PJJ GBKP Tgl. 22 - 28 Oktober 2017

PJJ GBKP TGL. 22 - 28 OKTOBER 2017

Pdt. Larena br. Sinuhadji (Nd. Rey Tarigan)

Tema : AKU PERBERITA SI MERIAH (1 Korinti 15:1-11)

Penjelasen Bahan Ogen & Renungen

Tugas Gereja, kalak si tek, e me si rusur igelari bersekutu, melayani ras bersaksi, entah pe Tri-Tugas Gereja. Janah secara khusus i bas paksa enda dalam rangka Mingggu Zending GBKP ngingetken kita, maka kita banci jadi pengikut Kristus erkiteken buah dahin per-Berita Si Meriah si enggo ilakoken Senina Turangta Belanda nari (NZG) bagepe Guru Injil Minahasa nari. Ertina, erkiteken lit kalak si rutang pusuhna guna meritaken Kata Dibata bagi si enggo iperentahken Tuhan Yesus ope IA nangkih ku Surga (Mat. 28:19-20).

Perikopta alu judul “Kerna Kekeken Kristus” (TB-LAI “Kebangkitan Kristus”), e me kap kata persinget si ilumbaken Paulus man Perpulungen Korinti maka perpulungen enda enggo tek man Kristus erkiteken Berita Si Mehuli (Si Meriah) si enggo iberitaken Paulus. Janah adi tetap banci icikepna isi Berita Si Mehuli e, perpulungen tetap nggeluh i bas keselamaten. Ertina, Kata Dibata si enggo ipeseh Rasul Tuhan arus ialoken ras idalanken i bas kegeluhen perpulungen. Palas Berita Si Mehuli si iberitaken Paulus e me kerna Kristus Yesus Juruselamat manusia : Si mate erkiteken dosa manusia, ikuburken, ras i bas wari peteluken ipekeke Dibata i bas si mate nari, janah selama 40 wari icidahken diriNa man Petrus, man rasul-rasul, man ajar-ajar si teremna lebih 500 kalak, man Jakub ras si perpudina man Paulus sendiri. Janah igejapi Paulus labo situhuna ia metunggung igelari “Rasul”, sabab enggo isiksana ndube perpulungen kalak Kristen sope ia itangkap Kristus. Tuhu-tuhu igejapi Paulus ia banci meritaken Berita Si Meriah erkiteken lias ate Dibata, jingkatken ia erdahin asangken rasul-rasul si deban, janah si e labo erkiteken gegehna jine, tapi lias ate Dibata si erdahin i bas ia. Emaka itekanken Paulus si penting labo ise kalak si er-Berita, tapi ise berita e, e me kerna Kristus Yesus Juruselamat manusia, si enggo nebusi dosa-dosa manusia.

Minggu Tgl. 29 Okt. 2017 i bas Alamak Gerejanta igelari Minggu Zending (Misi). Zendeling  ertina, kalak si iutus guna meritaken Berita Si Meriah man bangsa (kalak) si deban. Dahin Zending enda idalanken guna nggenepi Amanat Agung Tuhan Yesus sope IA nangkih ku Surga i bas Matius 28:19-20. Pdt. H.C. Kruyt, J.C. Weingaarden, Pdt. J.H. Neumann, Pdt. M. Joustra, rsd., bagepe Guru Injil i Minahasa nari rutang pusuhna meritaken Kata Dibata man kalak Karo. Labo hanya Kata Dibata ipesehna man kalak Karo, tapi peradaban kalak Karo pe ermajuna arah pendidiken - mbangun sekolah, kesehaten - bangun Rumah Sakit, mereken kesadaren kerna kebesihen rsd.

Adi bage, kai ertina, Minggu Zending si setiap tahunna ilitken bas Liturgi GBKP? Guna ngingetken tanggung jawabta Ngawan GBKP nehken Berita Si Mehuli man kalak si deban. Memang payo dahin meritaken Kata Dibata labo hanya melalui kata tapi arah kerina pengkebet geluhta. Si e tetap nge silakoken. Tapi meritaken Kata Dibata man kalak si deban pe ula ka silupaken. Piga-piga hal si banci ilakoken :

1) Erbahan PRT entah PI ke dalam e me kap nandangi anggotanta si enggo ndekah la nari pernah ku Gereja.

2) Membuka Pos PI, i ja lit i je kalak Karo tapi lenga lit i je pajek perpulungen kalak si tek. I daerah Klasis Riau Sumbar mbue kel pajek Gereja erkiteken dahin PI. Lahan sawit ibuka, lit je pulung kalak Karo. Lit si enggo tandaina Kristus, lit si lang. Emaka ilakoken dahin PI e me kap perpulungen si ndeherna ku je. Ndeher pe kurang lebih jarak 3-4 jam maka seh ku je. Rikutken perkembangen akhirna banci ilakoken Perminggun, Bajem seh ku Runggun.

3) Secara Sinodal, GBKP bekerja sama ras badan PI si deban guna banci ikut muat bagin mengutus anggota GBKP si enggo ilatih guna er-Pi ku daerah si deban.