PA Kategorial GBKP Tgl. 29 Okt. - 4 Nov. 2017

PA MORIA GBKP TGL. 29 OKT. - 4 NOV. 2017

Pdt. Larena br. Sinuhadji (Nd. Rey Tarigan)

Ogen : Pilipi 2:1-5

Tema : TERPENALEM I BAS ENGKELENGI

Tujun Gelah Moria : 1) Niksiki alu mbages erti kekelengen. 2) Nuriken perbahanen-perbahanen mpenahangi baban teman

Metode PA : Aksi Sosial

Penjelasen Bahan Ogen & Aplikasi

Kekelengen e me inti i bas pengajaren Pustaka Si Badia (bdk. Mat. 22:36-39, engkelengi Tuhan Dibata ras ngkelengi sesama manusia). Paulus pe i bas suratna man perpulungen Korinti pernah ngingetkenca maka lit telu hal si arus tetap idalanken : erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban (1 Kor. 13:13).

Secara khusus i bas suratna man perpulungen Pilipi mulihi Paulus mpersingeti perpulungen gelah tetap nggeluh i bas kekelengen. Kekelengen si enggo idalanken perpulungen enda, asum Paulus ndahiken tugas pelayanenna i bas majekken perpulungen, bahkan asum Paulus i bas penjara bagi si genduari ialamina, perpulungen Pilipi tetap setia nehken kekelengen si erbahanca megegeh Paulus ndalanken kegeluhenna (nen bindu 1:5,7; 4:10).

Paulus mpersingeti, maka kegeluhen si tetap rembak ras Kristus si erbahanca perpulungen tetap megegeh dingen banci nggeluh sikeleng-kelengen. Dingen lit penungkunen si isingetken Paulus man perpulungen berkaitan ras kekelengen (“Ma kin sikeleng-kelengen kam dingen mekuah atendu sekalak nandangi si debanna?”). Sabab mbiar kel Paulus erkiteken enggo lit pengajar-pengajar sesat si motivasina melayani pe la payo (bindu 1:15,17, “erkitken cian ate, perubat-rubat, erkiteken ranggapna nge”) si erbahanca banci ka turah keranggapen, egois, kiniganjangen ukur bas perpulungen. Emaka ipindoken Paulus gelah tetap perpulungen e ersada arih, ersada ukur dingen geluh sikeleng-kelengen. Dingen metenget nandangi “virus” si banci memecah-belah perpulungen e me : memetingken diri sendiri, meganjang ukur dingen rangap. Perpulungen arus ngusih perukuren Kristus, aminna IA si meganjangna tapi nggit IA mpeteruk diriNa bahkan seh mate i kayu persilang erkiteken kekelengenNa man manusia.

Engkelengi labo kata benda, tapi kata kerja. Ertina, engkelengi labo hanya icakapken tapi arus idalanken gelah banci igejapken sekelewetta, sabab kerina kita termasuk sinuan-sinuan ras rubia-rubia pe butuh ikelengi. Melala cara si banci silakoken dalam rangka nehken kekelengen, benaken hal si kitik. Mereken senyuman, mereken waktu man temanta si sangana lit persoalenna maka banci nuriken pergumulenna, nampati kalak i bas kesusahenna, ngalemi salah kalak man banta, rsd. Mari sitingkatken kualitas ras kuantitas kekelengenta gelah alu bage Tuhan terpuji arah geluhta.

PA MAMRE GBKP TGL. 29 OKT. - 4 NOV. 2017

Nrs. Pdt. L. br. Sinuhadji (Bp. Rey Tarigan)

Mamre & Pemerintah

Ogen : Roma 13:1-7

Tema : MAMRE RAS PEMERINTAH

Tujun : Gelah Mamre ngasup jadi “mitra kerja” pemerintah guna kesejahteraan rakyat.

Metode : Diskusi

Penjelasan Bahan Ogen & Aplikasi

Ogenta sendah e me pedah-pedah rasul Paulus man perpulungen kalak si tek i kota Roma khususna kerna kepatuhen kalak si tek nandangi pemerentah si erkuasa. Konteksna rikutken piga-piga literatur nina erkiteken status sosial kalak si tek paksa si e si minoritas denga, janah i bas sisi si deban lit karakteristik nasionalisme berlebihan kalak Yahudi si mpeturah antipati nandangi penguasa Roma erkiteken enggo menjajah bangsa Israel seh makana la nggit kalak Yahudi nggalar pajak. Adi sifat pemberontak kalak Yahudi enda (khususna kalak Yahudi si enggo tek man Yesus Kristus) ipediat banci jadi mabai kerugian nandangi kalak si tek si mbaru denga berkembang paksa si e. Tapi adi rikutken kai si itulisken rasul Paulus i bas ogenta sendah ikatakenna “labo lit pemerentah si la i bas Dibata nari, janah pemerentah si lit genduari e pe Dibata nge netapkenca” (ay. 1). “Sabap pemerentah e kap persuruhen Dibata si erdahin guna kiniulinndu” (ay. 4). Kai enda antusenna?

Pemerentah Romawi paksa si e amin pe cenderung represif (keras, menindas) nandangi kalak Kristen tapi lit denga hal-hal si mehuli si idalankenna, umpamana sen hasil pajak ipergunakenna guna membangun infrastruktur dalan si menghubungken kerina daerah jajahan Roma. Lit kebebasen i bas berkomunitas seh makana i bas paksa rasul-rasul berkembang komunitas kalak Kristen. Si debanna umpamana lit perlindungan nandangi warga negara Roma bagi rasul Paulus, rsd. Ertina lit usaha pemerentah Romawi paksa si e guna ningkatken kualitas geluh rayatna, pemerentah si bage nge si sue ras peraten Dibata. Lit ka deba pemerentah si la sue ras peraten Dibata, e me pemerentah si mpergunaken kuasana guna menindas rayatna secara membabi-buta guna kepentingen dirina sendiri, janah erpalasken ideologi tertentu (termasuk agama) bebas membantai kalak si deban si iakapna musuhna. Rikutken cataten sejarah biasana pemerentah si bagenda labo ndekah umurna. Tentu saja labo pemerentah si bage si imaksudken rasul Paulus, tapi pemerentah si mpergunaken kuasana guna erusaha meningkatken kualitas geluh rayatna.

Tema i bas PA-nta sendah “Mamre ras pemerintah”, alu tujun gelah Mamre ngasup jadi “mitra kerja” pemerintah guna kesejahteraan rakyat. Adi rikutken hasil kerja pemerintahan Presiden Jokowi akap kami enggo tuhu-tuhu pemerentah si lit genduari erusaha meningkatken kualitas geluh rayat Indonesia. Enggo iusahakenna pembangunen si merata i bas kerina daerah si lit i negaranta. Janah enggo melala perobahen si mehuli si terjadi i bas kerina bidang i bas negaranta enda. I bas si e tentuna tek kita maka pemerintah si lit genduari e me Dibata si netapkenca. Kerina si mehuli si enggo icapai pemerintah negaranta tentuna perlu terus sidukung. Secara khusus i bas PA-nta sendah iajuk kita gelah ikut mendukung pemerintah i bas semakin meningkatken kualitas kesejahteraan rakyat i sekelewetta alu erbage-bage cara si banci ilakoken kita. Bentuk-bentuk konkritna akap kami banci sidiskusiken i bas Runggun masing-masing rikutken konteksna. Dibata si mpegegehi kita guna aktif erpartisipasi jadi mitra kerja pemerentah si lit i sekelewetta.