PJJ GBKP Tgl. 29 Okt.- 4 Nov. 2017

PJJ GBKP TGL. 29 OKT. - 4 NOV. 2017

Pdt. Larena br. Sinuhadji (Nd. Rey Tarigan)

Tema : TUHAN MULAHI BANGSA-NA (Matius 9:35-38)

Penjelasen Bahan Ogen & Renungen

Rikutken pengantar i bas Alkitab Edisi Studi nina, secara garis besar Injil Matius terbagi ku bas telu bagin : 1) Allah mengutus Yesus, Sang Mesias (ps. 1:1 - 4:11). 2) Yesus memberitakan Kabar Baik di Galilea dan Yudea (ps. 4:12 - 25:46). 3) Yesus mati dan Dibangkitkan untuk Menggenapi Rencana Allah (ps. 26:1 - 28:20). Ogenta sendah masuk ku bas bagin si peduaken i ja lit kurang lebih 22 pasal si nuriken kerna Berita si Meriah si iberitaken Yesus i tengah-tengah bangsa Israel. Berita si Meriah si iberitaken Yesus labo terjeng ajaren-ajaren entah pe khotbah-khotbah si sifatna nambah pemeteh ras mbuka wawasen, tapi melala karya-karya Yesus si deban si sifatna konkrit ras holistik, umpamana mpepalem kalak si : pinakiten, gadamen, pentang, pang-pangen, rsd., mpelawes setan-setan alu kuasa Dibata, mere man lima ribu ras empat ribu kalak, mbela ras mereken pergegeh man kalak si secara status sosial lemah entah pe terpinggirkan. Janah Berita si Meriah si iberitaken Yesus labo terjeng itujuken man kalak Israel tapi pe man bangsa-bangsa si deban (bdk. Mat. 8:5-13; 11:20-24).

Secara khusus i bas ogenta sendah, ituriken maka mekuah ate Yesus ngenehen kalak si nterem, sabap enggo kote dingen lanai lit si ngepkepsa, bagi biri-biri si la ipermakani (ay. 36). Lanai lit si ngepkepsa ertina la lit si mabai bangsa e ku keselamaten si sifatna holistik (jasmani ras rohani, gundari i jenda ras pagi i surga). Mungkin banci jadi peminpin-peminpin si lit paksa si e, baik peminpin agama bage pe peminpin sekuler, dirina ngenca si iperdiatekenna labo kalak si nterem entah pe rayat si iperdiatekenna. Keadaan si bagenda tentuna erbahanca kalak si nterem kote, i bas terj. TB-LAI nina “lelah dan terlantar seperti domba yang tidak bergembala”. Yesus reh ku tengah-tengah bangsa Israel guna meritaken Berita si Meriah e me keselamaten i bas Dibata nari si mulahi bangsaNa i bas kuasa dosa nari bage pe mulahi bangsaNa i bas kuasa-kuasa politis si paksa si e erbahanca kalak si nterem kote, menderita, tertindas, rsd. Emaka nina Yesus man ajar-ajarNa, "Mbelang man peranin, tapi kurang si ranisa. Emaka pindolah man si Mada juma e, gelah isuruhNa si erdahin guna peranin e." (ay. 37-38). Secara konkrit kai si ikataken Yesus e iaplikasikenNa i bas bindu 10 i ja iutusNa 12 ajar-ajarNa guna meritaken Berita si Meriah entah pe berita keselamaten i bas erbage-bage bentukna, seri bagi si ilakokenNa i tengah-tengah bangsaNa si sangana kote.

Tema i bas PJJ-nta sendah e me “Tuhan mulahi bangsaNa”. Palas i bas Tuhan mulahi bangsaNa e me keleng ateNa entah pe perkuah ateNa si mbelin nandangi manusia ras doni enda. Keleng ate entah pe perkuah ate si mbelin e si erbahanca nggit Dibata nusur ku doni enda i bas Yesus Kristus guna meritaken keselamaten i bas kerina bentukna, janah nggit erkorban ngalaken kerina kiniseran, mate i kayu persilang ras keke i bas si mate nari guna naluken kuasa dosa. Amin pe Yesus Kristus enggo nangkih ku surga, misiNa tetap denga arus idalanken i tengah-tengah doni enda, emaka iutusNa kerina kalak si tek man baNa nina, “Enggo ibereken Dibata man bangKu kerina kuasa i surga ras i doni. Laweslah ku kerina bangsa manusia, bahanlah ia jadi ajar-ajarKu : Peridiken ia i bas gelar Bapa, gelar Anak, ras gelar Kesah Si Badia, janah ajari ia ngikutken kerina si enggo Kupedahken man bandu. Janah ingetlah! Aku tetap kap ras kam seh ku kedungen jaman” (Mat. 28:18-20).

 I bas PJJ-nta sendah mulihi kita isingetken kerna tugas tanggung jawabta er-Berita si Meriah maba berita keselamaten i bas Yesus Kristus i ja pape kita ringan, alu erbage-bage cara i tengah-tengah kegeluhenta si tep-tep wari. Yesus Kristus enggo mereken teladan man banta i bas IA mulahi bangsaNa ras maba berita keselamaten alu erbage-bage bentuk si konkrit ras holistik. Contoh, labo terjeng ngatakenca Yesus Kristus Juruselamat, tapi turun tan kita i bas kita nampati kalak si sangana melihe erkiteken kiniseran secara ekonomi, umpamana. Jujur kita i bas pendahinta. Pang kita berprinsip njemak si benar i tengah teman-temanta si teremen ngelakoken si la benar alu kai pe resikona. Mediate nandangi lingkungan sekelewetta, ras melala umpama si deban. Intina, status Kristen si lit i bas kita labo terjeng status, tapi kehadirenta i ja pape kita ringan tuhu-tuhu mabai keselamaten bagepe perobahen ku si mehuli sue ras peraten Dibata. Mari radu ras sievaluasi janah mari radu ras sipelimbarui tekadta guna tuhu-tuhu jadi saksi Kristus i bas geluhta si kentisik enda.