Khotbah GBKP Minggu Tgl. 1 Januari 2017

KHOTBAH GBKP MINGGU TGL. 1 JANUARI 2017

Pdt. Larena br. Sinuhadji (Nd. Rey Tarigan)

TAHUN BARU

(Warna Stola : Mbentar)

Invocatio : “Keleng ate TUHAN man bangsaNa, ikawaliNa sikerajangNa. E maka erjimpuh kita i lebe-lebe naheNa, janah siikutken perentah-perentahNa” (Ulangen 33:3)

Ogen : Heber 2:10-18 (Tunggal)

Khotbah : Jesaya 63:7-9b (Antiphonal)

Tema : LA ERSIBAR KELENG ATE TUHAN

Penjelasen Bahan Pustaka Si Badia

Invocationta termasuk i bas ende-enden pujin ras pasu-pasu Musa man bangsa Israel sope ia mate, benaken, bindu 32 seh 33. I bas ay. 3 ikataken Musa (terj. Alkitab Bahasa Indonesia Sehari-hari - BIS) nina, “Sungguh, TUHAN mengasihi bangsa-Nya (bangsa-bangsa). Ia melindungi semua orang yang menjadi milik-Nya. Mari kita sujud di depan kaki-Nya dan mentaati perintah-perintah-Nya”. Keleng ate ras pengkawali Dibata nandangi bangsa sikerajangNa enggo terbukti kidekah perdalanen Musa ngarak-ngarak bangsaNa Mesir nari seh ku taneh Kanaan. Amin pe Musa enggo latih ngarak-ngarak bangsaNa janah la ia banci bengket ku bas taneh perjanjin, tapi tetap ia nehken puji-pujin ras masu-masu bangsaNa. Musa ngajuk gelah keleng ate ras pengkawali Dibata arus sirespon alu nembah ras ngikutken perentah-perentahNa.

Bahan ogenta e me penjelsen kerna Yesus Kristus, utusen si mbelinna asangken utusen-utusen Dibata si debanna (nabi-nabi ras malekat-malekat), sebab arah Yesus Kristus ngenca Dibata nehken keselamaten si serta arah kiniseranNa sebage manusia biasa guna nebusi ras nelamatken manusia perdosa. Erpalasken keleng ateNa, nggit Ia jadi manusia biasa, ngorbanken diriNa guna ngalemi dosa manusia, mperdameken manusia perdosa ras Dibata, bage pe nelamatken manusia i bas kuasa Iblis nari. Emaka Yesus Kristus igelari Imam si Mbelinna, belinen asangken Musa si iakap kalak Yahudi peminpin si belinna erkiteken tanda-tanda sengget si pernah ibahanna ras arah Musa nge Dibata nehken 10 Pedah Dibata. Erkiteken si e, maka penulis surat Heber i bas ps. 3:1 ngajuk perpulungen gelah ngukuri mbages-mbages kerna Yesus Kristus, e me Rasul ras Imam si Mbelin, si iakuken kita i bas kinitekenta.

Bahan khotbahta e me persinget Dibata arah nabiNa Jesaya man bangsa Israel si mbaru denga mulih i bas pembuangen Babilon nari, gelah : 1) Nginget keleng ate Dibata si la lit sibarna. Keleng ate si la lit sibarna enda enggo terbukti i bas sejarah bangsa Israel, i ja enggo mbue kal pasu-pasu Dibata nandangi bangsaNa. Si menarik i bas ay. 8 terj. BIS, nina, “TUHAN berkata, "Sungguh, mereka adalah umat-Ku, anak-anak yang tidak mengecewakan." Maka Ia menjadi Penyelamat mereka”. Erkiteken keleng ate Dibata si la lit sibarna, la nari iinget-ingetNa uga kejahaten-kejahaten bangsa Israel. 2) Nginget maka labo ise pe si ngkelini (menyelamatkan) bangsa Israel i bas kiniseranna nari tapi TUHAN jine. TUHAN jine si mulahi ras mpekena-kena bangsa Israel erkiteken kekelengenNa ras perkuah ateNa.

Pengkenaina

Selamat Tahun Baru 2017 man banta kerina. Ngataken bujur kita man Dibata si enggo ngarak-ngarak kegeluhenta kidekah tahun 2016. Enggo melala pengalamen, meriah ukur, ceda ate, sukses, gagal, tawa, tangis, seh sura-sura, lenga seh sura-sura, sehat, sakit, rsd., i bas tahun si lepas, tapi iatankenNa denga kita i bas tahun si mbaru endah. Ertina, mberat pe perbebenta i bas tahun si lepas, tapi ipengasupNa denga kita mbentasi kerina perbeben si mberat e. I bas si e tentuna patut nge kita nehken puji-pujinta man baNa bagi Musa i bas invocationta. Musa ngasup rukur secara positif nandangi dirina si la banci bengket ku bas taneh Kanaan (bdk. Bil. 20:12; Ul. 3:23-29), amin pe enggo latih ia ras seninana ngarak-ngarak bangsa Israel kidekah 40 tahun, emaka ngasup ia nehken puji-pujin bahkan nehken pasu-pasuna man bangsa Israel. I bas tahun si mbaru enda iajuk gelah merespon keleng ate ras pengkawali Dibata alu nembah ras ngikutken perentah-perentahNa.

Nabi Jesaya banci ikataken sekalak nabi si menyaksiken secara langsung, sope itaban, paksa kiniseran si nialami bangsa Israel i taneh pembuangen Babilon, seh ku mulih ras mbangun mulihi Jerusalem bage pe Rumah Pertotonna. I bas pengalamen si enggo inanami bangsa Israel e ngajuk ia man bangsa Israel gelah er-anamnesis, ertina nginget-nginget mulihken perbahanen-perbahanen Dibata si mbelin, keleng ras perkuah ateNa, pasu-pasuNa, pengkeliniNa, bage pe pekena-kenaNa nandangi bangsa Israel si tegar tengkuk. Anamnesis enda penting kal man bangsa Israel si rusur lupa nandangi TUHAN Dibatana. Maun-maun bage ka si terjadi i bas kegeluhenta, lupa kita nandangi TUHAN Dibatanta si tetap setia ngarak-ngarak ras ngkawali kegeluhenta. I bas paksa sukses, senang, seh sura-sura, pengakapta, erkiteken gegeh ras beluhta nge makana banci sukses, seh sura-sura. I bas paksa perbeben si mesangat, rusur kita milih dalan si ekspres, instan, la nggit kita erproses, la nggit kita ngenanami kiniseran, makana sidarami kalak si beluh, dukun, paranormal, rsd. Paksa sendah, mari radu ras er-anamnesis kentisik kerna perbahanen-perbahanen Dibata si mbelin, keleng ras perkuah ateNa, pasu-pasuNa, pengkeliniNa, bage pe pekena-kenaNa nandangi kegeluhenta.

I bas bahan ogenta enggo tangkas maka Dibata nusur ku doni si dem alu dosa ras perbeben enda i bas Yesus Kristus. IA enggo naluken dosa, kiniseran, ras kematen arah pengorbanenNa. Ertina, kita pe ipengasupNa guna ngadapi perbeben si reh i bas kegeluhenta erkiteken enggo leben italuken Dibata kerina perbeben e. Tading uga kita mengaktifasi kuasa si enggo ibereken Dibata arah KesahNa si Badia i bas kegeluhenta. Bagi kartu SIM i bas handphone-ta, adi la siaktifasi lebe kartunta ndai maka la banci sipergunaken guna erkomunikasi. Bage pe i bas kegeluhen kinitekenta, adi mehuli relasinta ras Dibata maka ipengasupNa kita naluken kerina perbeben si reh i bas kegeluhenta. Adi lenga mehuli relasinta ras Dibata kidekah tahun 2016, mari sipehuliken relasinta ras Dibata alu ertoto ras ngoge Pustaka si Badia secara teratur, tutus reh ku bas kebaktin-kebaktin, bage pe aktif muat bagin i bas kerina pelayanen si enggo ifasilitasi gerejanta.

Tema i bas Tahun si Mbaru enda e me : LA ERSIBAR KELENG ATE TUHAN, ngingetken kita mulihi kerna kekelengen ras perkuah ate Dibata i bas kegeluhenta seh kita iatankenNa bengketi tahun si mbaru enda. I bas si e tentuna patut kita muji-muji Dibata, ngataken bujur, bersikap positif, optimis, ras ertekad geluhken kegeluhenta i bas tahun si mbaru enda alu nggit erlajar la erngadi-ngadi i bas teruh kuasa Kesah si Badia. Tema pelayanen GBKP i bas tahun 2017 enda e me : “Meningkatkan kemampuan warga GBKP dalam kehidupan berteologia dan menumbuhkan motivasi belajar secara mandiri”, sidalanen ras tekadta, mari radu ras situmbuhken motivasi erlajar i bas geluhta, erkiteken arah erlajar nge idatken kita melala pemeteh ras kebeluhen si serta, baik secara intelektual, emosional, ras spiritual. Dibata si mpegegehi kita.