo ibereken Tuhan umur si gedang tetap njemba kerina kita guna nggeluh alau bujur, ndalanken si mehuli, si ngena ate Dibata. Labo enda hal si mesukah, sabab enggo pasti mbue tantangenna, subuk bas dirinta sendiri bage pe kalak si deban. Umpamana : la lit temanta, idarami kalak si deban cara guna ndabuhken kita, sekelewetta la mendukung sabab ratana kawes kemuhenta ndalanken si la bujur, rsd. “Kebujuren barang langka”. Tapi e nge si arus idalanken kita adi ateta ikawali dingen itegu-tegu Tuhan.

Bujur man Tuhan adi sempat kita menikmati usia Saitun, umur si gedang, entah pe usia indah. Sigejapken e pemere Tuhan. E maka pakeken kesempaten usia lanjut guna tetap ngataken bujur ras jadi pasu-pasu (berkat). Saitun labo berarti berhenti erbahan si mehuli erkiteken enggo metua, sabab terkadang e jadi alasen, la lit nari gegeh, kurang daya ingat, rsd. Payo gegeh enggo urak, penginget enggo kurang, pengenehen ras pemegi enggo urak, tambah ka lit rusur si mesui, tapi  labo berarti la banci erbahan si ngena ate Dibata. Tetap denga banci silakoken si mehuli rikutken gegeh Saitun, ngoge Pustaka Si Badia secara rutin, ertoto (pendoa) syafaat, pebue ngataken bujur, mereken usihen si mehuli man anak ras kempu, saran-saran si membangun ras muat bagin i bas dahin-dahin Gereja si ngasup denga Saitun muat bagin.

Labo tanpa alasen Lansia GBKP igelari Saitun, sabab batang saitun mbue kel manfaatna. Buahna man pangan. Batang saitun batang si ndekah nggeluh, dingen i bas kerina musin tetap meratah daunna. Erbage-bage manfaatna, minak saitun selain guna kecantikan, kesehaten banci ka sipake sebage bahan bakar (2 Kro. 2:10, Luk. 10:34, Yak. 5:14). E maka kalak Timur Tengah, nggambarken saitun sebage simbol kinijilen, gegeh, kemakmuren ras pasu-pasu i bas Dibata nari. Bahkan adi batang saitun itas-tas, maka rehen ka tunas si mbaru i bas akarna nari. Bagem kehebaten batang saitun dingen bagem iarapken man orang tuanta si enggo lansia, tetap geluhna jadi pasu-pasu (berkat) seh iiket kambal-kambal e.

Janah perpulungen arus tetap mendukung, mengapresiasi ras ngkelengi orang tuanta Saitun. Mereken waktunta ras pusuhta guna inganna nuri-nuri. Sabab maun e si erbahanca latih ukur orang tuanta la lit nari temanna, kerina sibuk seh ku kempu pe sibuk. E maka rusur lit terkuan, ndube orang tuanta sekalak nari ia banci kep-kepna 5 anakna. Tapi genduari, anak si lima ndai enggo erjabu, sukses geluhna, lit kela ras permain tambah kempu si nterem, orang tuanta ndai si enggo lansia kurang lit si mperdiatekensa. Apai ka adi la lit ban kesibukenna orang tuanta ndai enggo pedas kel kari ia kolihen. 28 tahun Saitun GBKP, njemba Gereja pe tetap mperdiateken orang tuanta si enggo lansia, arah erbahan kegiaten PA ras kegiaten si deban si membangun (doa pagi seminggu sekali, senam bersama, ceramah kesehaten, rsd).

DISKUSI :

1. Kai saja tantangen i bas kita nehken kebujuren?
2. Perbahanen kai saja si banci ilakoken orang tuanta Saitun gelah tetap erguna?
3. Kai nge si banci siban man orang tuanta Saitun si banci maba keriahen ukur man bana, subuk keluarga bage pe Gereja?
4. Aksi : Guna wari Minggu Tgl. 11 Agustus sibahan kegiaten dalam rangka HUT Saitun (12 Agustus 2019)

TATA CARA PJJ KEPKEPEN :

1. Bernyanyi “Hari ini Kurasa Bahagia”
2. Bernyanyi “Senyum dan Bermuka Gembira”
3. Ertoto (i babai sekalak anggota PJJ Kepkepen)
4. Ngoge Pustaka Si Badia
5. Penjelasen Ogen & Tema (ibabai Pt./Dk. Pengepkep)
6. Rende KEE 293:1,3
7. Diskusi
8. Persembahen (Rende KEE 344:1-)
9. Pertoton Syafaat, Persembahen ras Pertoton Tuhan
10. Mengucapkan Tekad rikutken tema : “Tetaplah dalanken kebujuren gelah geluhta ikawali ras itegu-tegu Tuhan!”