PA MORIA GBKP TGL. 13 - 19 NOVEMBER
2016
Pdt. Larena br. Sinuhadji (Nd. Rey
Tarigan)
Si Man Ogen :
Johanes 4:28-30; 39-42
Tema : MORIA
ERBERITA SI MERIAH
Tujun : Gelah
Moria :
1) Ngumban
semangat diberu Samaria i bas er-PI man anak kutana
2) Ngerencanaken
program PI man si lenga nandai Yesus
Metode PA : Ndahi
Sangkep Geluh
Penjelasen Bahan Ogen
Perjumpaan ras Yesus Kristus selalu maba perobahan (transformasi)
ras enda ialami diberu kalak Samaria i bas perikopta. Ope si jadi man ogenta,
banci igambarken kami kerna proses (tahapen-tahapen) si terjadi i bas
perjumpaan Yesus ras diberu kalak Samaria :
1) Ibenai alu percakapen si ibuka Yesus i bas mindo
lau man diberu enda. Sabab paksa si e ciger wari ras enggo enggo latih (muas) i
bas perdalanen si enggo ibentasiNa.
2) Sengget diberu kalak Samaria, sabab sedekah enda la
lit komunikasi antara kalak Samaria ras kalak Jahudi, apai ka make barang si
enggo ipake kalak Samaria.
3) Ibaliken Tuhan Yesus, sabab adina tandaina ise si mindo
i bas paksa enda man diberu e, tentu enggo ipindo diberu e lau si mereken
kegeluhen. Tapi man diberu kalak Samaria e, Yesus e me manusia biasa si la
ngasup muat lau i bas Sumur Jakub e, sabab 32 M bagesna. Kenca si e itawarken
Tuhan Yesus lau si la erbahanca muas rasa lalap, si banci mereaken kegeluhen si
tuhu-tuhu si la erkeri-kerin.
4) Yesus nandai diberu kalak Samaria enda, seh ku
kegeluhen si pribadi kel, i ja enggo lima perbulangenna, ras dilaki si pelimaken
enda pe labo perbulangenna.
5) Reh tambahna pengangkan diberu enda kerna Yesus
maka nina, “Yesus e nabi kap”. Je nari isungkunna kerna masalah si sensitif kel
i bas hubungen kalak Jahudi ras Samaria kerna masalah peribadaten. I ja kin
situhuna Dibata nggit isembah, i Gerizim entah i Jerusalem? Emaka nina Yesus,
labo soal ingan si penting tapi arah Kesah si Badia manusia ersembah man Dibata
alu payo.
6) Mulai je nari enggo tambah penandai diberu kalak
Samaria e ndai kerna Yesus. I ja tek ia maka Mesias si ipadanken Dibata e me
Kristus nandangi reh me. Langsung nina Yesus, “Aku, si ngerana ras kam enda kap
si Engkelini si ipadanken Dibata e”.
7) Pengalamenna jumpa ras Yesus aminna i bas waktu si kentisik
erbahanca erburak-burak pusuhna mabai ia er-PI man anak kutana. Itadingkenna
ingan launa ndai minter ia erberita man anak kutana, “Marilah sinehen kalak si
enggo nuriken kerina lagu langkahku. Banci jadi ia me Mesias si ipadanken
Dibata”. Lit denga keraguanna alu kata-kata “banci jadi”. Bhs. Ind. : “Mungkinkah
Dia Kristus itu?” Emaka berkat anak kuta e ndahi Yesus.
8) Uga makana langsung nggit berkat anak kuta e? Sabab
enggo idahna secara langsung perobahan i bas diberu kalak Samaria e. Si awalna
tertutup >>> mulai terbuka. Minder >>> percaya diri. Fokus
dengan persoalan >>> fokus nandangi kuasa Yesus (“itandaina aku”). Rendah
iakapna dirina >>> meherga iakapna bana.
9) Bahkan arah pemberitaan diberu kalak Samaria, tek
anak kuta e man Yesus erkiteken kai si ikataken diberu e, seh makana
ipindokenna maka Yesus dua wari nari tading i kuta kalak Samaria. Kenca Yesus
ngajar reh teremna kalak si tek man Yesus. Bahkan enggo berobah, labo nari tek
man Yesus arah kai si ikataken diberu e tapi erkiteken pengalamenna sendiri
jumpa ras Yesus, “Kami enggo tek genduari, labo erkiteken kai si ikatakenndu,
tapi erkiteken kami jine enggo megi pengajarenNa, janah ieteh kami maka
tuhu-tuhu me Ia Si Engkelini doni enda”.
Aplikasi
Tema i bas PA-nta sendah e me “Moria er-Berita si Meriah”.
Engkai makana arus kita er-PI?
- Perentah Tuhan Yesus (Matius 28:18-20).
- Teladan i bas tokoh-tokoh Pustaka si Badia : Tuhan Yesus, Rasul-rasul, Jemaat Mula-mula.
- Tanpa Injil manusia binasa (Yoh. 3:16; Roma 3:23).
- Karena kita berhutang, i ja kita pe enggo iselamatken (Roma 1:14-15).
Semangat diberu kalak Samari arus siusih ras nggeluh i
bas kita Moria. Labo soal dekahna jadi kalak Kristen tapi soal kualitas, i ja
kinitekenta ras Yesus mabai perobahen i bas geluhta, dingen lit semangat guna
kita rutang nehken kekelengen Tuhan si enggo sialoken subuk arah kata ras
perbahanen si mehuli.
PA MAMRE GBKP TGL. 13 - 19 NOVEMBER
2016
Nrs. Pdt. Larena br. Sinuhadji (Bp.
Rey Tarigan)
Advent
Ogen : Matius
16:13-19
Tema : KAM ME
ANAK DIBATA SI NGGELUH
Tujun :
Pengakun nandangi Kristus sebage Mesias e me syarat guna ngaloken kuasa i bas
Kristus ras palas kegeluhen si paguh ngaloken tantangan doni si dem alu
keguluten
Penjelasen Bahan Ogen & Renungen
Bahan ogenta nuriken kerna penungkunen Tuhan Yesus man
ajar-ajarNa kerna diriNa. Penungkunen enda penting guna nikapken ajar-ajarNa
sope Yesus ngenanami kiniseran, ipakuken ku kayu persilang, mate, keke i bas
wari si peteluken, ras nangkih ku surga nadingken doni enda. Tanggapen ajar-ajarNa,
nina lit si ngatakenca Johanes Peridiken, nabi Elia, nabi Jeremia, entah pe
sekalak i bas nabi-nabi si deban. Kerina si tokoh si ikataken ajar-ajarNa e
memang tuhu enggo ngelakoken pendahin si mbelin i tengah-tengah bangsa Israel.
Tapi nina Yesus i bas kalimat si deban, “E me nina kalak. Menurut pendapatndu secara
pribadi, ise Aku enda?” Simon Petrus mewakili pendapat ajar-ajarNa ngatakenca :
“Kam kap Mesias, Anak Dibata si Nggeluh”.
Mesias (Kristus) ertina si iminaki (diurapi) Dibata, e
me Raja si niarapken reh ku tengah-tengah bangsa Israel mulahi i bas kerina penjajahen,
penindasen, entah pe kiniseran nari, ras maba keselamaten. I bas kinitekenta,
Mesias e Yesus Kristus. IA nge si maba keselamaten janah majekken kinirajanNa i
tengah doni enda. Kinirajan Dibata si labo seri ras kinirajan i bas doni enda,
e me kuasa Dibata si nciptaken kondisi, suasana, si dem alu keselamaten
holistik, kekelengen, dame sejahtera, kiniulin, kebenaren, keadilen, rsd. Anak
Dibata si nggeluh ertina lit hubungen khusus antara Yesus ras Dibata si
erbahanca duana ersada, janah la lit ise pe bagi Yesus si memiliki hubungen
khusus ras Dibata. I bas kinitekenta pe ngaku kita maka Yesus Dibata si nggeluh
seh asa gundari.
Kai si ikataken Yesus i bas ay. 18-20 e me visiNa
kerna kai si bakal jadi kenca IA nadingken doni enda. Janah enggo terbukti, Dibata
tetap ncidahken kuasaNa arah Kesah si Badia si nusur ndemi ajar-ajarNa. Simon
Petrus ras kerina rasul-rasul alu kuasa Kesah si Badia majekken gereja. Janah
Kesah si Badia e tetap erdahin seh asa gundari arah gerejaNa i tengah-tengah
doni enda seh maranatha.
Tema i bas PA-nta sendah “Kam me Anak Dibata si nggeluh”,
alu tujun, pengakun nandangi Kristus sebage Mesias e me syarat guna ngaloken
kuasa i bas Kristus ras palas kegeluhen si paguh ngaloken tantangan doni si dem
alu keguluten. Ngataken bujur kita man Dibata erkiteken enda me PA-nta si
terakhir i bas tahun enda. Enggo iarak-arakNa kita seh pendungi tahun enda
bengketi Advent. PA si pendungi enda itutup alu penungkunen man banta pribadi
lepas pribadi, tuhu kin Yesus Kristus e Tuhan ras Juruselamat i bas kegeluhenta?
Adi tuhu ninta berarti enggo ialoken kita kuasa i bas Dibata nari janah kuasaNa
e tuhu-tuhu nyata i bas kegeluhenta. Mari sirenungken kentisik kuasa Dibata e i
bas geluhta kidekah tahun enda. Tentuna enggo melala kuasa Dibata si terwujud i
bas kegeluhenta si tep-tep wari, si isedari entah pe si la isedari kita. Si
pasti, kai pe perbebenta, Dibata la pernah nadingken kita. Mari radu ras
sipergunaken kuasa Dibata si lit bas kita guna naluken kerina tantangen i bas
kegeluhenta. Janah ertoto kita gelah kuasa Dibata si lit bas kita mpengasup
kita guna tetap erdiate ras erpemere man sekelewetta gelah Dibata termulia.
Dibata si mpegegehi kita.
Tidak ada komentar:
Posting Komentar