PJJ GBKP Tgl. 15 - 21 Oktober 2017

PJJ GBKP TGL. 15 - 21 OKTOBER 2017

Pdt. Larena br. Sinuhadji (Nd. Rey Tarigan)

Tema : NJAGA RAS NGERGAI KESEHATEN
(Perb. Rasul 27:33-38)

Penjelasen Bahan Ogen & Renungen

Paulus iaduken kalak Yahudi maka ia ikataken si ngguntari kalak Jahudi i belang-belang doni i ja ipimpinna sekte kalak Nasrani. Arah pengajarenna nina kalak Yahudi icemarkenna Rumah Pertoton si Badia. Erkiteken si e maka Paulus itangkap ras iadili i bas Pengadilen Agama, bage pe mbela dirina i lebe-lebe perwakilen pemerintah Romawi, subuk gubernur Felix, Pestus ras Raja Agripa. Kesempaten si bage ipake Paulus guna naksiken kerna ia jera ras ipetandakenna kerna Yesus Kristus Juruselamat. Perwakilen pemerintah Romawi mutuskenca maka labo lit idatna kesalahen Paulus si sue ras ukumen mate entah ukumen penjara, janah enggo banci ibebasken. Tapi erkiteken pemindon Paulus sendiri mindo maka Kaisar i Roma-lah si mutusken perkarana (Perb. 26:30-32). Kenca dung si e, laweslah Paulus erlayar ku Roma. Perikopta e me kap salah sada bagin i bas perdalanen Paulus ku Roma.

Erkiteken angin si meter ras galumbang si tinggi erbahanca nungsang kapal si itumpangi Paulus. Kurang lebih sepuluh empat berngi kapal si itumpangi Paulus bombang-bombang i Lawit Adria. Tapi bagi enggo ipeseh Malekat Tuhan man Paulus, maka aminna gia mbue kiniseran si ibentasi Paulus ras kerina kalak si bas kapal, labo lit sekalak pe si bene, tapi selamat, seyakatan kapal ngenca. Nandangi terang i bas wari si pesepuluhempatken tedis Paulus ras merentahkenca kerina si bas kapal gelah man, “Enggo sepuluh empat wari dekahna iarap-arapkenndu ngadi angin si meter e. Janah kidekah si e la kam man. Emaka kukataken man bandu maka man lah kam lebe. Si enda perlu guna kesehatenndu. Labo selambar pe buk takalndu bene”. Kenca ikataken Paulus enda, ibuatna roti, ertoto ia i lebe-lebe kalak e kerina guna ngataken bujur man Dibata kerna pangan e, je nari icepik-cepikna roti e janah ipanna. Ngidah si e kerina tetap ukur kalak si lit bas kapal, janah man ia kerina, teremna lit dua ratus pitu puluh enem kalak. Kenca kerina besur man, iambeken pegawai gandum si lit bas kapal gelah reh nahangna kapal e.”

Nina Paulus, “Man lah lebe si enda perlu guna kesehatenndu” (i bas TB-LAI, “Karena itu aku menasihati kamu, supaya kamu makan dahulu. Hal itu perlu untuk keselamatanmu”). Terjemahen bahasa Karo ras Indonesia saling melengkapi. Sehat jasmani ras rohani, terlebih adi siterusken ku bas perikop selanjutna, kapal si itumpangi Paulus gedap, janah kerina si lit bas kapal arus erlangi seh ku Pulau Malta gelah banci selamat. Adi ndai la man, la lit gegehna guna erlangi menyelamatken diri.

Melala informasi si banci nampati kita i bas menjaga ras ngergai kesehaten. Si pemena lebe, mengkomsumsi makanan sehat, bergizi ras seimbang. Pebue serat ras sayur-sayuren, buah-buahan. Minum air putih tiap wari maksimal 2 liter atau 8 gelas per hari. Olah raga, termasuk jaga pola pikir. Sabab sijaga pe perpanta, tapi pola pikirta la sijaga si erbahanca dekahen kita stres, labo ka mejile. Mari radu ras siergai kesehatenta ras sijaga gelah banci denga kita ipake Tuhan guna mpermuliaken GelarNa arah kegeluhenta si tep-tep wari.