PA
MORIA GBKP TGL. 22 - 28 OKTOBER 2017
Nrs.
Pdt. L. br. Sinuhadji (Bp. Rey Tarigan)
Terpenalem
: Sikap ngalaken bencana
Ogen : 1 Raja-raja 17:1-24
Tema : PENJAYAMEN DIBATA I BAS KETERBATASEN
Tujun Gelah
Moria : 1) Nggargari penjayami Dibata i bas kegeluhen Elia ras diberu balu-balu
i kuta Sarpat. 2) Nggeluh i bas pengarapen alu ngusih perbahanen Elia ras
diberu balu-balu i kuta Sarpat
Metode PA : Meditasi & Kontemplasi
Penjelasen Bahan Ogen & Aplikasi
Turi-turin kerna Elia ras diberu
balu-balu i kuta Sarpat akap kami enggo semal man banta kerina. I bas perikop
ay. 1-7 ituriken kerna Kata Dibata si isehken man Raja Ahap erkelangken nabiNa
Elia nina, “I bas gelar TUHAN, Dibata si nggeluh, Dibata Israel si kusembah,
kukataken man bandu maka i bas dua entah telu tahun si reh la lit embun entah
udan ndabuh, pala kusuruh.” Adi rikutken bindu 16:30 ikataken maka Raja Ahap e
me si erdosa man TUHAN lebih asa kerina raja-raja si lebeh asa ia. Janah i bas
bindu 18:18 ikataken maka Ahap enggo ngguluti Israel erkiteken ilanggarna
perentah TUHAN janah isembahna dibata-dibata Baal. I bas si e iteh kita maka
bencana perlego si nialami bangsa Israel
e erkiteken dosa si ilakoken Raja Ahap. Judul i bas perikop bindu 17:1-7 nina
“Elia isampati TUHAN sanga perlego” ras judul i bas perikop bindu 17:8-24 nina
“Elia nampati diberu balu-balu”. Perikop e duana nuriken kerna kegeluhen i bas
kiniseran si idalani Elia ras diberu balu-balu erkiteken bencana perlego.
I bas bindu 17:1-7 ituriken maka
Dibata nampati Elia i tepi lau Kerit alu kak si maba roti ras daging guna ipan
Elia. Tapi erkiteken seh kel hebatna bencana perlego ndai, kerah me lau mbelin
si lit i bas sungai Kerit. Erkiteken si e isuruh Dibata Elia njumpai diberu
balu-balu i Sarpat (bindu 17:8-24), sebab enggo iperentahken Dibata diberu
balu-balu ndai mere Elia man. Kenca jumpa Elia ras diberu balu-balu ndai janah
ipindona inemen ras sitik roti, ngaloi diberu balu-balu ndai nina, “I bas gelar
TUHAN Dibatandu si nggeluh tuhu kukataken man bandu maka la lit roti i bas aku,
seakatan sengkerauk tepung tare mangkuk ras sitik minak tare botol. Enda
kupepulung sitik ranting man babanku mulih ku rumah gelah banci kutasakken
pangan si sitik e man bangku ras man anakku. E me pengkeri-kerinna kami man,
janah kenca e mate la man me kami”. Lit kearun ate i bas diberu balu-balu kenca
enggo isuruh Dibata nampati Elia, la ia tek maka Dibata si njayam kegeluhenna.
Respon si berbeda icidahken Elia, tek
ia nandangi kuasa Dibata. Kenca ipetetap ukur Elia maka tek diberu balu-balu
enda ndai, janah ilakokenna kerina si isuruh nabi Elia. Seh i bas ay. 16 siakap
la lit nari persoalen, sebab si jadi kearun ate diberu balu-balu ndai la
terbukti janah ia ras anakna bage pe nabi Elia banci denga nggeluh erkiteken
icukupken TUHAN kebutuhenna i bas bencana perlego. Kepeken lit denga ka
“bencana” si deban, sakit mekelek anak diberu balu-balu ndai janah mate.
Bagenda nina diberu balu-balu man Elia, “O suruh-suruhen Dibata, engkai maka
bage perbahanndu man bangku? Kerehenndu ku jenda erbahanca inget Dibata ka
mulihken dosa-dosangku, erkiteken si e mate anakku”. Enda respon si
peduakaliken diberu balu-balu i bas ngadapi bencana, isalahkenna nabi Elia.
Respon si berbeda icidahken nabi Elia, ertoto ia man Dibata gelah ipegeluh
mulihi anak si mate ndai. Kenca enggo ipegeluh Dibata mulihi anakna erkelangken
nabi Elia, nina diberu balu-balu i bas ay. 24, “Genduari kueteh kam
suruh-suruhen Dibata, janah tuhu-tuhu TUHAN ngerana arah kam!” Respon si petelukaliken
diberu balu-balu enda ndai kenca enggo nggeluh mulihi anakna, tuhu-tuhu tek ia
nandangi TUHAN.
PA-nta sendah lit i teruh tema umum “Terpenalem
: Sikap ngalaken bencana”, tema khusus “Penjayamen Dibata i bas keterbatasen”,
alu tujun gelah Moria nggargari penjayami Dibata i bas kegeluhen Elia ras
diberu balu-balu ras nggeluh i bas pengarapen alu ngusih perbahanen Elia ras
diberu balu-balu i kuta Sarpat.
I bas kita geluh denga i doni enda,
enggo pasti melala tantangen, perbeben, entah pe persoalen si nialami kita si
terjadi erkiteken kesalahenta sendiri, erkiteken perbahanen kalak si jahat man
banta, bage pe si terjadi erkiteken bencana alam. I bas bencana alam enda pe
lit dua jenis, bencana ekologis si terjadi erkiteken perbahannen manusia si
merusak lingkungan alam, ras bencana geologis si terjadi erkiteken fenomena
alam. Uga caranta merespon tantangen, perbeben, entah pe persoalen si terjadi i
bas geluhta? Adi rikutken ogenta sendah, enggo jelas maka bencana si terjadi
erkiteken dosa Raja Ahap. Janah lit dua respon i bas ngalaken kiniseran
erkiteken bencana kelegon : si pemena respon diberu balu-balu si cenderung
pesimis ras negatif amin pe kedungenna tek ia nandangi kuasa Dibata. Respon si
peduaken e me respon nabi Elia si cenderung optimis ras positif. Kai pe si
terjadi tetap nabi Elia tek nandangi kuasa Dibata si tetap njayam kegeluhen
kalak si tek man baNa.
Penungkunenna, respon si apai si
cenderung terjadi i bas geluhta sanga kita lit i bas perbeben entah pe sanga
lit i bas bencana? Mungkin rusur denga kita jungut-jungut si ncidahken maka la
tek kita nandangi kuasa Dibata si njayam geluhta, adi e si rusur terjadi, mari
radu ras kita mindo pengalemi dosa i bas Dibata nari, janah sipindo gelah
ipegegehiNa kita i bas kita erkiniteken man baNa amin pe lenga idah kita
kedungen perbeben si nialami kita. Adi perbeben entah pe bencana si nialami
kita erkiteken salah lepakta, perobahilah. Adi perbeben entah pe bencana si
nialami kita erkiteken perbahanen kalak si jahat man banta, alemilah kalak si
jahat ndai, pindolah gegeh i bas Dibata nari guna ngalakenca. Adi perbeben
entah pe kiniseran si nialami kita erkiteken bencana geologis, pindolah gegeh,
kesabaren, kinigenggengen i bas Dibata nari, janah tetaplah kita tek nandangi
kuasa Dibata si njayam kegeluhenta.
PA
MAMRE GBKP TGL. 22 - 28 OKTOBER 2017
Pdt.
Larena br. Sinuhadji (Nd. Rey Tarigan)
Perlakun/Kekerasan
Nandangi Perempuan
Nats : Kejadin 2: 18, 21 - 24
Tema : PENAMPAT SI IBEREKEN DIBATA
Tujun : Gelah Mamre nuduhken perbahanen si mehuli
man diberu si jadi penampat si ibereken Dibata.
Metode : Sharing
PENARUH
Lit lagu erjudul “Wanita” bagenda
nina lirikna, “Wanita diciptakan dari rusuk lelaki bukan dari kepalanya untuk
dapat mendudukinya. Wanita diciptakan dari rusuk lelaki bukanlah dari kakinya
untuk dapat diinjaknya. Tetapi dari sampingnya, agar sejajar dengannya, dekat
dengan lengannya agar dilindunginya, dekat dengan hatinya, agar tetap
dikasihinya.” (Dr. Andar Ismail, 1995, hlm. 7).
Arah lagu enda, jelas nampati kita
guna banci ngidah maka dilaki ras diberu ijadiken Dibata guna banci saling
menghargai ras nampati i bas kegeluhenna. Dilaki ras diberu tinepa Dibata si
meherga si seri i lebe-lebe Dibata sabab lit i je tempas Dibata (Kej. 1:27).
Tapi adi siidah realitana i bas paksa gundari enda enggo reh mbuena kekerasen
si terjadi nandangi diberu secara khusus i bas rumah tangga (KDRT), walaupe
labo kita menutup mata lit ka terjadi kekerasan si pelakuna diberu nandangi
dilaki. Tapi enggo pasti persentasena lebih kitik. Cataten akhir tahun 2014,
Komnas Anti Kekerasan Terhadap Perempuan mencatat lit 293.220 kasus kekerasan
nandangi diberu, ras 68% dari kasus si lit e me KDRT (Laraswati, 2015).
Arah bahan PA Mamre sekali enda
iarapken Mamre sebage bapa i tengah jabu sekaligus sebage imam, ngasup mabai
keluarga tetap erkemalangen man Tuhan secara khusus ngelakoken perbahanen si
mehuli nandangi ndeharana si jadi penampat i bas jabuna.
URAIAN TEKS/TAFSIRAN
Tuhan sendiri ngerana niNa, “La
mehuli adi manusia nggeluh sisada-sisada. Kubahanlah teman si cocok man bana,
guna nampati ia”. Alkitab TB-LAI, “Tidak baik, kalau manusia itu seorang diri
saja. Aku akan menjadikan penolong baginya, yang sepadan dengan dia”. Lit
piga-piga hal si penting si banci jadi cataten man banta arah ay. 18. Si
pemena, ayat enda ncidahken maka manusia adalah mahluk sosial, si la banci
nggeluh sekalak-sekalak. Uga pe hebatna manusia si pasti ia butuh kalak si deban.
Secara khusus bas jabu, maka Dibata-lah si berinisiatif i bas mpersadaken
dilaki ras diberu i bas perjabun. Arah teks enda pe jelas, maka perjabun e me
ikaten perpadanen dilaki ras diberu, labo dilaki ras dilaki entah pe diberu ras
diberu (Konfesi GBKP BAB IX kerna Perkawinan & melurusken pemahaman LGBT si
salah, melegalken perjabun sejenis). Si peduaken, manusia si dilaki ras si
diberu i bas perjabun e me teman si cocok (sepadan) sada ras si debanna, guna
banci saling nampati (“penolong yang sepadan” = ezer kenegedo = bersebelahan/berhadapan). Ras labo rubia-rubia si
jadi teman si cocok guna nampati dilaki walaupe enggo ibereken Tuhan kuasa man
manusia erbahan gelar-gelar rubia ndai. Teman sepadan dilaki e me diberu bage
pe sebalikna si enggo ipersadaken Tuhan.
Kenca bage ibahan Dibata badeh
pertunduh manusia ndai (tardemah =
tidak sadar). Ertina secara teologis, maka i bas Dibata nepa kai pe termasuk
manusia si diberu la banci isaksiken manusia. Otoritas penuh lit bas Dibata.
Emaka, ibahan Dibata diberu si ijadiken Dibata i bas tulang rang-rang dilaki
nari. Enda nuduhkennca maka dilaki ras diberu seri (sederajat), la siganjang
teruken. Kenca enggo ijadiken Dibata diberu, ras itaruhkenNa man Dilaki maka
enggo cocok iakap Adam, diberu si enggo itaruhken Dibata man bana. Emaka turah
pengakun Adam, “Enda me maka enggo payo; tulangna i bas tulanku nari, janah
jukutna i bas jukutku nari”. Ertina, pasangenta e me dirinta sendiri sabab ia
ibuat i bas dirinta nari. Emaka Paulus pernah ngatakenca, “Kalak si keleng
atena ndeharana, keleng kap atena badanna jine” (Epesus 5:28). Secara teologis
ngatakenca, ndeharanta e me dirinta jine, si arus sikelengi ras siergai. I bas
kita ngkelengi, ngergai ras erbahan si mehuli man pasangenta seri ertina kita
ngkelengi ras ngergai dirinta jine.
Kenca enggo ndatken pasangen si pas
(cocok), maka manusia si dilaki nadingken orang tuana gelah banci ersada ras
ndeharana, maka duana enggo jadi sada. I bas adat Israel kuno ras kalak Jahudi
umumna, si berlaku e me sistem Patriakal, i ja si mendominasi dilaki. Ertina,
si biasa terjadi diberu nandingken orang tuana, ersada ras perbulangenna. Tapi
i bas teks enda, erkiteken penulis prihatin nandangi keadaan diberu i bas paksa
si e, i ja terjadi penyelewengan kemitraan dilaki ras diberu, dilaki
semena-mena nandangi diberu, maka dilaki pe ndarat i bas jabu orang tuana nari
bage pe diberu guna ersada ras pasangenna sebage jabu si mandiri berpisah ras
jabu orang tuanana, dingen ertanggung
jawab guna keluargana jine (B.S. Childs, 1979, hlm. 142).
Kedungenna, ersada ia ras ndehara,
maka duana enggo jadi sada. I bas cakap Heber, ersada (yada) ertina, “terikat/leket” lit persadan si mendalam (Vivian A.
Soesilo, 1997, hlm. 4-7). Dua pribadi, dua pikiren, dua karakter si berbeda,
dua sura-sura, rsd. Si berbeda enggo ipersada Tuhan guna banci nggeluh saling
ngelengkapi gelah banci tetap harmonis jabu e. Perbulangen ras ndehara arus
tetap nggeluh saling memberi ras menerima, janah erusaha mereken keriahen
geluhna guna duana ras jabuna labo guna geluh erbana-bana.
APLIKASI
Adi nai perbapan kalak Karo terkenal
kurang ertanggung jawab i bas jabu. Dahinna mbuen koyok i kedai, erjudi, kenca
enggo las sitik matawari maka lawes ku juma, rsd. Nande lampas medak, erdakan,
ncuci, lawes ku juma, karaben ka maka mulih, erdakan ka guna man berngi bage
seterusna. Kurang lit kerja sama ras bapa i tengah-tengah jabu. Terkadang
bahasa ras sikap perbapan pe kasar man ndehara ras anak-anakna. Janah e enggo
termasuk KDRT. Bentuk KDRT ibagi i bas 4 jenis (Laraswati, 2015) : 1) Penganiayan fisik : tamparan, pukulan,
tendangan. 2) Penganiayan psikis : ancaman, hinaan, cemohan, selingkuh. 3) Penganiayan
seksual : pemaksaan hubungen seksual, melakukan kekerasan dalam berhubungan. 4)
Pengabaian kewajiban memberi nafkah material kepada istri atau mengontrol uang
belanja.
Puji Tuhan, kenca enggo Mamre GBKP
er-usia 22 tahun, enggo melala perobahen si terjadi. Mamre idalankenna peranna
sebage bapa ras imam i tengah jabu si mabai jabuna erkemalangen man Tuhan.
Mamre keleng atena nandangi ndehara ras anak-anakna, dahin rumah tangga pe
enggo ikut Mamre nampati tanpa merasa gengsi. Sabab ietehna melala ka peran
ndeharana i rumah tangga, mulai erpagi-pagi nari seh berngi, erdakan, ngaturken
anak-anak, la ketadingen dahin Gereja ras kerja-kerja peradaten kerina
idalanken nande sebage penampat bapa i tengah jabu. Enggo sepatutna, Mamre
sebage bapa ngataken bujur (mereken apresiasi) sekaligus erbahan perbahanen si
mehuli man ndeharana. Ikelengina, isampatina, iergaina ndeharana, ras melala denga
si deban, si banci ilakoken Mamre si tuhu-tuhu erbahanca malem kel ate
ndeharana. Terlebih bapa ndalanken tanggung jawabna guna banci mabai keluargana
erkemalangen man Tuhan, la banci lang keluarga e jadi keluarga si harmonis ras
jadi usihen man sekelewetna.
SHARING
(Mamre ibagi ku bas kelompok kecil,
sada kelompok 3 kalak ras itutup alu doa berantai i bas kelompokna
masing-masing). Penungkunen guna i-sharing-ken
:
1. Dibata enggo mereken penampat si
sepadan (cocok) ras kita perbapan, engkai makana i bas perdalanen geluh
perjabun melala ka kita ngatakenca la nari cocok pasangenku e. Kai e
penyebabna?
2. Perbahanen-perbahanen si mehuli
kai saja si enggo sibahan nandangi ndeharanta? Janah kai nari ateta silakoken
terulin i bas jabunta?
Tidak ada komentar:
Posting Komentar