PA Kategorial GBKP Tgl. 21 - 27 Mei 2017

PA MORIA GBKP TGL. 21 - 27 MEI 2017

Pdt. Larena br. Sinuhadji (Nd. Rey Tarigan)

Si Man Ogen : Kuan-kuanen 29:15-18

Tema : AJARKEN ANAKNDU!

Tujun : Gelah Moria :

1) Meteh ulih pengajaren man anak

2) Njemba ras numpak-numpak anak-anakna gelah terpenalem (mandiri)

Metode : Sharing Kelompok

Penjelasan Bahan Ogen & Renungen

Anak e me pemere (anugerah) si rehna i bas Dibata nari i bas tep-tep jabu khususna jabu kalak si tek. Sebage tanda pengataken bujurta man Dibata maka arus sicidahken tanggung jawabta man anak, alu kita ngkelengi ras mperdiatekenca subuk secara kiniteken, fisik, pemeteh ras kejiwaanna. Tapi terkadang erkiteken kesibuken ras enggo beda jamanna, maka melala orangtua absent i bas mperdiateken anak secara utuh. La banci lang pasti berpengaruh ku bas kegeluhen anak-anakta, subuk karakterna bage pe masa depanna. Melala contoh siidah, i ja kurang perhatian, kasih sayang rikut didiken si payo maka anak-anak enggo ka terlibat ku bas tawuran, pengaruh obat-obaten terlarang, seks bebas, bahkan erkiteken kurang sibabai nggeluh erkiniteken man Tuhan, maka erjabu anakta ndai ras si la sada kiniteken ras kita. Enggo pasti kita kecewa. Tapi nasi sudah menjadi bubur. Rikut nina pepatah, “kai si itabur kita, e ka nge si niperani kita”.

I bas PA Moria sekali enda ibabai kita lebih fokus i bas mendidik anak-anakta benaken kitik-kitik nari. Bahkan melala informasi ngatakenca benaken bas bertin nari pe enggo arus sibenaken nuanken si mehuli man anak e, alu mengkonsumsi makanan si bergizi, musik klasik, rikut ras perbahanen (pengenara) si mehuli si tetap ilakoken orang tua, gelah banci lit mpengaruhi ku bas hal si positif ku anak-anak.

Lit piga-piga point penting si berkaiten ras pengajaren man anak rikutken perikopta sendah e me :

1) Pedah dingen ajar mehuli man anak-anak (TB-LAI : “Tongkat dan teguran mendatangkan hikmat”). Terjemahen bahasa Karo lebih lembut adi bandingken ras bahasa Indonesia. Ertina, tanggung jawab orangtua guna mereken kata ajar, pedah si mehuli man anak-anakna benaken kitik-kitik nari. Kitab Ul. 6:7-9, “Ajarkenlah man anak-anakndu. Persingetilah rusur, subuk sanga kami i rumah, ntah sanga kam bas perdalanen, subuk sanga kam ngadi-ngadi ntah pe sanga kam erdahin”. Ertina, mereken kata ajar si mehuli la lit kata bosan, la ermedu-medu sibereken man anak-anakta. Subuk kerna nggeluh erkiniteken, sopan santun, etika berbicara, i bas pergaulan, nggeluh bermasyarakat, karakter si mehuli, rsd. Janah adi lit pelanggaran si ilakokenna, i ja enggo piga-piga kali pe persingeti maka “tongkat” pe labo salah ipake. Tapi umumna i bas paksa gundari sihindari kekerasen man anakta tapi iajarken alu kelemah-lembuten.

2) Anak si rusur itami-tami (TB-LAI : “dibiarkan”) ijurukenna nandena. Engai maka nande? Sabab umumna si nami-nami e me kap nande. Ertina, i bas kesalahen, pelanggaren, perbahanen si la mehuli si ibahan anakta pang kita mpersingetisa. Sebab sekali kari itami-tami, berikutna pe enggo itehna ndarami kelemahenta, piah dungna anakta e si mengatur kita. Umpamana, sangana reh temue, i je ka anakta mindo sen. Adi la sibere empetkenna kel ngandung. E maka sibere. Pagi kedun pe bage ka banna. Melala siban kesepakaten man anakta, umpamana, adi reh temue tetap berlaku sopan, adi sibaba lawes ku darat (PJJ, arisan, rsd.) tetap berlaku sopan, la banci mindoi sen. Adi kesepakaten enda ilanggar berarti lit ukumenna man bana. Janah ukumen sibereken man bana pe tetap si membangun, umpamana tambahi tanggung jawabna guna mbersihken jabu, rsd.

3) Ajar ras pedah e penting subuk man anak-anakta guna masa depanna bage pe mereken kemegahen ras kemalemen ate man banta. Sabab ‘di kenca berhasil kita mendidik anak-anakta maka selain kemalemen ate sikerajangenta, enggo pasti pujian isehken kalak banta. Kebalikenna adi la terdidik anakta, gendek umur geluh orangtua e ras njuruken orangtuana, sabab rusur orangtua e idilo pihak sekolah erkiteken erbahan kekacauan, idilo pihak kepolisian erkiteken ikut tawuran ras melala denga contoh si la mehuli si deban.

Memang la murah i bas kita mendidik anakta, terlebih i bas jaman gundari enda sangat jauh berbeda ras jamanta. Adi nai media e media cetak (koran), TV ras Radio ngenca. Tapi gundari anak-anakta, termasuk si kitik denga enggo terbiasa nonton TV Kabel, game online, internet, ipad, si banci mereken informasi ras mengakses ku kerina penjuru dunia (global). Erbage-bage jenis si jadi kebutuhen anak-anakta : hiburen, musik, mode, film dll., terpenuhi. CD, VCD, MP3, MP4 sahabat anak-anakta si tep-tep wari. Hal si berikut si perlu ka itengeti e me kap budaya kekerasen si banci ialokenna i bas media bioskop nari, film, TV, lagu bage internet ras game online. Janah kesibukenta sebage orangtua, terlebih si duana ka erdahin (ititipken man tetangga entah pe tempat penitipan anak), erbahanca makin jarang orangtua mendampingi anak i bas erlajar, nonton TV, main game, rsd. La lit si nampati anak-anakta menyaring nilai-nilai si banci iserapna i bas media TV, internet, rsd. Uga banci ipahamina, apai si etis entah lang, apai si ngena ate Tuhan apai si lang, apai si mehuli, apai si jahat, apai si banci itonton entah pe lang, rsd. Istilah “Absent parent, lost children. Absent father, lost son” perlu itengeti.

Kai si banci silakoken guna menyikapi zaman si semakin canggih enda, sebage orangtua nandangi anak-anakta. La banci lang, sepakat kita lebe sebage orangtua guna mereken perhatian, kekelengen man anakta, labo cukup enggo ia sisekolahken, silesken ras sicukupi kerina kebutuhenna. Kekelengen, perhatian e me kap palas relasi orangtua ras anak, bage pe remaja. Kekurangen cinta banci erbahanca anak-anakta terjebak ras ndarami dingen ndatken cinta i bas ingan ras kalak si salah. Nterem gundari anak-anak mengabaikan orangtuana, erkiteken anak-anak merasa kurang iergai ras ikelengi, benaken kitik-kitik nari.

Orangtua, khususna nande e me kap guru pertama sope Pelayan KAKR ras guru i sekolahna i bas ngajarken si mehuli gelah banci anak-anakta pe terpenalem. Mandiri, bangun pagi, membersihkan kamarna, mbersihken mainanna, bekas piring makanna, peka adi lit si melket minter ibersihken, mandiri mengerjaken tugasna, rsd. Janah kemandirian enda sididik, siajarken rikutken usia anak. Kemandirian man balita pasti berbeda man anakta si remaja. Adi hal-hal si bagenda enggo siajarken, sididik, la banci lang siarapken terpenalem anakta ja pe kari ia ringan.

Hal berikut, si perlu ilakoken i ja orangtua arus jadi teladan. “Satu perbuatan lebih berarti dari 1.000 kata-kata”. Sekalak perbapan ngatakenca man anakna si umurna 4 tahun, “Papa mau tidur, kalau ada yang cari Papa, bilang Papa tidak di rumah ya nakku”. La ndekahsa reh tamu. “Ada Papa, nak?” nina tamu. “Ada oom, jawabnya dengan polos, tapi kata Papa, kalau ada yang cari, bilang Papa tidak di rumah”. Kadang kita orangtua la sisedari maka “bohong kecil-kecilan”, malas medak pagi, ras e isaksiken anak-anakta tep-tep wari banci siwarisken man anak-anakta. E maka la heran, lit anak-anak nungkun man bulang entah ninina, “Nandeku marenda rajin entah malas ia erlajar Ni?” Sebab bage rusur ipaksana anakna erlajar ras itambahi alu perkataan, “Mama dulu, ga seperti kalian ini susahna diatur orang tua”. Padahal banci jadi kita pe marenda susah ka iatur orangtuanta.

Si la kalah pentingna, bangun Family Altar (kebaktian keluarga) si sifatna lebih santai. Bernyanyi, baca Alkitab, banci ka iselang-selingi membaca cerita Alkitab tentang Yusuf, Abraham, Daud, Simson, 12 murid Yesus, rsd. Anak-anak pegancih mbacasa ras ertoto. Adi la terban sada wari sekali, seminggu sekali lah gia. Firman Tuhan tetap penting jadi palas kegeluhenta, jabu-jabu kalak Kristen. Paling tidak lebe, nampati kita orangtua guna erpala-pala makeken Kata Dibata e, sebab anak pe enggo ikut ngontrol kita. Gejapkenlah maka anakta e me kap anak Tuhan si ititipkenNa sementara man banta. I bas gegehta si kurang pindo Kesah Kepentaren man Tuhan i bas kita banci mendidik ras ngkelengisa bagi si ngena ateNa. Tuhan si masu-masu keluarganta.