PA Kategorial GBKP Tgl. 14 - 20 Juli 2019

PA MAMRE GBKP TGL. 14 - 20 JULI 2019

Nrs. Pdt. L. Sinuhadji (Bp. Rey Rapha Tarigan)

Konfesi GBKP : Konsep & Dimensi Keselamaten

Ogen : Efesus 2:1-10

Tema : NGANGKAI KERNA KESELAMATEN ALU PAYO

Tujun : Gelah Mamre :

1) Ngangka maka keselamaten e erkiteken perkuah ate Dibata si iaminken i bas kiniteken erkelangken Berita Si Meriah. 2) Meteh maka keselamaten e la terjeng si pepagi (surga) ras la saja kerna keselamaten tendi.

Metode : Ceramah / Diskusi

Ogenta sendah e me sada bagin i bas surat rasul Paulus nandangi perpulungen i Efesus. Perpulungen Efesus labo Paulus si mantekisa tapi lit hubungen si ndeher antara Paulus ras perpulungen i Efesus sebab Paulus pernah tading ras melayani i perpulungen Efesus 2 tahun ndekahna (Perb. Rasul 19:8-10). Ertina enggo iteh Paulus kerna situasi si berkembang i perpulungen Efesus. Tujun surat enda labo guna ndungi persoalen bagi surat-surat Paulus si deban, tapi merupaken pengajaren bage pe persinget kerna nggeluh erkiniteken man Dibata i bas Yesus Kristus.

Ogenta sendah lit i teruh judul “I bas kematen nari ku kegeluhen”, terj. TB-LAI “Semuanya adalah kasih karunia”, si intina ngerana kerna keselamaten i bas Kristus. Ay. 1-3 nuriken kerna kegeluhen manusia sope iselamatken : ngikutken kebiasaan doni si jahat bage pe penguasa-penguasa doni si jahat, la nggit patuh man Dibata, nggeluh ngikutken sura-sura manusia si dem alu dosa si erbahanca mate pertendin. Ay. 4-7 nuriken kerna proses penyelamaten manusia si ilakoken Dibata, i ja erkiteken perkuah ate Dibata si la ersibar bage pe keleng ateNa si mbelin man manusia bage pe doni enda, kita si enggo mate, ipegeluhNa mulihi raduken ras Krisus, erbahanca kita jadi terkelin (selamat). IpersadakenNa kita, ipekekeNa kita, janah ipekundulNa kita ras Kristus i bas ingan si meganjangna. Kerinana ilakoken Dibata gelah teridah kiniulin bage pe lias ateNa si mbelin i bas Kristus Yesus man manusia bage pe doni. Ay. 8-10 bagi kesimpulen ras penegasen, maka : 1) keterkelinen entah pe keselamaten ialoken kita erkiteken tek kita man Kristus; 2) keterkelinen si ialoken kita e me pemere Dibata, labo bekas perbahanen bage pe pendahin manusia; 3) lit konsekuensi praksis (praksis ertina labo terjeng praktis tapi lit refleksi i bas aksi, iteh kita kai si jadi palas kerina si iukurken, si ibelasken ras si ilakoken kita ibas geluhta si tep-tep wari) : erkiteken kita enda tinepa Dibata si enggo ipersadaken ras Kristus maka tugasta e me ngelakoken, ndahiken, kerina si jadi peratenNa sebage wujud konkrit keterkelinen bage pe pengataken bujurta man Dibata.

I bas Konfesi GBKP Bab XIV kerna KESELAMATAN, irumusken bagenda nina : Kami percaya, bahwa : 1) Keselamatan adalah pemulihan kembali citra Allah dalam diri manusia. Keselamatan merupakan inisiatif Allah yang mengasihi manusia (Yoh. 3:16). Oleh karena itu, keselamatan merupakan anugerah Allah, bukan hasil usaha manusia (Ef. 2:8-9). 2) Keselamatan dari Allah diterima oleh iman dan membuahkan hidup benar dan kudus sesuai firman Allah serta semangat melakukan perbuatan-perbuatan baik sebagai ucapan syukur atas keselamatan yang telah dianugerahkan Kristus (2 Pet. 3:14; Kol. 1:17, 3:15-17; 1 Pet. 1:16). Ertina ogenta sendah sedalanen ras Konfesi entah pe Pengakuan Iman GBKP kerna keselamatan.

Adi sioge secara lengkap i bas Pustaka Si Badia maka keselamatan e sifatna holistik (melala dimensi) mencakup : keselamatan rohani dan jasmani; keselamatan esok di sana dan kini di sini; keselamatan personal dan sosial; keselamatan manusia dan seluruh ciptaan; keselamatan oleh Allah dan melalui manusia; keselamatan bagi umat terpilih dan keselamatan bagi semua orang. Ertina keselamatan e labo terjeng ngerana kerna surga, kenca mate masuk surga, tapi lit tanggung jawabta guna menciptakan keselamatan e secara konkrit i tengah-tengah doni enda. Bagi si ilakoken Kristus si secara proaktif erbahan erbage-bage hal si erbahanca kegeluhen kalak i sekelewetNa jadi tekelin. Emaka payo bagi si ikataken Paulus i bas Filipi 2:12 nina “tetap kerjakanlah keselamatanmu dengan takut dan gentar”, keselamaten e labo terjeng sialoken ngenca tapi arus siwujudnyataken i bas geluhta si tep-tep wari.

PA MORIA GBKP TGL. 14 - 20 JULI 2019

Pdt. Larena br. Sinuhadji (Nd. Rey Rapha Tarigan)

Ogen : Yesaya 28:23-29

Tema : KEPENTAREN DIBATA MABA KINIULIN

Tujun : Gelah Moria :

1) Ngangkai kepentaren Dibata i bas ngerancang kiniulin man manusia (rencana ngelola usaha/dahin). 2) Pang rusaha i teruh pasu-pasu Dibata.

Metode : Sharing

Salah sada biak kalak si pentar e me nggit erlajar. La pernah lit kata “tamat” i bas erlajar, la pernah ia erpuas diri. Arah ise pe dingen arah kai pe banci ia erlajar guna nambahi pemetehna, terlebih nggit iajari Tuhan sabab ulu kepentaren e me Dibata.

Ogenta sendah ibere judul “Kepentaren Dibata” (TB - LAI, “Kebijaksanaan Tuhan”). Piga-piga hal si penting si banci siidah arah perikop enda :

1) Selaku kita manusia tinepa Dibata arus lit kemauan guna erlajar, pemena kiningginten megiken ras mperdiateken Kata Tuhan. Megiken i jenda labo terjeng ndengkehkenca saja, sabab lit deba kalak masuk kuping kiri keluar kuping kanan. Tapi lit i je ketutusen, bengket ku proses internalisasi, ngerenungkenca, mpelajarisa ras makekenca i bas kegeluhen.

2) Arus lit ketutusen i bas menakenca sada-sada dahin seh ku pendungina, sabab lit deba kalak semangat i bas awal, tapi i bas prosesna erkiteken lit tantangen enggo itadingkenna. Ras enda igambarken Yesaya alu gambaren perjuma, si labo hanya nenggala ras ngeroka jumana (ay. 24), tapi pe kenca enggo mesai jumana iamburkenna bibit/sinuan-sinuan (ay. 25), irawatna seh ngayak rani (ay. 27). Ula hanya semangat pa gasing.

3) Terbuka guna mbuka peluang usaha si deban, selain dahin si utama si sedekah enda enggo sikerjaken. Gambaren enda pe ipake Yesaya, i bas ia nuan jera ras lenga, suanna ka gandum ras dawa erteran-teran janah arah duru isuanna jaung. La terjeng sinuan si utama isuankenna tapi terbuka peluang guna nambahi sinuan i duru juma. Umpamana sisuan rimo, kelang-kelangna suanna la cina ras sayur manis. Arah duru suan ka sere, lengkuas rsd. Adi sikaitken ku bas tahun enterpreneurship, melala genduari selain PNS, jualan online ka, entah investasi ku si deban si banci nambahi sumber uang masuk. Sitik-sitik tapi terakap guna nambahi perbeliten jabu.

4) Ietehna uga ngaturken ras ndahiken dahinna sabab enggo iajari Dibata. Kepentaren Dibata mabai ia ndalanken si mehuli i bas dahinna, la curnakenna gelar Dibata. Ietehna waktu erdahin ras pekesahken, labo lalap erdahin dingen labo ka lalap menganggur. Ietehna kai si arus idalankenna, gelah meminimalisasiken kesalahen, si e igambarken Yesaya i bas rani, labo pernah ipaken palu-palu si mberat labo muat buah jera entah buah lenga si enggo iperani, tapi ipakena ciken si menahang pagi payona. Gelah tetap utuh ras mejile buahna ras layak guna idayaken (ay. 28 - 29). Sabab lit deba kalak asal-asalen erdahin si penting enggo erdahin tapi hasilna banci la maksimal. Siarapken i jenda tuhu-tuhu sieteh kai si arus sidalanken gelah hasil sidatken kita banci maksimal. Adi soal kerugian entah la runtung e me resiko i bas berusaha, si arus ka sieteh ngevaluasisa gelah adi lit persoalen si seri banci ka kita mpekenasa gelah reh ulina ka asilna.

Puji Tuhan, adi tutus kita mengikuti kegiaten Moria, ambah warina ibereken Tuhan kepentaren man banta guna ngaturken jabu bage pe nambahi perbeliten jabu. Sabab lit ka deba kalak fokus ngenca ku perbeliten jabu tapi keluargana kurang iperdiateken. Tentuna enda labo payo.

Seumur hidup kita erlajar gelah jadi pentar, secara khusus i bas nambati ras nambahi income rumah tangga. Sabab reh galangna anak-anakta, maka kebutuhen pe reh buena. Emaka arus terbeluh kita selain berhemat tapi pe kreatif ndarami peluang usaha si deban si banci nambahi pemasukenta. Secara khusus kita si i daerah perantauan, adi enggo pang merantau berarti enggo pang erpasang, berjuang ras menanggung resiko. Bangun jejaring kalak si deban, terbuka guna erlajar mbuka usaha si ngasup kita ndalakenca alu la nadingken peranta sebage nande (nuan-nuan, buka lapak online, mbuka usaha catering kue, masakan sabab i bas kita saja teman sada gereja, persadan Karo banci jadi ingan pemasaranta; adi sikap - ntabeh asilna). Dingen siingetlah, kepentaren e Dibata merekenca, e maka arah usahanta, dahinta, kepentaren si lit bas kita, bagiken ka man kalak si deban, ula pelit ilmu ras si penting sidahiken kita e tetap mpermuliaken gelar Tuhan.