PJJ GBKP Tgl. 24 Feb. - 02 Mar. 2019

PJJ GBKP TGL. 24 FEB. - 02 MAR. 2019

Pdt. Larena br. Sinuhadji (Nd. Rey Rapha Tarigan)

Tema : KINISERAN YESUS (Matius 16:21-23)

(Minggu Passion)

I bas tgl. 3 Mar. 2019 kita enggo bengket ku bas Minggu Passion si pemena (Minggu-minggu Sengsara). Lit 7 minggu Passion sope kita ngerayaken wari raya Paskah, kemenangen Yesus Kristus i bas dosa ras maut nari.

Perikopta ibere judul “Ituriken Yesus kerna kiniseran ras kematenNa” (TB-LAI : “Pemberitahuan pertama tentang penderitaan Yesus dan syarat-syarat mengikut Dia”). Kenca penungkunen Yesus, ise kin IA menurut pengangkan ajar-ajarNa (nina Petrus : “Kam kap si Engkelini, Raja si ipadanken Dibata, Kam kap anak Dibata si nggeluh”), maka mulai je nari ituriken Yesus alu jelas man ajar-ajarNa kerna kai si bakal ialami Yesus. E me dalan kiniseran (via dolorosa) si bakal ialamiNa i Yerusalem subuk arah pemimpin-pemimpin Yahudi, Imam-imam si mbelin ras i bas Guru-guru Agama Yahudi nari. Labo terjeng je saja, tapi pe kematenNa si secara tragis e me kap ibunuh ras ipekeke i bas si mate nari. Janah kai si ituriken Yesus merupaken penggenapen arah kai si enggo ikataken nabi-nabiNa (bdk. Yesaya 53).

Tapi Simon Petrus, sekalak ajar-ajarNa si cukup ndeher ras Yesus, si berkarakter agresif, mencoba menghalangi kai si bakal ialami Yesus, alu mereken kata-kata pengapul, “Mbera-mbera ipedauh Dibata si e i bas Kam nari o Tuhan! Labo banci jadi e man baNdu!” Merawa Yesus, nina, “Laweslah i bas Aku nari, o Iblis! Isidingindu kap Aku. Perukurenndu perukuren manusia, labo perukuren Dibata” (TB-LAI : “Enyahlah Iblis! Engkau suatu batu sandungan bagiKu, sebab Engkau bukan memikirkan apa yang dipikirkan Allah, melainkan apa yang dipikirkan manusia”). Kepeken Yesus si meteh seh ku pusuh perukuren jelma iangkaiNa maka labo situhuna Petrus si ngerana, tapi ia enggo ikuasai Iblis. Dingen sura-sura Iblis nai-nai nari seh gundari e me gelah rencana Dibata guna keselamaten manusia la sahun. Perkataan Simon Petrus si enggo ikuasai Iblis merupaken batu sandungen man Yesus. Sabab si ipakena perukuren manusia labo perukuren Dibata. Sabab jelas adi perukuren Dibata e me mereken keselamaten man manusia, kalak si perdosa. Perukuren manusia banci jadi lebih ngukurken kenikmaten, kesenangen, banci la seh ku tujun erkiteken buena kiniseran ras tantangen.

Kai makna kiniseran Yesus man banta pengikutNa? Rikutken kelender gerejanta, maka Minggu Passion lit 7 minggu si ertina, sempurna, entah pe kuh kita i bas banci nggejapken kiniseran si enggo leben ialami Kristus gelah kita pe megenggeng, saber, tetap ndalanken si ngena ate Dibata asum kiniseran e nderpa. Sada hal lebe, asum kita ngenanami kiniseran la itadingkenNa kita ras iberekenNa gegeh gelah ngasup kita ngalakenca bage pe serpang pulah man banta, e si pemena. Si peduaken, jangan pernah mengambil jalan pintas gelah banci pulah i bas perbeben e. Sura-sura manusia, bagi si ikataken Petrus, pedaulah kiniseran i bas Kam nari, ula min kita ngenanami kiniseran. Emaka ‘di kenca reh kiniseran sidarami rusur dalah pulahna si la latih dingan pedas. La ateta by process tapi pedah pulah. Subuk alu cara si la mehuli bage pe mbunuh bana gelah selesai i bas persoalen. Si peteluken, tetap ersukuten man Tuhan gelah la kita ipake Iblis guna nehi sura-surana. Gelah perukuren Dibata-lah si nampati kita i bas erbahan keputusen, subuk i bas perukuren, pengerana ras perbahanennta.

Jadi pengikut Yesus arus pang menderita, bagi nina Yesus, “ise atena jadi pengikutKu, arus ipersanna kayu persilangna, ipersilahangna bana ras ikut-ikutna Aku”. Tetaplah kita setia seh ku ujung geluhta, gelah ula sia-sia darehNa si enggo mambur i uruk Golgota guna kita.