Khotbah GBKP Minggu Tgl. 13 November 2016

KHOTBAH GBKP MINGGU TGL. 13 NOVEMBER 2016

Nrs. Pdt. Larena br. Sinuhadji (Bp. Rey Tarigan)

MINGGU KELUARGA

Invocatio : Kejadin 2:18

Ogen : Ende-enden Salomo 2:1-17 (Antiphonal)

Khotbah : Kolose 3:18-25

Tema : KELUARGA SI SEMPABU

Penjelasen Bahan Pustaka Si Badia

Makna si banci siantusi i bas invocationta, dilaki ras diberu ijadiken Dibata alu tujun si khusus e me guna geluh ersada i teruh janji perjabun i lebe-lebe Dibata. Perjabun e me sura-sura Dibata nandangi manusia dilaki ras diberu bena-benana nai. Emaka perjabun kalak Kristen palasna e me sura-sura Dibata labo sura-sura manusia. Ertina si ringan i bas jabu-jabu kalak Kristen labo bapa, nande, ras anak-anak ngenca, tapi Dibata pe ringan i bas jabu-jabu kalak Kristen. Emaka jabu-jabu kalak Kristen e me ingan i ja sura-sura Dibata iwujudnyataken.

Sura-sura Dibata nandangi jabu-jabu kalak Kristen e me jabu-jabu si harmonis entah pe sempabu (cocok, sesuai, serasi). Salah sada kunci keharmonisen i bas jabu teridah arah bahan ogenta. Alu bahasa si puitis bahan ogenta ncidahken kegeluhen jabu-jabu si dem alu puji-pujin erpalasken keleng ate antara perbulangen ras ndehara. Duana saling mengagumi kinijilen ndehara bage pe perbulangen. Kai si ikataken i bas bahan ogenta sendah merupaken gambaren keleng ate Dibata nandangi kita manusia. Bage ka pe searusna si terjadi i bas relasi antara perbulangen ras ndehara, saling nehken puji-pujin erpalasken keleng ate Dibata.

Secara konkrit kegeluhen jabu-jabu kalak Kristen arus ncidahken keharmonisen sue ras sura-sura Dibata. Keharmonisen e la banci terwujud adi kerina anggota keluarga la siangkan sada ras si debanna. Arus lit relasi si mehuli antara perbulangen ras ndehara, orang tua ras anak-anak bage pe sebalikna. Konsep jabu kalak Kristen secara teologis iajarken rasul Paulus i bas bahan khotbahta sendah. Si pemena, setiap anggota jabu arus leben ipelimbarui geluhna i bas kiniteken man Yesus Kristus. Si peduaken geluh si mbaru i bas Kristus arus teridah arah pola relasi si sehat ras seimbang sada ras si debanna sue ras sura-sura Dibata. I bas bahan khotbahta sendah jabu-jabu kalak Kristen iajuk gelah membangun ras membudayaken relasi si sehat ras seimbang i teruh kuasa Kesah si Badia. Kuasa Kesah si Badia mpengasup ndehara patuh nandangi perbulangenna. Bage ka pe perbulangen ngasup ngkelengi ndeharana dem alu kelemahlembuten. Anak-anak ngasup mehamat ras patuh nandangi orangtuana bekas pengajaren orangtua erpalasken kepentaren Dibata alu teladan si mehuli.

Aplikasi

Minggu sendah e me Minggu Keluarga, janah tema si seh man banta e me “Keluarga si sempabu”. Akap kami tema enda enggo semal man banta kerina, erkiteken hampir setiap tahun usur lit tema enda i bas PJJ, PA-PA Kategorial, rsd.-na. Tujunna tentu saja gelah keluarga Kristen si sempabu e tuhu-tuhu banci iwujudnyataken i bas jabunta masing-masing. Adi melala jabu-jabu si harmonis, enggo pasti mabai gerejanta bage pe masyarakatta harmonis.

Sura-sura Dibata nandangi jabu-jabu kalak Kristen enggo jelas arah kerina bahan Pustaka-nta sendah. Si pemena lebe, perlu sisedari maka perjabun kalak Kristen e me Dibata si majekkenca. Adi Dibata si majekkenca maka kai pe si terjadi i bas jabunta, Dibata ngenca si jadi sukuten, ertina kerina keputusen si ibahan i bas jabu lit je kepentaren i bas Dibata nari. Si peduaken, harmonisasi i bas jabu kalak Kristen perlu senantiasa ibina perbulangen bage pe ndehara. Bagi bahan ogenta sendah, perbulangen ras ndehara saling mujiken sada ras si debanna erpalasken keleng ate Dibata. Si peteluken, nggeluh si mbaru i bas Kristus secara ideal mabai jabu-jabu kalak Kristen membudayaken relasi si sehat ras seimbang i teruh kuasa Kesah si Badia.

Membangun keluarga si sempabu memang labo hal si murah, apai ka adi siandalken kebeluhenta, kepentarenta ras gegehta. Tapi tek kita adi rusur sipindoken i bas pertotonta gelah kuasa Kesah si Badia mpengasup, mpegegehi, ras mereken kepentaren man banta, maka ipengasupNa, ipegegehiNa, ras iberekenNa kepentaren man banta guna mewujudken keluarga si sempabu sue ras sura-sura Dibata. Gelar Dibata termulia arah teladanta sebage jabu-jabu kalak Kristen i tengah-tengah sekelewetta.