Khotbah GBKP Minggu Tgl. 15 Januari 2017

KHOTBAH GBKP MINGGU TGL. 15 JANUARI 2017

Pdt. Larena br. Sinuhadji (Nd. Rey Tarigan)

EPIFANIAS II

(Warna Stola : Mbentar)

Invocatio : “Surat enda i bas aku nari, Paulus si enggo ipilih Dibata jadi rasul Kristus Yesus. Aku isuruhNa pembarken kegeluhen si ipadanken guna ialoken i bas persadanta ras Kristus Yesus” (2 Timotius 1:1)

Ogen : 1 Korinti 1:1-9 (Tunggal)

Khotbah : Jesaya 49:1-7 (Responsoria)

Tema : KITA IPILIH JADI TERANG MAN BANGSA-BANGSA

Penjelasen Bahan Pustaka Si Badia

Invocationta e me kata perlebe rasul Paulus i bas suratna si peduaken man murid rohanina Timotius. Kata perlebe si seri itulisken rasul Paulus i bas surat-suratna si deban, alu penegasen maka status kerasulenna e me i bas Dibata nari guna pembarken kegeluhen si mbaru (keselamaten) erkiteken persadanna ras Kristus Yesus. I bas Perb. Rasul 9:15-16 ituriken maka Paulus ipilih Dibata guna mpetandaken Yesus Kristus man bangsa-bangsa si deban. Janah enggo terbukti, amin pe Paulus labo termasuk i bas 12 ajar-ajar Yesus si isebut rasul-rasul, tapi arah kegeluhenna kenca enggo ia ipilih Dibata, berita keselamaten enggo seh ku bangsa-bangsa si deban.

Ogenta ncidahken maka Paulus ndahiken tugas pelayanenna alu tutus. Ia tetap menjalin relasi si mehuli ras perpulungen Korinti arah surat-surat si ikirimkenna. I bas Perb. Rasul 18:1-18 ituriken maka Paulus pernah tading i Korinti sada setengah tahun guna meritaken Berita si Meriah man bangsa-bangsa si deban. Kenca enggo itadingkenna Korinti tetap denga iberitakenna Kata Dibata arah surat-suratna man perpulungen i Korinti. I bas ogenta, ngataken bujur rasul Paulus man Dibata erkiteken perpulungen Korinti semakin berkembang i bas kinitekenna man Yesus Kristus, janah ipegegehina perpulungen Korinti gelah terus bertumbuh i bas Kristus.

Bahan khotbahta e me kesaksin, pergegeh, ras pengarapen i bas nabi Yesaya nari man bangsa Israel si mbaru denga mulih i bas tanah pembuangen i Babilonia nari. Kesaksin nabi Yesaya i bas ia enggo idilo Dibata jadi suruh-suruhenNa guna negu-negu bangsaNa mulih, nina, Dibata si mbela ia, ibereken Dibata upah i bas kelatihenna, ipermuliaken Dibata ia, janah Dibata sumbul gegehna (ay. 4,5). Ibahan Dibata nabi Yesaya jadi terang gelah keselamaten seh man bangsa doni kerina (ay. 6). Pergegeh ras pengarapen isehken nabi Yesaya man bangsa Israel, lit paksana maka Dibata Penebus mulahi, njaga kawali bangsaNa (ay. 7 rst.).

Aplikasi

Tema si seh man banta i bas wari Minggu sendah e me : “Kita ipilih jadi terang man bangsa-bangsa”. I bas minggu Epifanias si peduaken enda mulihi kita isingetken kerna pilihen Dibata man kerina kalak si tek man baNa i bas Yesus Kristus. Kita ipilih Dibata guna jadi terang man sekelewetta. Terang e me simbol keselamaten i bas Yesus Kristus.

I bas invocationta bage pe i bas bahan ogenta si pemena, Paulus ipilih Dibata jadi suruh-suruhenNa, jadi rasulNa. Pilihen Dibata man Paulus labo pilihen si salah entah pe asal pilih saja. Dibata meteh maka Paulus ngasup mengemban tugas meritaken Berita si Meriah man kalak Yahudi khususna man kalak i bas bangsa-bangsa si deban nari seh ku kedungenna. Arah Paulus nge maka berita keselamaten seh man banta. I bas sisi si deban, Paulus tuhu-tuhu menyadari tugas tanggung jawabna sebage rasul si iutus guna maba kabar keselamaten man bangsa-bangsa si deban. Lang situhuna banci saja rasul Paulus mengambil zona nyaman, iperentahkenna ajar-ajarna guna meritaken Berita si Meriah, umpamana. Tapi la bage ibahanna. Erdalan ia ribuan kilometer, ngadapi melala tantangen, ngenanami erbage-bage kiniseran i bas ndalanken tugas tanggung jawabna sebage rasul. I bas ogenta teridah maka Paulus tetap menjalin relasi si mehuli ras perpulungen i Korinti, sempat denga ia erbahan surat si isina pengajaren-pengajaren, pergegeh, rsd.

I bas bahan khotbahta, nabi Yesaya tuhu-tuhu nggejapken uga belinna kuasa Dibata i bas ia ndalanken tugas tanggung jawabna sebage sekalak suruh-suruhen Dibata amin pe melala tantangen si nihadapina. Igejapkenna tuhu-tuhuu maka i bas bertin nari Dibata enggo milih ia jadi suruh-suruhenNa. Emaka idalankenna tugas tanggung jawabna alu tutus. Isaksikenna maka i bas ia ndalanken tugas tanggung jawabna sebage suruh-suruhenNa, iperlengkapi Dibata ia, ibela Dibata ia, ibereken Dibata upah i bas kelatihenna, ipermuliaken Dibata ia, janah iakukenna maka Dibata sumbul gegehna. Terbelinen asa si e, ipercayaken Dibata ia jadi terang man bangsa-bangsa si deban.

Arah kesaksin rasul Paulus ras nabi Yesaya enda, iajuk kita gelah tuhu-tuhu nggejapken, menyadari, maka kita enggo ipilih Dibata jadi terang man sekelewetta. Pilihen Dibata man banta labo pilihen si salah, entah pe asal pilih. Lang! Dibata meteh maka lit i bas kita potensi guna meritaken Berita si Meriah arah kerina karunia si ibereken Dibata arah Kesah si BadiaNa i bas dirinta. Alu bage ipegegehiNa kita ndalanken tugas tanggung jawabta sebage terang si maba berita keselamaten i bas Yesus Kristus ku tengah-tengah sekelewetta arah pengerananta, cara rukur, gaya hidup, rsd. Tek kita bagi kesaksin nabi Yesaya, iperlengkapi Dibata kita, ibela Dibata kita, ibereken Dibata upah i bas kelatihenta, ipermuliaken Dibata kita, janah Dibata sumbul gegehta. Ertoto kita gelah Dibata si mpegegehi kita jadi terangNa.