PA Kategorial GBKP Tgl. 14 - 20 Mei 2017

PA MORIA GBKP TGL. 14 - 20 MEI 2017

Pdt. Larena br. Sinuhadji (Nd. Rey Tarigan)

Terpenalem : Tanda Ngergai Daging Kula

Si Man Ogen : Ende-enden Salomo 4:1-7 ras I Petrus 3:4

Tema : KINIJELEN KULA RAS PUSUH

Tujun : Gelah Moria :

1) Meteh kinijelen kula ras pusuh

2) Nggit mpekena-kena ras njagai kinijelen ras pusuh

Metode : Aksi & Demontrasi

Penjelasan Bahan Ogen & Renungen

Perikopta e me kap kerna pujian i bas dilaki nari nandangi sekalak diberu (“Pujian man impalna”, i bas Alkitab TB-LAI, “Mempelai laki-laki memuji mempelai Perempuan”). Janah pujian si isehken kerina si berkaiten ras fisik si sangat sempurna. “Seh kel jilena o impalku, seh kel jilena!” Si ipujikenna antara lain :

Mata : Matandu nalsalken keleng ate (matamu bagaikan merpati).

Rambut : Bukndu miap-miap desken rarasen asuh-asuhen (Rambutmu bagaikan kawanan kambing yang bergelombang turun dari pegunungan Gilead).

Gigi : Ipenndu mbentar desken biri-biri i bas permakanen si mbaru denga ipangkas ras iperidi. Beliganna kuh (la ropang), ratur dingen sikap perturahna.

Bibir : Biberndu megara desken pita megara.

Pipi : Pipindu ersinalsal i balik tutup ayondu (pelipismu bagaikan belahan buah delima).

Leher : Kerahungndu desken menara Daud, kibul janah melinang (lehermu seperti menara Daud, dibangun untuk menyimpan senjata. Seribu perisai tergantung padanya dan gada para pahlawan semuanya).

Buah dada : Tentendu bali ras dua anak belkih (seperti dua anak rusa buah dadamu, seperti anak kembar kijang).

I bas ay. 7 penegasen mulihi ibelasken si dilaki man si diberu, “Oh andiko seh kel kam jilena, o impalku, andiko, mberu kal kam” (Engkau cantik sekali manisku, tak ada cacat cela padamu).

Sedangken i bas 1 Petrus 3:4 ilumbaken Petrus gelah si lebih iperdiateken e me kap kinijelen si bas pusuhna rehna (inner beauty, cantik bathin). Sabab rikutken teks, iarapken ndehara banci jadi penyelamat jabuna, khususna perbulangenna si lenga tek, banci kedungenna tek erkiteken karakter si mehuli si lit bas ndeharana. Sabab kinijelen bas pusuh nari, e me kap kinijilen si la ermasap-masap (kekal); lemah lembut dingen ukur tenang (Roh yang lemah lembut dan tentram).

Kelemahlembuten ras ukur si tenang e ulu kinijilen si rehna i bas pusuh nari ras terpancar ku darat, dingen la banci iban-ban. Sedangken kinijelen fisik, enggo pe idempul i salon lenga bo tentu memancar ku darat (erbahanca malem ate si ngidahsa), adi la kin mejile pusuhna. Janah Paulus i bas suratna man perpulungen Korinti (2 Kor 4:16), “Aminna pe kula kami enda reh burukna reh dekahna, tapi ukur kami tep-tep wari i pelimbarui”. Ertina, fisikna rikutken umur pasti reh dekahna reh burukna (gegeh urak, ayo keriput, mata kurang pengidah, cuping kurang pemegi, bahkan si enggo operasi plastik sekali pe, lit nge limitna seh makana la nari kencang mulihi daging kula e bagi si gel-gel). Tapi kinijelen bas pusuh nari, banci tep-tep wari ipelimbarui Tuhan arah KesahNa si Badia. Ertina, asum kita tek man Tuhan, geluh si mbaru enggo sialoken (2 Kor. 5:17) maka i bas kerembakenta ras Tuhan (saat teduh pribadi, Firman Tuhan, doa, persekutuan bersama teman-teman seiman, rsd.) banci ngubahken perukurenta ambah warina reh sikapna.

Tema i bas PA-nta sekali enda “Kinijelen kula ras pusuh”. Ertina, jelas si perlu sipekena kita labo hanya cantik fisik (luar) tapi pe cantik bas pusuh nari (inner beauty). Cantik fisik e penting selaku Moria tapi labo si terpenting kel, seh melala diberu (deba Moria), nggit ngkeriken senna erjuta-juta guna permak ayo ras body, sulam alis, operasi bibir, operasi hidung, operasi dagu, harus ku salon setiap minggu (adi labo bage la ia pede), minum erbage-bage obat guna pelangsing body, rsd. Ertina, la ia ngasup ngaloken kondisi fisik pemere Dibata. Labo berarti la banci kita merawat. Penting untuk terus merawat, mpekena-kena kinijilen fisik, ku salon, make makeup, tetap langsing, olah raga, menjaga pola makan sehat rsd., tapi ula sempat erkiteken mpekena-kena kinijilen fisik, erbahanca lebih besar pasak daripada tiang, kedungenna siabaiken guna mpekena-kena kinijilen pusuh ras ukur. Cantik fisik labo arus meherga : olah raga, menjaga pola makan sehat (bahan PA minggu si nderbih), membersihkan muka, pake deodorant, parfum, rsd. Adi sikap sibahan banta, fisikta pe sehat, ukurta erlayas, sukacita, pasangenta pe reh riahna ukurna natap kita.

Kinijilen pusuh ras ukur e me si perlu ipekena-kena Moria sabab arah si e banci terpancar ku ayonta. Umpamana, melala siidah kalak, potongen ayona biasa-biasa saja, tapi la bosan kita natapsa erkiteken kinijelen pusuhna si terpancar i bas ayona. Bahkan i bas Liturgi Pemasu-masun pe enggo isingetken, “Pemetikndu sebo arah darat ... bagi ngelayamken buk, make barang emas, ruwisken uis mejile tapi manusia sini bas ate alu pemetikna si la ermasap-masap, e me kap ate lemah dingen ukur saber, si meherga i bas pengakap Dibata ras manusia”. E maka kinijelen pusuh : kesabaren, kekelengen, lemah lembut, kepentaren, kinijingkaten, rsd., e me si perlu sipekena i bas dirinta arah kerembakenta ras Tuhan gelah kehadirenta jadi pasu-pasu (berkat) man keluarganta ras kalak si deban i sekelewetta.

PA MAMRE GBKP TGL. 14 - 20 MEI 2017

Nrs. Pdt. L. br. Sinuhadji (Bp. Rey Tarigan)

Mamre Center e me sarana Pembinaan Spiritualitas ras Pemberdayaan Warga

Ogen : Matius 14:13

Tema : MAMRE CENTER GBKP

Tujun Gelah Mamre :

1) Nggejap uga perluna ngelakoken perenungen (meditasi) secara pribadi entah pe kelompok guna peningkaten spiritualitas ras memberdayaken Mamre

2) Erbahan komitmen janah ikut muat bagin mbangun Mamre Center GBKP

Metode : Presentasi ras sharing

Penjelasen Bahan Ogen & Relevansi

Bahan ogenta sendah nuriken kerna Yesus si lawes sisada-sisada tare perahu ku sada ingan si melenget. I bas ayat-ayat Injil si deban : Mrk. 1:35; 6:46; 14:32; Luk. 5:16; 6:12; 9:18; 9:28; 11:1, banci ioge kita maka i bas ingan si melenget e ertoto Yesus. Lit piga-piga hal si banci sicermati i bas bahan ogenta sendah. Si pemena, lit waktu si khusus si iaturkenNa secara teratur guna ngadi kentisik, rikutken ayat-ayat Injil si deban ndai biasana sope IA melayani (erpagi-pagi si lampas) bage pe kenca enggo IA melayani (berngi). I bas si e ertina enggo tuhu-tuhu isikapken Yesus pusuh ukurNa guna erbahan waktu si khusus enda. Si peduaken, lit ingan si khusus, i bas sada ingan entah pe i bas sada uruk si melenget. Ingan si khusus enda penting sebab erpengaruh i bas erkonsentrasi, janah i bas ingan si khusus e banci secara leluasa Yesus ertoto. Si peteluken, i bas waktu-waktu tertentu labo terjeng IA ngenca sisada-sisada lawes ku ingan si melenget, tapi itenahkenNa piga-piga ajar-ajarNa guna radu ras ertoto. Si peempatken, i bas ingan si melenget e mungkin Yesus labo terjeng ertoto, lit je perenungen khusus si ibahanNa guna persikapen pelayanenNa, entah pe evaluasi kerna dahin pelayanen si enggo idahikenNa, tapi si paling penting lit je komunikasi si intensif ras intim ras Dibata i bas waktu si khusus, si erbahanca Yesus datken gegeh si mbaru.

Bahan ogenta bage pe piga-piga ayat i bas Injil si deban nari biasana jadi palas i bas kita ngelaksanaken retreat entah pe meditasi. Maun lit pengangkan si kurang pas antara retreat ras kebaktin padang. Adi retreat biasana lawes kita ku sada ingan si khusus (bagi Retreat Centre GBKP) janah erberngi kita i bas ingan e, sada berngi entah dua berngi dekahna. Sedangken kebaktin padang, lawes kita ku sada ingan guna ngelakoken kebaktin, kenca enggo dung kebaktin e maka mulih kita kerina, la kita erberngi i bas sada ingan e. Retreat, i bas bahasa Inggris nari, pengertinna mundur sejenak i bas rutinitas geluh si tep-tep wari entah pe i bas rutinitas pelayanenta, guna datken penyegaran rohani, mpeteguhi kiniteken si lesu erkiteken rutinitas entah pe perbeben geluh, mengevaluasi kegeluhen kinitekenta, datken pemeteh ras energi (spirit) si mbaru i bas ngalaken perbeben, ngulihken semangat melayani, rsd., si berkaiten ras pertumbuhen spiritualitasta.

Erkiteken enggo lit ingan khusus si enggo ibahan GBKP, bagi PPWG ras Retreat Centre GBKP, kegiaten retreat enda enggo semal ilaksanaken i bas hampir kerina Runggun. Memang adi lenga siteh fungsina bage pe lenga sigejapken manfaatna, bagi si mberat iakap piga-piga kalak guna ngelaksanaken entah pe ikut muat bagin i bas kegiaten retreat enda, padahal Yesus sendiri pe ibahanNa waktu si khusus ras ingan si khusus guna IA retreat. E maka i bas PA-nta sekali enda iajuk kita guna mpebagesi pengangkanta kerna retreat enda. Kerna dasar teologisna akap kami enggo jelas i bas penjelasen i datas bage pe i bas buku PA Mamrenta.

Si pemena lebe mungkin perlu ipebagesi tujun ilaksankenna kegiaten retreat rikutken dasar teologis bage pe pengertin kerna retreat enda. E maka kegiaten enda perlu iaturken entah pe irencanaken ndauh-ndauh wari sebelumna, labo dadakan. Janah materi retreat enda perlu tuhu-tuhu iukurken rikutken kai si jadi kebutuhen Mamre berkaiten ras peningkaten kualitas spiritualitasna. Si peduaken, perlu irencanaken waktu ras ingan si khusus. Waktu ras ingan si khusus enda penting erkiteken sangat mempengaruhi pencapaian tujun retreat enda. Adi kurang pas waktuna tentuna banci mengganggu konsentrasi. Adi ndehersa ingan retreat ras ingan tading, maun-maun melala ka Mamre si mulih. Adi enggo melala si mulih terganggu ka kari peserta si deban si tutus ngikuti retreat enda janah terganggu ka susunen acara si enggo iaturken kita. Iusahaken gelah retreat enda ibahan i bas ingan si khusus guna retreat. Si pentingna i bas si e e me kesiapan pusuh perukuren peserta i bas ngikuti retreat. E maka perlu sibahan sosialisasi si intensif ndauh-ndauh wari sope retreat enda ilaksanaken gelah kerina ersikap. Si peteluken, rikutken dasar teologis bage pe pengertin kerna retreat enda, maka olah rohani arus melala porsina asangken kegiaten si deban. Umpamana, adi i bas PA Mamre enggo rusur ibahan manggang-manggang maka i bas Retreat Mamre arus lit bedana.

PA-nta sendah lit i bas judul “Mamre Center e me sarana Pembinaan Spiritualitas ras Pemberdayaan Warga”, tema-nta sendah “Mamre Center GBKP” alu tujun gelah Mamre : 1) nggejap uga perluna ngelakoken perenungen (meditasi) secara pribadi entah pe kelompok guna peningkaten spiritualitas ras memberdayaken Mamre; 2) erbahan komitmen janah ikut muat bagin mbangun Mamre Center GBKP. Akap kami semakin melala ingan khusus guna retreat enda semakin melala variasi i bas kita ngelaksanaken retreat guna peningkaten spiritualitasta, e maka perlu radu ras sidukung Mamre Center GBKP. Mungkin si perlu iukurken terdauhen e me metode retreat si bervariasi ras kreatif si banci sitawarken Mamre Centre GBKP.