PJJ GBKP Tgl. 22 - 28 Januari 2017

PJJ GBKP TGL. 22 - 28 JANUARI 2017

Nrs. Pdt. Larena br. Sinuhadji (Bp. Rey Tarigan)

Tema : CIDAHKEN KINITEKENNDU ARAH PERBAHANENNDU (Yes. 6:8; Roma 13:8)

Penjelasen Bahan Ogen & Renungen

Bahan ogenta si pemena, Yesaya 6:8, akap kami enggo rusur sibegi entah pe sioge kita, e me kerna pendilo Tuhan man nabi Yesaya, “Kenca bage kubegi Tuhan ngerana nina, “Ise ndia Kusuruh? Ise ndia nggit maba berita i bas Aku nari?” E maka ningku ngaloi, “Aku, suruhlah aku!” I bas Alkitab bahasa Ind. TB-LAI nina, “Lalu aku mendengar suara Tuhan berkata: “Siapakah yang akan Kuutus, dan siapakah yang mau pergi untuk Aku?” Maka sahutku: “Ini aku, utuslah aku!” I bas kinata geluh nabi Yesaya memang tuhu ilaksanakenna pendilo Dibata e seh ku kedungenna. Pendilo Dibata, respon nabi Yesaya, ras kinata geluhna sidalanen.

Bahan ogen si peduaken, kurang jelas i bas buku PJJ-nta. Adi sioge buku PJJ-nta lit je ikataken “rutang sikeleng-kelengen”. I bas surat Roma lit 4 ayat si mengandung kata “rutang” e me : Roma 1:14; 8:12; 13:8; ras 15:27, janah si pas kel “rutang sikeleng-kelengen” lit i bas Roma 13:8. Adi payo ayat si e si nimaksud, kai si ikataken rasul Paulus e lit i bas perikop alu judul “Sikeleng-kelengen”, adi bas Alkitab bhs. Ind. TB-LAI nina “Kasih adalah kegenapan hukum Taurat”. I jenda iban kami ay. 8-9 alu arapen semakin jelas maksudna, “Ola kam rutang man ise pe -- seakatan rutang sikeleng-kelenglah sapih-sapih kam. Kalak si erkeleng ate nandangi kalak si deban, ia enggo nehken Undang-undang. Sabap ... kerina si enda ras pedah-pedah si debanna ipersada i bas pedah si sada enda, e me, “Kelengilah temanndu manusia bagi kam engkelengi dirindu”. Kai enda antusenna? Adi rutang sen kita man sekalak teman, umpamana, e wajib idungi. Tapi adi sikeleng-kelengen ula min sempat lit kedungenna, ertina arus terus silakoken man ise pe. Umumna adi lit utangta man teman tentu geluhta pe la tenang, lalap siukuri uga carana banci silunasi utangta ndai. Bage min i bas sikeleng-kelengen arus lalap lit i bas pusuh ukurta : uga carana gelah banci kita nehken kekelengen man kalak si deban? Adi enggo lalap lit perukuren uga caranta gelah banci nehken kekelengen man kalak si deban ras tuhu-tuhu silakoken, kita enggo ngelakoken undang-undang si iajarken Yesus, e me “Kelengilah temanndu manusia bagi kam engkelengi dirindu”.

Tema si seh man banta i bas PJJ-nta si pemena i bas tahun 2017 enda e me : “Cidahken kinitekenndu arah perbahanenndu”. Akap kami kerina si iajarken Tuhan Yesus man banta labo hanya sebatas meteh ngenca tapi si paling penting e me ngelakoken kai si enggo iajarkenNa e. Umpamana i bas Mat. 7:12 ras 21, nina Yesus, “Bahanlah man kalak si deban bagi ngena atendu ibahanna man bandu”, “Kalak si ngelakoken rikutken si ngena ate bapangKu i Surga nge bengket ku bas Kinirajan e”. I bas pedah-pedah si ibereken rasul-rasul pe seri bagi si niajarken Tuhan Yesus, umpamana Jakup 2:17, rsd. Ertina, Kristen e enggo leket i bas identitasta. Identitas e labo terjeng gelar, merga entah beru, dilaki entah diberu, pendahin, alamat, rsd., tapi arah pengkebet geluhta kalak si deban nandai maka kita enda kalak si enggo iselamatken i bas Yesus Kristus. Idealna secara otomatis pengkebet geluhta sue ras identitasta sebage kalak Kristen. Nabi Yesaya jadi teladanta, pendilo Dibata, respon nabi Yesaya, ras kinata geluhna sidalanen.

Sikeleng-kelengen e me identitas Kristen si paling menonjol erkiteken e nge si iajarken ras ilakoken Yesus. Janah e nge palas i bas kita ngelakoken kai pe i bas kegeluhenta, palasna e me kekelengen Yesus Kristus. Kekelengen si uga? Sebab melala definisi kekelengen enda i bas doni enda. Keleng ate Kristus si nggit erkorban guna kiniulin kalak si deban tanpa ngarapken balasen, keleng ate Kristus si pang mempertahaken si benar sue ras Kata Dibata, Keleng ate Kristus si megenggeng i bas ngalaken perbeben, lit keriahen, lit kemalemen ate, lit kesabaren, proaktif erbahan si mehuli, mehuli i bas kai pe, setia, meteruk ukur, sabar, ngasup engkuasai diri, rsd. Sekalak penulis i bas Amerika Serikat nari, Oscar Hammerstein ngatakenca, “A bell is no bell until you ring it. A song is no song until you sing it. And love in your heart wasn't put there to stay. Love isn't love until you give it away”, intina, kekelengen e labo kekelengen adi la sibereken man kalak si deban. Tahun 2017 enda paksana kita erlajar ngelakoken kai pe si jadi peraten Dibata, em tekadta. Ertoto kita gelah Kesah si Badia mpegegehi ras mpengasup kita ncidahken kinitekenta arah perbahanenta.