PA Kategorial GBKP Tgl. 7 - 13 April 2019

PA MAMRE GBKP TGL. 7 - 13 APRIL 2019

Nrs. Pdt. L. Sinuhadji (Bp. Rey Rapha Tarigan)

Pilpres Dan Pileg : Kelebihan Mamre I bas Politik

Ogen : 1 Samuel 16:1-7

Tema : MILIH PEMIMPIN ALU KINITEKEN RAS PUSUH SI MEHULI

Tujun : Gelah Mamre :

1) Meteh maka Dibata ersura-sura mpekena bangsaNa alu milih kalak si erkiniteken ras bujur.

2) Meteh maka Dibata ndilo Mamre guna ikut berperan i bas milih pemimpin si mpekena bangsanta.

Metode : Sharing

Bahan ogenta nuriken kerna proses pilihen Dibata man Daud anak Isai si bakal gantiken Saul jadi raja Israel. Lit 10 anak Isai rikutken 1 Kron. 2:13-16, si dilaki e me Eliap, Abinadap, Sammah, Natanael, Radai, Osem, teruhen Osem si la isebutken gelarna, ras Daud. Si diberu e me Seruya ras Abigail. Sue ras si enggo iperentahken Dibata man bana, berkat Samuel ku Betlehem guna ndahi Isai sebab enggo ipilih Dibata sekalak anak Isai guna jadi raja Israel. Isai ras anak-anakna si dilaki (kecuali Daud) itenahken ku bas lakon persembahen. Mungkin tersungkun-sungkun Samuel i bas pusuhna, anak si apai si ipilih Dibata e? Erkiteken melala kepeken anak Isai si dilaki. I bas pengakap ras pengidah Samuel anak Isai si ntua si bakal ipilih Dibata. Mungkin erkiteken Eliap (ras dua teruhenna) termasuk i bas anggota pasuken raja Saul (bdk. 1 Sam. 17:13). Janah adi sioge ay. 7 banci sibayangken uga tampilen fisik Eliap enda, gedang ras mejile rupana. Tapi seh ku anak Isai si pepituken, “Labo ia si Kupilih”, nina Dibata. Emaka nungkun Samuel man Isai, “Lit denga tole anakndu?” Lit denga kepeken anakna si nguda si tergelar Daud sangana ermakan biri-biri. E maka isuruh Isai kalak ngelegisa. Daud sekalak anak perana si mejile, sehat, janah matana pe mejile. Nina TUHAN man Samuel, “Enda me kalakna, tangkuhkenlah ia!” Ibuat Samuel minak saitun je nari iminakina Daud. Rempet Daud ikuasai Kesah TUHAN janah mulai i bas wari e nari Kesah e tetap ras ia.

I bas proses pemilihen Daud jadi raja gantiken Saul enda teridah perbedan palas i bas milih sekalak peminpin. I bas ay. 7 nina TUHAN, “Ola nehen kuga gedangna ras kuga jilena rupana ... sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna”. Manusia milih erpalasken si teridah arah darat, sedangken palas Dibata i bas IA milih e me leben inehenNa pusuhna. Pusuh si uga, pusuh si erkemalangen man baNa. Hal si deban si banci sipelajari i bas proses pemilihen enda, Samuel erpengendes man Dibata, iikutkenna kai si jadi peraten Dibata i bas pemilihen enda, amin pe la bagi ukurna, tapi Kata Dibata si iikutkenna.

PA-nta sendah lit i teruh judul “Pilpres Dan Pileg : Kelebihan Mamre I Bas Politik”, tema “Milih pemimpin alu kiniteken ras pusuh si mehuli”, alu tujun gelah Mamre meteh maka Dibata ersura-sura mpekena bangsaNa alu milih kalak si erkiniteken ras bujur, meteh maka Dibata ndilo Mamre guna ikut berperan i bas milih pemimpin si mpekena bangsanta. Kai kelebihen Mamre i bas politik? Paradigma erpolitik kalak Kristen tentuna mengacu ku kai si enggo ilakoken Yesus Kristus. Yesus mpergunaken kuasa si lit bas IA guna kepentingen kalak si deban: mpepalem kalak si sakit; mbela kalak si imarginalken; menentang ketikdakadilan; menghadirkan kasih, damai, kebenaran, keadilan; melayani dengan tulus tanpa mengharapkan imbalan, rsd. E me kerina politik si idalanken Yesus Kristus. Ertina seharusna politik si idalanken Yesus menjadi acuan Mamre i bas er-politik, e nge kelebihan Mamre i bas politik.

Tema ras tujun sendah ngajuk kita gelah milih pemimpin erkiniteken, bujur, bage pe mehuli pusuhna. Palasta i bas kita milih e me : si pemena, i bas bahan ogenta sendah jelas maka Dibata milih sekalak peminpin si erkemalangen man baNa. Secara konkrit peminpin si erkemalangen man Dibata e me peminpin si labo saja teridah arah darat maka ia sekalak si religius, tapi si pentingna teridah maka ia sekalak peminpin si pro-rakyat, membela rakyat kecil, ilawanna ketidakadilan, pang ia dalanken si benar, labo mbiar ia man kalak jahat si atena nangko sen rakyat, anti korupsi, anti politik sen, rsd.

Si peduaken, teridah maka Samuel ngikutken Kata Dibata i bas ia ipake Tuhan milih Daud. Ertina i bas kita milih sekalak peminpin si arus ilakoken kita e me ertoto, mindo petunjuk i bas Dibata nari i bas kita nentuken sekalak peminpin si erkemalangen man Dibata. Memang adi rikutken situasi negaranta si mayoritas labo seri kinitekenna ras kita rusur kita arus milih peminpin si la sada kiniteken ras kita. Tapi amin pe lit sekalak peminpin si sada kiniteken ras kita tapi labo tentu ia sekalak si erkemalangen man Dibata. Ertina, amin pe labo sada kiniteken ras kita sekalak peminpin si ipilih kita, tapi adi enggo sibaba i bas pertotonta gundari nari, teklah kita maka Dibata ikut erdahin i bas kita nentuken sekalak peminpin i daerahta masing-masing.

Si peteluken perlu ka sidarami informasi si berkaiten ras track record (rekam jejak) peminpin si ateta ipilih kita, janah ula kita terlibat i bas politik sen, transaksional, rsd., sebab e la sue ras peraten Dibata. Tentuna jadi sada keprihatinen adi lit iidah kita Gereja-gereja si nggit ngaloken sen alu syarat milih salah sada calon.

Si peempatken, kai si ikataken Yesus i bas Mat. 22:21 teridah secara tersirat maka kita arus patuh nandangi peminpin negaranta. I bas Roma 13 (bdk. Titus 3:1; rsd.) Rasul Paulus ngajuk gelah kita patuh man pemerentah si erkuasa sebab Dibata si netapkenca. Ertina i bas kita ikut muat bagin i bas Pemilu palasta jelas e me ngikutken Kata Dibata. Adi la kita perduli nandangi peminpin-peminpinta, banci ikataken la kita patuh nandangi Kata Dibata si tertulis i bas Pustaka si Badia. Uga adi i bas kinatana melala peminpin-peminpinta si la erkemalangen man Dibata, si erbahanca kita kisat guna ikut Pemilu? Umpamana : sewenang-wenang ia, korupsi, la adil, la benar, rsd. I bas si e tentuna arus kita lebih patuh man Dibata (bdk. Perb. Rasul 5:29), janah kita pe arus pang ngelawan peminpin si la erkemalangen man Dibata alu cara-cara si sue ras Kata Dibata ras aturen-aturen si berlaku i bas negaranta.

PA MORIA GBKP TGL. 07 - 13 APRIL 2019 HUT KAKR GBKP

Pdt. Larena br. Sinuhadji (Nd. Rey Rapha Tarigan)

Ogen   : 1 Petrus 1:13-17

Tema  : METENGET DINGEN MAKEKEN KESEMPATEN ALU MEHULI

Tujun  : Gelah Moria :

1) Ngangkai isi teks kerna metenget i bas kegeluhen dingen tetap erpengarapen nandangi pasu-pasu Dibata

2) Pentar makeken kesempaten guna Dibata, dahin ras jabu (keluarga)

Metode : Diskusi, Aksi ras Nobar

Perikopta ibere Judul ‘Kegeluhen si mbaru man anak-anak Dibata (TB-Lai Kekudusan dan Kasih Persaudaraan), judul sindauh berbeda antara bahasa Karo ras bahasa Indonesiana.  I jenda Petrus i bas suratna mpersingeti kalak Ksten si sangana merantau(merapmarpar) gelah banci ersikap katawari paksa pe. Dingen metenget ras erpengarapen nandangi pasu-pasu sibakal ibereken Dibata asum kerehen Jesus Kristus peduakaliken ku doni enda. Enggo jelas pasu-pasuNa emekap kegeluhen sirasa lalap asum kerehenNa peduakaliken i bas kesetian perpulungen amin mbue perbeben.

Perpulungen arus patuh man Dibata janah ngasup ngkuasai diri gelah ula nari mulihken ku bas kegeluhen si ndekah asum lenga itandaina Dibata. Penandai kerna Jesus Kristus erbahanca lit pengendalian diri. Jemaat ipindoken gelah tetap badia i bas kerina perbahanenna bagi Dibata pe badia. Pakeken kesempaten silit alu mehuli guna mpermuliaken Dibata. Sabab Dibatanta eme Dibata si adil singadili kerina manusia alu la erndobahen rikutken perbahanenna sekalak-sekalak.

Temanta : “ Metenget dingen Makeken Kesempaten alu mehuli”. Rikutken tema, maka lit dua kata penting i jenda, eme metenget ras makeken kesempaten alu mehuli. Metenget berarti waspada. Adi ikaitken ku bas kegeluhen anak-anakta i ja i bas bulan enda tgl. 18, KAKR berusia 129 tahun, maka i bas kemajuan jaman i bas paksa enda kai pe alu gampang banci idat. Tehnologi maju, alu layar sentuh-digitalisasi, subuk informasi positif ras negatif banci alu mudah idat. Emaka lebe sebage orang tua kita metenget,  arus lit pendampingen man anak-anakta. Kurangna pengawasan i bas orang tua nari banci erbahanca ‘bene’ anak-anakta. Subuk kerna lama pemakaian ras informasi kai saja sibanci ibukana. Memang labo mungkin kita mengawasi selama 24 jam aktivitas anak-anakta, tapi alu kedekaten orang tua ras anak, dasar firman Tuhan sibenaken kitik-kitik nari enggo ibereken mahan bana lit penguasan diri bas anak-anakta.

Psikolog Stanford University Carol Dweck, nuliskenca “hadiah terpenting dan terindah dari orang tua kepada anak-anaknya adalah tantangan”. Mekatep orang tua sigenduari kurang metenget, iakapna alu erbage-bage kemudahan banci nampati anak. Padahal situhuna banci mbeneken anak e sendiri. Tantangen, kesuliten erbanca anak bertumbuh alu dewasa ras tangguh dingen la murah putus asa.

Sipeduaken, makeken kesempaten alu mehuli. Lit pengalamen sekalak pernanden si erkadiola erkiteken asum kitik denga anakna, la lit waktuna guna ras anakna subuk mendampingi erlajar, main-main, wisata bersama, makan bersama, melayani anak-na. Waktu berjalan cepat anakna ndai enggo bertumbuh remaja ras dewasa, janah i je enggo lit waktu bapana guna ras anakna, sabab je enggo ia pensiun ras turah kesadarenna. Tapi enggo terlambat, anakna la nari banci ndeher ras bapana. Ia merasa asing ras bapana sendiri. Waktu la nari banci ulang, kesempaten sienggo ibereken Dibata man bapana ndube la nari banci iulihi. Anak-anakta pewaris kerajan Dibata, siititipken Dibata man orang tua gelah tetap lit karakter simehuli i bas ia. Maka erdosalah kita asum la banci sitaruhken anakanakta tetap jadi pewaris kerajaan Dibata.

Hidup ini adalah kesempaten siarus ipakeken moria terlibat aktif ras jadi berkat i jabu, i gereja bahkan i bas masyarakat i ja ia tading.