Khotbah GBKP Minggu Tgl. 22 Januari 2017

KHOTBAH GBKP MINGGU TGL. 22 JANUARI 2017

Nrs. Pdt. Larena br. Sinuhadji (Bp. Rey Tarigan)

MINGGU EPIFANIAS III

(Warna Stola : Mbentar)

Invocatio : “Mekuahlah ateNdu man bangku suruh-suruhenNdu, maka alu bage banci aku nggeluh ngikutken ajarNdu” (Masmur 119:17)

Ogen : Masmur 27:1,4-9 (Responsoria)

Khotbah : Matius 4:18-25 (Tunggal)

Tema : IKUTKENLAH AKU

Penjelasen Bahan Pustaka Si Badia

Masmur 119 ibenaken alu pengakun Pemasmur maka kalak si geluhna la erpandangen, si ngikutken undang-undang ras perentah-perentahNa, si ndarami IA alu bulat ukur, si erdalan i bas dalan TUHAN, e me kalak si malem kel atena (berbahagia). Erpalasken pengakun kinitekenna enda, i bas invocationta, mindo kel Pemasmur gelah ibereken Dibata denga kesempaten guna ngikutken kerina si iajarken Dibata. Bagi kurang denga akapna umur nggeluhna erkiteken enggo inanamina kemalemen ate si tuhu-tuhu i bas ia erkiniteken ras erlajar kerna Kata Dibata.

I bas ogenta teridah maka Daud (Pemasmur), si secara doni enda statusna enggo seh ku tingkat si meganjangna, ia raja Israel, melala ertana, kai pe la kurang bas ia menurut ukuren doni, tapi kurang denga akapna i bas ia erkiniteken man Dibata. Emaka nina, sada ngenca pemindonku man TUHAN, sada ngenca sura-surangku e me ringan i bas Rumah TUHAN kidekah geluhku guna nggejapken kiniulin TUHAN dingen mindo gelah itegu-teguNa. Enggo igejapkenna maka erkiniteken man Dibata lebihen gunana asangken status ras kinibayaken si enggo idatkenna, maka erlajar atena rusur kerna Kata Dibata, em enggo jadi prioritas i bas geluhna.

Bahan khotbahta nuriken kerna Yesus si ndilo empat kalak penjala nurung guna jadi ajar-ajarNa. E me terjadi tangtangna Yesus menaken pelayanenNa i tengah-tengah bangsa Israel. Ajar-ajarNa si empat kalak e me : Simon, Andreas, Jakup ras Johanes. Lit piga-piga poin si banci idatken kita i bas bahan khotbahta sendah e me : 1) Alu wibawaNa, Yesus ndilo penjala nurung ndai seh makana la lit kata kai pe si ibelasken empat kalak e, mis itadingkenna dahinna guna ngikutken Yesus. I bas sada sisi Yesus ncidahken pengaruhNa si mehuli man kalak si deban. Banci ka iertiken maka Yesus makeken kuasaNa sebage Dibata guna ngerobah kalak si deban. Tapi sosok pribadi Yesus tentuna mempengaruhi pertimbangen empat kalak ndai guna ngikutken IA. I bas sisi si deban, enggo leben itandai empat kalak ndai ise Yesus e, Kitab Injil Yohanes bindu sada mereken keterangen kerna si e. 2) Keputusen empat kalak penjala nurung ndai guna ngikutken Yesus banci iertiken sebage simbolisasi perobahen ku kegeluhen si mbaru. Banci ka iertiken sebage simbolisasi kiniteruken ukur, pengorbanen, ras ketutusen i bas ngikutken Yesus. 3) Penjala nurung ipilih Yesus jadi ajar-ajarNa, banci iertiken maka pilihen Yesus e me pilihen si la memandang status sosial, ise pe banci ipilihNa jadi ajar-ajarNa. I bas sudut pandang karakteristik pendahin sebage penjala nurung, banci ka iertiken maka pilihen Yesus membutuhken kriteria kejelian, kesabaren ras ketekunan i bas ndilo kalak si deban jadi ajar-ajarNa.    

Aplikasi

Lit sekalak teman si ngatakenca bagenda nina, sada pinakit si mekelek i bas piga-piga kalak Karo (labo kerina), e me merhat kel jadi ingan penggurun. I bas kerina status sosial ras tingkaten pendidiken (musil entah bayak, si la pernah sekolah seh ku Profesor Doktor) lit kalak Karo si bage, nina. Iteruskenna, adi tuhu banci jadi ingan penggurun labo dalih yah, tapi i bas kinatana melala si kebalikenna, jadi ingan penggurun ningen tapi la terpenggurui, adi iajarken la terajarken, ia akapna si beluhna i bas kerina hal. Entah payo entah lang si nikatakenna e, tapi adi lit denga kalak Karo Kristen si bage, tentuna perlu siperobahi, sebab la lit ise pe kita manusia si ngasup (meteh/beluh) menguasai kerina si lit i bas doni enda, Tuhan ngenca ingan penggurunta. Sebage kalak si enggo idemi Kesah si Badia, tentuna biak kiniteruken ukur lit bas kita, baik i bas pergaulenta bage pe i lebe-lebe Dibata.

Enggo sada minggu enda kita ngelaksanaken Pekan Penatalayanen, i bas Pekan Penatalayanen sekali enda, iajukna kita gelah erlajar secara mandiri. Salah sada karakteristik pembelajar yang baik e me lit biak kiniteruken ukur. Biak kiniteruken ukur enda lit i bas Pemasmur entah pe Daud. Kiniteruken ukurna mabai ia nggit erlajar man Dibata. Bahkan igejapkenna kurang denga umur geluhna i doni enda erkiteken merincuh kel ia erlajar ngelakoken kai si jadi peraten Dibata.

I bas bahan khotbahta, Yesus ndilo empat kalak penjala nurung guna jadi ajar-ajarNa. Engkai maka nggit si empat kalak e jadi ajar-ajar Yesus? Si pemena lebe, erkiteken memang Yesus layak jadi Guruna. Enggo itandai empat kalak e maka Yesus e me Mesias, utusen Dibata guna maba berita keselamaten i doni enda. Emaka man banta si enggo ipercayaken Tuhan jadi SerayanNa, layak jadi teladan e me salah sada syarat pembelajaran yang baik. Si peduaken, lit kiniteken ras biak kiniteruken ukur i bas si empat kalak e, maka nggit iajari Tuhan Yesus. Adi la tek itambahi ka alu meganjang ukur, tentu la nggit si empat kalak e jadi ajar-ajarNa. Apai ka arus itadingkenna kenyamanenna (zona nyaman) hanya untuk mengikut Yesus. Emaka i bas erlajar kerna Kata Dibata si niperluken selain tek ras kiniteruken ukur e me berani mencoba hal yang baru dan bernyali untuk meninggalkan zona nyaman.

Tema si seh man banta i bas wari Minggu sendah e me : “Ikutkenlah Aku”. Akap kami enggo iangkai kita kai maksudna tema enda. Ngikutken Yesus ertina, nggit kita jadi ajar-ajarNa, nggit kita erlajar kerna KataNa, ras nggit kita ngelakoken kerina si jadi peraten Dibata i bas kegeluhenta. Hal enda tentuna menjadi bahan evaluasi man banta sekalak-sekalak. La lit ajar-ajar si terganjangen asangken guruna. Ertina, adi tuhu kin Yesus Kristus ingan penggurunta, maka iteh kitalah i ja posisinta : meteruk ukurlah kita, tek kita maka kerina si iajarkenNa e mabai kita ku kemalemen ate (kebahagiaan) amin pe melala perbeben si nihadapi kita, pang kita mencoba hal-hal baru si niajarken Yesus Kristus arah kita erlajar man baNa, ras pang kita meninggalkan zona nyaman kita hanya untuk belajar lagi dan melakukan kehendak Tuhan i bas geluhta. Umpamana, nina Yesus, alemilah kalak si enggo erbahan salah man bandu. Adi karakteristikta murid si ganjangen asangken Gurunta, enggo pasti pengajaren Yesus e la teraloken kita, iban kita ka melala alasen (logis - analitis - teologis) gelah banci isilahken perentah Yesus e. I bas zona nyamanta pe mungkin ikataken kita i bas pusuhta, man kai ngalemi kalak si bage rupana, erbahanca latih saja, rsd. Mari radu ras kita ertoto gelah Kesah si Badia mpengasup kita ngikutken Yesus, belajar untuk melakukan kehendakNya, segedang geluhta.