SUPLEMEN PA MORIA GBKP TGL. 26 JULI - 1 AGT. 2026

Pdt. Larena Sinuhadji

Wujud Kasih Kepada Allah Melalui Ketaatan

Si Man Ogen : Lukas 5:4-11

Tema : PATUH NDALANKEN PERSURUHEN YESUS

Tujun : Gelah Moria:

- Meteh kecibal ajar-ajar paksa si e

- Maba sada teman Moria si kurang aktif reh ku PA Moria

Metode : Games & Aksi

Penaruh

Lit kurang lebih 384 kata “patuh” i bas Alkitab Bhs. Karo, ertina kata enda e me kata si penting i bas Pustaka. Janah adi siinget pe maka kepatuhen man Dibata e me si rusur ilumbaken i bas Pustaka. Adi siulihken ku kita sebage orang tua nandangi anak-anakta, tentu kecewa kel kita adi anak-anakta la patuh man banta selaku orang tuana. Bage ka nge mungkin perasaan Dibata adi kita kerina anak-anakNa la patuh man baNa. Tapi kepatuhen si niarapken Dibata tentu labo kepatuhen si “buta.” Maksudna, patuh tapi la iangkai kita kai maksud ras tujunna. Apai ka adi patuh kita tapi kepatuhenta e ilakoken alu kebiaren ras keterpaksaan. Meriah ukur Dibata adi kepatuhenta tuhu-tuhu ipalasi alu pengangkanta si benar kerna Kata Dibata, janah kepatuhen e ilakoken alu ukur ersuruh dem alu kiniteken ras keriahen ukur. I bas kesempaten enda radu ras mulihi kita erlajar kerna kepatuhen i bas ndalanken peraten Dibata.

Mpebagesi Si Man Ogen

Si man ogenta sendah lit i teruh judul perikop “Yesus milih ajar-ajar si pemena.” I bas terj. Bhs. Ind., nina “Penjala ikan menjadi penjala manusia.” Judul perikop enda akap kami banci saling melengkapi, Yesus milih ajar-ajar si pemena guna jadi penjala manusia. Turi-turin kerna Yesus milih ajar-ajarNa si pemena enda lit i bas Mat. 4:18-22 ras Mrk. 1:16-20 alu keistimewaan masing-masing. Turi-turin istimewa i bas ogenta sendah, si berbeda ras kai si ituriken i bas Injil Matius bage pe Markus e me tanda sengget (mujizat) si terjadi i dano Galilea. Idatken Simon ras teman-temanna nurung si luar biasa buena, erbahanca merigat jala si ipake kalak enda, janah dua perahu pe menam gedap kenca iisi nurung erkiteken seh kel buena si idatken Simon ras teman-temanna.

Adi sioge benaken ay. 1 nari, ituriken maka kenca enggo seh i tepi dano Galilea, ipake Yesus perahu Simon guna IA kundul janah mereken pengajaren man kalak enterem si ngikut-ngikut guna megiken berita i bas Dibata nari. Simon ras teman-temanna mbaru denga ngadi i bas dahinna njala nurung. Je denga Simon ras teman-temanna guna mpesikap jala si enggo ipakena. Ertina, Simon ras teman-temanna pe ikut megiken pengajaren Yesus kerna berita i bas Dibata nari.

Kenca dung ngajar, isuruh Yesus Simon guna maba perahuna tertengahen ku ingan si mbages, gelah banci iamburken jalana guna nangkap nurung. Enda situhuna pemindon si labo semal. Sebab si semal paksa si e njala nurung i bas berngi wari. I je nge waktu si tepat guna njala nurung sebab suhu udara enggo nusur, alu bage nurung pe enggo nangkih ku permukaan lau, janah jala pe la teridah adi iamburken. Tapi amin pe labo semal ras bertentangen ras pengalamenna selaku penjala nurung si profesional, tetap iikutken Simon kai si iperentahken Yesus. Nina Simon, “Tapi adi Kam kal nuruhsa banci kuamburken jala e.”

Penungkunenna, engkai maka nggit bage-bage saja Simon? Tentu lit erbage-bage asumsi. Tapi si paling masuk akal e me, mungkin enggo pernah ibegina berita kerna Yesus ras tanda-tanda sengget si enggo ibahan Yesus. Janah mbaru denga pe ibegina secara langsung pengajaren Yesus, maka nggit Simon ngelakoken kai si ipindoken Yesus man bana. Adi sioge kai si ikataken Simon “Adi Kam kal nuruhsa banci kuamburken jala e” i bas bhs. Yunani, “epi de tō rhēmati sou,” ertina “atas dasar firmanMu, banci kuamburken.” Emaka kai si ikataken Simon e tuhu-tuhu erpalasken kinitekenna nandangi kuasa Yesus si enggo ibegina arah berita-berita si seh man bana, bage pe arah pengajaren Yesus si secara langsung enggo ibegina.

Kenca enggo inanamina secara langsung kuasa Kata Dibata arah tanda sengget, mamang ate Simon ras teman-temanna, e me Jakup ras Johanes. Mis erjimpuh Simon janah ikatakenna, “O Tuhan, laweslah Kam i bas aku nari! Aku kalak perdosa kap!” Enda encidahkenca kualitas karakter ajar-ajar Yesus si meteruk ukurna. Kenca enggo itehna ras ise ia berhadapan, mis isedarina kinilatunggungenna, janah erjimpuh Simon nembah man Yesus. Tapi Yesus mpetetap ukur Simon, Jakup ras Johanes guna jadi penjala jelma. Emaka mis itadingkenna nurung si luar biasa mbue ndai, janah iikutkenna Yesus.

Pengkenaina

PA-nta sendah mulihi ngingetken kita kerina maka kepatuhen man Dibata i bas Yesus Kristus e me hal si penting kel i bas kita erkiniteken man baNa. Kiniteken tanpa kepatuhen banci ikataken hal si sia-sia, sebab erkiniteken ras kepatuhen e me sada paket, bagi dua sisi i bas sada mata uang. Kepatuhen e me wujud nyata kinitekenta man Dibata i bas Yesus Kristus. Simon ras teman-temanna mereken teladan man banta i bas hal kepatuhen. Tapi kepatuhen Simon labo terjadi bage-bage saja, lit proses si ituriken secara tersirat i bas si man ogenta sendah. Kenca enggo ibegina Kata Dibata, maka mis tergerak ia guna ngikutken persuruhen Yesus man bana, amin pe kai si ipindoken Yesus e la sue ras logikana selaku nelayan profesional. Tapi labo terjeng ngadi je saja, kenca enggo iidahna kuasa Dibata si luar biasa, mis itadingkenna kerina guna jadi ajar-ajar Yesus.

Penungkunen evaluatif man banta kerina Moria, enggo piga tahun kita jadi Kristen? Enggo nge tuhu-tuhu sitandai ise si isembah kita? Adi enggo, puji Tuhan! Ertina kuasa Kata Dibata e enggo tuhu-tuhu sinanami dampakna i bas kegeluhenta si tep-tep wari. Janah alu bage, asumsina, enggo patuh kita ndalanken Kata Dibata i bas kegeluhenta si tep-tep wari. PA-nta sendah kembali meneguhkan kinitekenta, reh tambahna semangat ras motivasinta guna patuh ndalanken Kata Dibata. Adi lenga, marilah ertekad kita guna si pemena lebe nggejapken kuasa Dibata i bas kegeluhenta si tep-tep wari. Marilah siinget mulihi pasu-pasu si enggo ialoken kita i bas Dibata nari. Si peduaken, adi enggo siinget keleng ate Tuhan si luar biasa i bas kegeluhenta, maka marilah kita ertekad guna ngataken bujur man Dibata arah kita patuh nandangi kerina perentah-perentahNa i bas kegeluhenta. Sue ras tema umum i bas PA-ta sendah, maka kepatuhenta e me wujud nyata keleng ateta man Dibata.