PJJ GBKP Tgl. 16 - 22 Juni 2019

PJJ GBKP TGL. 16 - 22 JUNI 2019

Pdt. Larena br. Sinuhadji (Nd. Rey Rapha Tarigan)

Tema : “I Bas Wari Pendungi Kerina Arus Ipertangungjawabken” (Matius 12:33-37)

Konfesi : Eskatalogi

“Kai pe silakoken kita, subuk mehuli entah pe jahat sada paksa waktu bakal sipertanggungjawabken man Tuhan” (2 Korinti 5:10)

Latar belakang perikopta, i ja Yesus mbaru denga mpepalem kalak si pentang dingen la beluh ngerana erkiteken iseluki setan. Kenca ipelawes Yesus setan i bas diri anak e nari kedungenna banci ia ngerana. Ras ituduh kalak Farisi maka kuasa si ipake Yesus mpelawes setan e me alu kuasa Beelzebul. Tapi kedungenna ipatahken Yesus tuduhen e alu argumen-argumen si la terbantahken (ay. 25-32).

E maka i bas perikopta Yesus ngerana arah perumpamaan e me batang ras buah,  arah buahna itandai kap batangna. Adi guna ndatken buah si mehuli arus lit batang si mehuli; adi batangna la mehuli tentu buahna pe la mehuli. Kai sibelasken Yesus i bas perikop enda situhuna enggo pernah ibelaskenNa i bas khotbahNa i uruk (bdk. Mat. 7:16-20, “Itandaindu nge ia arah perbahanenna. Batang bungke rimbang labo anggur buahna, janah batang lateng labo galiman buahna. Batang si mehuli tentu mehuli nge buahna, tapi batang si la mehuli tentu pe la mehuli buahna. Labo banci la mehuli buahna batang si mehuli, bage pe labo banci mehuli buahna batang si la mehuli. Batang si la mehuli buahna itektek me je nari itamaken ku bas api. Emaka itandaindu nge nabi si palsu e arah perbahanenna”). Ertina, perkataan Yesus  sekali nari i bas perikop enda dalam rangka penegasen ras kritik nandangi kalak Farisi si pekulah-kulah.

Bahkan alu keras Yesus ngatakenca, kalak enda kesusuren nipe si jahat (Bhs. Ind. : “ular beludak” : ular alu diameter si la galang, la gedang, kulitna mejile ras medalit tapi dilahna dem alu bisa si banci mateken mangsana. Darat nari idah mejile tapi ibasna dem alu hal-hal si la mehuli). Ertina, kai si ibelaskenna erburak i bas pusuhna nari, dingen la banci ibuali. Kata sibelasken kita nuduhken isi pusuhta. Jadi labo pas adi ninta, ukurku mehuli nge, tapi perbahanenta menyakitken (la sedalanen). Adi kin mehuli pusuhta entah ukurta pasti sibelasken kita pe si mehuli, si membangun, si memotivasi kalak si deban. Berarti adi kata-kata sibelasken kita la mehuli, dem sumpah serapah pusuh perukurenta nge  si arus sipesikap (bdk. Jakup 3:11-12, “Labo lit ndarat lau si entebu ras lau si pagit i bas sada sumbul nari. O seninangku, labo banci batang galiman erbuahken buah kembiri; labo banci batang anggur erbuahken galiman; bage pe labo banci sumbul lau masin pedarat lau malem”). Pusuh perukurenta arus idemi Kesah Si Badia.

Temata i bas PJJ sekali enda “I bas wari pendungi kerina arus sipertanggung-jawabken” (Eskatalogi). Eskatalogi e me kap ajaren kerna wari pendungi entah akhir jaman. E me kerehen Yesus si peduakaliken sebage hakim guna ngadili kerina kalak. Labo sieteh digan waktuna Yesus reh peduakaliken, sabab kerehenNa desken pinangko tengah berngi (2 Pet. 3:10). Tep-tep kalak arus mpertanggungjawabken kai si ilakokenna subuk perukurena, pengerana ras perbahanenna. Sekali nari pengerananta pe pagi iadili Dibata. Emaka, tupung lit denga kesempaten ibereken Dibata sipekena lagu langkahta, sipekena secara khusus pengerananta. Adi mekatep sibelasken kata guak, fitnah, sumpah, si menyakitken berarti pusuh ukurta siarus ipesikap. Demilah alu kuasa Kesah Si Badia gelah ipimpin Kesah Si Badia kita guna melasken kata-kata si membangun si jadi pasu-pasu (berkat) man sekelewetta.