PA Kategorial GBKP Tgl. 28 Juli - 3 Agt. 2019

PA MAMRE GBKP TGL. 28 JULI - 3 AGT. 2019

Nrs. Pdt. L. Sinuhadji (Nrs. Bp. Rey Rapha Tarigan)

Pelestarian Lingkungan Secara Fisik (Alami)

Ogen : Kolose 1:15-23

Tema : PENEBUSEN KRISTUS MABA KINIULIN MAN LINGKUNGEN

Tujun : Gelah Mamre :

1) Meteh kerna sura-sura Dibata nandangi lingkungen. 2) Nggejap maka Mamre si enggo itebus ikut ertanggung jawab ras sijaga kelestarian alam

Metode : Topikal

Rikutken Alkitab Edisi Studi, ogenta sendah termasuk i bas bagin pembukaan surat si isina salam, doa ras ende-enden pujin man Kristus. Secara khusus ay. 15-20 e me ende-enden pujin (madah, himne) Kristen perdana si nggambarkenca ise Kristus ras kai si enggo ibahanNa, “IA adalah gambar Allah yang tidak kelihatan, yang sulung, lebih utama dari segala yang diciptakan, karena di dalam Dialah telah diciptakan segala sesuatu yang ada di sorga dan yang ada di bumi”. Madah entah pe himne enda ngingetkenca sekaligus jadi pengakun kiniteken maka Yesus Kristus e me Dibata si njadiken doni enda ras kerina isina. Janah i bas ay. 20 ikataken “Arah IA me pe itetapken Dibata ndameken kerina si nasa lit ras DiriNa. Dibata mereken perdamen arah kematen AnakNa i kayu persilang, gelah kerina si nasa lit, subuk i doni bage pe i Surga mulihken man baNa”. Kristus e me jurudame i bas relasi si la mehuli nari, antara manusia ras Dibata, manusia ras manusia, bage pe manusia ras lingkungen alam i sekelewetna, mulihken jadi relasi si mehuli. Ertina i bas perdamen enda si erdame labo saja manusia ras Dibata, manusia ras manusia, tapi pe antara manusia ras alam sekelewetna.

Kai enda antusenna? Secara tersirat rasul Paulus ngingetkenca maka Dibata i bas Yesus Kristus nggit gelah kita erdame ras alam si lit i sekelewetta. Akap kami enda si sedekah enda kurang siperdiateken janah i bas PA sendah tuhu-tuhu kita isingetken maka lit tugasta guna erdame ras alam sekelewetta. E maka payo nina temata sendah : “Penebusen Kristus maba kiniulin man lingkungen”. Adi sinen keadaan alam sekelewetta tentuna ogenta sendah sangat relevan erkiteken enggo terjadi kerusakan lingkungan alam si sifatna masiv. I Eropa enggo terjadi gelombang panas si semakin tahun semakin meningkat derajatna. Es i kutub utara ras selatan enggo semakin mencair. Terjadi pemanasan global. Indonesia termasuk negara terbesar penyumbang sampah plastik. Ras melala contoh-contoh si deban si mereken informasi maka doni enda enggo mendekati kehancuran erkiteken la beluh kita manusia menjalin relasi si mehuli ras alam sekelewetta. Gundari paksana kita erdame ras alam sekelewetta alu erbage tindakan nyata. Engkai maka tindakan nyata? Situhuna alam banci nge memperbaiki dirina sendiri secara alamiah, tapi alu erbage-bage bencana geologis ras ekologis. Tentuna la lit ise pe si nggit nimai terjadi bencana. E maka lebih baik secara proaktif kita mencoba menyelamatkan alam sekitar alu tindakan-tindakan nyata.

Tindaken nyata kai saja si banci silakoken kita? Tentu melala contohna. Umpamana : mengurangi sampah plastik. I Gerejanta si biasa lit air mineral gelas plastik, gundari enggo banci siganti alu air mineral galon, kita perpulungen sibaba ingan minemta rumah nari. Berkat kita belanja, enggo sibaba kantong belajanta sendiri. Adi ndeher ingan belanja la palah sipake keretanta entah pe motorta, erdalan nahe saja kita. Adi ngadi kita bas lampu merah mateken mesin keretanta. Hemat penggunaan listrik. Sisuani kesain rumahta gelah melala produksi oksigen. Adi perjuma sawit kita enggo banci siukurken sinuan-sinuan si deban gelah banci jadi alternatif guna mengurangi jumlah tanaman sawit. Stop membakar lahan. Ras melala contoh si deban si banci silakoken kita guna menyelamatkan alam sekelewetta guna anak kempunta. Dibata si mereken gegeh man banta guna ngelakokenca.

PA MORIA GBKP TGL. 28 JULI - 3 AGT. 2019

Nrs. Pdt. L. Sinuhadji (Nrs. Bp. Rey Rapha Tarigan)

Ngembangken Jejaring

Si Man Ogen : 2 Kronika 1:12-17

Tema : PENTAR MBANGUN JEJARING

Tujun : Gelah Moria :

1) Meteh kepentaren Salomo erbahan hubungen (jejaring) ras kerajan-kerajan si deban. 2) Ngusih Salomo i bas mbangun jejaring guna ngembangken usaha.

Metode : Diskusi

Lit kuan-kuan si ngatakenca, “lebih baik cari teman daripada cari musuh”. Kai enda ertina? Ertina ndarami teman e lebih menguntungken asangken ndarami musuh. Adi melala musuhta tentu rugi kita erkiteken la kita banci ku japa pe erkiteken i japa pe lit musuhta. Adi perbinaga kita umpamana tapi melala musuhta tentuna labo lako binagata ndai. Sebalikna adi melala temanta, ku japa pe kita lawes labo kebiaren erkiteken melala teman-temanta si ngalo-ngalo kita. Apai ka adi kita perbinaga umpamana, tentu binagata ndai melala si nukur erkiteken melala teman si nampati kita, bage pe sebalikna, kita pe nampati teman-temanta.

Kira-kira bage nge si ilakoken raja Salomo. Politik si idalankenna enggo lanai bagi bapana Daud, i ja Daud lalap erperang guna memperluas wilayah entah pe guna mempertahanken wilayahna. Politik si idalanken Salomo e me kerja sama si saling menguntungken ras kerajan-kerajan si deban si lit i sekelewet kerajan Israel. I bas ogenta sendah lit ituriken maka itambahi Salomo gegeh tenterana alu pepulung 1.400 gereta kuda dingen 12.000 tentera si erkuda. Guna si e tentuna raja Salomo membutuhken melala kuda, janah kuda-kuda ndai idatkenna arah Musri (sada daerah i Mesir) ras Kilikia (sada daerah i Turki) nari. Sebalikna, kuda ras gereta kuda di iperluken raja Heti (sada daerah i Turki) ras raja Aram (Siria, entah pe Suriah gundari), raja Salomo si ngelitkenca. Kerina keperlun-keperlun kerajan-kerajan e la banci terlitken adi la lit kerja sama entah pe jejaring si mehuli si ibangun kerina raja-raja si lit paksa si e.

Adi rikutken ogenta sendah, raja Salomo datken kepentaren bage pe kebayaken arah Dibata nari. Ertina raja Salomo tuhu-tuhu mpergunaken kepentaren ras kebayaken i bas Dibata nari alu mehuli, e me ibangunna jejaring si mehuli ras raja-raja si deban gelah kerina si jadi kebutuhen banci terpenuhi janah banci membawa keuntungan material si banci ipergunaken guna membangun negarana masing-masing.

Tema i bas PA-ta sendah e me “Pentar mbangun jejaring” alu tujun gelah Moria meteh kepentaren Salomo erbahan hubungen (jejaring) ras kerajan-kerajan si deban janah ngusih Salomo i bas mbangun jejaring guna ngembangken usaha. Akap kami kerna erbahan jejaring guna ngembangken usaha labo hal si mbaru sebab nai-nai nari kalak Karo enggo biasa erbinaga ku ingan-ingan si ndauh. Saja ngenca membangun jejaring i bas jaman gundari enda enggo semakin mudah erkiteken teknologi informasi ras media sosial si enggo berkembang pesat. Tading kininggitenta guna membangun jejaring alu mehuli. Membangun jejaring enda akap kami labo saja gelah dat keuntungan materi i bas usahanta tapi lebih asangken si e, membangun jejaring banci imanfaatken guna hal-hal mehuli si deban, umpamana guna nampati kade-kadenta si sangana sakit i bas ingan si ndauh ras membutuhken penampat, temanta si lit i bas sada kuta banci nampati kade-kadenta ndai arah jejaring si enggo ibahan kita. Lit talenta i bas kita guna pembangunen kula ni Kristus, adi la lit relasinta ras si deban tentu sitik ngenca si meteh kerna talenta si lit i bas kita. Adi lit jaringenta tentu enggo melala temanta si mindo penampat man banta arah talenta si lit bas kita guna membangun kula ni Kristus, umpamana arah talentanta rende, jadi panitia pembangunen Gereja, i bas bidang pastoral. Ras melala contoh-contoh si deban. E maka i bas PA-ta sendah iajuk kita gelah membangun jejaring guna tujun si mehuli gelah gelar Dibata termulia i bas kegeluhenta.