PA Kategorial GBKP Tgl. 6 - 12 November 2016

PA MAMRE GBKP TGL. 6 - 12 NOVEMBER 2016

Vic. Floreanado Kilanta Sembiring (Nando K. Sembiring)

Ogen : Johanes 5:1-9

Tema : NGGELUH SEHAT ARAH MAKEKEN PERUKUREN KRISTUS

Tujun : Gelah Mamre :

1) Meteh maka Dibata ersura-sura gelah kita nggeluh sehat

2) Membudayaken cara nggeluh si sehat

Metode : Nuriken pengalamen & Diskusi

Emaka nina Yesus man bana “Atendu kin gelah malem pinakitndu?” (ay. 6b)

I bas jaman genduari, akses kesehatan enggo seh kel canggihna hampir kerina pinakit kula lit tambarna guna pepaplem entah pe memperlambat penakit si ncedai dirita. Tapi akses kesehatan si canggih enda berbanding terbalik ras reh teremna kalak “sakit”. Maksud sakit i jenda labo sakit secara kula tapi sakit secara perukuren.

Tambah warina reh teremna kalak si mengalami stres berat, depersi bahkan se ku gangguan secara mental. Penyebabna emkap reh rusurna kalak ngkeriken waktu ras gegehna guna ngukuri hal-hal si negatif; si la bagi ukurna, pebelin-belin masalah si sebenarna la perlu, nukah kel nembeh atena kalak si deban, pesimis ngenehen kegeluhenna, mpepulung-pulung ate mesui ras si debanna. Kepeken perukuren si bage rupana si jadi penyebab utama kalak ngenanami sakit (piga-piga penelitian nuriken mayoritas penakit si membunuh rehna arah perukuren si la sehat).

Kepeken hal si bage rupana jadi salah sada perhatin Tuhanta Yesus Kristus. Inti Johanes 5:1-9 emkap sekalak Yahudi si enggo telu puluh waluh tahun ngenanami sakit tapi la malem-malem (ay. 5). Arah percakapenna ras Yesus teridah ia nyalahken komunitasna si la nampati ia alu namaken ia ku kolam asum mburak kolam e (ay. 7). Perukuren kalak Yahudi e enggo sakit, dem alu penyesalen, rate nembeh ku kalak si deban ras mpepulung-pulung ate mesui perbahan lenga ia bengket-bengket ku bas kolam si mburak e.

Akibat perukuren si la sehat e, la ipergermetkena penungkunen Tuhan Yesus, “Atendu kin gelah malem pinakitndu?” Situhuna jawabenna sederhana, nggit entah lang tapi lain ka jawaben kalak Yahudi enda. Lebih ipilihna mutar mulihi kerina penderitaanna janah e jadikenna jawaban guna penungkunen Tuhan Yesus. La lah kidekah geluhta bage kang? Enggo rusur Tuhan Yesus nungkun “Atendu kin gelah malem pinakitndu?” Tapi la terbeginta perbahan gangen sorata numpahi padan geluhta si siakap dem penderitaan ras la lit kesempatan guna damai sejahtera.

Tuhan Yesus nawarken tambar guna kerina pinakitta e, maka kita banci sehat seutuh-utuhna, “Angkat amakndu, jenari ndalanken” (ay. 9). Angkatndu kerina pola pikir si negatif, pake perukuren Kristus guna memandang kai pe si sangana nerpa kam, petetaplah ukurndu, kam e enggo itebus, kam sekerajangen Tuhan, anak-anak Dibata si asa kam lawes ku rumah Bapata si ni surga tetap iperdiateken Dibata. Dalani kegeluhen enda alu erkemalangen man Tuhan Yesus saja, kai pe si reh ingetndu saja penungkunen Tuhan Yesus Kristus, “Atendu kin gelah malem pinakitndu?” Jawabena emkap “nggit Tuhan”.

PA MAMRE GBKP TGL. 6 - 12 NOVEMBER 2016

Nrs. Pdt. Larena br. Sinuhadji (Bp. Rey Tarigan)

Ogen : Johanes 5:1-9

Tema : NGGELUH SEHAT ARAH MAKEKEN PERUKUREN KRISTUS

Tujun : Gelah Mamre :

1) Meteh maka Dibata ersura-sura gelah kita nggeluh sehat

2) Membudayaken cara nggeluh si sehat

Metode : Nuriken pengalamen & Diskusi

Penjelasen Bahan Ogen

Judul i bas ogenta sendah e me “Ipepalem Yesus kalak si pinakiten i kolam Betesda”. I bas Alkitab TB-LAI nina, “Penyembuhan pada hari Sabat di kolam Betesda”. Betesda ertina “rumah belas kasihan”, kerna fungsi kolam enda paksa si e enggo jelas bas ogenta. Idapeti Yesus je sekalak si enggo 38 tahun pinakiten. Erkiteken la lit ise pe si nampati ia guna bengket ku bas kolam e, maka la malem-malem pinakitna. Kondisi e ieteh Yesus maka isungkunina sekalak ndai “Atendu kin gelah malem pinakitndu?” Ay. 7 i bas bahasa Indonesia nina “Tuhan”, nuduhkenca kiniteken sekalak ndai erkiteken igelarina Yesus “Tuhan”. Amin pe wari Sabat, tetap ipepalem Yesus sekalak si enggo 38 tahun sakita ndai. Kai si ilakoken Yesus e jadi persoalen man kalak Yahudi si erkuasa sebab wari e wari Sabat. Menurut aturen la banci erkai pe i bas wari Sabat. Ipelimbarui Yesus aturen e erkiteken la lit kai pe si banci ngambati kalak guna erbahan si mehuli sue ras peraten Dibata (ay. 17).

Si menarik adi sioge seh ay. 18, i bas ay. 14 ikataken Yesus man kalak si enggo 38 tahun sakit e niNa, “Genduari kam enggo malem; olanai bahan si la ngena ate Dibata, gelah ola jadi man bandu keleken asa si nggona”. I bas bahasa Indonesia niNa, “Engkau telah sembuh; jangan berbuat dosa lagi, supaya padamu jangan terjadi yang lebih buruk”. Secara tersirat mereken keterangen kerna pinakit si nialami sekalak ndai si jadi erkiteken perbahanenna si la ngena ate Dibata. Memang lit tafsiren si ngatakenca la lit hubungenna antara dosa ras pinakit sekalak si enggo 38 tahun sakit ndai i bas perkatan Yesus, tapi banci ka terjadi pinakit erkiteken perbahanen-perbahanen si la ngena ate Dibata.

Aplikasi

Tema si seh man banta “Nggeluh Sehat Arah Makeken Perukuren Kristus” alu tujun gelah Mamre meteh maka Dibata ersura-sura gelah kita nggeluh sehat ras membudayaken cara nggeluh si sehat. I bas ogenta sendah, kiniteken selakak si 38 tahun sakit erbahanca ia malem i bas pinakitna nari. Ogenta pe nuduhkenca Dibata si tuhu-tuhu erdiate nandangi kalak si lit i bas kiniseran erkiteken sakit-pinakit, si secara konkrit iwujudken Yesus alu mpepalem kalak si sakit ndai. Dibata si erdiate ndai nuduhkenca maka sura-sura Dibata nandangi manusia perdosa e me keselamaten secara holistik, ertina labo hanya secara rohani tapi pe jasmani, labo hanya terjadi i bas Maranatha tapi pe terjadi i bas paksa gundari. Maka i bas ay. 17 ikataken Yesus, “BapangKu erdahin kap lalap; e maka Aku pe arus erdahin”. Erdahin guna keselamaten manusia perdosa seh asa gundari.

Pendahin guna keselamaten e pe dahinta. Secara kiniteken, enggo lit jaminen keselamatenta si isempurnaken i bas Maranatha. Tapi gundari pe banci iwujudken keselamaten e alu hal-hal si praktis bagi njagai kesehatenta secara fisik, psikis, ras spiritual. Melala pinakit si terjadi erkiteken la beluh kita njagai kesehatenta, melalasa rukur kerna sen, umpamana, banci erbahanca kita sakit, lit pinakit si reh erkiteken pergaulen si salah, tapi melala ka terjadi pinakit si reh amin pe enggo sijaga alu payo kesehatenta. Tapi paling tidak pinakit e banci siminimalisir penyebabna alu njagai kesehatenta. Emaka mari sibudayaken cara nggeluh sehat i bas pola perukurenta, i bas pola makanta si seimbang, i bas erkiniteken man Dibata, i bas perbahanen-perbahanenta si sue ras peraten Dibata, rsd. Dibata si mpegegehi kita.

PA MORIA GBKP TGL. 6 - 12 NOVEMBER 2016

Vic. Rinaldy Girsang

Si Man Ogen : 2 Korinti 9:6-11

Tema : PERSEMBAHEN SI ERBUAH

Tujun : Gelah Moria :

1) Nuriken erti ras palas nehken persembahen

2) Ningkatken kualitas ras kuantitas persembahen

Metode : Erbahan Tekad

Persembahan i bas Kamus Bahasa Indonesia ikatakaten pemberian kepada orang yang terhormat nce ikataken ka pe ertina yang dihidangkan atau dipertunjukkan. Persembahen e banci ikataken buah kiniteken kalak si tek. Persembahen e me respons erkiteken si lit i bas kita kerina, juma, keluarga, kebayaken bage pe kegeluhen si lit i bas ia isadarina labo erkiteken gegeh kengasupen dirina jine, tapi perban perkuah ate Dibata si enggo nampati dingen pengasup i bas kegeluhenta. Saja enggo ngenda kita mereken persembahen alu payo?

Persembahen i bas kitab 2 Kor. 9:6-11 enda nuriken kerna mpepulung persembahen man kalak musil si tading i Yerusalem. Paulus i bas ayat bage pe perikop enda cukup detail kerna uga arusna i bas kita nehken persembahen man Tuhan. Paulus labo hanya ngajuk guna mereken persembahen tapi mereken pengelayasi kerna nehken persembahen alu payo. Lit piga-piga hal i bas kita nehken persembahen i bas konteks ayat enda si perlu iperdiateken e me : mere alu “Sukarela, Sukacita bage pe dem pengataken bujur”. I bas konteks enda pe Paulus labo lit nulisken kerna jumlah ntah pe nominalna i bas nehken persembahen. Paulus mereken penjemba bage pe pemahamen gelah ula mbiar kekurangen i bas nehken persembahen sebab Dibata masu-masu kalak si mere alu riah ukur janah pe ibere Tuhan pasu-pasu si simpar (2 Kor. 9:8). Bagi kalak musil si tading i Yerusalem si membutuhken penampat adi lit i bas kita ula sitahan guna mere man kalak si membutuhken penampatta sebab adi enggo sibereken e me tanda kita enggo ipakeken Tuhan guna nehken keleng ate man kalak si membutuhken (Saluren Berkat).

I bas tema ikataken e me persembahen si erbuah, persembahen si enggo isehken kita alu dem pengataken bujur bage pe keriahen ukur e me buah kinitekenta man Tuhan Dibata. I bas kita nehken persembahen e tentu kita enggo nuan si mehuli janah labo lit si sia-sia i bas kita nehken keleng ate e. Sebab kai isuan e ka nge si turah. Bagi nina Pustaka, Berelah kalak si deban, maka kam pe pagi ibere Dibata; ialokenndu me pagi sada persukaten si dem, sada bagin si sampur si itungtungken ku bas tanndu asa ngasup kam ngalokenca. Sukat-sukat si ipakendu e kange isukatken man bandu (Luk. 6:38).

Selaku kalak Kristen tentu melala kita ikut muat bagin i bas nehken persembahen subuk i bas nehken perpuluhen, kerja rani, kolekte, Diakonia, pembangunan gereja, mpepulung dana guna PI ras si debanna. Arah kerina si enggo sibahan kita e perlu kita masuk ku bas sada perenungen e me enggo ngenda kita nehken alu payo? Adi alu payo tentu siikutken bagi sikataken Paulus, e me alu Sukacita labo alu pusuh jungut-jungut. Emaka alu sukarela ertina alu pusuh ersuruh labo erkiteken paksaan ntah pe terpaksa. Bage pe mere alu dem pengataken bujur sebab tek kita maka kerina si lit i bas kita erta-erta, duit, kebayaken, bage pe kegeluhen enda Tuhan si Mada, emaka tanda riah ukurta siendesken ka man baNa sebage tanda pengataken bujurta.

Emaka sada penjemba man banta kerna uga kerna sikapta i bas nehken pengataken bujur bage pe persembahen. Adi payo pengangkanta, payo ka nge sikap ntah pe perbahanenta sebab pemahamen si payo erbahan sikap si payo i bas nehken persembahen. Emaka adi payo pemahamen ras perbahanen la banci lang kualitas ras kuantitas persembahen enda meningkat. Emaka banci isimpulken si enda kerina i bas kalimat enda sangap me kalak si mere alu labo nginget-nginget, janah ngaloken alu la ngelupakenca, sebab sangapen kap mere asang mindo.