PA Kategorial GBKP Tgl. 7 - 13 Juli 2019

PA MAMRE GBKP TGL. 7 - 13 JULI 2019

Pdt. Larena br. Sinuhadji (Nd. Rey Rapha Tarigan)

(Njaga Kesehaten Arah Pangan)

Ogen : Hakim-hakim 13:1-5

Tema : JAGALAH KULANDU

Tujun : Gelah Mamre :

1) Njaga kesehaten (ngaturken pangan si sehat)

2) Ngasup nehken peraten Tuhan arah kula si sehat

Metode : Diskusi

I bas kegeluhenta si arus tetap iperdiateken e me kesehaten kula, pertendin ras perukuren, teluna enda penting. Sabab, adi sehat kulanta, tapi la sehat pertendinta mbue ka pinakit si banci tendengna ; murah putus asa, murah sakit hati-elem-elem, meganjang rukur, beluh akapna bana tanpa isedarina lit i je peran si mada kuasa. Bage pe sebalikna sehat tendinta, tapi kulanta sakit enggo pasti la banci kita beraktivitas, terbatas gegeh ras ukurta guna banci melayani. Ras melala survei ngatakenca maka sakit fisik salah sada penyebab terbesar erkiteken perukuren si negatif.

I bas Padan Si Ndekah (PL) berlaku denga, adi taat ipasu-pasu Tuhan tapi adi melawan Tuhan dat ukumen. Enda me si terjadi i bas jaman Hakim-hakim i ja bangsa Israel erdosa man Tuhan, e maka reh ukumen Tuhan arah bangsa Pilisti si ngkuasi bangsa Israel 40 tahun dekahna. Tapi Tuhan tetap mperdiateken kegeluhen bangsaNa. Teridah arah rencanan kegeluhen nandangi bangsa Israel si enggo ipersiapken Tuhan arah hambaNa. Ituriken maka lit sekalak dilaki Manoah i bas suku Dan nari, dingen ndeharana la banci mupus (mandul). Tapi ia ipake Tuhan gelah banci sura-sura Dibata erdalan. Malekat Tuhan ngatakenca maka la nai ndekah nari mehuli kula ndehara Manoah, ras ipupusna sekalak anak dilaki. Si arus itengeti ndehara Manoah asum mehuli kulana, la banci minem anggur (bir), la banci man pangan pantangen, janah kenca tubuh pe buk anakna la banci igunting. Sabab tantangna tubuh nari pe enggo ia iendesken man Dibata jadi sekalak “Nasir”. Kata “Nasir” ibuat i bas kata “Nazar” nari ertina mengasingken, mentahbiskan, berpantang, orang yang mengasingkan diri dari orang lain dengan mengkhususkan diri bagi Yahwe. Sekalak Nasir arus mantangken anggur, minuman keras, cuka anggur, buah anggur (Bil. 6:1-21). Bage pe la banci ikeret bukna.

I bas ogenta jelas, maka labo hanya kenca tubuh anak ndai maka arus ipantangkenna erbage pangan ras inemen tapi i bas bertin nandena nari pe arus itengetina dirina alu si ipantangken ndai. Alasenna jelas, labo hanya berkaiten ras tugasna kari selaku Nasir Dibata, tapi kesehaten i bas bertin nari pe arus iperdiateken. Mbue manfaat si banci idatken asum sekalak pernanden mperdiateken masa kehamilen alu makanan si sehat ras bergizi, e me mengembangkan otak janin, menghindari persalinen prematur, kulit sehat, menjaga kesehaten jantung, mengembangken otot janin, menjaga indera penglihatan, mencegah keguguren, rsd. Ertina, tanggung jawab sebage orang tua enggo sidalanken i bas njagai kesehaten secara maksimal. Sabab ‘di kenca sehat anakta e, la banci lang bagi, Simson i bas turi-turin enda, ngasup ia ndalanken sura-sura Dibata si mehuli e me mbebasken bangsa Israel i bas bangsa Pilisti nari.

Njagai kesehetan kula e me tanggung jawabta. Memang banci kita ertoto man Dibata gelah iberekenNa kesehaten, kejuah-juahen banta, tapi lit ka i je peranta, ras selebihna Dibata si ngkuhisa. Sabab banci jadi enggo maksimal kel kita njagai kesehatenta, banci ka kita ikenai pinakit si membahayakan, umpamana, kanker, demam berdarah, rsd.  Enggo pasti si e di luar kuasanta. Tanggung jawabta guna njagai kesehaten kula alu mengkonsumsi makanan yang sehat bergizi ras ula berlebih. Arus lit penguasaan diri bas kita. Sabab terkadang bahkan rusur la nari kita ngasup mengendaliken dirinta adi enggo melala lebe-lebenta pangan si ntabeh. “Makanlah sebelum lapar dan berhentilah sebelum kenyang”. Selain soal pangan si arus itengeti, e me olah raga si penting guna kesehaten kulanta. Setengah jam sada wari berjalan pagi entah sibiasaken untuk berjalan kaki adi tujunta labo ndauh kel. Sabab terkadang enggo kita manja kel, la ndauh pe tujuanta enggo kita berkendaraan. Ras si terakhir si perlu man jagan e me perukuren, sabab mbue pinakit reh arah perukuren si la mehuli. Kompasina.com beyon blogging nuliskenca, dendam ras akar pahit (elem-elem) banci erbahanca stress, kolesterol, hipertensi, bage pe adi rusursa kita stress, panik pencernaanta banci terganggu rsd. Ertina, perukuren si la mehuli banci mpengaruhi kesehaten kulanta. E maka Kuan-kuanen 17:22 ngatakenca, “Keriahen desken tambar si mereken kejuah-juahen, adi ukur serbut erbahanca daging kertang tading tulan”.

Adi kulanta sehat enggo pasti ngasup kita nehken peraten Dibata i bas geluhta, subuk erdahin, ngkuhi kebutuhenta ras keluarganta, melayani, rsd. E maka berusahalah kita alu tetap njagai kesehaten kulanta iherta tetap mindo kesehaten ras kejuah-juahen man Tuhan.

PA MORIA GBKP TGL. 7 - 13 JULI 2019

Pdt. Larena br. Sinuhadji (Nd. Rey Rapha Tarigan)

Ogen : Pilipi 2:1-4

Tema : RADU MPERDIATEKEN

Tujun : Moria :

1) Mperdiateken kalak si isekelewetna

2) Ngejapken maka ia perlu man kalak si deban ras kalak si deban pe perlu man bana

Metode PA : Diskusi ras Aksi

Lit peribahasa Karo nina : “Siangeng-agengen radu mbiring, sikuning-kuningen radu megersing”. Peribahasa enda memotivasi kita guna saling mengasihi, mperdiateken gelah radu sikap, mejile kita. Sedangken adi saling menjelekken, saling mengotori enggo pasti si terjadi hasilna radu sakit.

Perpulungen Pilipi merupaken sada perpulungen si ipajekken Paulus, janah surat enda itulisken Paulus asum ia i penjara denga. Perpulungen Pilipi sangat melekat bas ukur Paulus, selain sebage perpulungen si pemena ipajekken Paulus, perpulungen enda pe luar biasa kepedualianna asum Paulus melayani i je. Jadi Perpulungen labo hanya sifatna menerima tapi pe memberi, e me kap mereken perhatian, kekelengen, kepedulian si luar biasa man Paulus gelah tole reh ngasupna Paulus nehken pelayanen alu mehuli. Bdk. Bindu 1:5, “Nginget kuga kam nampati aku i bas meritaken Berita Si Meriah tangtana nari seh genduari”. Selain si e, perpulungen pe kompak, ersada kel arihna.

Tapi begina berita maka enggo reh urakna kiniersadan perpulungen, enggo lit perpecahen, belat-belat, mementingken diri sendiri. Adi situasi si bagenda iterusken enggo pasti reh kelekna terjadi perpecahen. Maka surat Paulus enda tole mpersingeti uga kin keleng ate Kristus si enggo mpersadaken perpulungen alu la erpilihen (status sosial, ekonomi, suku, rsd.). Janah adi lit virus si erbahanca terjadi perpecahan e me si arus itengeti ras ibeneken. Piga-piga hal si arus ilakoken perpulungen :

1) Paguh rembak ras Kristus. Sabab Kristus me ulu kekelengen, kita banci ngkelengi kalak erkiteken enggo leben sigejapken keleng ate Kristus. Jadi si pemena ula sirangi Kristus, arus tetap kita nggeluh rembak ras Kristus gelah katawari paksa keleng ateNa, KesahNa mpelimbarui geluhta. Bindu 2:1, “Kegeluhenndu i bas Kristus erbahanca kam megegeh. Ma keleng ateNa ngapuli Kam?”

2) Hubungen secara horizontal, sesama pe tetap arus sijalin. “Ersada min arihndu, sikeleng-kelengen min kam, ersada geluhndu dingen ersada ukurndu”. Virus si banci memecah-belah kiniersadan arus itengeti ras ibeneken : merangap, meganjang ukur, ulin siakap kita asangken kalak si deban, egois entah pe keperlunta saja siukuri kita tanpa kita peduli ras keperlun kalak si deban. Biak si bagenda adi siasuhi banci erbahanca ceda kiniersadan, belat-belat (gap-gap), dingen asa digan pe perpulungen e la maju. Sabab hanya berkutat kari ku bas persoalen demi persoalen, perubaten demi perubaten. Mbue kel keuntungenna adi kita banci ersada arih, saling mperdiateken, sikeleng-kelengen. Sada lebe : perpulungen e maju ras banci jadi berkat (pasu-pasu), labo ncakapken perubaten tapi kai si banci ilakoken perpulungen e guna memajuken jemaat; aksi sosial, latihan koor, rsd. Perpulungen e banci enterem anggotana, sabab sada ras si debanna saling merindukan. Tapi adi lit saja sekalak si rusur i je njengkali kalak, sok jadi bos, egois, enterem teman banna sakit hati, enggo pasti perpulungen pe reh urakna. Perpulungen e hidup sabab radu sikelengen kita, radu mperdiateken. Secara pribadi pe karakterta reh ulina, sabab erusaha kita uga geluhta enda banci tetap meneladani Kristus dingen erbahan si mehuli.

Mari perpulungen, radu mperdiateken kita, radu sikelengen, radu sisampaten kita sabab enggo leben Kristus mperdiateken kita, ngkelengi kita, nampati kita. Adi radu berarti lit je biak erlumba, erpengayak ku bas si mehuli. Sipake matanta, cupingta, tanta, nahenta, pusuhta, perukurenta, babahta guna nehken kekelengen. Mata si uga? Mata yang menyejukkan bukan menyalahkan, menghakimi, memojokan. Cuping si uga? Cuping si siap mendengar keluhan teman-temanta tanpa ada sikap menghakimi. Mendengar dengan hati. Tan si uga? Tan si merangkul, tangan yang menggenggam, tangan yang menopang. Nahe si uga? Nahe si siap berkat ku ja pe asum ibutuhken temanta si sangana butuh penampatta. Pusuh si uga? Pusuh si terbuka ngalo-ngalo ise pe, pusuh si bersih tanpa lit i je menghakimi. Perukuren si positif, si memotivasi, membangkitkan. Babah si mendamaikan, labo profokatif entah pe mem-bully, tapi menyejukkan, babah si mpedarat kata-kata pasu-pasu, apresiasi, dukungen. Mari senina Moria radu mperdiateken kita.

PA enda itutup, i ja setiap Moria kundul ras temanna dua kalak, saling mperdiateken, alu sapaan awal, “Kai si banci kuban teman, kai si banci kusampati?” Je nari saling mendoakan.