Kebaktin Pekan Doa GBKP Tgl. 28 Mei - 3 Juni 2017

KEBAKTIN PEKAN DOA GBKP TAHUN 2017

TEMA UMUM :

“Ertoto Ulu Gegeh Ndalanken PedahNa” (Matius 14 : 23)

WARI PEMENA (Minggu Tgl. 28 Mei 2017)

Pdt. Larena br. Sinuhadji

Invocatio : “Awang-awang ndai igelari Dibata langit emaka ben me wari, jenari siang ka - eme wari si peduaken” (Kejadin 1:82)

Renungen : Keluaren 3:5-15

Tema : “Kutandai Dibata Si Kusembah”

Penjelasen Bahan Pustaka Si Badia & Refleksi

Pekan Doa tahun enda merupaken 10 wari ertoto, ibenai alu pra-ertoto i jabunta sekalak-sekalak telu wari, kenca si e Pekan Doa bagi semalna ras perpulungenta. Latar belakangna e me kap kenca Yesus nangkih ku surga, maka 10 wari ipake ajar-ajarNa guna tutus ertoto bagi si ipindoken Yesus seh nusurna Kesah si Badia (Pentakosta). Iarapken arah 10 wari ertoto enda pe, spiritualitasta semakin terbangun seh makana megegeh kita dalanken pedahNa.

Rikutken bahanta i bas Pekan Doa berngi si pemena, lit piga-piga hal si menjadi point penting man banta :

1) Dibata si mada kuasa si la ibatasi alu ruang, ingan ras waktu. Sabab terkadang pengangkanta Dibata hanya banci sijumpai i gedung Gereja entah pe i Yerusalem asum kita ngadaken perjalanan rohani. Tuhan arah malekatNa njumpai Musa i deleng Sinai, i tengah-tengah rambah duri bagi gara api, asum Musa sangana ermakan biri-biri ras kambing domba mamana Jetero.

2) Dibata si isembah kita e me Dibata si badia, e maka i bas kita jumpa ras IA pe arus bersih pusuh ras ukurta, labo hanya bersih secara fisik (tantangi selopndu, sabab kam sangana tedis i bas ingan si badia).

3) Dibata si tuhu-tuhu peduli i bas kiniseran sialami anak-anakNa. I bas ay. 10 lit i je piga-piga kata kerja si ipake guna nggambarken Dibata si mediate. Dibata si enggo ngidah kuga serana bangsaNa i Mesir (melihat).

4) Dibata si megi penderkuh bangsaNa (mendengar).

5) Dibata si enggo meteh kiniseran bangsaNa (mengetahui).

6) Dingen Dibata si bertindak, berinisiatif mulahi bangsaNa, i ja IA nusur ku doni enda ras naruhken bangsaNa ku taneh si mehuli dingen mehumur. Janah ipake Dibata Musa sebage perpanjangen tan Dibata guna naruhken bangsa Israel Mesir nari ku Kanaan. La tetap ukur Musa i bas pendilo Dibata e. E maka itetapken Tuhan ukurna, maka Tuhan tetap ras Musa (“Aku ras kam, janah kenca itaruhkenndu bangsa e ndarat i Mesir nari, isembahndu pagi Aku i das deleng enda. Em pagi tandana maka Aku enggo nuruh kam).

Gelar si arus ipetandaken Musa man bangsa Israel eme AKU TETAP AKU. Dibata si la pernah berubah. Dibata si isembah Abraham, Ishak ras Yakub, e me leluhur bangsa Israel. Gelar Dibata si arus ipetandaken man kesusuren bangsa Israel sundut ku sundut.

Dibata si enggo mpetandaken diriNa man Musa ras bangsa Israel e me Dibata si peduli, mediate, dem kekelengen, ngejapken kinisuin bangsaNa. Dingen Dibata si bertindak mulahisa tepat i bas waktuNa, ras e terbukti i bas perdalanen bangsa Israel Mesir nari seh ku Kanaan. Penungkunenna, apakah Dibata e jelas itandai bangsa Israel? Lang. Sabab rusuren bangsa Israel jungut-jungut, berontak, nimbak Kata Dibata, song-song kesetianna man Dibata.

Tema : “Kutandai Dibata si Kusembah”. Dibata enggo mpetandaken diriNa man banta i bas kegeluhenta, e me Dibata si mada kuasa, si nepa langit doni ras kerina isina (invocatio). Dibata si memelihara kita manusia ras nelamatken kita i bas kuasa dosa. Dibata si mediate i bas kesusahen anak-anakNa. Apakah tuhu sitandai Dibata e? Entah lenga bo payo penandaita kerna Dibata si erbahanca kita ragu-ragu, kurang setia, kurang penalementa baNa. Umpamana, tek denga kita nandangi kuasa si deban si banci nampati kita, asum lit perbeben nderpa. Kutandai Dibata si kusembah njemba kita mengutamaken Dibata i bas kerina dampar geluhta, la nari mbiar ndalani geluh enda. Janah terkadang ipake Dibata dalan kiniseran gelah arah si e pe banci reh bagesna penandaita kerna Dibata.

Tulisan Basuki Tjahaya Purnama (Ahok) si iogeken Veronika Tan i bas pencabuten bandingna sungguh sangat sarat mengandung makna teologis. “Gusti ora Sare. Put your hope in the Lord now and always (Mazmur 131:3). Kalau dalam iman saya katakan, The Lord will work out his plan for my life (Mazmur 138:8a, Tuhan akan menyelesaikannya bagiku)”. Ahok jelasken penandaina kerna Dibata si isembahna, la ia ragu sitik pe amin kiniseranna ialamina i bas ia nehken kebenaren ras keadilen. Man Ahok Tuhan si utama ras pemenana, sedangken jabaten, kehormaten, erta, rsd., pasu-pasu (berkat) tambahen i bas Dibata nari (aksesoris : ula sempat menggeser si utama ras pemenana).

Adi jelas penandaita kerna Dibata si isembah kita, maka la kita mbiar, aru ate i bas dalani geluh enda, amin sekali lit kiniseran sialami kita i bas ndalanken kebenaren, maka Dibata la pernah nadingken kita. I bas Pekan Doa wari pemena enda, sipebagesi penandaita kerna Dibata si isembah kita : alu tutus ertoto, erbakti man baNa subuk pribadi ras keluarga, tetap sertaken Tuhan i bas kerina perdalinen geluhta gelah sigejap uga Tuhan nemani kegeluhenta.

WARI PEDUAKEN (Senin Tgl. 29 Mei 2017)

Pdt. Larena br. Sinuhadji

Invocatio : “Paksa si e, lawes Yesus ku datas sada uruk-uruk; i je IA ertoto man Dibata seh terang wari” (Lukas 6:12)

Renungen : 1 Samuel 1:21-28

Tema : “Tutus Ras Patuh”

Penjelasen Bahan Pustaka Si Badia & Refleksi

Hana ertoto alu tutus iherna tangis perban ceda kel atena erkiteken lenga ibereken Tuhan tuah man bana. I bas pertotonna tungkaskenna kerina kesusahenna man Tuhan ras mindo gelah ibereken Tuhan anak dilaki man bana. Janah erpadan ia man Tuhan, adi ibereken Tuhan anak man bana maka kidekah umur geluhna iendeskenna man Tuhan ras bukna digan pe la ipangkasna. Tuhan megiken pertoton Hana, setahun kenca si e ibereken Tuhan anak dilaki man bana. Hana patuh man Tuhan, kai si enggo ipadankenna isehkenna man Tuhan. Siidah i jenda, ersada arih keluarga enda, aminna Hana nge sekalak si melasken perpadanen man Tuhan, tapi Elkana sangat mendukung. Nina Elkana, “Bage-bage, bahanlah kai iakapndu si mehulina; i rumah dage kam seh enggo ipengadindu ia minem. TUHAN lah si erbahanca maka padanndu e banci seh”.

Kenca enggo Samuel ngadi minem, itaruhken Hana ia ku Silo, tanda maka tuhu-tuhu ia patuh man Tuhan. Labo terjeng je saja ibabana persembahen tutungen man Tuhan e me sada anak lembu umur telu tahun, sepuluh kilo tepung ras lau anggur. Jumpaina Imam Eli. Siidah walaupe la nari inget Eli perpadanen Hana, tapi ia ertanggung jawab guna nehkenca. Kenca enggo ia ngerana, maka iendeskenna anakna man Eli guna jadi sikerajangen Tuhan segedang geluhna.

Hana kalak si tutus man Tuhan, hal enda teridah i bas pengendesen geluhna man Tuhan, asum lenga italangi Tuhan buah kandungenna bagepe kenca enggo ibereken Tuhan tuah ku tengah jabuna. Rikutken bahanta, labo sekali e ngenca Hana ertoto man Tuhan, tapi setiap tahun asum lit kesempaten ku Silo tetap ia ikut ras ertoto man Dibata gelah ibereken Dibata tuah ku tengah-tengah jabuna. Amin pe lenga ijabab Tuhan, labo ngkurangi kinitekenna man Tuhan. Bahkan erkiteken tutusna, la nari isedarina sekelewetna, seh makana ikataken Imam Eli, ia enggo mabuk anggur. Terlebih pe i bas ia nehken padanna man Tuhan i bas ngendesken anakna man Tuhan. Sabab terkadang adi ngerana soal padan (nazar), banci kita lupa perban riahna, banci ka pura-pura lupa. Tapi Hana ras Elkana, tuhu itandaina kel Dibata. Penandaina kerna Dibata jemba keluarga enda tutus ras patuh ersembah man Tuhan. Penandainta kerna Dibata mpengaruhi ku bas penembahenta, ketutusenta, kepatuhenta, kinitekenta man Dibata. I bas invocationta pe icidahken banta, uga Tuhan Yesus ertoto i datas uruk, seh terang wari. Perban ketutusenNa ertoto la gejapNa enggo seh terang wari. Sebab melala siidah kalak la tutus, entah kurang tutus i bas penembahenna man Tuhan.

Piga-piga point penting i bas renungenta :

1) Ertoto e me nafas hidup orang percaya; adi tetap sibangun relasinta ras Dibata, maka geluh pertendinta pe paguh. Arah si e ngasup kita ngalaken erbage-bage keadaan geluhta, subuk senang bage pe susah.

2) Ertoto arus tek ras erpengarapen, maka ieteh Dibata si terbaik i bas kegeluhen kalak si erkemalangen baNa. Ola monce-once. Soal jawaban doa, tetap otoritas Dibata, ras arus siimani adi tuhu-tuhu kita enggo bulat ukur erpengendes man Tuhan, sijaga tetap bersih ukurta, Dibata ietehNa si tebaik man banta. Walaupe sekali jawaban doa e, “lang” nina Dibata, maka si e kerina i bas rancangen dame sejahtera i bas Dibata nari.

3) Terkadang i bas perbeben sialami kita, senangen kita curhat man teman, entah pe man FB si lenga bo tentu lit jalan keluarna. Tapi Hana ngajari kita, maka i bas perbeben si ialamina, tek kel ia man Dibata inganna nuri-nuri.

4) Padanta man Dibata arus siinget ras sidalanken alu sukacita.

WARI PETELUKEN (Selasa Tgl. 30 Mei 2017)

Nrs. Pdt. L. br. Sinuhadji (Bp. Rey Tarigan)

Invocatio : “Adi sada ringring suin, kerina ringring si deban pe ikut nggejapkenca. Janah adi sada ringring ipehaga, kerina ringring si deban ikut ermeriah” (1 Korinti 12:26)

Renungen : Masmur 133:1-3

Tema : “Kemalemen Ate I Bas Persadan”        

Penjelasen Bahan Pustaka Si Badia & Refleksi

Bahan renungenta e me ende-enden ziarah si itulisken Daud kerna kiniulin ras kesenangen kalak si ersenina ersada perarih. Kiniulin ras kesenangen i bas kiniersadaan kalak si ersenina enda igambarken alu gambaren minak wangi si meherga ras embun. I bas Kel. 30:22-33 idat kita informasi maka minak wangi si meherga enda e me minak si badia si igunaken secara khusus guna dahin-dahin Dibata i bas Kemah Perjumpan bage pe guna penangkuhen sekalak imam. Banci ikataken minak wangi si meherga enda e me lambang pasu-pasu Dibata. Daud nggambarkenca kinilulin ras kesenangen i bas kiniersadaan kalak si ersenina enda bagi minak si badia si maler ku janggut ras ku kerahung baju jubah Harun sanga ia itangkuhken jadi imam. Janggut e me lambang kehamaten sekalak dilaki Yahudi (bdk. 2 Sam. 10:5; rsd.). Baju jubah e me lambang kuasa i bas jabaten khusus bage pe lambang kebenaren ras keadilen (Jes. 61:10; Job 29:14; rsd.). Kehamaten, kebenaren ras keadilen enda la banci erfungsi alu mehuli adi la ipasu-pasu Dibata.

Daud nggambarkenca kinilulin ras kesenangen i bas kiniersadaan kalak si ersenina enda bagi embun. Embun labo terjeng fenomena alam tapi lambang kegeluhen si ibereken Dibata man bangsa Israel. Embun mbelin kel fungsina i bas musim perlego si erbahanca sinuan-sinuan kalak Israel tetap denga turah ras erbuah. Deleng Hermon e me deleng si tertinggi (2.814 m) i daerah Palestina, puncakna itutupi alu es si launa maler seh ku sungai Yordan. Deleng Sion e me Yerusalem ingan Rumah Pertoton kalak Israel. Embun e me lambang pasu-pasu Dibata si maba kegeluhen man bangsa Israel. I bas ay. 3b ikataken, “I je me TUHAN erpadan mereken pasu-pasuNa, kegeluhen si la erkeri-kerin” (terj. TB-LAI, “Sebab ke sanalah TUHAN memerintahkan berkat, kehidupan untuk selama-lamanya), e me penekanen maka i bas kiniersadaan kalak si ersenina labo saja lit kinilulin ras kesenangen, tapi lit pe padan Dibata kerna pasu-pasuNa ras kegeluhen si la erkeri-kerin.

Penungkunenna engkai maka ibahan Daud Masmur 133 enda? Adi sinen i bas kegeluhen Daud kenca ia enggo erdosa man Dibata (2 Sam. 11-12), kegeluhen keluargana jadi rontang, anak-anakna ermusuhen sada ras si debanna. I bas keadaan si bagenda rupana tentu tuhu-tuhu igejapken Daud seh kel mehergana kiniersadaan kalak si ersenina. I bas tafsiren si deban ikataken maka ende-enden enda iendeken sanga bangsa Israel ersiarah nangkih ku deleng Sion, e me Yerusalem ingan Rumah Pertoton. Lit ribuan kalak Israel i bas kuta-kuta si deban nari si ngikuti siarah enda. Perdalanen siarah nangkih ku Yerusalem enda adi sidalani alu ersada arih saling sisampaten bagi kalak si ersenina maka la tergejap perdalanen si mberat e banci idalani alu teratur ras lancar.

Kiniersadaan kalak si ersenina si erbahanca lit kesenangen, kiniulin, kegeluhen ras pasu-pasu Dibata si la erkeri-kerin enda pe igejapken rasul Paulus. Emaka ipedahkenna man perpulungen Korinti gelah nggeluh ersada i bas Kristus. Kerina kalak si tek enggo ipersada i bas kula ni Kristus ras nggeluh i bas kegeluhen si mbaru si dem alu keselamaten e me : sikeleng-kelengen, sihamat-hamaten, sisampat-sampaten, saling membutuhkan, saling mperdiateken, saling mendukung, saling melengkapi, rsd. Enda me gambaren ideal kerna kula ni Krisus entah pe Gereja.

Tema si seh man banta i bas wari peteluken Pekan Doa enda nina : “Kemalemen Ate I Bas Persadan”. Penekanena mungkin lit i bas persadanta ras Kristus si mabai kemalemen ate i bas persadanta ras sapih-sapihta kalak si tek man Yesus Kristus. Enda nge si mbedakenca persadanta kalak si tek ras persadan-persadan si deban si labo erpalasken Yesus Kristus. Persadan-persadan si deban si labo erpalasken Yesus Kristus biasana bersifat ekslusif, la banci kerina kalak jadi anggotana. Adi la sue ras ideologi persadan e la banci kita ikut bergabung. Bicara banci bergabung pe hak-hakta ibatasi. Janah biasana bentuk-bentuk kegiaten saling mperdiateken, sisampat-sampaten, rsd., terbatas hanya man anggotana ngenca. Kiniersadaan si terjalin i bas persadan e biasana erpalasken perkade-kaden, ideologi partai, entah pe kepentingen tertentu. I bas si e tentuna enggo banci sigejapken kita bedana kemalemen ate i bas Kristus ras kemalemen ate erpalasken hubungen perkade-kaden, ideologi entah pe kepentingen tertentu. Memang labo kerina persadan e la mehuli, sebab genduari enggo melala persadan si mengadopsi persadan i bas Kristus entah pe Gereja, janah melala anggotana pe anggota Gereja entah pe kalak Kristen.

Persoalenna mungkin lit kiniersadaan i bas Gereja si enggo lanai tergejap lit i je kemalemen ate si tuhu-tuhu. Secara tanpa isadari kiniersadaan si terjalin sifatna semu entah pe pura-pura. Darat nari teridah ersada dem alu kemalemen ate tapi bas nari melala akar pahit, sakit hati, elem-elem, rsd. Adi rikutken pengalamen raja Daud, akar masalah maka la lit kiniersadaan e me erkiteken dosa si enggo ilakokenna si erbahanca jabuna rontang, saling ermusuhen sada ras si debanna. Adi rikutken pengalamen rasul Paulus i bas perpulungen Korinti, lit i je kesombongen, egois, merasa paling penting, rsd., si erbahanca perpulungen la banci ersada ras makeken pemere-pemere Kesah alu maksimal guna pembangunen kula ni Kristus.

Emaka Pekan Doa i bas wari si peteluken enda banci jadi bahan evaluasi man banta guna radu ras sitotoken. Adi memang lit denga dosa-dosa masa lalu si lenga idungi, dungilah alu mindo pengalemi dosa i bas Dibata nari janah simaafen sada ras si debanna alu tulus ate. Adi lit denga si la nggit bekerja sama i bas pelayanen, la nggit ngaloken koreksi, rsd., tentuna perlu siperobahi gelah pembangunen kula ni Kristus banci maksimal ilaksanaken i bas Gerejanta. Adi kiniersadaan i bas Gerejanta enggo erdalan alu mehuli, enggo lit je suasana kemalemen ate si tulus, sikeleng-kelengen, sihamat-hamaten, sisampat-sampaten, saling membutuhkan, saling mperdiateken, saling mendukung, saling melengkapi, rsd., perlu denga sitotoken gelah banci terus erdalan alu mehuli ras semakin meningkat kualitas ras kuantitasna.

Mari radu ras sigepapken maka kiniersadaanta ras Kristus erpalasken kinitekenta si tuhu-tuhu erbahanca kiniersadaanta ras sapih-sapihta kalak si tek tuhu-tuhu mabai kemalemen ate. Mari radu ras sibuktiken maka i bas kiniersadaan kalak si ersenina labo saja lit kinilulin ras kesenangen, tapi lit pe padan Dibata kerna pasu-pasuNa ras kegeluhen si la erkeri-kerin.

WARI PEEMPATKEN (Rabu Tgl. 31 Mei 2017)

Nrs. Pdt. L. br. Sinuhadji (Bp. Rey Tarigan)

Invocatio : “Sangap kal kalak si malang man TUHAN, si nggeluh ngikutken kerina perentahNa” (Masmur 128:1)

Renungen : Kolose 3:18-21

Tema: “Kelengi Jabundu”

Penjelasen Bahan Pustaka Si Badia & Refleksi

I bas bahan renungenta sendah teridah je gambaren jabu si ideal i bas Kristus. Sope bengket kita ku bas bahan renungenta, leben sioge Kol. 3:5-11. I bas ogen ndai teridah maka lit denga perpulungen si geluhna lenga sue ras kegeluhen si mbaru i bas Kristus. E maka i bas Kol. 3:12-17 iajuk rasul Paulus perpulungen gelah : makeken ate perkuah, mehuli, rukur meteruk, lemah-lembut dingen saber, sialem-alemen salah, arus sikeleng-kelengen, erpenggurun man Kristus i bas erbahan keputusen-keputusen, kata Kristus nggeluh i bas pusuh peraten, siajar-ajaren alu kepentaren, ngendeken masmur, ende-enden pujin ras pertendin, kai pe si ibahan subuk i bas ngerana entah i bas perbahanen arus ibahan i bas gelar Tuhan Yesus janah ngataken bujur man Dibata Bapa arah IA. Si e kerina arus sibenaken i bas jabu-jabu kalak Kristen. Engkai maka arus ibenaken i bas jabu? Tek kita maka jabu-jabu kalak Kristen e me rancangan Dibata (Kej. 2:18-25; Mal. 2:14; Kuan 2:17; Mat. 19:6; Mrk. 10:9; rsd.), ertina lit misi khusus Dibata i bas jabu-jabu kalak Kristen. Misi si khusus enda labo terjeng gelah lit kesusuren tapi keluarga e me ingan si pemenana ras si utamana i bas nandai Dibata alu payo. Jabu-jabu kalak Kristen e me ingan si mehulina kel i bas internalisasi ajaren-ajaren (nilai-nilai iman kristiani) si payo kerna Dibata i bas Yesus Kristus.

E maka i bas bahan renungenta sendah lit piga-piga nilai iman kristiani si arus ilakoken i bas jabu-jabu kalak Kristen gelah kerina si enggo ibenaken i bas jabu-jabu e banci secara otomatis mempengaruhi Gereja ras lingkungen sekelewetna. Si pemena (ay. 18) pedah man ndehara gelah patuh nandangi perbulangenna (“patuh” i bas terj. TB-LAI “tunduk” i bas terj. BIS-BIMK “taat”). Adi bas Ep. 5:22-24 lebih jelas je ibahan perbandingenna nina Paulus, “bagi patuh man Tuhan ... bali ras perpulungen patuh man Kristus”. Ertina si jadi ukuren kepatuhen e me Dibata i bas Kristus labo perbulangen. Si peduaken (ay. 19) pedah man perbulangen gelah ngkelengi ndeharana. I bas Ep. 5:25 jelas je si jadi ukurenna labo kekelengen manusia tapi kekelengen Kristus, “bagi Kristus engkelengi perpulungen, dingen ngendesken kesahNa guna perpulungen e”. Si peteluken (ay. 20) pedah man anak-anak gelah patuh man orangtuana sebab bage nge si ngena ate Dibata. I bas Ep. 6:1-3 si jadi ukuren kepatuhen man orangtua “e me pedah si pemena ibereken Dibata radu ras padanNa ... gelah mejuah-juah kam, janah ndekah kam nggeluh i doni enda”. Si peempatken (ay. 21) pedah man orangtua gelah mendidik anak-anakna alu payo. I bas Ep. 6:4 si jadi ukuren i bas ngajarken anak-anak e me ajaren ras pedah i bas Dibata nari (terj. TB-LAI, “didiklah mereka di dalam ajaran dan nasihat Tuhan”).

Sue ras tema-nta sendah, iajuk kita gelah ngkelengi jabuta. Tentu banci radu ras sievaluasi kerna geluh perjabunta sue ras bahan renungenta sendah. Adi lenga sue ras peraten Dibata tentuna arus radu ras sitotoken gelah ipengasup Dibata kita tuhu-tuhu ngkelengi jabunta masing-masing alu ndalanken kerina si jadi peratenNa bagi bahan renungenta sendah. Adi enggo ipala-palai ngkelengi jabunta, tentu perlu denga ka sitotoken gelah banci tetap harmonis janah banci mempengaruhi sekelewetta. Invocationta ngatakenca, “Sangap kal kalak si malang man TUHAN, si nggeluh ngikutken kerina perentahNa” (terj. TB-LAI, “Berbahagialah setiap orang yang takut akan TUHAN, yang hidup menurut jalan yang ditunjukkan-Nya!”). Ertina i bas kita erpala-pala mewujudken keluarga si harmonis (sempabu) labo saja jadi kesaksin i bas kerina isi jabu, teman-temanta sada perpulungen ras masyarakat sekelewetta, tapi kita pe datken kesangapen i bas kita erkemalangen man Dibata. Gelar Dibata termulia arah jabu-jabu kalak Kristen.

WARI PELIMAKEN (Kamis Tgl. 1 Juni 2017)

Pdt. Jefri Alexander Keliat

Invocatio : “Kueteh maka mbelin kal sura-surandu ngaloken pemere-pemere Kesah, tapi usahakenlah maka i bas kam lit pemere si majekken perpulungen ngelebihi pemere-pemere si deban” (1 Korinti 14:12)

Renungen : 1 Tesalonika 1:6-10

Tema : “Kukelengi Gerejaku”

Penjelasen Bahan Pustaka Si Badia & Refleksi

Gereja Tesalonika e me kap gereja si ipanteki Paulus. Salah sada tantangen si man hadapen Jemaat Tesalonika e me kap tantangen i bas kalak Yahudi nari si ercian ate man Paulus i bas usaha Paulus meritaken Berita si Meriah man kalak si non-Yahudi. E maka erkiteken mbuena tekanen enda tujun surat 1 Tesalonika ertujun gelah jemaat tetap ukurna dingen tetap erpengarapen man Dibata. lit kebiaren Paulus kerna jemaat enda erkiteken jemaat enda termasuk jemaat si nguda denga (1 Tes. 3:1-15). Keriahen Dibata peduakaliken pagi nantangi kerina kelatihen si enggo ialoken jemaat Tesalonika gel-gel nari. Lit piga-piga hal si menjadi pujin si ibereken Paulus i bas kegeluhen jemaat si lit bas Tesalonika :

1) Megenggeng. Tantangen bergereja sialami Jemaat Tesalonika tentu labo hal si melukah. Sada sisi ia enggo nadingken kinitekenna si ndekah tentu arah temanna si ndekah pe lanai nge ia ialoken, tapi arah teman Kristen Yahudi pe la ialoken. Adi bas konsep pemahamen si gundari banci ikateken enda me minoritas ganda atau bas kalak Karo banci rusur ikataken ia bagi belo la ertange ku japa pe la nai kut bas beligan. E maka tentu enda labo kondisi mudah guna ialoken. Bas kondisi si bage rupa kecenderungen si paling mudah e me kap menyerah, sebab adi ku japa pe imbang harusna menyerah menjadi pilihen si realistis. Tapi e la iambil kalak Tesalonika. Ia malah terus berjuang bas minoritas ganda sialokenna.

Banci enda sibandingken ras Gerejanta. Sada sisi tanda kekelengenta man Gereja-gereja la banci jadi Gereja si eksklusif (bagi kalak Yahudi) tapi jemaat si nggit ngaloken kerina bangsa ras suku (bdk. GBKP KM 46 Jambi). Terdauhen i bas si e pe jemaat harus mampu jadi jemaat si megegeh bas kiniteken i bas erbage tantangen bergereja (bdk. Gereja Pentakosta i Simpang Basrah). Tempaan iman si mehulina e me kap percubaan. Tanpa litna percuban imanna labo banci tertempa. Iman si dewasa ngajari kita guna mengelola persoalen alu mehuli. Keleng ate man Gereja tentu berkaiten pe ras uga kita tetap engkelengi Gereja uga litna (ula melukah jajan, sebab adi rusursa jajan e la sehat ras engkeriken sen).

2) Man Usihen. Erkiteken saber dingen megenggeng Gereja i Tesalonika e maka ia tentu enggo jadi usihen man Gereja-gereja si deban si lit i bas kuta-kuta si deban. Menarik hal enda sebab Jemaat Tesalonika pang erbahan sada hal si hebat si banci jadi usihen Gereja si deban.

Adi e baba man banta tentu menarik guna banci erbahan sada penungkunen reflektif Gerejanta Gereja si uga nge? Atau alu bahasa si deban bas dampar si apai nge kita banci jadi usihen bas Gereja-gereja si deban? Kekuatan Gereja GBKP nai nari tandai kalak tuhu erkiteken kuatna diakonianta baik si sifatna karitatif bage pe transformatif kerina lit bas Gerejanta ras melala Gereja erlajar bas kita nari. Tapi secara Runggun kai nge si man usihen (hal pembeda) bas Gerejanta?

3) Metemue. Waktu Paulus reh pertama ku Tesalonika luar biasa kel pengalo-ngalo Jemaat Tesalonika ia. Tentu hal enda berkaiten tuhu ras nilai persahabatan ras keramah-tamahen si icidahken kalak enda man temuena. Salah sada Gereja i Malaka (Malaysia) Anglican Church (Gereja Merah), kerina kalak si mbaru reh ialo-alo tuhu alu bersahabat. Kerina jemaat nalami jemaat si mbaru reh tuhu malem ateta. La terpungkiri melala Gereja lanai tandaina deba ise saja si reh. E maka maun-maun orang baru merasa la nyaman reh. Ula lebe jemaat arah Gereja si deban, maun-maun sama-sama GBKP pe la siakap nyaman je.

4) Pertobaten. Salah sada hal si sulit bas kegeluhen enda e me kap menjadi Kristen si otentik (100%). Sebab kegeluhen doni enda megati lalap ngerintak kita guna ndabuh ku dosa. Jemaat Tesalonika awalna labo kalak Kristen, tapi ketika ia jadi kalak Kristen kerina hal si lanai ngena ate Dibata lanai e ikutkenna. La hanya nadingken ritual-ritual si ndekah (adat) tapi pe nadingken kebiasaan si ndekah. Pertobaten menjadi kunci awal bas engkelengi Gereja.

WARI PEENEMKEN (Jumat Tgl. 2 Juni 2017)

Pdt. Jefri Alexander Keliat

Invocatio : “Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak. Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah” (Matius 5:13-14)

Renungen : Daniel 6:1-14

Tema : “Ernanam Man Jelma Si Enterem”

Penjelasen Bahan Pustaka Si Badia & Refleksi

Erti Daniel e me kap “Tuhan kap hakimku”. Kisah Daniel itulisken bas masa pembuangen bangsa Israel. Secara umum kisah Daniel ertujun gelah bangsa Israel tek bahwa perbeben kegeluhen si alamina gundari lit nge kari kedungenna.

Bas ayat 3 kenca ipilih raja gubernur guna ngurus perdalanen kerajaan, maka teridah litna perbedaan hasil pendahin antara Daniel ras gubernur si deban. Tentu menjadi menarik guna jadi penungkunen engkai maka banci kualitas Daniel banci berbeda ras kalak si deban? Adi mulih kita ku bas ayat sebelumna tentu siidah kualitas diri Daniel la lepas arah cara hidup dingen kinitekenna.

Si pemena Daniel termasuk kalak si banci ngaturken dirina. Kalak si banci ngatur dirina nge maka banci ngatur kalak. Adi siidah Daniel kalak si tuhu disiplin guna ngaturken kegeluhenna. Salah sada contoh si jelas e me kap uga Daniel ngaturken carana man. Tuhu disiplin ia ngaturkenca gelah ia sehat.

Si peduaken Daniel tuhu erkiniteken. Kalak si erkiniteken nge maka banci mimpin alu mehuli. Adi siidah bas contoh-contoh pemimpin i doni enda, kerina pemimpin si la megegeh basis kinitekenna labo banci mbaba kemalemen ate man nterem jelma, contoh Hitler. Banci sibandingken ras kalak si secara iman si paguh tentu berbeda kel nanamna man terem jelma si banci iangkatken menjadi contoh tentu Ahok. Ahok pemimpin si erkiniteken ras kinitekenna e jadi dasar kepemimpinenna.

Dua dasar enda me menjadi pembeda Daniel ras pemimpin si debanna. Ras pembeda enda tentu mbaba kemalemen ate kel man Raja. Tapi bas mehuli si ilakoken Daniel e ternyata la kerina erbahanca malem akap si nterem jelma. Melala gubernur si merasa tersaingi arah kai si ilakoken Daniel. Menjadi refleksi kel banta bahwa ketika mehuli sibahan lenga bo tentu erbahanca meriah kap kalak. Labo erkiteken la sikap akapna, tapi erkiteken kai sibahan kita e erbahanca terganggu ia. Kai si ilakoken Daniel mengganggu kerina gubernur. Biasana la pe gegehina erdahin enggo banci tapi erkiteken Daniel tentu pendahinna enggo jadi pandangen.

Kenca enggo iaduken kerina gubernur kerna Daniel situhuna erbahanca latih kel akap Raja. Situhuna enda hal si la biasa sebab posisi Daniel labo orang asli, ia statusna tetap nge kalak buangen. Bicara mate pe Daniel labo min jadi masalah. Tapi man Daniel e aset si luar biasa kel. Bicara je Daniel enggo me melala hal si banci ilakoken. Hal enda mirip kel bagi si terjadi bas negaranta. Melala kel nge si enggo ilakoken Ahok bas Jakarta, tapi kepeken e jadi persoalen man nterem jelma si terusik kenyamanenna. tapi bas kondisi si bage melala nge kalak si situhuna lanai banci tunduh ngukurken ahok. Mirip bagi Raja si lanai tunduh ndai. Tentu penyebabna sebab kai silakoken Ahok enggo tuhu-tuhu mereken kemalemen ate man nterem jelma.

Arah bahanta enda rikutken tema-nta, maka guna banci erguna dingen ernaman maka la banci lang kita harus meningkatkan kualitas diri. Menjadi kalak si banci ipimpin ras erkiniteken man Dibata. Maka guna banci ernanam uga kita mpekena dirina gelah sikap kari nanam si banci ialoken kalak. Sebab kerina manusia pasti mereken nanam man kalak si deban. Hanya saja si menjadi pertanyaanna man kai nge si kari igejapken kalak si deban? Guna banci mereken nanam si mehuli la banci lang sipekena dirita. Mejile ban pupukna, terawat ia gelah entebu pagi nanam si banci sibereken man kalak si deban.

Megati bas mereken nanam man kalak si deban kita lebih mikirken soal kemasen. Adi Natal pangen siakap nasi kotak asa nasi bungkus. Lit lagu Karo kampuh si deka deka tuhu murah kel hergana tapi dimakenca tuhu sikap kel nanamna. Labo rupa nentuken isi. Guna jadi berkualitas isina nge situhuna. Guna menjadi erguna nanam man si nterem nge pada akhirna.

WARI PEPITUKEN (Sabtu Tgl. 3 Juni 2017)

Pdt. Jefri Alexander Keliat

Invocatio : “Kesah Tuhan Si Erdolat lit i babongku. Enggo ipilihNa aku, lako maba berita si mehuli man kalak musil. IsuruhNa aku pepalem kalak si getem pusuhna, meritaken kebebasen man kalak si tertaban, janah kalak si lit bas penjara enggo banci ndarat ia” (Jesaya 61:1)

Renungen : 1 Korinti 2:9-16

Tema : “Kesah Si Badia Mereken Gegeh Ndalanken PedahNa”

Penjelasen Bahan Pustaka Si Badia & Refleksi

Kota Korinti e me kap kota si maju. Cukup beralasen erkiteken uga perkembangen kota bas paksa e. Adi nen ku jaman genduari hampir mirip ras Singapura, kota pelabuhen si sangat sibuk. Erkiteken si e tentu melala hal termasuk pemahamen dingen kiniteken masuk secara bebas ku kota enda. Enda me salah sada tantangen man kalak Korinti bas bahanta enda erkiteken melala pandangen-pandangen si berbeda kel bahkan berseberangen ras kiniteken kalak Kristen situhuna. Enda me latar belakang maka itulisken Paulus surat enda. Paulus ingin mengoreksi pemahaman si e, bahwa kepentaren si tuhu-tuhu e me kap kepentaren bas Dibata nari.

Bas bahanta enda paulus nerangi kerna kepentaren si tuhu-tuhu e rehna bas Dibata nari. Adi sibenai bas ayat 6 Paulus nerangi bahwa kerina kepentaren doni uluna e me kap kemasapen. Ertina i jenda tentu berkaiten kel ras sura-sura daging. Kerina sura-sura daging pada akhirna mbabai manusia ku bas kematen. E maka la banci lang Jemaat Korinti harus waspada sebab adi lalap ikutken kerina pemeteh e kedungenna ndabuh me ia ku bas kematen.

Gelah banci ndatken kegeluhen si tuhu-tuhu harus lit kepentaren bas Dibata nari bas manusia. Hanya saja manusia labo ngasup ngangkaisa kerna kepentaren Dibata e adi la kin litna Kesah si Badia. Kesah si Badia e berarti secara tidak langsung ianggap Paulus sebagai transleter Dibata (bas kalak Yunani “Hermes”). E maka tentu peran Kesah si Badia sangat sentral bas geluh manusia sebab tanpa Kesah si Badia asa dingan pe manusia la ngasup guna ngangkai kerna peraten Dibata.

Berikutna peran Kesah si Badia la hanya erbahan gelah banci ngangkai tapi terdauhen pe banci ka iangkai kai sura-sura Dibata man banta. Menarik enda, sebab kepeken adi la lit Kesah si Badia latih nge siakap kerna er-Dibata. La heran melala kalak si latih kel akapna jadi kalak Kristen, terlalu terbeban ras kerina aturen-aturen kekristenan. Jangan-jangan e terjadi erkiteken lenga sialoken Kesah si Badia bas dirinta sehingga kita terbeban.

Kalak si lit Kesah si Badia ngasup guna ertimbang. Bas bahasa Indonesia kata enda e me kap “menilai”. Ertina arah kata enda maka kalak si lit Kesah si Badia enggo banci guna banci ndauh rukur. Kesah si Badia ngajari kita guna banci ndauh rukur. Salah ada kelemahen kalak Korinti e me kap gendek rukur. E maka sumber pemetehna terjeng pengidahna. Asal cocok akapna mis lakokenna padahal lenga ndauh ukurkenna kerna kai dampakna. Salah sada istilah si genduari sibegiken e me kap “sumbu pendek”. Sumbu pendek e me kap kalak si reaktif, melukah merawa, bas la angkana e pe merawa ia. Kalak si ndauh rukur la pedas merawa tapi bali kuan-kuan kalak Karo ia siksik lebe maka tindes.

Tema-nta mbabai kita guna ngangkai Kesah si Badia e me gegeh. Bas kalak Karo Kesah si Badia e banci andingken bagi anak beru. Anak beru me gegeh man kalimbubu. Bas hubungen ras Kesah si Badia, Kesah si Badia e me sumber gegehta. IA lalap erdahin guna kiniulinta. Tugasta e me kap ngikutken kai nina. Kalak sibegikenna ranan anak beru si keleng atena man kalimbubuna pasti sikap kerja silakokenna. Tapi adi rusuren kin begiken anak beru si la erdahin, si erbuat ngenca atena (kepentaren doni) ujungna e me kap bene. Tuhu melala gundari pengajuk doni si banci mbabai kita guna ndabuh ku bas dosa. Kesah si Badia terdauhen jadi ampang-ampangta guna banci ngelawan kerina kuasa-kuasa si la mehuli e.