PJJ GBKP Tgl. 6 - 12 November 2016

PJJ GBKP TGL. 6 - 12 NOVEMBER 2016

Pdt. Larena br. Sinuhadji (Nd. Rey Tarigan)

Tema : NGGELUH SEHAT (Daniel 3:3-16)

Penjelasen Bahan Ogen & Renungen

Perikop enda ibere Judul “Iperentahken Nebukadnesar maka kerina kalak nembah man gana-gana emas” (TB-LAI : “Perapian yang menyala-nyala”) si intina ngerana kerna kesetian Saderah, Mesah ras Abednego teluna teman-teman Daniel, anak muda Yahudi si iambeken ku Babel ras jadi pegawai i istana raja. Kenca enggo ipajekken raja Nebukadnesar gana-gana emas si gedangna dua puluh pitu meter maka perentahna man kerina pegawai-pegawaina, subuk raja-raja, gubernur, wakil gubernur, wakil raja, bendahara, hakim-hakim, kepala daerah ras kerina pegawai-pegawai si deban si lit bas propinsi Babilon rikut ras kerina jelma i bas kerina bangsa, suku ras cakap, arus nembah mungkuk man gana-gana e. Ise si la nembah mungkuk, minter iambekken ku bas api ginuhur si gurlah.

Saderah, Mesah ras Abednego la sembahna gana-gana ndai, maka lit langsung laporen man raja. Merawa raja ras iperentahkenna maka teluna kalak enda ngadap man raja. Sekali nari isungkun raja teluna kalak enda, bahkan iberekenna kesempaten guna nembah man dibatana ras gana-gana emas buaten raja. Adi lang, minter teluna kalak enda iambaken ku bas api ginuhur si gurlah. Itantang raja teluna kalak enda alu penungkunen, “Akapndu kin lit dibata si ngasup ngkelini kam?” Alu tegas ijawab Saderah, Mesah, ras Abednego maka labo lit sura-surana guna mperdiateken diri sendiri. “Adi kin ngasup Dibata si isembah kami mulahi kami i bas api ginuhur si gurlah ras i bas kuasandu nari, tentu ipulahina kami. Tapi adi lang pe, gelah ietehndu min Raja, maka la kami nggit nembah dibatandu, janah la kami nggit nembah mungkuk man gana-gana emas si enggo ipajekkenndu e”.

Iman si berkualitas, si tahan uji dingen la tergantung ku bas tanda-tanda sengget (mujizat). Sabab jelas ikataken teluna kalak enda, la pe ipulahi Tuhan, tetap kalak enda setia erkemalangen man Tuhan, la nggit “ilacurkenna” sitik pe kinitekenna. Sabab mbue gundari kesetianta erdibata tergantung mujizat, pertolongen bas Dibata nari. ‘Di kenca kurang siakap penampat Dibata e, mulai kendur kinitekenta.

Tema si isikapken i bas PJJ-nta sekali enda “Nggeluh Sehat”. Situhuna, labo lit sitik pe ogenta menyinggung soal kesehaten daging kula, kecuali i bas bindu 1, i ja Daniel ras teluna temanna pang nulak pangan inemen si isikapken i bas istana Nebukadnesar nari ras lebih memilih pangan-pangan rikutken aturen agamana. Ras adi ngerana kita soal nggeluh sehat berarti secara holistik, sehat jasmani ras rohani (mungkin si nimaksudken i bas kaiten antara tema ras ogen i bas PJJ-nta sendah e me sehat secara rohani). Dingen lenga bo tentu lit kaitenna antara kesehaten daging kula ras sehat kiniteken. Sabab lit deba kalak sehat daging kulana, tapi kinitekenna la sehat. Lit ka kalak sakit daging kulana, kinitekenna tetap paguh. Contohna rasul Paulus, lit duri i bas daging (maksudna sakit secara fisik), enggo ertoto ia mindo kesembuhen i bas Dibata nari, tapi la malem-malem, labo e erbahanca bene kiniteken Paulus, bahkan geluh pertendinna semakin ibaharui Tuhan wari lepas wari (bdk. 2 Kor. 12:7-10). Si mehulina, sehat kinitekenta, janah ngasup ka kita alu bijaksana njagai kesehaten daging kulanta alu konsumsi pangan si sehat (seimbang), ras istirahat si cukup. Adi enggo pe bage sijaga geluhta subuk jasmani ras rohani alu mehuli, reh pinakit, si e kerina i luar kuasanta. Si penting kai pe si terjadi i bas geluhta tetap kita ngasup ngataken bujur man Tuhan ras erkemalangen man baNa. Dibata si mpegegehi kita.