PJJ GBKP Tgl. 8 - 14 Oktober 2017

PJJ GBKP TGL. 8 - 14 OKTOBER 2017

Pdt. Larena br. Sinuhadji (Nd. Rey Tarigan)

Tema : NIMBAK PERATEN DAGING (Galati 5:16-21)

Penjelasen Bahan Ogen & Renungen

Lagu KEE 323 salah sada lirikna ngatakenca, “Sura-sura daging lawanlah tetap, je ‘di la kam talu tambah gegehndu. Sura-sura jahat simbaklah tetap, ngaraplah man Yesus tentu kam menang”. Ertina jelas man banta maka sura-sura daging si erbahanca manusia banci ndabuh ku bas dosa arus ilawan ula ituruti. Ilawan labo arah gegehta jine tapi gegeh Tuhan si nampati kita i bas tetap kita ernalem man baNa.

Surat Paulus man perpulungen Galatia si menjadi bahan renungenta ibere judul “Kesah Si Badia ras Manusia”. I bas terjemahen bahasa Indonesia TB-LAI, “Hidup menurut daging atau Roh”. Judul i bas terjemahen bahasa Indonesia banci kataken lebih pas guna ncidahken maka lit kehendak bebas ibereken Dibata man manusia. Labo kita robot. Pilihen lit bas kita. Tapi selaku kita kalak si tek si enggo ngaloken perkuah ate Tuhan arah penebusen Yesus Kristus, enggo sepatutna geluhta arus erpalasken kiniteken man baNa si cidahken kita arah perbahanen si ngena ate Dibata.

Paulus mereken persinget man perpulungen Galatia, maka sura-sura ukur manusia erlawanan ras sura-sura Kesah Si badia, janah Kesah Si Badia erlawanen ras sura-sura ukur manusia. Si enda duana ermusuhen, la banci rembak ras i bas geluhta. Genduari tading ise mendominasi i bas geluhta, sura-sura Kesah Si Badia entah sura-sura kedagingenta? Ketedehen ate Paulus, maka Kesah Si badia min si negu-negu kegeluhenta manusia maka ola siikutken perukurenta secara manusia. Perbahanen-perbahanen si erpalasken sura-sura ukur manusia icidahken Paulus antara lain : erlua-lua, si nggesuh, la meteh mela, nembah man berhala ras erbahan ilmu sihir, simusuhen, rubati, mecimberu, perampus, egois, erbahan perpecahen dingen erpihak-pihak, sician-cianen, mabuk. Kalak si tetap denga ndalanken perbahanen-perbahanen si bagi enda adi la kin ia ertobat labo banci dat bagin i bas Kinirajan Dibata si reh pagin.

Genduari si perlu jadi evaluasi man banta, engkai makana enggo pe kita jadi kalak Kristen, bahkan lit ka deba Serayan Tuhan, tetap denga la ngasup nimbak peraten daging e? Lit bahkan melala kalak Kristen pemakai ras pengedar narkoba, koruptor, selingkuh, mabuk, ermusuhen, nembah man berhala, rsd. Bahkan erkiteken lit embel-embelta selaku Serayan Tuhan janah si la mehuli denga tetap silakoken, la banci lang geluhta jadi batu antuken man perpulungenta.

Johanes Calvin i bas bukuna Institutio mereken motivasi, maka lit enem kebiasaan man kalak Kristen si sangat efektif guna banci ngalaken sura-sura daging :

Kebiasaan si pemena, bergantung man Kesah Si Badia. Kesah Si Badia enggo ibereken Tuhan man banta. Emaka si erbahanca Kesah Si Badia tetap nggeluh bas kita, tetap kita rembak ras Dibata. Kesah Si Badia si mpengasup kita nggeluh i bas pertobaten sepanjang geluhta (labo sesaat). Kerembaken ras Kristus erbahanca lit dua tindaken sihasilken kita, e me tindaken mortifikasi (mematikan kehidupan lama) ras vivifikasi (mpekeke kegeluhen si mbaru).

Si peduaken, menyangkal diri (mpersilahang banta). Iterangkenna, maka kita enggo itebus Kristus, maka geluhta labo nari kita si empuna, tapi Dibata. Emaka arus kita tunduk nandangi sura-sura Dibata i bas kegeluhenta.

Kebiasaan si peteluken, mersan kayu persilang. Bagi Kristus mengalami erbage-bage kiniseran guna keterkelinenta, maka selaku pengikutNa kita pe tetap ngataken bujur i bas erbage-bage kiniseran si nderpa kita. Kiniseran merupaken dalanna ujian guna reh gegehna kinitekenta.

Si peempatken, menfokuskan diri man kegeluhen si rasa lalap. Ibereken pengangkan man perpulungen maka geluhnta labo terjeng bas doni enda saja, tapi lit kegeluhen si rasa lalap.

Kebiasaan si pelimaken, memanfaatkan seluruh aspek kegeluhen guna kemulian man Dibata. Dibata tetap ermulia arah perukuren, pengerana ras perbahanenta. Ras terakhir si peenamken, bertekun i bas doa.

Talukenlah peraten daging alu tetap kita erpengendes man Tuhan Dibatanta.