PA Kategorial GBKP Tgl. 15 - 21 Oktober 2017

PA MORIA GBKP TGL. 15 - 21 OKTOBER 2017

Pdt. Larena br. Sinuhadji (Nd. Rey Tarigan)

HUT Moria Pe-60-Ken

Ogen : Kolose 4:5-6

Tema : MORIA JADI DENGDENGEN (IDOLA)

(Kamus Karo - Indonesia Darwin Prinst : Tumpuan, Penanggung jawab, rsd.)

Tujun Gelah Moria : 1) Meteh pedah-pedah man perpulungen Kolose; 2) Ngasup nuriken biak-biak Moria gelah jadi dengdengen (Idola)

Metode PA : Diskusi Kelompok, Ceramah

Penjelasen Bahan Ogen & Aplikasi

Surat enda itulisken rasul Paulus man perpulungen Kolose gelah banci sedar perpulungen e kerna pengajaren si turah si niajarken guru-guru perguak maka si erbahanca manusia selamat arah adat sunat ras peraturen-peraturen si deban, nembah man kuasa-kuasa si lit i awang-awang ras man kesah-kesah. Itulisken Paulus kerna pengajaren si benar, maka Kristus ngenca si mereken keselamaten ras uga kin arusna kegeluhen kalak si enggo tek man Kristus. Secara khusus i bas perikop enda e me kap pedah-pedah man perpulungen selaku kalak si tek man Kristus. Si arus ilakoken pentar entah pe bijaksana i bas ersikap terlebih nandangi kalak si la tek man Kristus. Perpulungen arus makeken kesempaten alu mehuli.

Ertina, kalak si tek arus jadi contoh arah pengkebet geluhna gelah banci jadi usihen man kalak si lenga tek, bahkan kedungenna banci ia tek man Kristus. Mehuli dingen ngena min ate kalak cakapndu, ertina pengerananta si positif, membangun. Banci jadi tujunna mpersingeti, tapi ipeseh alu cara si tepat, labo kasar ras mpermaluken kalak (Kuan-kuanen 15:4, “ranan mehuli mereken kegeluhen, cakap si ngelukai pusuh erbahanca bene ukur”). Labo memang banci ngena kel ate kalak arah cakapta, tapi paling tidak i bas kita ngerana e, perlu lebe siukurken maka sibelasken. Ras ngasup mereken jabap si tepat man ise pe, ertina arus sieteh persoalen entah permasalahan alu jelas ula setengah-setengah entah pe nina pa nina, rikut sieteh kondisi ras situasina gelah alu bage banci kita mereken jawab alu tepat. Banci jadi enggo siakap tepat jawabta, tapi situasina sangana la pas (kondisi dem i bas perbeben), timai lebe seh situasi agak membaik.

Dalam rangka HUT Moria pe-60-ken, tema-nta sendah “Moria jadi dengdengen (Idola)”. Rikutken Kamus Karo - Indonesia, Darwin Prinst, maka “dengdengen” ertina : tumpuan, apa yang digunakan untuk menginjakkan kaki, siapa yang menjadi penanggungjawabnya, siapa yang menjadi pelindungnya. Rikutken pengertian Kamus Karo Indonesia, lit dua pengertian si banci sidat kita, banci postif banci ka negatif. Negatif, i ja Moria ipake guna menginjakkan kaki (ingan dedehen nahe), Moria sangat direndahkan. Sedangken pengertian si positif, Moria sebage ingan tumpuan, sandaran, penalemen i bas jabu. Tentu pengarapenta, pengertian si peduaken me si turah dingen nggeluh i bas diri Moria. Adi Moria enggo jadi penalemen i bas jabu la banci lang Moria lebe jadi idola i bas jabuna.

Rikutken tema buku PA tahun 2017 “Terpenalem”, ciri-cirina si banci teridah : 1) Kinitekenna paguh, seh anak jabuna pe ngasup ngalaken erbage-bage tantangen. 2) Perbahanenna mehuli. Arah pengkebet geluhna teridah ia kalak si mehuli : lit kekelengen, kesabaren, kepedulian, rsd. 3) Pentar. Pentar makeken waktu, ngaturken ras nambahi perbeliten rikutken talenta si lit, mendidik anak, rsd. Pentar ngaturken jabu rikut ras kesehaten daging kula keluarga.

Labo lit manusia si sempurna, termasuk Moria. Tapi paling tidak, i bas proses si terus-menerus ipelimbarui Dibata, biak-biak si mehuli reh tambahna i bas diri Moria. Rikutken bahanta, perbahanen ras pengerananta mereken sukacita man sekelewetta. Ibenaken lebe man perbulangen, anak-anak ras teman si rusur jumpa ras kita. Adi perbulangenta ras anakta saja pe enggo kisat ia jumpa ras kita, perlu nge sikoreksi dirinta. Selamat Ulang Tahun Moria, Tuhan masu-masu i bas usia 60 tahun.

PA MAMRE GBKP TGL. 15 - 21 OKTOBER 2017

Nrs. Pdt. L. Sinuhadji (Bp. Rey Tarigan)

HUT Moria

Ogen : Epesus 5:23-33

Tema : NDEHARANGKU DENGDENGENKU

Tujun gelah Mamre : 1) Meteh keleng ate man ndehara erpalasken keleng ate Kristus; 2) Tetap ersada ras Moria i bas kerina situasi

Metode : Studi Kasus

Penjelasan Bahan Ogen & Aplikasi

Judul perikop i bas ogenta sendah e me “Kerna ndehara ras perbulangen” seri ras Alkitab terj. BIS-BIMK “Suami dan isteri”, akap kami lebih tepat si lit i bas Alkitab TB-LAI nina “Kasih Kristus adalah dasar hidup suami isteri”, sebab memang keleng ate Kristus si arus jadi palas i bas jabu-jabu kalak Kristen. Labo sada hal si murah i bas ngerobah budaya si lit paksa si e, khususna i bas ngerobah pola relasi si lit i bas jabu-jabu kalak Kristen si berlatar belakang budaya Yunani i ja ndehara, anak, bage pe budak la lit hakna i bas jabu. Surat rasul Paulus man perpulungen i Epesus enda i bas rangka sedikit demi sedikit merubah kebiasaan entah pe kesemalen paksa si e i bas jalinen relasi i antara anggota jabu, leben secara khusus i bas relasi antara perbulangen ras ndehara. Pengajaren rasul Paulus i bas i bas membangun relasi si mehuli antara perbulangen ras ndehara i bas jabu kalak Kristen e me : mehamat man Kristus (ay. 21), patuh man Tuhan (ay. 22), Kristus arus jadi usihen i bas mabai ku si mehuli sue ras peraten Dibata (ay. 23), patuh man Kristus (ay. 24), kekelengen Kristus arus jadi usihen i bas nggit erkorban guna kepentingen anggota-anggota jabu si deban (ay. 25-27), ngkelengi bagi ngkelengi kulana, seri bagi Kristus mpekena-kena dingen engkawali perpulungen (ay. 28-30).

Piga-piga hal si banci jadi renungen i bas PA-nta sendah e me : 1) Otoritas tertinggi i bas jabu-jabu kalak si tek e me Tuhan Yesus Kristus, labo perbulangen entah pe ndehara. Perbulangen iajuk gelah jadi peminpin si menghamba man Kristus, entah pe i bas kalimat si deban, sekalak peminpin si labo njadiken dirina tuan si man sembahen bagi kesemalen budaya peminpin doni enda, tapi jadi peminpin si menghamba bagi Kristus si rela merendahkan diri, berkorban, mementingkan kepentingan orang lain, rsd. Emaka sekalak perbulangen i tengah-tengah jabu kalak Kristen arus banci jadi teladan si mehuli i tengah-tengah jabuna. 2) Ukuren kepatuhen ndehara nandangi perbulangenna e me patuh man Tuhan entah pe patuh man Kristus. Adi si jadi ukuren kepatuhen perbulangen enggo pasti melala ndehara si kecewa sebab la lit perbulangen si sempurna, Kristus ngenca si sempurna, emaka jadikenlah Kristus sebage ukuren i bas kepatuhen man perbulangen. 3) Ukuren kekelengen perbulangen nandangi ndeharana e me kekelengen Kristus, labo keleng ate manusia. Sebab adi si jadi ukuren keleng ate ndeharanta, enggo pasti melala kita perbulangen si kecewa sebab la lit ndehara si sempurna, Kristus ngenca si sempurna, emaka jadikenlah kekelengen Kristus ukuren i bas engkelengi ndehara.

PA-nta sendah ilaksanaken i bas rangka menyambut HUT Moria si pe-60-ken, alu tema  “Ndeharangku Dengdengenku”, ras tujun gelah Mamre : 1) meteh keleng ate man ndehara erpalasken keleng ate Kristus, bage pe 2) tetap ersada ras Moria i bas kerina situasi. Kerna definisi “dengdengen” akap kami enggo banci sioge i bas Buku PA-nta. Si paling penting i bas PA-nta sendah e me membangun budaya relasi si mehuli antara perbulangen ras ndehara sue ras si ngena ate Dibata. I bas ogenta sendah jelas maka relasi si mehuli antara perbulangen ras ndehara arus ibangun erpalasken kepatuhen man Tuhan ras kekelengen Kristus. Sekalak perbulangen iajuk gelah jadi peminpin si menghamba bagi Kristus, engkelengi ndeharana alu kekelengen Kristus. Penungkunenna, enggo kin si e silakoken? Sebab akap kami bahan ogenta sendah entah pe tema i bas PA-nta sendah enggo rusur sibahas, genduari tading mengevaluasisa. Adi melala denga kita Mamre si lenga ngasup engkelengi ndehara erpalasken kekelengen Kristus, pindolah gegeh man Dibata gelah ipengasupna kita ngelakokenca.