Pekan Penatalayanen GBKP Tgl. 15 - 21 Januari 2017

PEKAN PENATALAYANEN GBKP TAHUN 2017

Pdt. Larena br. Sinuhadji (Nd. Rey Tarigan)

TEMA UMUM :

“Nandai Dibata Muat Bagin I Bas DahinNa” (Berteologi : Belajar Untuk Melakukan - Mat. 28:20; 2 Kor. 8:4)

WARI PEMENA (Minggu Tgl. 15 Januari 2017)

Invocatio : “Alu meseksek ipindokenna man kami gelah ibereken kesempaten man bana guna ikut muat bagin i bas nampati kalak Kristen si i Judea” (2 Korinti 8:4)

Ogen : Ulangen 29:10-15

Renungen : Matius 28:20, 2 Korinti 8:1-15

Tema : “Nandai Dibata, Muat Bagin I Bas DahinNa” (Berteologi : Belajar untuk Melakukan)

Penjelasen Bahan Pustaka Si Badia

Ogen si pemena (Ul. 29:10-15) masuk i bas perikop alu judul “Perpadanen TUHAN man Israel i negeri Moap”, i bas bhs. Ind., nina, “Perjanjian dengan Allah diperbaharui”. Perpadanen TUHAN man Israel enda penting iulih-ulihi isingetken Musa man bangsa Israel gelah generasi si mbaru (danak-danak), bangsa-bangsa si deban, ras kerina kesusuren si lenga tubuh (ay. 11,15), nandai Dibata ras perpadanenNa man bangsa Israel. Isi perpadanen e, “itetapken TUHAN kam selaku bangsaNa ras Ia Dibatandu, sue ras si ipadankenNa man bandu ras man nini-ninindu Abraham, Isak, ras Jakup” (ay. 13). I bas ay. 12, perpadanen e mengandung konsekuensi tanggung jawab (kewajiban) i bas bangsa Israel nari e me, ngkelengi Dibata alu nembah, patuh man Dibata, ras setia ngelakoken kerina si jadi peraten Dibata.

I bas Padan si Mbaru, perpadanen Dibata ipelimbarui, sue ras si enggo inubuatken nabi Jeremia (31:31-37), i bas Yesus Kristus (bdk. Mat. 26:28). Ertina, ise pe si tek ras ngakuken Yesus Kristus sebage Tuhan ras Juruselamat, enggo masuk i bas perpadanen ras Dibata. Kiniteken man Yesus Kristus mengandung konsekuensi ndahiken kerina si jadi peraten Dibata i bas Yesus Kristus. Umpamana, hukum kasih i bas Mat. 22:37-40, rsd. I bas bahan renungenta sendah, Tuhan Yesus nehken perentah-perentahNa man ajar-ajarNa (Amanat Agung) gelah idahiken, isina : 1) Laweslah ku kerina bangsa manusia, bahanlah ia jadi ajar-ajarKu : Peridiken ia i bas gelar Bapa, gelar Anak, ras gelar Kesah si Badia; 2) Ajari ia ngikutken kerina si enggo Kupedahken man bandu. Dibata tetap nemani ras ngkawali ajar-ajarNa ndahiken perentah-perentah enda seh ku kedungen jaman.

Perpulungen-perpulungen i Makedoni meseksek ipindokenna man rasul Paulus kesempaten guna ikut muat bagin i bas nampati kalak Kristen si i Judea. Padahal radu ras siteh uga keadaan perpulungen i Makedoni. I bas bahan renungenta, icidahken rasul Paulus situasi si nialami perpulungen i Makedoni : ngenanami kiniseran-kiniseran si mesangat ras musil (ay. 2, i bas Alkitab Bahasa Indonesia nina, “sangat miskin”). Tapi justru i bas kiniseran ras kemusilen si nialamina, alu ukur ersuruh, perpulungen Makedonia ermeriah ukur mere penampat man kalak Kristen i Judea. Berbanding terbalik ras perpulungen Korinti si sampur i bas kai pe, tapi arus lebe iajuk maka ersuruh ukurna guna mere penampat. Kuncina i bas ay. 5, iendesken perpulungen Makedoni dirina man Tuhan. Jenari, alu peraten Dibata, iendeskenna pe dirina man kami (rasul-rasul). Pemetehna kerna lias ate Yesus Kristus (ay. 9) mpengasup guna erkeleng ate ras nampati kalak si deban si lit i bas kiniseran. Ertina, pengendesen perpulungen Makedoni man Dibata ras man rasul-rasul (nggit iajari), bage pe pemetehna kerna lias ate Yesus Kristus mabai perobahen si tuhu-tuhu i bas kegeluhen perpulungen Makedoni seh maka idahikenna kai si jadi peraten Dibata i bas Yesus Kristus. I bas kondisi, situasi, si kugana pe, tetap ermeriah ukur.

Aplikasi

Tema si seh man banta i bas Pekan Penatalayanen GBKP tahun 2017 wari pemena enda e me : “Nandai Dibata, Muat Bagin I Bas DahinNa” (Berteologi : Belajar untuk Melakukan). Ngajuk kita gelah si pemena lebe, nandai Dibata. Si peduaken, ikut muat bagin i bas dahinNa. Penungkunenna, enggo nge sitandai Dibata si isembah kita i bas Yesus Kristus? Adi enggo, kai buktina? Tentuna arah pengalamenta erkiniteken sebage kalak Kristen, enggo melala nge pemetehta kerna Yesus Kristus. E pe adi rajin kita ngoge Pustaka, buku-buku Kristen, rsd., bage pe rajin kita ngikuti kegiaten-kegiaten i bas Gerejanta. Bukti paling nyata tentuna arah pengkebet geluhta : cara rukur, pengerana, tingkah laku, rsd. Sebab nandai Dibata labo saja meteh ise Yesus Kristus, tapi pe iteh kita kai si jadi sura-sura Yesus Kristus, bage pe berusaha ndahiken (ngelakoken) kerina si jadi sura-sura Dibata i bas Yesus Kristus.

Selaku kalak si tek man Yesus Kristus, kita enggo bengket ku bas perpadanen ras Dibata. Konsekuensina, iajuk kita guna ndahiken kerina si jadi peraten Dibata i bas Yesus Kristus. I bas bahan renungenta, iajuk kita gelah erlajar ngikutken kerina si ipedahken Yesus Kristus. Perpulungen Makedoni jadi usihen man banta sebab la lit kengasupenta guna ndahiken kerina si jadi peraten Dibata. Emaka endeskenlah dirinta man Dibata, nggit kita erlajar mperobahi kerina si la sue ras Kata Dibata, tek kita maka Dibata arah Kesah si BadiaNa mpegegehi kita guna ngasup ndahiken kerina si jadi peratenNa.

WARI PEDUAKEN (Senin Tgl. 16 Januari 2017)

Invocatio : “Batang si mehuli tentu mehuli nge buahna, tapi batang si la mehuli tentu pe la mehuli buahna” (Matius 7:17)

Ogen : 2 Raja-raja 4:8-17

Renungen : Matius 7:21-23

Tema : “Nandai Dibata, Ndalanken Sura-suraNa” (Berteologi : Mengajar untuk Melakukan)

Penjelasen Bahan Pustaka Si Badia

Ogenta si pemena nuriken kerna nabi Elisa ras diberu si bayak i Sunem nari. Teridah i bas bahan ogen sekalak diberu ras perbulangenna si erbahan mehuli man nabi Elisa. Labo saja isikapkenna pangan inemen tep-tep nabi Elisa reh ku Sunem, tapi isikapkenna sada ingan tading si sikap lengkap ras perlengkapenna gelah nabi Elisa banci pekesahken i je. Kai si ilakoken diberu si bayak ras perbulangenna enda ncidahkenca ketulusan i bas nehken si mehuli, la iarapkenna balasen i bas keluarga enda nehken si mehuli man nabi Elisa, amin pe i bas cerita enda ituriken maka diberu kalak bayak enda datken tuah sebage imbalan ketulusenna nehken si mehuli man suruh-suruhen Dibata.

Invocationta ras renungenta termasuk i bas rangkaian khotbah entah pe pengajaren-pengajaren Yesus i das uruk. Invocationta termasuk i bas perikop “Kerna batang ras buahna”. Renungenta termasuk i bas perikop “Perbahanen sebo ngerana” i bas Alkitab Bahasa Indonesia Sehari-hari entah pe Bahasa Indonesia Masa Kini (BIS-BIMK) nina, “Perbuatan, bukan perkataan”. I bas Alkitab Terjemahan Baru (TB-LAI), la lit pemisahen perikop, ay. 17-23 masuk i bas sada perikop “Hal pengajaran yang sesat”. Ay. 17 intina, Yesus nehken persinget man ajar-ajarNa gelah metenget nandangi nabi-nabi palsu si nehken ajaren-ajaren si papak alu nandai perbahanenna. Batang ras buah si mehuli e me anding-andingen (metafora) si nggambarkenca pengajaren si payo si sumberna arah Dibata nari arusna sedalanen ras perbahanen si mehuli sue ras peraten Dibata.

Bahan renungenta mereken penekanen kerna pelaksanaan Undang-undang erpalasken keleng ate bagi si niajarken Yesus Krsitus. I bas ay. 21 ikataken, “kalak si ngelakoken rikutken si ngena ate BapangKu i surga nge bengket ku bas Kinirajan e”. Yesus labo meneken Undang-undang Musa (Hukum Taurat), tapi merobah cara pandang kerna Hukum Taurat : 1) Erpalasken bindu 7:12, kerina si jadi peraten Dibata termasuk si lit i bas Undang-undang Musa arus ilakoken secara proaktif; 2) Kerina si jadi peraten Dibata arus ilakoken erpalasken keleng ate man Dibata ras keleng ate man manusia bagi ngkelengi diri sendiri (bdk. Mat. 22:37-40). Sebalikna, man kalak si hanya meteh ngenca tapi la ngelakoken entah pe ndalanken kerina si jadi peraten Dibata, la itandai Dibata i bas wari pendungi.

Aplikasi

Menjelang Pilkada serentak si nilakoken i bas tahun enda, melala berita-berita si la payo, palsu, i bas bhs. Inggris nina hoax (iogeken : houg), si beredar i dunia maya entah pe internet. Melala situs-situs mengatasnamaken situs religius i bas agama tertentu nari tapi isina memprovokasi massa gelah ngelakoken hal-hal si la mehuli. Tentu sada hal si ironis adi memang tuhu-tuhu pemuka-pemuka agama menghasut melala jelma gelah ngelakoken hal-hal si la mehuli. Adi sisungkun payo kin hal-hal si la mehuli e si iajarken bas agamana? Pasti la lit sada pe pemuka agama si mengakui hal si bage. Pasti ikatakenna, agama kami adalah agama yang mengajarkan cinta kasih, rsd. Engkai maka hal-hal si bagenda terjadi i bas negaranta? Mungkin erkiteken la iangkaina alu payo agama si ianutna.

I bas bahan renungenta bage pe invocationta, Tuhan Yesus enggo ngingetken man banta kerna ajaren-ajaren si la payo si ibabai nabi-nabi palsu. Ajaren-ajaren si la payo entah pe palsu enda tentuna sumberna labo i bas Dibata nari, tapi i bas cara rukur manusia si dem alu kejahaten, si orientasina materi doni ngenca, entah pe kepentingen-kepentingen doni enda guna keuntungen ras kekuasaan. Kepentingen-kepentingen si la payo enda banci ka ibungkus alu kemasan-kemasan religius, teridah payo arah darat nari tapi macik arah bas nari. Man kalak si la itandaina apai ajaren-ajaren si payo tentu mudah terprovokasi. I bas si e tentuna kita sebage kalak si enggo iselamatken i bas Yesus Kristus perlu metenget. Uga caranta gelah metenget?

Si pemena lebe tentuna arus sitandai alu payo Dibata si isembah kita i bas Yesus Krsitus. Berarti kita arus erlajar kerna Kata Dibata arah kerina hal si banci ilakoken kita baik secara pribadi bage pe secara komunal i bas kegiaten-kegiaten Gerejanta. Si peduaken, adi enggo sitandai kai si jadi sura-sura Dibata arah KataNa, tugasta berikutna e me ngelakoken entah pe ndahiken kerina si jadi sura-sura Dibata i bas kegeluhenta secara proaktif. Proaktif ertina secara otomatis bergerak ngelakoken kerina si jadi peraten Dibata erpalasken keleng ate, la nari man iah-iahenken, la nari erkiteken lit sura-suranta (maksud) si tersembunyi makana aktif kita ngelakoken kai si jadi peraten Dibata. Bagi diberu kalak bayak ras perbulangenna Sunem nari si proaktif ngelakoken si mehuli man nabi Elisa alu tulus la ngarapken balasen i bas kerina si mehuli si enggo ilakokenna. Si peteluken, rikutken tema-nta sendah, iajuk kita gelah la erngadi-ngadi erlajar nandai Dibatanta ras la erngadi-ngadi ndalanken kerina si jadi sura-suraNa. Gelah kerina pengkebet geluhta jadi usihen man kalak si deban si lit i sekelewetta, sebab pengajaren si efektif e me arah teladan geluhta (berteologi : mengajar untuk melakukan).

WARI PETELUKEN (Selasa Tgl. 17 Januari 2017)

Invocatio : “Bena-bena kepentaren e me erkemalangen man TUHAN. Man kalak si erkemalangen man baNa iberekenNa kap pemeteh si mehuli. Terpujilah Dibata seh rasa lalap” (Masmur 111:10)

Ogen : Johanes 3:1-10

Renungen : Lukas 19:1-10

Tema : “Aron Dibata Si Nggit Ras Tutus Erlajar Mandiri”

Penjelasen Bahan Pustaka Si Badia

Invocationta e me pengakun kiniteken i bas Pemasmur nari maka erkemalangen man Dibata e me bena-bena kepentaren. Pemeteh si mehuli ibereken Dibata man kerina kalak si erkemalangen man baNa. Kepentaren ras pemeteh si mehuli i bas Dibata nari e ipergunakenna guna muji gelarNa seh rasa lalap. Maka lit pengakun kiniteken i bas Pemasmur nari, erkiteken i bas pengalamen geluhna tuhu-tuhu igejapkenna maka kepentaren si tuhu-tuhu si la lit batasna bage pe pemeteh si payo e me rehna i bas Dibata nari. Janah sebage manusia biasa, iakuina maka kepentaren ras pemetehna terbatas, la sebanding ras kepentaren bage pe pemeteh Dibata. Emaka ernalem ia man Dibata.

Ogenta nuriken kerna percakapen Yesus ras Nikodemus sekalak Farisi peminpin agama Yahudi. Farisi e me salah sada kelompok i bas masyarakat Yahudi si ncikep alu paguh Undang-undang Musa (Hukum Taurat), janah Undang-undang e ilaksanakenna alu cermat bahkan cenderung cermatsa seh makana merasa berhak menghakimi kalak si deban. Yesus usur mengkritik kalak Farisi si perbahanenna la sue ras Kata Dibata, umpamana i bas Mat. 3:7, rsd. Erkiteken si e maka kalak Farisi termasuk kelompok si menentang ajaren-ajaren Yesus. I bas si e jelas maka Nikodemus ercakap-cakap ras Yesus i bas berngi gelah la teridah kalak Farisi si deban. I bas percakapen e Yesus mereken penjelasen kerna kegeluhen si mbaru alu lau sebage simbol baptisen (pertobaten) ras Kesah Dibata si ngiani kalak si enggo nggeluh i bas kegeluhen si mbaru, e me syarat mutlak bengket ku bas Kinirajan Dibata. Intina, ise pe si menganggap dirina rembak ras Dibata tapi la lit perobahen si nyata i bas geluhna sue ras peraten Dibata, maka la banci ia ikataken rembak ras Dibata. Tapi la iangka Nikodemus kai si nimaksudken Yesus. Emaka mamang ate Yesus, uga makana sekalak guru, kalak Farisi, peminpin agama Yahudi la iangkana hal si bage?

Bahan renungenta e me contoh si nyata kerna kegeluhen si mbaru i bas geluh Sakeus. Sakeus e me kepala pengalo cuke i kota Jeriho. Kepala pengalo cuke e maksudna, enggo leben itukurna hak man pemerentah Romawi guna muat cuke i bas wilayah Jeriho. Cuke e me sen si wajib igalari penduduk Jeriho man pemerentah Romawi erkiteken statusna sebage wilayah jajahen Romawi. Tapi enggo leben igalari Sakeus cuke si wajib igalari penduduk Jeriho man pemerentah Roma. Jadi enggo banci sibayangken uga ate-atena Sakeus muat cuke i bas penduduk kota Jeriho nari arah suruh-suruhenna pengalo cuke (Matius e me contoh pengalo cuke, tapi ganjangen Sakeus erkiteken ia kepalana pengalo cuke, bdk. Mat. 9:9). Melala keuntungen si la wajar si idatken Sakeus arah ngaloken cuke enda. Penduduk Yeriho la senang man Sekeus erkiteken dahinna e janah ianggap sebage kaki tangan penjajah bage pe kalak si belin kel dosana. Tapi kenca enggo jumpa ras Yesus, lit perobahen 180° i bas diri Sakeus. Perobahen e tuhu-tuhu nyata i bas perbahanenna, nina ay. 8 : “Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat”. Ngaloi Yesus i bas ay. 9-10 nina : “I bas wari enda enggo reh keselamaten man isi jabu enda. Kam pe kesusuren Abraham kap. Sabap Anak Manusia si isuruh Dibata reh guna nelamatken kalak si papak”.

Aplikasi

Tema si seh man banta i bas wari peteluken Pekan Penatalayanen enda nina : “Aron Dibata Si Nggit Ras Tutus Erlajar Mandiri”. Penekanen lit i bas nggit ras tutus erlajar mandiri. Engkai maka kininggiten ras ketutusen erlajar mandiri enda penting jadi penekanen? Mungkin i bas kebiasaanta lenga turah budaya erlajar mandiri, khususna i bas hal geluh erkiniteken bage pe i bas pengembangen pelayanen i bas Gerejanta. Umpamana, melala denga si man iah-iahenken, rsd. Entah mungkin perlu lebih sitingkatken kininggiten ras ketutusen guna erlajar secara mandiri. Tapi si jelas, la lit rugina adi kita nggit ras tutus erlajar secara mandiri, apai ka erlajar kerna erkiniteken man Dibata bage pe guna pengembangen pelayanen i bas Gerejanta. Sebab erlajar e me labo terbatas i bas dunia formal ngenca bagi pendidiken i sekolah entah pe i universitas. Long life education, e me semboyan maka arus kita erlajar segedang geluhta.

Melala hal si positif si banci idatken kita arah kininggiten ras ketutusenta erlajar secara mandiri. Pemasmur nggejapkenca maka i bas ernalem man Dibata erlajar ia kerna kepentaren Dibata si la terbatas bage pe pemeteh si payo i bas Dibata nari i bas pengalamen geluhna. Ipujina Dibata erkiteken la idatkenna kepentaren ras pemeteh si tuhu-tuhu i bas doni enda. Sekalak peminpin bagi Nikodemus, arus nggit ras tutus erlajar. Adi lang, maka la lit kepentaren ras pemeteh i bas Dibata nari i bas kepemimpinenna. Arah nggit ras tutus erlajar maka lit wawasen si mbaru bagi si idatken Sakeus. Labo saja wawasen si mbaru, tapi kegeluhenna pe ipelimbarui si icidahkenna arah perbahanenna si nyata.

Emaka sebage aron Dibata, i bas kesempaten enda, iajuk kita gelah ningkatken kininggiten ras ketutusenta i bas erlajar secara mandiri. Mungkin budaya lisan enggo perlu sitadingken. Maksudna, mungkin sedekah enda megi-megi ngenca kebeluhenta arah khotbah entah pe renungen si nisehken Serayan i bas kebaktin-kebaktin, PJJ, entah pe PA-PA kategorial. E pe adi rajin kita reh kubas kegiaten-kegiaten e, banci reh tambahna pemetehnta. Adi lang, enggo pasti la erkembang pemetehta kerna Kata Dibata. Enggo banci kita bengket ku bas budaya membaca ras menulis secara intensif. Umpamana, lit lah gia sada buku si nioge kita i bas sada bulan, rsd. Gelah pemetehta pe reh tambahna, bage pe kinitekenta pe reh paguna i bas kita ngoge literatur-literatur si terpercaya sumberna, labo berita-berita hoax i bas dunia maya nari, umpamana. Dibata si mpegegehi kita.       

WARI PEEMPATKEN (Rabu Tgl. 18 Januari 2017)

Invocatio : “Nina TUHAN man Nuah, “Bengketlah kam ras kerina keluargandu ku bas kapal e. Sada kam nari ngenca i bas doni enda erbahan si mehuli Kuakap” (Kejadin 7:1)

Ogen : Kejadin 19:12-22

Renungen : Masmur 128 : 1 – 6

Tema : “Aron Dibata Si Muat Bagin I bas Jabu Ras Sangkep Nggeluh”

Penjelasen Bahan Pustaka Si Badia Ras Aplikasi

Invocationta e me kerna konteks Nuah ras banjir si mbelin. Tuhan erkadiola njadiken manusia ras namakenca ku doni enda, emaka ersura-sura IA ngkernepken doni enda alu banjir si mbelin. Tapi Nuah ras jabuna ngena ate Dibata, sabab i bas jamanna Nuah ngenca si mehuli, ia erdalan i bas dalan Dibata. Isuruh Dibata ia erbahan sada kapal si galang, gelah ia ras jabuna banci selamat. Nuah patuh. Selaku sekalak bapa, pemimpin, banci ia mabai keluarga besarna tetap erkemalangen man Tuhan. Emaka i bas ayat enda, jelas mulihi Tuhan nuruh Nuah gelah bengket ku bas kapal si enggo ibahanna, ia ras kerina keluargana.

Bahan ogenta ngerana kerna Lut si nadingken kota Sodom. Judul i bas perikop enda “Lut nadingken Sodom” (Alkitab TB-LAI, ay. 12 merupakan bagian dari judul secara keseluruhan ps. 19, “Sodom dan Gomora dimusnahkan Lot diselamatkan”). Dua kalak temue Lut mpersingeti ia maka kuta Sodom ras Gomora enda bakal ikernepken Tuhan, sabab pengadun si mesangat enggo seh man Tuhan kerna anak kuta Sodom (ps 18:20). Emaka ipindokenna man Lut gelah ngatakenca man keluargana gelah ndarat i bas kuta e nari, sabab ate Tuhan ngkernepken  kuta e. Ijumpai ras ipersingeti Lut calon kelana, tapi itanggapi la mehuli arah calon kelana ndai, malah ianggapna Lut erguro-guro saja. Malekat ndai tole mpersingetisa gelah pedas-pedas Lut, ndeharana ras duana anakna si diberu nadingken kuta e, “kiamken kelini kesahndu! Ola mulih ku pudi dingen ola ngadi i berneh. Kiamken ku das uruk-uruk gelah ola kam mate!” Perban ndauh denga kuta i datas uruk, janah mbiar kel Lut enggo leben kari itunduk cilaka ope ia seh ku je, emaka ipindokenna gelah banci ia ras keluargana terkelin seh kuta si kitik, la ndauhsa inganna. Emaka nina Malekat Tuhan, labo dalih sebab kuta si kitik e la ikernepken.

Kata Dibata si jadi renungenta, ngatakenca, “Sangap jabu si malang man Tuhan, si nggeluh ngikutken kerina perentahNa. Ertina, kesangapen e, kebahagian e, keharmonisen e, labo erkiteken buena ertana, pangkat, jabaten, tapi erkiteken jabu e nggeluh ngikutken kai sura-sura Tuhan. Kemalangen man Tuhan, mabai sekalak ndehara patuh man perbulangenna, hormat man perbulangenna, walaupe banci jadi mbuen uang masukna asangken perbulangenna. Tetap ia mehamat man perbulangenna, sabab perbulangenna imam i bas jabuna. La ia sepele, anggap enteng man perbulangenna. Adi ndehara pe enggo sepele man perbulangen, ise nari si ngehamati perbulangen, la mungkin ndehara kalak. Bage pe, perbulangen keleng atena man ndeharana, ilindungina, igejapina, gegehen ia asangken ndeharana, emaka la ate-atena ndeharana e. Itepa Dibata, diberu i bas tulang rangrang dilaki nari, labo bas tulang nahena gelah ula itipakina, labo i bas tulang tanna, gelah ula ipekpekina, tapi bas tulang rang-rangna nari gelah banci ikelengina, bahkan bermitra, la lit si ganjangteruken. Jadi jelas, ndehara patuh man perbulangenna, dalam rangka mbiar, patuh man Tuhan, bage pe perbulangen keleng atena man ndeharana erkiteken patuh, malang man Tuhan. Malang man Tuhan, kepatuhen man Tuhan, mabai perbulangen ras ndehara dalanken tanggung jawabna masing-masing alu tulus tanpa litna pemaksaan ras kemunafiken.

Keluarga si tetap erkemalangen man Tuhan mabai ia ras jabuna tetap ipasu-pasu subuk secara jasmani ras rohani, lit kedamen, kiniersadan arih i tengah-tengah jabu. Ipanna me ulihna latih sangap nggeluh mehuli sikerajangenna. Ertina, banci ternikmati kita bekas ulihta latih, sabab lit jabu e ngasup menatalayankenca kai si enggo ibereken Tuhan ras tetap mampu ngataken bujur. Anak-anakna bali ras tunas batang saitun i sekelewet mejana. Batang saitun e erkinar, janah tetap ertunas enggo pe itektek. Ertina, anak e mereken keriahen ukur man orang tuana. Melala gundari anak-anakta erbahanca gulut orang tuana, latih orang tuana. Sabab benaken kitik-kitik nari enggo sibabai anak-anak e erkemalangen man Tuhan, ras kita orang tua siusahaken jadi contoh si mehuli man anak-anakta. Sabab anak-anak melakukan apa yang mereka lihat (children do what they see). I bas KEE 124, salah sada keriahen ukur orang tua e me adi anakna ikut ajar e (“E malem ukur si mesui lupa, di la njuruken lagu anak e”). Asum orang tua, ndalanken tanggung jawabna alu mehuli, alu sendirina anak menaruh hormat, patuh man orang tuana. Walaupe arus tetap kita metenget kerna pengaruh jaman, lingkungen, media sosial si cukup mbelin banci mpengaruhi perkembangen anak-anakta. Tapi adi bentengna, palasna paguh, la murah ia terpengaruh.

Jadi jelas pasu-pasu Tuhan tetap ipepaler Tuhan man jabu si tetap erkemalangen man baNa. Bahkan i bas ay. 4 i je ikataken, “Ipepaler i bas kita patuh man Tuhan”, i bas Alkitab TB-LAI nina, “Sesungguhnya demikianlah akan diberkati orang laki-laki yang takut akan TUHAN. Adi sekalak bapa, imam i tengah-tengah jabu kalak si erkemalangen man Tuhan, maka dengan mudah ia banci mabai jabuna geluh erkemalangen man Tuhan.

Arah teluna bahan enda, mabai kita nggejapken maka penting kel kegeluhen jabu si tetap banci ersada arih ras saling peduli sada ras si debanna. Sangat rancu adi ku darat kita mejile, tapi bas jabu sendiri kurang kita pedulina. Lebe i tengah-tengah keluarga inti : bapa, nande, ras anak-anak, arus tetap paguh kiniersadanna ras nggeluh sikeleng-kelengen, siergan, sisampat-sampaten ras banci berkerja sama alu mehuli. E maka ku sangkep geluhta si deban. Kelebihenta kalak Karo, maka nterem sangkep geluhta, subuk keluarga Bapanta, Nandeta, keluarganta, keluarga pasangenta, lenga keluarga ipar-iparta (sukut, kalimbubu, anak beru). Asa bancina tetap sijalin kebersamaan, hubungen perkade-kaden si mehuli alu la erayo-ayo. Keluarga Nuah, keluarga Lut menjadi contoh si mehuli aminna pe sekelewetna enggo ngelakoken si la mehuli, tapi keluarga e tetap la terpengaruh. Ertina, palas jabu si erkemalangen man Tuhan tuhu-tuhu nggeluh i bas jabu e seh ku anak-anakna.

Tema i bas wari peempatken i bas Pekan Penatalayanenta, “Aron Dibata Si Muat Bagin I Bas Jabu Ras Sangkep Nggeluh”, mpersingeti keluarga-keluarga maka kita pe termasuk teman sekerja Dibata guna banci melayani ras e ibenaken i bas jabunta.

WARI PELIMAKEN (Kamis Tgl. 19 Januari 2017)

Invocatio : “Mulihken Elisa, ibuatna lembu penenggalana ndai duana, igelehna. Alu make tenggalana e jadi rantingna, itanggerkenna daging lembu e, jenari iberekenna ipan kalak ndai kerina. Kenca bage berkat ia ngikutken Elia jadi suruh-suruhenna” (1 Raja-raja 19:21)

Ogen : Keluaren 17:8-16

Renungen : 1 Korinti 3:5-9

Tema : “Aron Dibata Si Muat Bagin I Bas Pelayanen Gereja”

Penjelasen Bahan Pustaka Si Badia

Elisa (ertina “Dibata e me keselamaten” entah pe “Dibata Juruselamat”), sekalak si enggo itetapken Dibata gantiken Elia (ertina : Jahweh-lah Dibata) i bas 1 Raj. 19:16. Invocationta nuriken kerna proses pelaksanaan pemilihen Dibata man Elisa si nilakoken Elia alu ncabinken jubah kenabianna man Elisa. Ncabinken jubah e me simbolisasi penetapen Elisa jadi si nggantiken Elia si secara definitif ialokenna i bas 2 Raj. 2:1-18. Si menarik, Elisa si lenga itandaina Elia mis ngikutken Elia jadi suruh-suruhenna.

Ogenta nuriken kerna bangsa Israel si menang erperang naluken bangsa Amalek. Kemenangen e idatken bangsa Israel erkiteken melala pihak si ikut muat bagin saling mendukung i bas peperangen enda : Yosua ras piga-piga dilaki si ipilihna sue ras perentah Musa; Hur ras Harun nampati ngangkat tan Musa si njemak ciken si isuruh Dibata; si utamana Tuhan Dibata si nampati bangsa Israel menang naluken bangsa Amalek.

Renungenta nuriken kerna kerja sama saling mendukung i bas pelayanen antara Paulus ras Apolos rikutken pemere (karunia) si ibereken Dibata. Kerja sama si mehuli enda perlu iusih perpulungen Korinti si medanak denga kinitekenna si memandang secara negatif kerja sama si mehuli antara Paulus ras Apolos alu erbahan kelompok-kelompok si saling rubati sada ras si debanna. Paulus ngingetkenca maka Dibata i bas Yesus Kristus arus jadi palas i bas pelayanen, sebab Dibata ngenca i bas Yesus Kristus si erbahanca turah kerina si mehuli guna pembangunen kula ni Kristus. Janah Dibata si arus termulia gelarna labo Paulus entah pe Apolos.

Aplikasi

Tema si seh man banta i bas wari pelimaken Pekan Penatalayanen sendah e me :  “Aron Dibata Si Muat Bagin I Bas Pelayanen Gereja”. Penekanenna lit i bas ikut muat bagin i bas  pelayanen Gereja. Kinata si usur terjadi, one man show, entah pe piga-piga kalak ngenca si ikut muat bagin i bas pelayanen, jelmana e e saja. Kinata si bagenda tentu lit penyebabna. Si pemena lebe, mungkin erkiteken memang la nari lit si nggit ikut muat bagin i bas pelayanen, amin pe enggo siiah-iahken. Mungkin kapasitasna si kurang, banci ka la nggit erlajar. Si peduaken, mungkin lit piga-piga kalak si la senang adi melala perpulungen si deban ikut muat bagin i bas pelayanen, piah dungna sician-cianen. Si peteluken, melala si nggit ikut muat bagin i bas pelayanen tapi pengaturenna la sikap, piah dungna sidalih-dalihen. Si peempatken, melala si nggit ikut muat bagin i bas pelayanen tapi la lit ruang (kesempaten) si isikapken Gereja guna menampung pemere-pemere Dibata si lit i bas perpulungen. Umpamana, melala si beluh rende tapi la lit ibahan song leader, entah pe tim koor. Melala si beluh ermusik, tapi la ngasup nglitken alat musikna, rsd.

Secara ideal tentuna, Gereja mereken kesempaten (ruang) seluas-luasna man kerina perpulungen guna ikut muat bagin i bas pelayanen. Janah kerina fasilitas ras bentuk-bentuk pelayanen ngasup isikapken Gereja. Suasana si lit i tengah-tengah perpulungen pe saling mendukung, kerinana ermeriah ukur adi melala si ikut muat bagin i bas pelayanen. Emaka unsur-unsur si penting si arus lit i bas pelayanen i Gereja rikutken bahan-bahan Pustaka si Badianta sendah, e me : 1) Rikutken invocationta, arus lit unsur perpulungen si ersuruh ukurna ikut muat bagin i bas pelayanen. 2) Rikutken ogenta, arus lit suasana saling mendukung, nggit bekerja sama sada ras si debanna. 3) Rikutken bahan renungenta, makeken kerina pemere-pemere Dibata guna pembangunen kula ni Kristus alu Yesus Kristus si jadi palasna ras tujunna guna kemulian gelar Dibata.

I bas Pekan Penatalayanen wari si pelimaken enda, iajuk kita gelah ikut muat bagin i bas pelayanen. Mungkin melala denga kita si erpenulak adi lit si ngiah-ngiahken kita. Tahun enda waktu si tepat guna kita ikut muat bagin i bas pelayanen. Salah sada sistem bas Gerejanta e me kolegial - kolektif, ertina alu sistem enda iarapken kerina ikut muat bagin erkiteken kerina kita kolega, sada aron i bas Yesus Krisus. Serayan Tuhan, Pdt./Pt./Dk. fungsina e me koordinator, fasilitator, motivator, dinamisator i bas pelayanen, gelah reh berkembangna pelayanen i bas Gerejanta ras gelar Dibata termulia i bas pelayanenta.   

WARI PEENEMKEN (Jumat Tgl. 20 Januari 2017)

Invocatio : “Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap” (Jeremia 29:7)

Ogen : Matius 5:13-16

Renungen : 1 Petrus 2:11-17

Tema : “Aron Dibata Si Muat Bagin I Bas Masyarakat, Bangsa Ras Negara”

Penjelasen Bahan Pustaka Si Badia

Invocationta e me sada bagin i bas isi surat si isehken nabi Yeremia man imam-imam, nabi-nabi, peminpin-peminpin bangsa Israel, dingen man kerina kalak si enggo iangkut Nebukadnesar ku Babilon i Jerusalem nari jadi tabanen. Maksud surat enda gelah bangsa Israel si itaban i Babilon banci ngaloken keadaan si nialamina sebab e enggo jadi ketetapen Dibata si la ise pe banci ngerobahsa. Pitu puluh tahun dekahna waktu si enggo itetapken Dibata man bangsa Israel jadi tabanen i Babilon. I bas waktu si enggo itetapken Dibata e manfaatkenlah alu hal-hal si positif, bagi ikut muat bagin alu erdahin guna kiniulin kuta-kuta i ja bangsa e itaban, janah ertoto guna keperlun kuta e.

I bas bahan ogenta, gambaren sira ras terang ipake Yesus guna nehken pengajaren kerna kegeluhen si mbaru si ernanam mehuli man kalak si deban, bage pe perbahanen-perbahanen si mehuli sue ras peraten Dibata si arus teridah i lebe-lebe kalak si nterem gelah Dibata Bapa si i surga ipuji ras ipermuliaken.

Bahan renungenta e me pedah-pedah i bas rasul Petrus nari man perpulungen si merap i Pontus, Galati, Kapadokia, Asia, ras Bitinia. Pedah-pedah enda erkawiten ras orat geluh kalak si enggo iselamatken i bas Yesus Kristus. Orat geluh kalak Kristen arus sidalanen sue ras peraten Dibata i tengah-tengah doni enda. Emaka i bas bahan renungenta ipedahken rasul Petrus kerna hal-hal si praktis si arus ilakoken i bas kegeluhen si tep-tep wari sue ras  peraten Dibata, e me : 1) Mehuli lagu langkah i tengah-tengah kalak si lenga nandai Dibata; 2) Patuh ras hormat nandangi kerina pemerentah i doni enda; 3) Nggeluh bagi budak Dibata si bebas ngelakoken kerina si jadi peraten Dibata; 4) Mehamat man kerina manusia ras ngkelengi teman si sada kiniteken; 5) Erkemalangen man Dibata.

Aplikasi

Tema si seh man banta i bas wari pe-6-ken Pekan Penatalayanen e me : “Aron Dibata Si Muat Bagin I Bas Masyarakat, Bangsa Ras Negara”. Tema-nta sendah ngajuk kita guna ikut muat bagin i bas bermasyarakat, berbangsa ras bernegara. Bahan ogenta sendah e me perutusen i bas Yesus Kristus nari man kerina kalak si tek man baNa guna jadi sira ras terang i tengah-tengah doni enda. Emaka esensi kalak Kristen e me kalak si iutus guna ersaksi kerna keselamaten i bas Yesus Kristus ku tengah-tengah doni enda alu simbol sira ras terang. Sedangken invocationta ras renungenta sendah banci ikataken petunjuk-petunjuk si sifatna etis praktis i bas rangka wujud nyata sira tas terang ndai.

Kondisi ras situasi si nialami kita i bas paksa enda, banci ikataken seri ras konteks nabi Jeremia ras rasul Petrus, i ja kita enda kalangan minoritas i bas bangsa ras negaranta. Tapi amin bage gia, nabi Yeremia ras rasul Petrus ngajuk gelah i bas kondisi ras situasi si kugana pe tetap kita arus secara proaktif ikut terlibat i bas bermasyarkat, berbangsa ras bernegara. I bas sejarah bangsa ras negaranta tentuna enggo melala contoh keikutsertaan kalangan Kristen i bas perjuangan kemerdekaan seh ku paksa enda i bas suasana kemerdekaan. Tapi i bas kesempaten enda, mulihi kita isingetken kerna peran sertanta i bas ikut muat bagin membangun bangsa ras negaranta. Secara praktis tentuna melala si banci ilakoken kita i bas si e, umpamana, menjadi warga negara si mehuli, meteh ras ngelakoken kai si jadi kewajiben warga negara, mentaati peraturen, membayar pajak, menjalin relasi si mehuli ras ikut terlibat i bas kegiaten-kegiaten i lingkungen masyarakat sekelewetta, mediate ras nampati teman-temanta tanpa membedaken suku, ras, agama, entah pe golongen, rsd.

Akap kami tentuna kita umumna enggo ikut muat bagin i bas bermasyarakat, berbangsa ras bernegara, saja ngenca mungkin perlu terus sijaga konsistensina ras sitingkatken kuantitas ras kualitasna gelah gelar Dibata semakin terpuji ras termulia i tengah-tengah masyarakat Indonesia.

WARI PEPITUKEN (Sabtu Tgl. 21 Januari 2017)

Invocatio : “Kenca bage kubegi Tuhan ngerana nina, “Ise ndia Kusuruh? Ise ndia nggit maba berita i bas Aku nari?” E maka ningku ngaloi, “Aku, suruhlah aku!” (Jesaya 6:8)

Ogen : Johanes 21:15-18

Renungen : Pilipi 1:20-26

Tema : “Kubuat Baginku Selaku Aron Dibata”

Penjelasen Bahan Pustaka Si Badia

Invocationta e me sada bagin i bas perikop “Dibata ndilo Yesaya jadi nabi”. Adi sioge bindu 6 kitab Yesaya enda, teridah je lit proses i bas pendilo Tuhan man Yesaya : 1) I bas sada pengenehenen reh malekat serafim ndahi Yesaya; 2) Erkiteken kebadian Dibata arah malekat serafim ndai, sedar Yesaya maka ia kalak perdosa, iakuina dosana ras imasapken Tuhan dosa-dosa Yesaya; 3) Dibata ndilo Yesaya, janah pendilo Dibata e ialoken Yesaya; 4) Yesaya iutus Dibata guna nehken berita i bas Dibata nari man bangsaNa. Si unik i bas pendilo man Yesaya enda leben iakukenna dosa-dosana i lebe-lebe Dibata.

Ogenta lit i bas perikop “Percakapen Yesus ras Simon Petrus”, i bas Alkitab TB-LAI judul perikopna lebih imperatif (perentah) “Gembalakanlah domba-dombaKu”. Telu kali Yesus nungkun man Petrus, “O Simon, anak Yohanes, keleng kin atendu Aku?” Mungkin enda si jadi ciri khas pendilo Tuhan Yesus man Simon Petrus. Amin pe enggo pernah ipersokenna Yesus telu kali (bdk. Mat. 26:34), tapi Yesus tetap tek nandangi Simon Petrus guna mpermakani biri-biriNa.

Renungenta lit i bas perikop “Nggeluh e me guna Kristus”, nuriken kerna kesaksin sekaligus tekad Paulus, amin pe lit i bas kiniseran erkiteken ipenjara, tetap atena nggeluh guna Kristus, tetap ergiah-giah ukur, la mbiar ia mate sebab kematen ertina ersada ras Kristus, tapi adi nggeluh pe mbue denga si atena ibahanna dahin si mehuli i bas geluhna, tetap denga atena ras perpulungen guna nambahi kemajun ras keriahen perpulungen i bas kiniteken i bas persadanna ras Kristus. Bahan renungenta enda ncidahkenca uga rasul Paulus erpala-pala tetap konsisten i bas pendilona seh ku kedungenna. Finishing well!

Aplikasi

Adi siinventarisasi tema-tema i bas Pekan Penatalayanen GBKP tahun 2017 enda teridah maka ibabaina kita bengket ku bas tujun si lit i bas tema GBKP tahun 2017 e me, “Meningkatkan Kemampuan Warga GBKP Dalam Kehidupan Berteologia Dan Menumbuhkan Motivasi Belajar Secara Mandiri” :

“Nandai Dibata, Muat Bagin I Bas DahinNa” (Berteologi : Belajar untuk Melakukan)

“Nandai Dibata, Ndalanken Sura-suraNa” (Berteologi : Mengajar untuk Melakukan)

“Aron Dibata Si Nggit Ras Tutus Erlajar Mandiri”

“Aron Dibata Si Muat Bagin I bas Jabu Ras Sangkep Nggeluh”

“Aron Dibata Si Muat Bagin I Bas Pelayanen Gereja”

“Aron Dibata Si Muat Bagin I Bas Masyarakat, Bangsa Ras Negara” 

Ibenaken alu pengajuk man banta gelah nandai Dibata si isembah kita i bas Yesus Kristus alu payo erpalasken Kata Dibata i bas Pustaka si Badia. Kenca enggo sitandai Dibatanta i bas Yesus Kristus alu payo, iajuk kita gelah ikut muat bagin i bas dahinNa, ndalanken sura-suraNa, nggit ras tutus erlajar mandiri, erperan secara proaktif i bas ndalanken sura-suraNa i bas jabu, sangkep geluh, pelayanen i Gereja, bage pe i bas bermasyarakat, berbangsa, ras bernegara. Emaka sue ras tema i bas wari pendungi Pekan Penatalayanen enda, iajuk kita gelah ertekad ndalanken kerinana i bas kegeluhenta.

Kerina bahan Pustaka si Badia i bas wari sendah ngerana kerna pendilo Dibata ras konsistensi i bas ndalanken pendilo Dibata e. Memang la lit kita si sempurna i bas kesetianta ndalanken kerina si jadi peraten Dibata i bas geluhta. Yesaya ngakuken dosa-dosana i lebe-lebe Dibata, Simon Petrus pernah mersoken Yesus telu kali, Paulus mantan sekalak si atena nasapken kerina pengikut Kristus, tapi teluna tetap denga ipercayaken Dibata guna ndalanken misiNa. Ertina kesempaten terbuka dengan man banta kerina guna mpesikap komitmenta mulihken. Yesaya, Simon Petrus ras Paulus teluna konsisten i bas pendilo Dibata seh ku kedungenna. Emaka i bas tekadta sendah, ula kita lupa peran kuasa Dibata si mpengasup kita guna secara konsisten ndalanken pendilo Dibata i bas kegeluhenta sebage aron Dibata si mpembarken kabar keselamaten i bas kerina pengkebet geluhta. Ertoto kita gelah Kesah si Badia si mpegegehi ras mpengasup kita.