PA Kategorial GBKP Tgl. 21 - 27 Juli 2019

PA MORIA GBKP TGL. 21 - 27 JULI 2019

Pdt. Larena br. Sinuhadji (Nd. Rey Rapha Tarigan)

Ogen : Pengerana 7:11-12

Tema : NGGELUH ARUS PENTAR RAS ERPEMETEH

Tujun : Gelah Moria :

1) Ngangkai uga ergana pemeteh e perehken keterkelinen, ketenangen ras duit. 2) Nggit erlajar arah lingkungen, budaya, ras pemerintah guna nambahi pemeteh.

Metode PA : Inventarisir peluang-peluang erlajar

Minggu nderbih enggo kita ibabai i bas materi maka kepentaren e rehna i bas Dibata nari. Dingen kepentaren Dibata si lit bas kita arus sipakeken guna membangun dirinta ras kalak i sekelewetta, ertina adi lit kepentaren bas kita tujunna guna ncelakai kalak si deban, berarti isia-siakenna perkuah ate Tuhan dingen geluhta la erguna. Janah sekali enda tema memotivasi kita maka i bas kegeluhen enda arus pentar dingen erpemeteh. Kitab Pengerana si itulisken kalak si enggo metua dingen bijaksana ras enggo mbue idalanina erbage-bage cibal kegeluhen enda ngelumbakenca man banta maka nggeluh enda arus pentar. Enggo iidah ras igejapina sendiri uga kin ulihna adi makeken kepentaren Dibata ras uga ulihna adi siandalken gegehta si terbatas ras ernalem kita bas sura-sura doni enda, enggo pasti la maba kemalemen ate. Lit piga-piga hal si penting si icidahken Pengerana man banta i bas dua ayat enda :

1) Kalak nggeluh arus pentar. Kepentaren kap si mpengasup kita meteh kai si mehuli si ngena ate Tuhan, kai si la mehuli dingen silakoken si mehuli si ngena ate Dibata. Kitab Kuan-kuanen ngatakenca bena-benana kepentaren e me erkemalangen man Tuhan Dibata. Ras kitab Jakub 1:5 nina “adi lit i bas kam si kurang kepentarenna, ertotolah ia man Dibata si mereken kepentaren man bandu. Sabab Dibata kap mereken kepentaren man kerina jelma alu melumbar dingen dem perkuah ate”. Ertina, ulu kepentaren e me Dibata. E maka sipindo man baNa i herta tetap nggeluh erkemalangen man baNa. Raja Salomo pe ope isungkun Tuhan la pindona kinibayaken ras umur si gedang entah pe kematen musuh-musuhna, tapi pindona kepentaren ras pemeteh guna ngerunggui rakyat Israel si nterem (bdk. 2 Kron. 1:10), ras kedungenna labo hanya kepentaren ras pemeteh tapi pe itambahi Tuhan alu kebayaken, kemulian lebih asangken kerina raja si enggo leben entah pudin asangken Salomo (2 Kron. 1:12). Adi lit kepentaren bas kita, ngasup kita nggeluhken geluh enda alu dame sejahtera amin sekali mbue perbeben si man bentasen kita, dingen la ndigan pe bene kinitekenta (silacurken kinitekenta) tapi asa ngasupta nggeluh ndalanken si ngena ate Dibata.

2) Pemeteh e bali kap ras barang pusaka. Barang pusaka biasana meherga sabab lit nilai sejarahna dingen ilestariken, irawat alu mehuli gelah ula bene. Kesusurenta banci tetap ngidah ras meteh uga mehergana ras uga ndube fungsi barang pusaka e erkiteken terus ipebetehken dari generasi ku generasi. Ertina pemeteh e pe arus sigejapken barang si meherga dingen arus siwarisken man kesusurenta. Pemeteh dingen ulih pemeteh e labo hanya erguna man banta tapi man kalak si deban. Pemeteh e tetap nggeluh, berkembang ras berdaya guna adi sipakeken. Adi hanya isiniken saja, la pernah pakeken ras bagiken enggo pasti stagnan, la berkembang, bahkan banci rebo (rempet bodoh).

3) Pemeteh mereken ketenengen bali ras duit. Duit memang labo segalana tapi penting i bas geluh enda. Payo sen la banci nukur kesehaten (umur panjang) tapi arah litna sen kesehaten banci lebih baik erkiteken asa bancina perpanna si bergizi, vitamin cukup. Sabab adi la lit senta la banci sicukupi kebutuhenta, keluarganta, erbahanca kita la tenang ‘di kenca kebutuhen primer ras sekunderta la ncukupi.

4) Kalak si i bas kepentaren ras dingen pemeteh, ia terkelin (selamat - i bas terj. Ind. nina : “memelihara hidup pemiliknya”). Tujunta nggeluh i tengah doni enda ratana e me gelah nggeluh alu mejuah-juah, keselamaten jadi sikerajangenta. Keselamaten labo hanya kenca kita mate pepagin (surga) tapi pe kesalematen i bas doni enda. Keselamaten labo hanya tendi tapi pe kulanta. Bage me adi lit kepentaren ras pemeteh bas kita, maka geluhta terkelin. I ja kepentaren ibenai alu erkemalangen man Tuhan. I bas kita tek man Tuhan, siendesken geluhta man Tuhan alu perkuah ateNa iberekenna keterkelinen alu gratis (cuma-Cuma).

Guna banci sidatken pemeteh ras kepentaren tentuna si pemena erkemalangen kita man Dibata dingen nggit kita erlajar, ndatken informasi arah ise pe ras arah kai pe (long life education). Ula pernah lit kata selesai guna erlajar dingen nambahi pemeteh. E maka mulihi bahan PA Morianta sekali enda ngajuk dingen memotivasi kerina Moria GBKP guna nggeluh alu pentar ras erpemeteh. Erbage-bage dalanna secara eksternal banci silakoken asal kita enggo leben membangun link entah jejaring subuk secara pribadi bage pe ras lembaga si deban (kursus-kursus kerampilan, erlajar guna meng-up-grade kapasitas diri, megiken ceramah karakter building, link ras pemerintah ras lembaga si deban (PKK, CU, capacity building, kursus-kursus ketrampilen).

PA MAMRE GBKP TGL. 21 - 27 JULI 2019

Nrs. Pdt. L. Sinuhadji (Bp. Rey Rapha Tarigan)

Tanggung Jabab Mamre Selaku Imam I Bas Jabu

Ogen : 1 Timotius 3:4-5

Tema : BAPA SI NGEPKEP JABU

Tujun : Gelah Mamre :

1) Meteh tanggung jabab bapa selaku imam i tengah jabu

2) Ngasup jadi pemimpin kiniteken i bas jabu

Ogenta sendah lit i teruh judul “Si ngepkep perpulungen”, i bas terj. TB-LAI nina “Syarat-syarat bagi penilik jemaat”. Penilik entah pe si ngepkep i jenda e me episkopos i bas cakap Yunani si i bas perkembangenna pertua, penatua, entah pe tua-tua (presbuteros) masuk ku bas kategori penilik, si ngepkep, entah pe pemimpin perpulungen. Lit piga-piga syarat si arus lit i bas sekalak penilik entah pe pemimpin perpulungen. Piga-piga syarat enda arus lit erkiteken : si pemena, dahin enda dahin si mehuli, banci ikataken Dibata si netapkenca. Jadi ise pe si nggit ia jadi sekalak penilik entah pe pemimpin perpulungen arus leben isedarina maka dahin enda labo dahin main-main tapi dahin si mehuli i bas Dibata nari. Si peduaken, gelah pemimpin perpulungen e, bage pe perpulungen si ipimpinna, tuhu-tuhu jadi kesaksin si mehuli bage pe jadi pasu-pasu nandangi sekelewetna si lenga nandai Dibata i bas Yesus Kristus (bdk. 1 Tim. 3:7,13).

Si jadi ogenta sendah e me salah sada syarat si arus lit i bas sekalak penilik entah pe pemimpin perpulungen, e me ngasup ngepkep jabuna alu mehuli, janah ngasup mendidik anak-anakna alu mehuli entah pe tuhu-tuhu jadi teladan nandangi jabuna. Model, gaya, entah pe karakteristik pemimpin perpulungen iperseri rasul Paulus bagi pemimpin i bas jabu, nina, “Sabap adi la ia ngasup ngepkep jabuna, labo ia ngasup ngepkep perpulungen Dibata”. Engkai maka bage? Si pemena lebe erkiteken paksa si e perpulungen si lit e me jemaat rumah tangga, i ja kerina kegiaten si berkaiten ras pembinaan kiniteken ilakoken i bas jabu-jabu baik secara pribadi bage pe secara komunal. Secara pribadi maksudna, pemimpin jabu arus ia ngasup mabai jabuna erkiniteken janah erkemalangen man Dibata. Janah enda memang si jadi tujun perjabun kalak Kristen. Si peduaken, secara komunal, ise pe si jadi tuan rumah i bas pulung-pulung guna erbakti paksa si e, wajib jadi tuan rumah si mehuli nandangi perpulungen si reh, baik i bas penyambuten, nehken Kata Dibata, mimpin pujian, ngepkep, rsd. Jadi adi sekalak Mamre i tengah jabu la ia ngasup ngepkep jabuna enggo pasti la ia ngasup ngepkep perpulungen. I bas perkembangenna, penilik, si ngepkep, entah pe si mimpin enda ndai, lit jabaten khususna e me jadi pertua, penatua, entah pe tua-tua i tengah-tengah Gereja.

PA-ta sendah lit i teruh tema umum “Tanggung jabab Mamre selaku imam i bas jabu”. Tema khusus “Bapa si ngepkep jabu”, alu tujun gelah Mamre meteh tanggung jababna selaku imam i tengah jabu, janah ngasup jadi pemimpin kiniteken i bas jabu. Adi sidarami i bas Pustaka Si Badia kerna Mamre selaku imam i tengah jabu, la lit sada ayat pe si ngatakenca bage. Jadi istilah “imam i tengah jabu” e me istilah si berkembang i tengah-tengah perpulungen kalak Kristen si maksudna ngatakenca maka sekalak perbulangen e me pemimpin rohani i tengah jabu si iasumsiken ngasup ia mabai jabuna erkiniteken ras erkemalangen man Dibata. Lang situhuna adi ngerana kita kerna istilah “imam”, rikutken 1 Pet. 2:9, kerina kalak si tek e me imam si tugasna meritaken perbahanen-perbahanen Dibata si mbelin, labo terjeng Mamre saja. Istilah si payo akap kami sue ras ogenta sendah e me “kepala keluarga” (ay. 4 terj. TB-LAI) entah pe “pengepkep jabu” i bas terj. Pustaka Si Badia, e me sekalak pemimpin.

Adi rikutken tema umum, tema khusus, bage pe tujun PA-ta sendah, akap kami kerina kita Mamre si tuhu-tuhu enggo berusaha nggeluh erkiniteken bage pe erkemalangen man Dibata enggo sieteh tugas tanggung jababta, labo terjeng memenuhi kebutuhan hidup keluarga tapi si seri kel pentingna e me mabai jabuta erkiniteken bage pe erkemalangen man Dibata. PA-ta sendah mulihi mpersingeti kita kerna tugas tanggung jababta selaku “kepala keluarga” si arus mabai jabuta erkiniteken ras erkemalangen man Dibata alu teladanta i bas : ertoto ras ngoge Pustaka secara teratur, relasi bage pe komunikasi si mehuli ras Moria, nggit megiken kai si jadi perbeben anak-anakta, pola pikirta, pengerananta, perbahanenta, rsd. Pindolah gegeh i bas Dibata nari gelah ipengasupNa kita jadi “kepala keluarga” si mehuli sue ras peraten Dibata.