Khotbah GBKP Minggu Tgl. 8 Januari 2017

KHOTBAH GBKP MINGGU TGL. 8 JANUARI 2017

Pdt. Larena br. Sinuhadji (Nd. Rey Tarigan)

KENCA TAHUN BARU (Epiphanias I)

(Warna Stola : Mbentar)

Invocatio : “I tengah-tengah bangsa e nari reh me pagi penguasa, peminpin bage pe puanglima si ngaturken bangsangKu” (Sakaria 10:4)

Ogen : Masmur 29:1-11 (Tunggal)

Khotbah : Matius 3:13-17 (Tunggal)

Tema : YESUS ME ANAK KEKELENGEN DIBATA

Penjelasen Bahan Pustaka Si Badia

Invocationta e me salah sada nubuaten i bas nabi Sakaria nari (Zakharia, ertina : “Tuhan mengingat”). Nubuaten enda isehken i bas konteks bangsa Israel si mbaru denga mulih i bas taneh pembuangen Babilonia nari. Paksa si e lenga lit peminpin, erkiteken Israel merupaken salah sada provinsi i bas kekuasaan kerajan Persia. Pembangunen Rumah Pertoton si mbaru i Jerusalem ngadi erkiteken kote denga bangsa e kenca mulih Babilonia nari. I bas konteks si bagenda nubuaten nabi-nabi paksa si e termasuk i bas Sakaria nari tentuna mabai semangat si mbaru man bangsa e. I bas kinitekenta, tek kita maka nubuaten Sakaria enda enggo igenapi i bas diri Yesus Kristus.

Bahan khotbahta e me peridin man Yesus si ilakoken Yohanes Peridiken. Yohanes Peridiken e me sekalak persuruhen Dibata si nikapken dalan man Mesias. I bas rangka nikapken dalan man Mesias e, ipesehna berita i bas Dibata nari kerna pertobaten janah iperidinna kerina kalak si tek nandangi berita e ras ngakuken dosa-dosana (bdk. Mrk. 1:1-7; rsd.). Arah tugas tanggung jawab si ibereken Dibata man Yohanes Peridiken enda jelas maka si iperidikenna e me kerina kalak si ngakuken dosa-dosana ras ertobat (jera). Tapi i bas bahan khotbahta Yesus iperidiken Yohanes Peridiken. Kai enda antusenna? Si pemena lebe, i bas ay. 14 secara tersirat Yohanes Peridiken ngakuken maka Yesus e me Mesias. Si peduaken, i bas ay. 15 ngaloi Yesus nina, “sidalanken kai si ngena ate Dibata”, i bas bhs. Ind., nina, “melakukan semua yang dikehendaki Allah” (“kehendak Allah” i bas bhs. Yun., dikaiosunè, ertina : suatu cara hidup sesuai dengan kehendak Allah). Yesus mereken contoh nggeluh sue ras peraten Dibata, merendahkan diriNa sebage manusia alu iperidiken Yohanes Peridiken sebage langkah awal ibenakenNa misiNa i tengah-tengah doni enda. Si peteluken, langkah awal misiNa i tengah-tengah doni enda ibenaken alu pentahbisen Yesus sebage : “Kristus” (yang diurapi Roh Kudus), Mesias (Juruselamat), Anak Dibata (kekelengen Dibata), penegasen kerna keilahian Yesus, Dibata si jadi manusia reh ku doni guna maba keselamaten holistik (bdk. ay. 16-17), IA nge si arus siikutken bagi si iberitaken Yohanes Peridiken.

Ogenta ngerana kerna Dibata si erdolat nandangi kerina tinepaNa. Kedolaten mutlak Dibata enda labo saja teridah arah kuasaNa si icidahkenNa alu kebebasenNa ngelakoken kai pe si isurakenNa nandangi alam tinepaNa, tapi icidahkenNa maka IA ulu gegeh, kedamen, ras pasu-pasu man kerina kalak si tek man baNa. I bas kedolaten Dibata enda, enggo sepatutna kerina isi doni muji ras mpermuliaken gelarNa alu tunduk ras taat man baNa.

Pengkenaina

Minggu enda bengket kita ku bas Minggu Epiphanias (cara ngogeken si payo e me “Epifanias”), ibuat i bas bhs. Yunani nari, epiphaneia, ertina : menyatakan entah pe memperlihatkan. Epifani i bas tradisi Gereja Barat, awalna e me peringeten kerna guru-guru i Timur nari si ndarami Raja si enggo reh alu tanda bintang Betlehem (Mat. 2:1-11). Arah bintang (terang) enda guru-guru i Timur nari (si labo kalak Jahudi) jumpa ras Yesus Kristus. Emaka Epifani e me terang ras wahyu Dibata si menyataken diriNa i bas wujud manusia, e me Yesus Kristus, si reh ku tengah doni enda man kerina isi doni, labo man kalak Yahudi saja. I bas minggu Epifanias enda kita pe iajuk gelah terang si nuduhken dalan ku Yesus Kristus arah kerina pengkebet geluhta.

Terang si uga? Kerina bahan Pustaka si Badianta sendah mereken penjelasen kerna Terang e. Terang e enggo leben inubuatken nabi Sakaria, IA sekalak i bas bangsa Israel nari Si ngaturken bangsaNa alu kekelengen, kebenaren, keadilen, rsd. Terang e enggo igenapi i bas Yesus, Kristus, Mesias, Juruselamat, Anak Si nikelengei Dibata, Si jadi teladan man banta alu ngelakoken kerina si jadi peraten Dibata (diakosunè). I bas diri Yesus Kristus lit kedolaten Dibata, erkuasa, ulu gegeh, kedamen, ras pasu-pasu. Yesus Kristus enda si arus siikutken alu tunduk ras taat. Ertina, adi Terang e lit bas pusuh perukurenta maka i bas dirinta lit potensi guna ngelakoken kekelengen, kebenaren, keadilen, ras kerina si mehuli si jadi peraten Dibata alu kiniteruken ukur, kesetian, ketaaten man Dibata.

Yesus Kristus e me Anak kekelengen Dibata, ertina Yesus Kristus e me Dibata sendiri, erkuasa, ras erdolat i bas kerina tinepaNa. I bas sada sisi tema-nta sendah ngajuk kita gelah ngakuken kedolaten Yesus Kristus i bas kegeluhenta sebage Dibata, satu-satunya sumber kehidupan, satu-satunya pedoman, satu-satunya keselamatan. Si peduaken, kerina kalak si ngakuken Yesus Kristus sebage Tuhan ras Juruselamat, ikelengi Dibata jadi anak-anakNa ras iutus guna ngelakoken kerina si jadi peraten Dibata jadi saksiNa ku sekelewetna. Yesus Kristus enggo ncidahken dikaiosunè, ngelakoken kerina si jadi peraten Dibata, bahkan ngenanami kiniseran seh ku kematenNa i kayu persilang. Tapi IA ngasup ngalaken kiniseran ras kematen i bas statusNa sebage manusia biasa bagi kita. Kita pe ipengasup Dibata arah Kesah si BadiaNa si lit bas kita guna ngelakoken perobahen i bas geluhta, ipengasupNa kita ngalaken kerina kiniseran erkiteken ersaksi kerna Kristus, ras ipengasupNa kita guna nehken kekelengen ku sekelewetta.

Tahun si mbaru enda merupaken bukti pengkawali Dibata i bas kegeluhenta. Enggo piga kali tahun baru ialami kita, sedekah e nge Dibata berkarya i bas geluhta. Tek kita i bas wari-wari si reh enda pe tetap Yesus Kristus jadi Terang, si nerangi geluhta, mengarungi kerina si bakal ialami kita i bas tahun enda : susah - senang, sakit- sehat, gagal - sukses, tawa - tangis, rsd. Tading uga kita merespon pendilo Dibata i bas geluhta. Dibata si masu-masu ras mpegegehi kita sedekah tahun 2017 enda.