SUPLEMEN PJJ GBKP TGL. 4 - 10 OKT. 2026

Pdt. Larena Sinuhadji (Nd. ReyRapha Tarigan)

ERSEMBAH MAN DIBATA ALU PAYO - Johanes 4:21-24

(Mengenal Tuhan Melalui Penyembahan)

Penaruh

Mungkin pernah sibegi istilah “pengkultusan.” Adi sisungkun AI kerna istilah enda, bagenda nina, “Pengkultusan adalah proses atau tindakan memuja, mengagungkan, atau memberikan penghormatan secara berlebihan kepada seseorang, tokoh, atau kelompok sehingga melewati batas wajar dan rasional. Pengkultusan tidak hanya ditujukan kepada manusia, tetapi juga beralih ke objek fisik berupa tempat, bangunan, atau situs geografis tertentu. Tempat-tempat ini dianggap memiliki kekuatan spiritual, kesucian mutlak, atau nilai sakral yang berlebihan melampaui fungsi atau realitas aslinya.” I bas tradisi kalak Yahudi, Rumah Pertoton e me si utamana. Bahkan banci ikataken Rumah Pertoton i Yerusalem e me pusat harga diri bangsa Israel. Pemahamen si bagenda rupana erbahanca terjadi pengkultusan Rumah Pertoton i Yerusalem. Pengkultusan ingan ersembah enda rusur ikritisi Yesus sebab erkiteken si e kalak Israel enggo lanai fokus ersembah man Dibata. 

I bas kesempaten enda radu ras kita erlajar kerna ersembah man Dibata alu payo si bebas i bas pengkultusan nari erpalasken kai si iajarken Yesus i bas ogenta sendah.

Mpebagesi Ogen

Ogenta sendah lit i teruh judul perikop “Jesus ras sekalak diberu Samaria.” I bas terj. Bhs. Ind., nina, “Percakapan dengan perempuan Samaria.” Arah judul enda nari teridah maka secara garis besar isi perikop enda nuriken kerna percakapen Yesus ras diberu Samaria i sada kuta gelarna Sihar. I bas kuta e lit sada juma si ibereken Yakub nai man anakna Yusuf. I bas juma e lit sumur si igelari Sumur Yakub. Ituriken maka sanga mulih Yesus ras ajar-ajarNa ku daerah Galilea, Judea nari, ibentasiNa daerah Samaria. Perban latih Yesus erdalan, ngadi IA i tepi Sumur Yakub, ajar-ajarNa lawes guna nukur nakan sebab wari enggo ciger. Asum Yesus sisada, reh sekalak diberu bangsa Samaria ku sumur e ngelegi lau. Emaka ipindo Yesus sitik lau gelah iinemNa. Emaka lit percakapen antara Yesus ras diberu Samaria ndai.

I bas ay. 9, 20 ras 27 teridah secara tersirat latar belakang maka lit hubungen si la mehuli, entah pe la siangkan, antara kalak Yahudi ras kalak Samaria, padahal kalak enda situhuna bersaudara sada bapa e me Yakub. I bas ay. 9 ituriken maka mamang ate diberu Samaria erkiteken lit sekalak Yahudi si ngerana man bana janah nggit make peralaten minem kalak Samaria, sebab biasana kalak Yahudi la nggit make kai pe si enggo ipake kalak Samaria. I bas ay. 20 teridah maka ingan ersembah kalak Samaria ras kalak Yahudi berbeda. Kalak Yahudi ersembah i Yerusalem, sedangken kalak Samaria ersembah i deleng Gerisim. I bas ay. 27 ituriken maka mamang ate ajar-ajar Yesus sebab idapetina Yesus sanga ngerana ras sekalak diberu Samaria. Paksa si e kalak Yahudi pantang ngerana ras kalak Samaria.

I bas kesempaten enda la palah sijelasken engkai maka kalak Yahudi la siangkan ras kalak Samaria? Lit sejarah si gedang kerna si e, ibenaken i bas pecahna Israel jadi dua kerajan, utara ras selatan. Si utara pusatna i Samaria, sedangken si selatan pusatna i Yerusalem. Faktana i bas jaman Yesus, kalak Yahudi si tading i Yerusalem tidak mengakui kalak Yahudi si tading i Samaria. Kalak enda la sicakapen, enggo putus hubungan, janah ingan ersembahna pe berbeda. Tapi si menarik i jenda, Yesus labo bagi kalak Yahudi pada umumna, tetap siperkuanken Yesus kalak Samaria, bahkan nggit Yesus ngaloken keberadaan kalak Samaria bage pe melayani kalak Samaria. Alu bage jelas teridah maka keselamaten e labo itujuken man bangsa Yahudi ngenca tapi man kerina bangsa.

Si jadi fokus i bas PJJ-nta sendah e me kerna ersembah man Dibata alu payo. Erpalasken ogenta sendah, banci ikataken maka kalak Yerusalem bage pe kalak Samaria labo ersembah man Dibata alu payo. I bas ay. 20 adi siperdiateken i bas terj. Bhs. Ind. (BIMK), lebih jelas teridah maka enggo terjadi pengkultusan terhadap Bait Allah i Yerusalem, bagenda nina, “Nenek moyang kami menyembah Allah di bukit ini (Gerisim), tetapi bangsa Tuan berkata bahwa HANYA di Yerusalem saja tempatnya orang menyembah Allah.” Kalak Yerusalem erpengakap maka Rumah Pertoton i Yerusalem e me satu-satunya ingan ersembah si metunggungna, sedangken Rumah Pertoton si lit i bas ingan si deban la metunggung. Ise pe si la ersembah man Dibata i Yerusalem, banci ikataken labo sah ibadahna. 

Sedangken i bas ay. 22 teridah maka kalak Samaria la itehna ise si isembahna. Antusenna, ibadah si ilakoken kalak Samaria hanya seremonial, gelah enggo lit, gelah enggo teridah ersembah. Ibadah hanya sekedar rutinitas belaka si la lit ertina, la lit maknana i bas kegeluhen kalak Samaria. Ertina banci ikataken maka duana kalak enda, baik kalak Yerusalem bage pe kalak Samaria, labo ersembah man Dibata alu payo. Kalak Yerusalem mengkultuskan Bait Allah, sedangken kalak Samaria ersembah hanya sebatas seremonial ras rutinitas belaka. Alu bage ersembah si ilakoken kalak Yerusalem ras kalak Samaria labo fokus man Dibata.

I bas si e Yesus ngatakenca, lit paksana pagi maka kalak ersembah man Dibata lanai i Yerusalem entah pe i Gerisim, tapi arah Kesah Si Badia manusia ersembah man Dibata alu payo. Antusenna, ersembah man Dibata labo bergantung ku ingan, i japa pe kalak si tek banci ersembah man Dibata alu payo, si penting e me pusuh perukuren si tutus ras fokus ku Dibata, labo ku hal-hal si deban si la sue ras peraten Dibata. Emaka alu bage kerina kalak si tek butuh penampat i bas Kesah Si Badia nari guna ersembah man Dibata. Sebab arah Kesah Si Badia ngenca maka banci manusia nembah Dibata alu payo (ay. 24).        

Pengkenaina

Ersembah man Dibata tentu labo hal si mbaru man banta kerina kalak si tek. Setiap wari kita ersembah man Dibata. Tapi penungkunenna, enggo nge kita ersembah man Dibata alu payo? Ogenta sendah mulihi mpersingeti kita maka melala hal i doni enda si erbahanca enggo lanai fokus kita ku Dibata sanga ersembah man baNa. Ibadah-ibadah si ilakoken kita hanya terjeng rutinitas, seremonial, gelah teridah saja arah darat nari, tapi la lit pengaruhna i bas pembentukan karakter geluhta. Lit motivasi-motivasi si deban i bas kita ersembah man Dibata ras melayani i Gereja si la sue ras peraten Dibata. Si e kerina erbahanca enggo pe kita puluhen tahun jadi Kristen, tapi la sitandai ise Dibata si isembah kita. Terjadi pengkultusan man kalak tertentu i bas Gereja. Sipilihi ise si khotbah, umpamana. Adi pertua entah pendeta si anu si khotbah, la kita reh ku Gereja. Adi si anu si melayani, la kita senang, entah pe la kita nggit. Ras melala denga contoh-contoh si deban si erbahanca kita la ersembah man Dibata alu payo.

Tuhan Yesus mereken pengajuk man banta, pindolah gegeh i bas Kesah Si Badia nari gelah ipengasupNa kita ersembah man Dibata alu payo. Kesah Si Badia si mpengasup kita meteruk ukur, ngakuken kelemahenta i lebe-lebe Dibata, janah ipengasupNa kita fokus ku Dibata i bas kita ersembah, la lit motivasi-motivasi si deban guna keuntungen entah pe kemulian diri sendiri. Dibata si mpengasup kita kerina guna ersembah man baNa alu payo.