Pekan Kebaktin Keluarga GBKP Tgl. 20 - 26 November 2016

SUPLEMEN PEKAN KEBAKTIN KELUARGA GBKP

TAHUN 2016

Tema Umum : “JABU SI ERKOMITMEN, JABU SI ERLAJAR” (Josua 24:15; Kuan-kuanen 24:3)

WARI SI PEMENA (MINGGU 20 NOVEMBER 2016)

Pdt. Jefri Alexander Peranginangin

Invocatio : “Samuel terus erbelinna janah erngenana ate TUHAN ras manusia man bana” (1 Samuel 2:26)

Ogen : Kolose 2:10

Renungen : Bilangen 9:15-23

Tema : KEGELUHEN ENDA DESKEN PERDALANEN

Kata Perlebe

Adi banci imeteri bekasta erdalan kahe kolu tiap wari subuk erdalan salu nahe entah pe salu kendaraan si tumpangi kita entah enggo menda ndauh kel nge jarak si nggo sitempuh. Adi minimal 5 Km lah gia lit pergerakennta tiap warina e ikaliken 30 wari maka si sitikna lit nge 90 Km tapak tapak nahenta. Adi perdalanen enda ihitungken ka ku bas argo taksi maka nggo banci sikaliken uga hergana taksi si man galaren kita. Si menjadi penungkunen bage hergana dingen dauhna perdalanen kegeluhenta arah si e kerina enggo me malem ateta? Entah bicara erdalan ndai nggom lebih kapalna tapak-tapak nahenta tapi loba kai pe sidat? Atau si latihna mungkin nina bagi lagu Karo ras kita erdalan, tapi erdalan-dalan saja, la eteh ja ujungna.

Piga-piga Hal Menarik I Bas Teks Guna Ipebagesi

Teks Bilangen 9 situhuna ngerana kerna uga Dibata ngarak-ngarak perdalen kalak Israel i bas perdalanenna ku taneh Kanaan. I bas cerita enda kenca bangsa Israel majakken Kemah Perjumpaan (bas bahasa Ibrani Shakan si banci iertiken tempat beribadah) maka reh me sada embun (anan). Embun enda me si menjadi pelindung sekaligus kompas man bangsa Israel. Ayat 15 enda jelas nuriken bahwa kalak Israel iarak-arak Dibata perdalanen geluhna kenca ia majekken sada Rumah Pertoton. Rumah Pertoton menjadi syarat entah pe tiket gelah banci bangsa Israel ndatken awan si jadi kompas dingen perlindungen perdalanenna. Emaka bas ayat 18, tiap kali bangsa Israel lawes nadingken ingan si iinganina ras masuk ia bas ingan si mbaru maka hal si pemena si ilakokenna e me kap majekken Shakan entah pe Rumah Pertoton.

Awan e tuhu melala fungsina adi nangkih ia maka harus bangsa Israel lawes nadingken kemah (ay. 17).  Adi erdalan bangsa Israel ia lit bas datas bangsa Israel si tentu banci ka erfungsi sebagai payung, si erbahanca la panasen bangsa Israel adi erdalan tapi adi berngi robah ia jadi bagi api gelah alu bage la ka bergehen bangsa Israel i waktu berngi. Arah fungsi perlindungen enda tentu sanga erdalan ndauh banci idalani bangsa Israel erkiteken la ia latihsa ban panas. Tapi bas bergi banci tuhu badeh pertunduhna erkiteken la bergehen.

Bangsa Israel tuhu-tuhu patuh man tiang awan enda. Emaka adi nen ayat 22 pergeraken kalak Israel bergantung ras uga “nina” tiang awan. Selama kalak Israel patuh man tiang awan maka malem me atena nggeluh. Kepatuhen e tentu menjadi kunci kel bas perdalanen kalak Israel enda. Ras bas ayat 19 jelas me maka tiang awan e me kap suruhen Dibata. Emaka tiang awan enda patuh man Dibata. Ertina secara tidak langsung situhuna arah kalak Israel ngikutken perdalanen tiang awan secara tidak langsung ia ncidahken kepatuhenna man Dibata.

Pengkenaina

La siarap megati latih siakap ndalani wari kegeluehnta. La lah erkiteken la litna tiang awan si ngarak-ngarak dalanta. Emaka nggo banci rusur pengakapta suari tempa berngi, berngi tempa suari. Gelah banci perdalanen geluh enda menahang kepeken la banci lang harus nge Dibata si ngarak-ngarak. Minimal lit dua kesalahen bas perdalanen si erbahanca kita papak. Si pemena kita ngasamken pemetehta padahal la sieteh ku ja tujunta. Ras si peduaken sipindo gegeh guna banci jadi pandu perdalanenta, tapi pemandu e pe situhuna paksana ndarami dalan ka nge emaka banci jadi radu papak kita. Dibata ngge ngenca si banci jadi pandu kegeluhenta.

Gelah banci Dibata tetap jadi pandu geluhta lit dua sarat. Si pemena e me kap nggitna kita majekken “Rumah Pertoton” bas pusuhta. Kalak Israel tiap ia masuk ku bas sada ingan si pertama ilakokenna e me kap majekken Rumah Pertoton, ersembah ia man Dibata sebagai tanda ucapan syukurna. Emaka syarat utama gelah enda banci terwujud haruslah tersehi. Syarat si peduaken e me kap taat. Keataan ngikutken arahen Dibata bas kegeluhen. Bas geluhta jelaslah man banta bahwa ketaaten man Dibata la pernah njadiken kutuk tapi pasti erbuah pasu-pasu. Emaka adi ateta bas perdalanen kegeluhenta menahang siakap, la banci lang harus nge kita patuh.

WARI SI PEDUAKEN (SENIN 21 NOVEMBER 2016)

Pdt. Jefri Alexander Peranginangin

Invocatio : “Janah i babo si e kerina, arus kam sikeleng-kelengen sabap keleng ate mpersadaken kerinana alu serta” (Kolose 3:14)

Ogen : Perbahanen Rasul 18:1-4

Renungen : Kuan-kuanen 24:3-7

Tema : PALAS JABU

Penjelasen Bahan Pustaka Si Badia & Pengkenaina

Bas kalak Israel menjadi manusia si dewasa menjadi sada hal si mutlak. Emaka kitik-kitik nari bangsa Israel iajari alu erbage-bage pengajaren si tujunna e me kap guna banci ndatken sada kedewasaan. Sekalak anak perana banci erjabu kenca umur 30 tahun erkiteken pengakap bangsa Israel sekalak perbulangen harus dewasa emaka umur 30 me sukat-sukat kedewasaan bas kalak Israel.

Bas bahanta wari enda ituriken kerna 3 dimensi si la banci lang harus jadi palas i bas mbenai perjabun. Si telu dimensi enda merupakan kecerdasen nggeluh si la banci lang harus lit bas manusia i bas  ia ndalani wari-wari kegeluhen jabuna.

Si pemena kepentaren (ay. 3). Kata kepentaren bas bahasa Ibani e me kap Hokma. Kata enda banci ertiken bijaksana tapi banci ka iertiken erkiniteken. Emaka palas perjabun si pemena e me kap cerdas secara spiritualitas ntah pe pentar. I bas kalak Israel kepentaren banci muncul arah dua hal, si pemena ketaaten ngoge Taurat ras anugerah Dibata. Ertina arah kata enda jelas maka adi ateta kita jadi kalak pentar, la banci lang si harus lit bas kita e me kap kedekaten ras Dibata. Erdeherna kita ku Dibata harusna erpentarna kita. Namun kinatana melala kang kalak nggo pe rusur ngoge Pustaka, PA, PJJ lalap la pentar. Mungkin enda erkiteken kerehenna labo guna erlajar tapi banci jadi ia ka atena man penggurun, la ia ngguru man Dibata. Kalak si la nggit nambahi pemetehna guna jadi kalak pentar bali ras kalak longgor. Longgor bas bahasa Ibrani itulisken alu ewil. Kata enda nggo merujuk ku bas kata sifat. Adi sifat tentu banci iperobahi, emaka tergantung uga kininggiten. Si nibutuhken e me kap kininggiten guna erlajar kerna Tuhan.

Si peduaken e me kap pengertin (ay. 3). Bas bahasa Ibrani kata enda e me kap bina si banci iertiken sebagai kengasupen ngenen alu benar. I bas bahasa si deban enda me si rusur ikataken sebagai kecerdasen emosional. Uga sekalak si jadi anggota jabu enggo ngasup ia ngenen kerina isi jabuna alu cara si benar. Perbulangen ngenen ndeharana alu benar, maka lanai anggapna ia si erdakanna tapi nggo idahna ia sebagai teman arihna. Megati enda pe menjadi tantangen jabu. La litna kecerdasen emosional si erbahanca maka megati melukah jumpa datas. Sebab kepeken lenga ngasup ngidah alu cara si benar. Guna banci ngidah alu cara si benar situhuna Pustaka pe nggo melala mereken pengajaren man banta. Kekelengen (cinta) e pe bentuk emosi. Jabu harus lit kekelengen bas, tapi kekelengen e ibereken alu cara emosional justru banci jadi mbuahken si la mehuli. Misalna ban kelengna ate perbulangen man ndeharana melukah ia cemburu, ban rusur ia cemburu ras la terkendalikenna emosina ikuringina lalap ndeharana rumah. Tentu jabu si mehuli haruslah ngasup mengendaliken ras ngarahken emosina alu benar.

Si peteluken e me kap pemeteh (ay. 4). Kata enda bas bahasa Ibrani e me kap dea si banci iertiken ilmu pengatahuan, kemampuan memberikan opsi ntah pilihen. Kalak si erjabu harus beluh ka pemikirenna. Emaka la salah engkai maka bas kalak Israel umur 30 tahun dilaki maka erjabu sebab bas umur e nggo melala pemetehna nggeluh, nggo melala pilihen-pilihen bas kerina tantangen nggeluh si banci iberekenna. Bahkan i bas ayat 5 jelas ikatakenna maka kepeken pentingen pemeteh asa gegeh. Adi enda jelas bahwa pemimpin dunia la pernah ngandalken gegehna tapi pemetehna, emaka kalak pentar pasti menguasai kalak megegeh.

Adi si telu hal enda lit bas jabu maka kerina barang meherga ras mehuli lit bas jabu. Ayat enda nggambarken kerna hasil. Adi jabu erkiniteken, ngasup mengendaliken emosi (ngenen alu benar) dingen banci memaksimalkan pemeteh si lit bas dirina la banci lang maka jabu e nggo pasti idemi alu erbage-bage kiniulun. Kerina kalak ertujun gelah banci min jabuna mabai kemalemen ate man bana. Emaka syarat mutlak si la banci lang harus ipenuhi e me kap litna si telu palas i datas. Adi ibalik ka maka adi lit denga jabunta lenga lit kemalemen atena i je mungkin saja 3 palas si la banci lang lit i das la terpenuhi.

WARI SI PETELUKEN (SELASA 22 NOVEMBER 2016)

Pdt. Larena br. Sinuhadji (Nd. Rey Tarigan)

Invocatio : “Kenca Yesus ngidah jelma si nterem, inangkihNa sada uruk. Kenca Ia kundul reh ajar-ajarNa pulung deherken Ia. Jenari ibenakenNa ngajari ajar-ajarNa e” (Matius 5:1-2)

Ogen : Titus 2:1-6

Renungen : Job 42:1-5

Tema : NGIDAH TUHAN I BAS KEGELUHEN

Penjelasen Bahan Pustaka Si Badia

Perikopta merupaken pendungi i bas kitab Job, si merupaken kisah Job si berakhir bahagia (happy ending) kenca mengalami penderitaan si mesengat. Janah arah pengalamen kiniseran sialami Job kepeken semakin lagi mpelimbarui kegeluhenna. Selain kinitekenna reh paguhna, penandaina kerna Dibata pe reh bagesna. Adi sedekah enda, pemetehna, penandaina kerna Dibata terjeng si ituriken kalak ngenca (nina pa nina), tapi genduari alu matana jine, Dibata enggo idahna (ay. 5 ras bdk. Joh. 4:42 “Kami enggo tek genduari, labo erkiteken kai si ikatatakenndu, tapi erkiteken kami jine enggo megi pengajarenNa, janah ieteh kami maka tuhu-tuhu me Ia si ngkelini doni enda”). Dibata si uga? Dibata si ngasup erbahan kai pe ay. 2, Dibata si sura-suraNa (rancangenNa) la terjangkau alu pemikiren manusia si terbatas (ay. 2b).

Pemahaman si ibangun i bas kalak Yahudi sedekah enda, maka kalak si setia erkemalangen man Tuhan geluhna ipasu-pasu, sedangken kalak si jahat, geluhna ndatken kiniseran. Tapi arah peristiwa si alami Job ras jabuna, memutarbalikken teologi si sedekah enda enggo nggeluh bas bangsa Israel, maka kalak si setia man Tuhan pe banci geluh mengalami penderitaan.

Bahan ogen si pemena, merupaken surat pengelayasi bas Paulus nari man Titus si melayani i Kreta maka perpulungen arus nggeluh sentudu bagi si ngena ate Dibata. Selaras (sedalanen) antara perukuren, pengerana ras perbahanen. Sabab turah hal si la mehuli i daerah Kreta (bdk. ay 10, “perguak, bali ras rubia-rubia si merawa, rangap ras perkisat”). Si niarapken man perpulungen i Kreta, gelah pengajaren kerna Firman Tuhan e isehken alu benar (la tanggung-tanggung) gelah tuhu-tuhu kiniteken perpulungen e la terjeng teori. Subuk man dilaki si enggo metua, diberu-diberu si enggo metua, diberu-diberu si nguda denga bage pe man anak perana. Ertina, kerina golongan kategorial, dilaki ras diberu geluhna arus jadi usihen si mehuli.

Aplikasi

Erkiniteken man Dibata lit i bas sada proses perdalanen kegeluhen i ja iarapken reh dekahna kita nggeluh reh bagesna penandaita kerna Dibata dingen reh paguhna kinitekenta. Sabab erkiniteken e labo terjeng Pengakun Kiniteken si ibelasken i bas Ruang Ibadah, entah pe ketutusen ngikuti ibadah alu megiken ras diskusiken Kata Dibata, tapi penerapen Firman Tuhan (pengajaren Tuhan) si enggo sialoken i bas kegeluhenta si tep-tep wari.

Tema i bas wari pe-3 Pekan Kebaktin Keluarganta, “Ngidah Tuhan i bas kegeluhen” mabai kita gelah dewasa i bas erkiniteken man Tuhan. Maka Tuhan sitandai labo terjeng si iungkapken bas “buku”, kai nina kalak (hamba-hamba Tuhan), tapi secara pribadi, kita sendiri ngidah ras mengalami Tuhan arah erbage-bage pengalamen kegeluhenta. Seh maka turah pengakun, “alu matangku jine, Kam enggo kuidah”.

WARI SI PEEMPATKEN (RABU 23 NOVEMBER 2016)

Nrs. Pdt. Larena br. Sinuhadji (Bp. Rey Tarigan)

Invocatio : “Adi kam nggit megiken kata dingen nggit erlajar, i bas sada paksa kam la banci lang jadi pentar” (Kuan-kuanen 19:20)

Ogen : Heber 6:1-5

Renungen : Masmur 119:12-18

Tema : ERLAJAR E ME KERIAHENKU

Penjelasen Bahan Pustaka Si Badia

Bahan renungenta e me puji-pujin kerna kepentaren (kebijaksanaan) ras undang-undang (hukum) Tuhan. Istilah-istilah si deban si ipake guna mperjelas kerna undang-undang Tuhan si lit i bas ay. 13,16,18 e me : peraturen-peraturenNa (ay. 12), perentah-perentahNa (ay. 14), keputusenNa (ay. 15), ras ajarNa (ay. 17). Ertina undang-undang Tuhan enda labo terjeng si lit bas Hukum Taurat si ibereken Dibata man Musa ngenca, tapi kerina si nisuraken Dibata gelah ilakoken si tujunna guna kiniulin kalak si tek man baNa. Emaka kerina si nisuraken Dibata enda adi tuhu-tuhu sipelajari, sipergermetken, siikutken, ras sidalanken mabai keriahen si tuhu-tuhu (ay. 14 & 18). Keriahen (kebahagiaan, sukacita) i jenda seri antusenna ras pasu-pasu (berkat) i bas Dibata nari. Janah i bas teologia Pemasmur, pasu-pasu si maba keriahen si tuhu-tuhu e labo erpalasken kepemilikan erta-erta doni tapi erpalasken keterbukan nandangi pengajaren-pengajaren Dibata ras nggeluh rikutken sura-suraNa. Rikutken sura-sura Pemasmur si atena nggeluh denga i bas keriahen si tuhu-tuhu ndai, maka ipindoken Pemasmur man Dibata gelah iberekenNa denga kesempaten guna nggeluh ngikutken ajarNa bage pe ipindona gelah reh ipetangkas Dibata kebenaren undang-undangNa si rejin (ay. 17-18).

Bahan ogenta e me pengajuk man perpulungen kalak Kristen gelah ningkatken kualitas erlajarna alu pelajaren-pelajaren si terbagesen kerna kegeluhen Kristen. Pelajaren-pelajaren si terbagesen kerna kegeluhen Kristen si nimaksudken i jenda e me ndalanken kerina si jadi peraten Dibata i bas kegeluhen si tep-tep wari. Em tandana perpulungen kalak Kristen si dewasa i bas erkiniteken.

Invocationta ngerana kerna kepentaren Dibata si idatken arah megi-megi ras nggit erlajar kerna Kata Dibata. Kepentaren Dibata i jenda e me pengertin ras pemahamen si mbages (meliputi kecerdasen intelektual, emosional, ras spiritual si seimbang) si mpengasup sesekalak menilai, erbahan keputusen ras tindaken si benar sue ras Kata Dibata.

Aplikasi

Sekalak tokoh terkenal i bas negara Amerika Serikat nari si tergelar Benjamin Franklin ngatakenca, “Tell me and I forget. Teach me and I remember. Involve me and I learn”. Ertina kurang lebih i bas bhs. Indonesia, “Ceritakan padaku maka aku akan lupa. Ajarilah aku maka aku akan mengingatnya. Libatkan aku maka aku akan belajar”. Antusenna, sekalak pengajar si mehuli ngasup ia mabai murid-muridna ngelakoken kerina teori si iajarkenna. Emaka proses erlajar si mehuli arus mencakup olah pikir (kognitif), olah rasa (afektif), ras olah tingkah laku (psikomotorik). Adi bas quiz edukatif sendah nina, “head, heart, ras hands”.

Teluna bahan Pustaka si Badianta sendah ngajuk kita gelah mpelajari, mpegermetken, ngikutken, ras ndalanken kerina si jadi peraten Dibata i bas geluhta. Ertina, Kata Dibata e labo terjeng ngadi bas pusuh perukurenta ngenca, tapi maler ku bas caranta rukur, caranta erdiate, caranta ndungi sada-sada persoalen (problem solving) entah pe erbahan keputusen, pengerananta, ras perbahanenta si tep-tep wari. Adi si e kerina enggo erdalan, e me gelarna pasu-pasu Dibata si maba keriahen si tuhu-tuhu.

Tema si seh man banta “Erlajar e me keriahenku”, sada pengajuk man banta kerina gelah la erngadi-ngadi erlajar kerna kai pe si mehuli, khususna kerna Kata Dibata. Erlajar kerna pemeteh si deban guna ngelitken kerina kebutuhen geluhta labo salah, saja ngenca pemeteh kerna Kata Dibata pe arus jadi prioritas i bas geluhta, e me sura-sura Dibata guna kiniulin geluhta. Gelah kai pe si icapai kita i bas geluhta, i bas situasi si kugana pe, tetap kita ngasup meteruk ukur ras ngataken bujur man Dibata. E me pasu-pasu si maba keriahen si tuhu-tuhu i bas Dibata nari. Sipindolah kepentaren i bas Dibata nari gelah ipengasupNa kita ndalanken kerina si jadi peratenNa i bas geluhta. Gelar Dibata termulia arah teladan geluhta i tengah-tengah sekelewetta. Dibasa si mpegegehi kita.  

WARI SI PELIMAKEN (KAMIS 24 NOVEMBER 2016)

Pdt. Larena br. Sinuhadji (Nd. Rey Tarigan)

Invocatio : “Pepayolah ntah mawen lepak dalan si kudalani, jenari babailah aku arah dalan si tetap rasa lalap” (Masmur 139:24)

Ogen : Kejadin 6:1-12

Renungen : 2 Timotius 4:1-5

Tema : JABU E ME GEREJA SI PAGUH

Penjelasen Bahan Pustaka Si Badia

Perikop enda ibenai alu kata-kata si berfungsi sebage sumpah (bahasa Karo kurang teridah, i bas Alkitab TB-LAI nina, “Di hadapan Allah dan Kristus Yesus yang akan menghakimi orang yang hidup dan yang mati, aku berpesan dengan sungguh-sungguh kepadamu demi penyataanNya dan demi kerajaanNya”). Kai si ibelasken Paulus enda e me kap guna mpertegas uga pentingna kata-kata ajar si bakal ipeseh Paulus. Si arus terus ilakoken Timotius e me :

• Pembarken Kata Dibata tenteng entah la tengteng paksana.
• Mpersingeti perpulungen : cidahken salahna, mpersingeti dingen menegur.
• Ajarken perpulungen alu dem kesabaren.

Kai alasenna maka arus makeken waktu guna mpembarken Kata Dibata? Sabab reh pagi paksana nterem kalak la nari megiken pengajaren si tuhu-tuhu. Malah kebalikenna, ipepulungna guru-guru palsu guna ngajari ia kerna kai siakapna entabeh megikenca. Tapi man Timotius sendiri, kai pe si terjadi ola bene ukurna, megenggeng i bas ngenanami kiniseran. Dahikenlah dahin meritaken Berita si Meriah, janah dalanken tanggung jawabna jadi suruh-suruhen Dibata.

I bas bahan ogen si pemena icidahken man banta kerna keluarga Nuah si la terbawa arus jaman paksa si e erkiteken ia ras jabuna bergaul akrab ras Dibata. Nuah ras keluargana (ndeharana, telu anakna ras telu permenna) tetap erdalan i bas dalan Dibata. Seh makana, lit pe ukumen nandangi manusia si semakin jahat arah banjir si mbelin, Dibata menyelamatken Nuah ras jabuna arah ketaatenna erbahan kapal (bahtera).

Aplikasi

Lit sada buku terbiten tahun 1971 si berjudul “Keluarga retak masyarakat rusak”, “Crisis of the family as crisis of the society”. Akap kami sue denga ras situasi masyarakatta paksa gundari. Ertina, adi ateta masyarakatta maju, berkembang, dame, e kerina ibenai i bas setiap jabu. Adi jabu e dame, teratur, berintegritas, jujur, masyarakat pe sikap, dame, la rusur erbahan demo si anarkis, rsd. Termasuk Gereja pe paguh, persadanna nteguh, semangat untuk melayani ras ersaksi. Sabab jabu e me lembaga si terkecil bekas Dibata mantekisa. Adi keluarga e harmonis sada ras si debanna, la banci lang menjadi benteng (pertahanen) si nteguh i bas tantangen ras godaan jaman si nderpa.

I bas jaman i ja Timotius melayani i Epesus, tuhu melala tantangen, i ja ajaren sesat bengket si banci ka mpengaruhi perpulungen sabab kencendrungen jemaat paksa si e senang si serba praktis ras berpikir pragmatis (rukur guna keuntungenna saja). Tapi Timotius la banci bene ukurna, tetap ia ndalanken tanggung jawabna alu mehuli. Termasuk pe keluarga Nuah si bergaul akrab ras Tuhan, e me tandana jabu si erkemalangen man Dibata, entah pe Dibata tuhu-tuhu jadi sukuten bas jabuna.

Tema si seh man banta i bas berngi sendah e me “Jabu e me Gereja si paguh”. Jabu-jabu kalak Kristen paksa rasul-rasul e me cikal bakal Perpulungen Kalak Kristen. Kebaktin-kebaktin rusur ilakoken i bas jabu-jabu. Arah jabu-jabu si lit i bas sada kuta, i je me ipanteki Gereja Tuhan. Tuhe mbelin kel peran jabu i bas paksa rasul-rasul. Arah jabu-jabu si ersada arih, paguh erkiniteken, turah me Gereja Tuhan si paguh i bas ngalaken kerina tantangen si lit paksa si e. Arah jabu-jabu si jadi teladan man sekelewettna, melala kalak si nandai Kristus ras reh belinna pengikut Kristus seh asa gundari.

Jabu-jabu kalak Kristen ras Gereja bage pe ras masyarakat sekelewetna la banci terpisahken. Emaka i bas wari sendah iajuk kita guna menyadari peran penting jabunta i tengah-tengah masyarakat bage pe i tengah-tengah Gerejanta. Ibenaken i bas jabunta masing-masing, adi jabunta termasuk i bas jabu si berkualitas prima i bas erkiniteken man Dibata enggo banci sipastiken pelayanen i bas Gereja pe berkualitas prima. Adi jabunta termasuk jabu kalak Kristen si layak jadi teladan, enggo banci sipastiken lingkungan sekitarta pe nandai Kristus arah litna jabunta i tengah-tengahna. Pindolah kepentaren i bas Dibata nari. Dibata si mpegegehi kita.

WARI SI PEENEMKEN (JUMAT 25 NOVEMBER 2016)

Vic. Floreanado Kilanta Sembiring (Nando K. Sembiring)

Invocatio : “Nina TUHAN, “O Betlehem i Eprata, aminna i Juda kam kuta si kitikna, tapi i bas kam nari Kupekeke sekalak si ngerajai Israel, si asalna i bas adi-adi nari, i bas paksa si nuria nari” (Miha 5:2)

Ogen : Jesaya 11:1-9

Renungen : Matius 1:18-25

Tema : JABU SI ER-ADVEN

Penjelasen Bahan Pustaka Si Badia & Pengkenaina

“Sabab Ia me pagi si nebusi bangsaNa i bas dosa-dosa nari” (ay. 21b)

           

Natang tuah em kap sada pasu-pasu si mbelin si rehna arah Dibata nari, tapi adi enggo leben natang tuah ope lenga erjabu e banci lanai sigejabken sebage pasu-pasu tapi kemelaan i tengah jabu. Cibiran, hinaan ras si debanna enggo pasti inanami, terkhususna bagi si diberu lebih berat bebanna banci ia icap sebage diberu si la mehuli janah banci la lit dilaki si nggit nungkun ia jadi ndeharana, adi nggit pe dilaki e enggo lain pandangan kalak si deban.

Mungkin keadaan si bage rupana si inanami Maria ras Jusup paksa Maria enggo leben mehuli kulana. Tapi kerina pandangen e labo jadi masalah perbahan ieteh Maria ras Jusup, Anak si lit i bas bertin Maria em kap Mesias si enggo inubuatken nabi-nabi, si jadi Raja Penampat, Penebus dosa-dosa bangsaNa, Bapa si engkelengi anak-anakNa arah penebusan dosa. Enda jadi sada penghiburan ras pengharapen bagi Jusup, kepeken Maria em kap diberu si enggo isikapken Dibata guna Ia, Imannuel si enggo itimai kidekah enda. I bas ayat-ayat berikutna ituriken maka tuhu-tuhu ersikap Maria ras Jusup guna tubuhna Anak si enggo ijanjiken Dibata e sue ras perentah Dibata, maka kerehenNa ku doni enda tuhu-tuhu nyata.

I bas Gerejata Minggu-minggu nimai kerehen Anak e igelari Minggu Advent entah pe Minggu-minggu Ertima KerehenNa, bagi Maria ras Jusup ertima ketubuhenNa. I bas Minggu-minggu e Gereja nikapken dirina arah merenungken ulihi gua belinna lias ras keleng ate Dibata ku manusia arah kerehen AnakNa si igelari Jesus guna mulahi manusia arah dosa nari.

Labo ngenca Gereja si ersikap tapi jabu kalak Kristen pe arus ersikap guna ngalo-ngalo kerehen Tuhanta Jesus Kristus Sang Penebus ku doni enda. Kai kin arus si isikapken jabu kalak Kristen i bas nimai kerehenNa si irayakan bulan Desember si reh? Selain secara lahiriah, bagi mendokarsi rumah alu tema Advent entah pe Natal, jabu kalak kristen arus nge nikapken perukurenna sebage sada jabu ras pribadi-pribadi si lit i bas jabu. Ula sicedai Minggu Advent enda ras perayaan Natalta alu pinakit formalitas saja, maka enggo irayaken saja. Tapi ukurta pe arus nge sikap guna sikap ngalo-ngalo kerehenNa.

Aruslah sipesikap ukurta maka tuhu-tuhu tubuh Tuhan Jesus e i bas geluhta janah arah ketubuhen Tuhan Jesus i bas geluhta banci sipelimbarui dirinta ras jabuta. Jadilah kita jabu si er-Advent, jabu si enggo sikap guna ngalo-ngalo ketubuhen Tuhan Jesus i bas geluhta ras jabuta, IMMANUEL.

WARI SI PEPITUKEN (SABTU 26 NOVEMBER 2016)

Vic. Floreanado Kilanta Sembiring (Nando K. Sembiring)

Invocatio : “Sabab bage pengkelengi Dibata doni enda, e maka iberekenNa AnakNa Si Tonggal, gelah ola bene ise pe si tek man Bana, tapi gelah dat kegeluhen si tuhu-tuhu si la erkeri-kerin” (Johanes 3:16)

Ogen : Sakaria 9:9-10

Renungen : Lukas 1:67-71

Tema : NATAL SI TUHU-TUHU

Penjelasen Bahan Pustaka Si Badia & Pengkenaina

“IbereknNa man banta Penebus si erkuasa” (ay. 69a)

I bas Gerejata Natal em kap sada perayaan gerejawi si penting. Natal jadi sada moment si mempringati ketubuhen Kristus Jesus, Raja Penampat si nampati kita pulah arah maut nari. Sikonsep perayaan Natalta seh kel merihana : lit tari-tarian, koor, vocal grup, drama Natal ras la ketadingen jamuan makan si ntabeh. Banci seh bulan Januari pe sirayaken denga Natal : Natal Umum, Natal Kategorial, Natal Persadaan, Natal Kantor, Natal Oikomene si la kalah meriahna. Tapi ekin Natal si tuhu-tuhu e? Lang lah si sangana sirayaken e egota, lang lah enggo si pelawes Kristus i bas Natal e?

I bas Lukas 1:67-71 ituriken kerihanen ukur Sakaria perbahan kai si enggo ipadanken Dibata arah nubuat nabi-nabi terjadi, kerehen Mesias. Meriah kel ukurna, ipujina Dibata perbahan kerehen Mesias e, tapi si menarikna em kap riahen akapna berita kerehen Mesias asangken ketubuhen anakna si sada. Labo kurang dekah itimai Sakaria kerehen anakna malah enggo hampir putus asa ia, la ia tek berita si ibaba Malaikat Gabriel ku ia.

Bagi Sakaria si arus irayakenna arah puji-pujianna labo kerna dat ia anak paksa enggo metua ia ras labo perbahan anakna e jadi kalak si penting i bas karya keselamatan Tuhan Jesus. Iteh Sakaria, dosa ras maut lanai erkuasa man ia ras manusia perbahan Sang Penebus enggo reh, e si erbahan meriah kel ukur Sakaria.

Arah Sakaria sitandai kai kin Natal si tuhu-tuhu. Kepeken Natal labo memuaskan egota tapi mengosongkan diri, ras mengisina alu kerihen ukur perbahan enggo tubuh Tuhan Jesus i bas geluhta. Labo salah merayaken Natal alu meriah, e pe salah sada bentuk keriahen ukur menyambut ketubuhen Kristus tapi si pentingna i bas Natal ula bene, em kap keriahen ukur menyambut ketubuhen Kristus ku doni enda ras ku geluhta.

Arah puji-pujin arus sicidahken kemerihen ukurta. Puji-pujinta labo terjeng perayaan ras rende-rende saja, tapi puji-pujinta arusna bagi puji-pujin Sakaria, perubahan hidup. Jadiken perayaan Natal jadi perayaan Dibata enggo mentransformasi geluhta, maka tuhu-tuhu sigejabken Natal si tuhu-tuhu. Adi sirayakan Natal si tuhu-tuhu e, banci sigejabken lias ate ras perkuah ate Dibata si mbelin i bas geluhta, bagi Sakaria.