PJJ GBKP Tgl. 14 - 20 Mei 2017

PJJ GBKP TGL. 14 - 20 MEI 2017

Nrs. Pdt. L. br. Sinuhadji (Bp. Rey Tarigan)

Tema : AKU GEREJA KAM PE GEREJA (1 Korinti 12:25-31)

Penjelasen Bahan Ogen & Renungen

Kula (bhs. Indonesia : tubuh) e me sada anding-andingen si rusur ipake rasul Paulus guna nggambarkenca perpulungen kalak si tek, jemaat Kristus, entah pe Gereja (Roma 12:4-5; 1 Kor. 10:17; 12:12-27; Ep. 1:23; 2:16; 3:6; 4:4,12,16; 5:30; Kol. 1:18,22,24; 3:15). Anding-andingen kula enda pas kel guna njelasken kerna hakikat Gereja. Yesus Kristus e me takal perpulungen (Gereja) janah kerina kalak si tek e me ringringNa (anggota). Kerina kalak si tek enggo ipersada i bas kula ni Kristus ras nggeluh i bas kegeluhen si mbaru (keselamaten) e me : sikeleng-kelengen, sihamat-hamaten, sisampat-sampaten, saling membutuhkan, saling mperdiateken, saling mendukung, saling melengkapi, rsd. Enda me gambaren ideal kerna kula ni Krisus entah pe Gereja. Tapi gambaren si ideal kerna Gereja enda la sue ras kinatana bagi si terjadi i bas perpulungen i Korinti. Perpulungen Korinti banci ikataken sada perpulungen (Gereja) si berkembang pesat erkiteken ibereken Dibata erbage-bage pemere Kesah si Badia (karunia Roh), tapi la lit kiniersadaan i bas perpulungen : turah perjengilen, erpihak-pihak, rsd. (1 Kor. 1:10-12; rsd).

Lit dua hal si ibahas rasul Paulus i bas bindu 12 e me pemere Kesah si Badia ras melala ringring tapi sada kula. Kerna pemere Kesah si Badia, i bas ay. 1-11 ras 1 Kor. 14:1-25, teridah je secara tersirat maka pemere Kesah si Badia si pelain-lain e mpeturah perjengilen i tengah-tengah perpulungen erkiteken masing-masing kalak si datken pemere Kesah si pelain-lain ndai erpengakap maka pemere Kesah si lit bas ia si hebatna ras si utamana asangken pemere si debanna. I bas si e rasul Paulus ngatakenca (ay. 4-7), “Erbage-bage pemere Kesah, tapi sada nge Kesah si merekenca e. Erbage-bage dahin guna mereken penampat, tapi sada nge Tuhan si mada dahin e. Erbage-bage dahin si man dahin, tapi sada nge Dibata si mada dahin e, e me si mereken kengasupen man kerina kalak guna ndahiken dahinna si khusus. Guna kerinana nge maka man banta sekalak-sekalak ibereken pemere si ncidahken maka Kesah erdahin kap” (ay. 7, “guna kerinana” i bas bhs. Ind., “untuk kepentingan bersama”).

Si peduaken kerna melala ringring tapi sada kula (ay. 12-31), ikataken Paulus, “Bagi sada kula melala ringringna, bage me Kristus e. Amin gia melala ringring e, tapi sada kula nge. Bage me pe kita kerina ... enggo iperidiken alu Kesah si sada e ku bas sada kula. Ibahan Dibata maka kerina kita enggo minem Kesah si sada e” (ay. 12-13). Rasul Paulus nekanen maka lit si lebih penting asangken ncidahken pemere-pemere Kesah e me kula ni Kristus. Nina Paulus, “Tapi si tuhuna, Dibata namaken ringring e sada-sadai i bas kula e sue ras si mehuli iakap Dibata” (ay. 18). Ertina arus leben isedari maka perpulungen e me ringringNa (labo takal) alu tujun ngikutken kai si jadi peraten Dibata i bas Yesus Kristus si jadi takal perpulungen : saling memerluken sada ras si debanna, siergan, saling mperdiateken, adi sada ringring suin, kerina ringring si deban pe ikut nggejapkenca, janah adi sada ringring ipehaga, kerina ringring si deban ikut ermeriah (ay. 21-26). I bas si e kerina pemere-pemere Kesah si ibereken Dibata guna mbangun kula ni Kristus (Gereja) banci erfungsi alu mehuli (ay. 27-30).  

Si peteluken, nina Paulus i bas ay. 31, “E maka ersura-suralah kam guna ndatken pemere-pemere Kesah si terulin. Janah genduari kuturiken ateku man bandu dalan si mehulina kal”. Kai si terulin e (“si terulin” i bas bhs. Ind., “yang terutama” entah pe “paling utama”)? I bas 1 Kor. 13:13 isimpulken rasul Paulus, “Dage lit telu si tetap arus idalanken, e me : erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban”. Erkeleng ate man kalak si deban i jenda palasna e me keleng ate Kristus. Keleng ate Kristus si memperjuangken kebenaren, labo si permisif i bas hal-hal si la mehuli si la sue ras peraten Dibata i bas GerejaNa (bdk. 1 Kor. 5:11-13). E maka keleng ate Kristus si dem alu kebenaren arus jadi palas i bas GerejaNa bage pe jadi palas i bas memfungsiken pemere-pemere Kesah guna membangun GerejaNa.

Enggo radu ras siteh maka Gereja si tuhu-tuhu e me labo gedungna entah pe organisasina, tapi kita kerina kalak si tek si enggo ipersadaken Dibata i bas sada kula ni Kristus. Ertina, si pemena, Gereja e me inisiatif Dibata, kerina kalak si tek terjeng alatNa ngenca guna majekken GerejaNa. Si peduaken, Gereja e me perpulungen kalak si tek si enggo ngaloken keselamaten ras iutus guna erberita kerna keselamaten e i bas kerina dampar kegeluhenta. I bas bahan PJJ-nta minggu si lepas, isingetken kita kerna Gereja si nggeluh si iutus guna bersekutu, bersaksi, dan melayani. Si peteluken, i bas PJJ-nta sendah isingetken kita kerna fungsinta selaku ringringNa si arus muat bagin i bas membangun kula ni Kristus entah pe GerejaNa. Ertina kerina kita secara ideal arus ikut muat bagin i bas kerina dahin-dahin pelayanen i bas Gerejanta masing-masing alu erbage-bage pemere Kesah si lit i bas kita. I bas si e tentuna perlu lebih sitandai pemere-pemere Kesah si lit bas kita. Maun-maun terpaku kita i bas pemere-pemere Kesah tertentu bagi si lit i bas bahan ogenta sendah, padahal i bas konteks ogenta sendah memang e si tuhu-tuhu ibutuhken Gereja paksa si e. Situhuna melala denga pemere-pemere Kesah si deban rikutken kai si nibutuhken GerejaNa i bas kerina jaman, janah dahin Kesah si Badia la banci ibatasi manusia.

Si paling penting i bas kita memfungsiken pemere-pemere Kesah e, si pemena, arus leben isedari maka kita enda hanya ringringNa si ipake Dibata guna si mehuli (ay. 18), e maka ngataken bujur ras meteruk ukurlah kita adi ibereken Dibata pemere-pemere Kesah tertentu. Janah ula kita merasa rendah diri adi umpamana pemere Kesah si lit i bas kita labo seri ras pemereNa man kalak si deban. Si peduaken, kerina pemere-pemere Kesah e guna “kepentingan bersama” (ay. 7) erpalasken peraten Dibata man GerejaNa. Si peteluken, palasta i bas kita memfungsiken pemere-pemere Kesah e me keleng ate Kristus si dem alu kebenaren. E maka i bas PJJ-nta sendah iajuk kita gelah mengeksplorasi pemere-pereme Kesah si lit i bas kita. Sendah e me waktu si tepat guna kita menjadi anggota-anggota si aktif labo terjeng jadi anggota si pasif : hanya tercatat jadi anggota, reh ku Gereja 2 kali ngenca i bas sada tahun (Natal & Paskah, e pe adi la udan), lalap mindo isampati tapi la lit kontribusi (kontribusi labo terjeng sen), lalap mengkritik tapi la lit solusi si konkrit, rsd. Mari radu ras kita berpartisipasi aktif i bas Gerejanta, sebab kita enda Gereja. Dibata si mpegegehi kita.