PJJ GBKP Tgl. 13 - 19 November 2016

PJJ GBKP TGL. 13 - 19 NOVEMBER 2016

Pdt. Larena br. Sinuhadji (Nd. Rey Tarigan)

Tema : RAJA PENAMPAT SI NGUBAHKEN GELUHTA (Jesaya 9:1-7)

Penjelasen Bahan Ogen & Renungen

Yesaya ertina “Tuhan (YHWH) menyelamatkan”. Ertugas sebage nabi cukup ndekah i tengah-tengah bangsa Israel kira-kira 112 tahun ndekahna, i benaken sekitar tahun 742 SM seh kematenna i bas tahun 630 SM. Kitab Jesaya rusur isebut Kitab Mesianik erkiteken melala nubuaten-nubuaten i bas kitab enda si meritaken kerehen Mesias ku tengah-tengah bangsa Israel ras jadi referensi i bas Padan si Mbaru. Ayat-ayat si usur ikutip i bas Padan si Mbaru umpamana : Yes. 7:14 (Mat. 1:23); Yes. 61:1-2 (Luk. 4:18-19); Yes. 45:23 (Pil. 2:10-11); rsd. Secara khusus ogenta sendah ikutip i bas Mat. 4:15-16; Luk. 1:32-33; 79.

Ogenta lit i teruh judul “Raja si reh pagin”, i bas Alkitab TB-LAI nina, “Kelahiran Raja Damai”. Ay. 1 (Yes. 8:23 i bas Alkitab TB-LAI) nuduhkenca situasi si terjadi i kerajan Juda i teruh raja Ahas si sangana lit i bas kesusahen ras kepiceten si mesangat erkiteken ancamen kerajan Assur si bakal reh naluken kerajan Juda (Yes. 8:5-10). I bas situasi si bagenda rupana, Dibata arah nabi Jesaya nehken penghiburen ras pengarapen. Labo kepiceten saja si bakal ialami bangsa e. Alu kata-kata si puitis nabi Jesaya nehken nubuaten kerna kerehen sekalak Penampat si bakal mulahi bangsaNa i bas kesusahen ras kepiceten nari. Penampat e igambarken alu “ersinalsal si erkinar”, “terang si harhar” (ay. 2). Penampat si reh e bakal mabai keriahen si mbelin ras kemalemen ate (ay. 3). Penampat si reh e bakal mulahi bangsaNa i bas kerina baban si mberat ras kinisuin, nasapken penindasen ras peperangen (ay. 4,5). Penampat si reh e bakal jadi peminpin si igelari “Penampat si meganjangna”, “Dibata si Mada Kuasa”, “Bapa si Rasa Lalap”, ras “Raja Dame” (ay. 6). Kuasana mbelang, mabai kedamen, merentah erpalasken kebenaren ras kebujuren seh rasa lalap. Si e kerina bakal jadi sabab bage kap sura-sura Tuhan (ay. 7).

I bas Padan si Mbaru enggo tangkas sekalak Penampat e me Yesus Kristus, Juruselamatta si ketubuhenNa bakal ipersingeti kita i bas bulan si reh enda. Tema i bas PJJ-nta si terakhir i bas tahun enda e me “Raja Penampat si ngubahken geluhta”. Seh asa gundari la lit pengakun i bas kalangen masyarakat si eragama Yahudi maka Yesus e Raja Penampat. Yesus e me sekalak tokoh ngenca, labo Mesias apai ka Dibata si reh ku tengah-tengah doni enda. E maka nai-nai nari seh asa gundari la lit perobahen i bas bangsa Yahudi, itimaina denga kerehen sekalak Mesias. Adi la lit pengakun kiniteken maka Yesus Kristus tuhu-tuhu Raja Penampat, tuhu-tuhu Juruselamat, ras tuhu-tuhu Dibata si reh guna nelamatken manusia i bas dosa nari, maka enggo pasti la lit perobahen si nyata i bas kegeluhen. Adi sihitung entah enggo si pepigakaliken Natal tahun enda sirayaken. Entah enggo piga puluh tahun kita jadi kalak Kristen. Penungkunenna tuhu kin Yesus Kristus e Raja Penampat ras mabai perobahen si nyata i bas kegeluhenta sebage kalak Kristen?

Penungkunen e banci jadi bahan evaluasinta secara pribadi i bas dungi tahun enda, seh i ja enggo kuantitas ras kualitas kinitekenta sedekah tahun 2016 enda? Mungkin tema GBKP i bas tahun enda e me “Meningkatkan komitmen warga GBKP yang missioner untuk berpartisipasi dalam pelayanan”, banci jadi salah sada indikatorta. Enggo meningkat kin komitmenta guna berpartisipasi i bas pelayanen? Mari radu ras sievaluasi, sirenungken, sitotoken, ras siperobahi adi memang melala denga si perlu siperobahi gelah reh meningkatna kuantitas ras kualitas kinitekenta i bas tahun si reh enda. Tema GBKP i bas tahun 2017 e me “Meningkatkan kemampuan warga GBKP dalam kehidupan berteologi dan menumbuhkan motivasi belajar secara mandiri (self learning)” perlu radu ras sitotoken ras sidukung. Dibata si mpegegehi kita.