Pdt. Larena Sinuhadji (Nd. ReyRapha Tarigan)
Liturgi Kebaktin Pekan Keluarga 2024 silahkan klik :
Versi Audio silahkan klik :
WARI PEMENA, MINGGU 17 NOVEMBER 2024
Invocatio : “Ranan si mehuli mereken kegeluhen, cakap si ngelukai pusuh erbahanca bene ukur” (Kuan. 15:4)
Ogen : Jop 1:4-5
Renungen : Matius 18:10-14
Tema : Meherga Kap Anak-anak
Penaruh
Anak e me pemere entah pe anugerah Dibata man banta. Masmur 127:3 ngatakenca, “Situhuna, Tuhan kap si mereken anak-anak e, pasu-pasu i bas Tuhan nari kap ia.” I bas si e tentuna tugas tanggung jawab orang tua nandangi anak-anakna e me engkelengi, memelihara, melindungi, mendidik erpalasken Kata Dibata. Ngataken bujur kita man Dibata erkiteken i bas Pekan Kebaktin Keluarga tahun enda anak-anak jadi fokus renungenta, alu arapen penghargaan bage pe perhatian nandangi anak-anakta semakin mehuli erkiteken anak-anakta e me masa depan keluarga bage pe masa depan Gerejanta.
Mpebagesi Kata Dibata
Si jadi bahan renungenta ibuat i bas Kitab Injil Matius 18:10-14, si lit i teruh judul perikop “Perumpamaan kerna biri-biri si bene.” I bas Alkitab TB-LAI, ogenta sendah lit i teruh dua judul perikop, ay. 10 - 11 lit i teruh judul “Siapa yang menyesatkan orang.” Ay. 12 - 14 lit i teruh judul “Perumpamaan tentang domba yang hilang.” Adi sioge benaken ay. 1 nari, ituriken maka lit persoalen i bas ajar-ajar Yesus kerna ise si mbelinna sapih-sapih ia. Paksa si e Yesus sangana viral i tengah-tengah bangsa Israel sebage sekalak Rabi luar biasa, si labo saja beluh erkhotbah tapi pe beluh erbahan tanda-tanda sengget. Erkiteken si e erpengakap ajar-ajar e ndai maka Yesus bakal jadi sekalak raja si minpin bangsana pulah i bas penjajahen Romawi nari. Adi seh paksana pagi Yesus jadi Raja Israel, ise si mendampingisa? Emaka nungkun ajar-ajar ndai man Yesus, “Ise si mbelinna i bas Kinirajan Surga? Ijabab Yesus alu njadiken danak-danak sebage contoh. I jenda karakteristik danak-danak ijadiken contoh karakter pemimpin si sue ras peraten Dibata (ay. 2-5).
Selanjutna i bas perikop ay. 6-9 ituriken kerna persinget Yesus man ajar-ajarNa gelah mabai anak-anak ku pengajaren kiniteken si benar (i bas terj. Bhs. Ind., jelas je ikataken “anak-anak kecil ini”). Ula sempat anak-anak e ndai tondel ukurna erkiniteken man Dibata. Lit ukumen Dibata nari man kalak si mabai anak-anak si tek man Dibata ku bas dosa. Si jadi renungenta sendah akap kami lit denga kaitenna ras perikop i datas. Isingetken Yesus maka ajar-ajarNa harus ngergaken anak-anak (i bas terj. Bhs. Ind., jelas je ikataken “anak-anak kecil ini”). Labo terjeng erkiteken anak-anak e termasuk ku bas kelompok masyarakat si lemah, tapi lebih asa si e lit malekat-malekat si njagai anak-anak e. Enda lit denga kaitenna ras ukumen i bas Dibata nari nandangi kalak si merendahken bahkan si menyesatken anak-anak si tek man Dibata. Sebalikna, ajar-ajar Yesus harus ngelakoken kai si ilakoken Yesus e me nelamatken si enggo papak (ay. 11). Keleng ate Dibata si mbelin nandangi anak-anakNa mulihi ipertegas alu gambaren sekalak permakan si engkelengi biri-birina. ‘Di kune lit sada saja biri-biri si bene, mis idaramina. Sebab Dibata la nggit sekalak pe anak-anakNa si papak.
Danak-danak entah pe anak-anak si ituriken i bas telu perikop i datas lit dua antusenna. Si pemena e me danak-danak si memang danak-danak. Sebab paksa si e enterem ka kalak si kurang ngergaken danak-danak, e maka rusur inomorduaken i bas pelayanen-pelayanen. Entah pe kurang iperdiateken. Danak-danak termasuk kelompok si rentan i bas masyarakat Yahudi, raduken ras diberu balu-balu, yatim piatu, bage pe kalak tandang-tandang, si rusur datken perlakuan semena-mena. Si peduaken, danak-danak i jenda ipake jadi gambaren kerina kalak si tek man Dibata i bas Yesus Kristus, si paksa Injil Matius enda itulisken lit i bas keadaan menderita erkiteken kinitekenna man Yesus Kristus.
Invocatio e me pengajuk man kalak si tek gelah pentar i bas pengeranana. Sebab belas-belas kalak banci mabai kalak si deban terhibur, tersampati, termotivasi. Banci ka erbahanca kalak sakit pusuh perukurenna. I bas budaya Karo lit kuan-kuan, “Sisik lebe maka tindes,” antusenna ukurken lebe sope sibelasken. I bas buku Liturgi Pekan Kebaktin Keluarga, ayat enda enggo itafsirken jadi, “Mereken ranan si mehuli si pepalem pusuh ibereken man anak labo ranan si ngelukai pusuh.” I bas penafsiren enda enggo iarahken maka orang tua harus mereken teladan man anak-anak i bas pengeranana. Gelah seimbang situhuna banci ka ilanjutken ku ay. 5, nina, “Kalak bodoh la iperdiatekenna ajar bapana, kalak pentar ilakokenna ajar orang tuana.” Ertina sebage anak pe harus merespon upaya-upaya si mehuli si enggo ilakoken orang tua alu sikap hormat ras ngelakoken kata ajar i bas orang tuana nari.
Ogenta nuriken kerna Jop selaku orang tua si sangat peduli bage pe visioner nandangi anak-anakna. Kepedulian Jop icidahken alu notoken anak-anakna secara rutin. Enggo iukurken Jop kemungkinen-kemungkinen kai saja si ilakoken anak-anakna, janah ipindoken Jop man Dibata i bas pertotona gelah ipebadiaken Dibata anak-anakna. Ula sempat anak-anakna ndai datken ukumen i bas Dibata nari i bas wari-wari si reh. I bas si e teridah maka Jop enda sekalak bapa si visioner.
Pengkenaina
Tema i bas wari pemena Pekan Kebaktin Keluarga enda e me, “Meherga kap anak-anak.” I bas budaya Karo, anak-anak akap kami enggo cukup datken penghargaan, amin pe masih denga lit si membedaken antara dilaki ras diberu. Anak-anak keluarga Karo enggo enterem si sukses, berhasil, datken jabaten, keduduken si penting i bas pemerintahan, bage pe perusahaan-perusahaan. Anak-anak si lit i bas keluarga Karo Kristen pe, khususna i bas GBKP, enggo enterem si berhasil, labo saja berhasil secara materi, tapi pe secara karakter tuhu-tuhu mehuli, jadi pasu-pasu man keluarga, Gereja, ras masyarakat sekelewetna. Enda akap kami sada kinata si harus isyukuri, ertina sedekah 134 tahun sehna Berita Si Meriah ku tengah-tengah masyarakat Karo, erbahanca kalak Karo Kristen lebih mehuli cara rukurna bage pe kegeluhenna. Kerina anak-anak iergai seri, dilaki ras diberu, kerinana ifasilitasi tumbuh kembangna alu mehuli, seh jadi kalak si tuhu-tuhu jadi kebanggaan keluarga bage jadi saluren pasu-pasu Dibata.
Tapi amin bage gia, melala denga si harus ilakoken i bas rangka ngergaken anak-anak. Pekan Kebaktin Keluarga sekali enda iarapken gelah keluarga-keluarga i bas GBKP semakin meningkatken perhatian nandangi anak-anakna, khususna i bas konteks tantangen i bas media sosial nari. Adi kurang perhatian bage pe pengawasenta nandangi anak-anakta, banci jadi anak-anakta ndai masuk ku bas erbage-bage dosa: judi online si melala kaitenna ras game online. Pinjaman online si jaman gundari enda anak-anak pe banci terjerat pinjol arah Hp.-na nari. Perilaku konsumtif arah belanja online. Pergaulan bebas, pornografi, seks bebas arah video call. Peredaran narkoba pe banci ilakoken i bas media sosial. Ras melala hal si deban si banci mabai anak-anakta bene. Selain si e, enggo melala pembahasen kerna karakteristik Gen Z yang tidak mengenal tata krama, tidak mengenal sopan santun, daya juangnya rendah, mudah menyerah, tidak memiliki komitmen jangka panjang, mengutamakan healing - self reward dari pada etos kerja yang baik, rsd.-na. Si e kerina harus jadi keprihatinenta ras perhatianta.
Kata Dibata sendah ngingetken kita maka Yesus pe tuhu-tuhu ngergai anak-anak. Anak-anak datken perhatian ras pelayanen si seri kualitas ras kuantitasna ras kalak si enggo dewasa. Anak-anak wajid dilindungi dan diarahkan ke arah yang benar dan baik. Invocationta ngingetken kita sebage orang tua gelah mereken pengajaren si mehuli, memotivasi anak-anakta, utamana mereken teladan arah kerina pengkebet geluhta. Ogenta ngingetken kita orang tua gelah menjadi tiang doa untuk anak-anak kita. Enda tandana kita erpengendes man Dibata, sebab gegehta terbatas i bas melindungi anak-anakta, khususna i bas konteks jamanta si genduari enda. Si terakhir, peran Gereja sangat penting i bas mendampingi generasi muda menghadapi tantangan jaman. Emaka Gereja pe harus terus melakukan pembinaan-pembinaan si kontekstual gelah tuhu-tuhu iangkai anak-anakta. Guru-guru KAKR harus datken pembinaan-pembinaan secara rutin gelah kualitas pendampingan arah lembaga KAKR nari pe semakin mehuli guna menyelamatkan generasi muda GBKP. Dibata si mpengasup kita guna ngelakoken kerina si jadi peratenNa.
WARI PEDUAKEN, SENIN 18 NOVEMBER 2024
Invocatio : “Ula kal pelepas ise pe mapas man bandu erkiteken kam nguda denga. Tapi jadilah kam man usihen kalak si tek, subuk i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurdu bujur” (1 Tim. 4:12)
Ogen : Kuan-kuanen 1:1-6
Renungen : Markus 10:13-16
Tema : Pelepas Danak-danak Sebage Danak-danak
Penaruh
Rasul Paulus i bas 1 Kor. 13:1-3 ngatakenca maka kalak si enggo dewasa seharusna man nakan keras, sedangken kalak si danak-danak denga pan-pan si cocok man bana e me susu. Enda sada anding-andingen Paulus i bas ngajari perpulungen kerna dewasa i bas kegeluhen pertendin. Kai si ikataken Paulus enda akap kami sue ras tema Kebaktin Pekan Keluarganta sendah. Anak-anak harus datken pengajaren kiniteken sue ras usiana.
Mpebagesi Kata Dibata
Turi-turin i bas bahan renungenta akap kami enggo semal man banta adi ngerana kita kerna anak-anak i bas konteks kinitekenta. Yesus si ngaloken ras masu-masu anak-anak rusur ijadiken dasar i bas pelayanen entah pembinaan man anak-anak i bas Gerejanta. Arah bahan renungenta sendah radu ras kita erlajar arah pihak-pihak si lit. Si pemena lebe erlajar kita arah orang tua si naruhken anak-anakna ku Yesus. Enggo semal paksa si e orang tua si naruhken anak-anakna si kitik denga ku pemimpin-pemimpin agama (imam, rabi, rsd.-na) guna datken pasu-pasu. Si peduaken erlajar kita arah anak-anak si nggit ia itaruhken guna datken pasu-pasu. Si peteluken, erlajar kita arah ajar-ajar Yesus nari maka anak-anak e harus datken pelayanen si seri bagi kalak si enggo dewasa. Emaka anak-anak harus isambut kerehenna i tengah-tengah perpulungen kalak si tek. Si peempatken erlajar kita arah Yesus nari maka sebage sekalak pemimpin rohani ibahanNa seri kualitas pelayanenna man kerina kalak. Janah i bas ngajarken nggeluh erkiniteken man anak-anak, labo ibahanNa khotbah si gedang, tapi cukup dengan idakepNa anak-anak ndai sekalak-sekalak, janah itamakenNa tanNa ku babona guna mereken pasu-pasuNa.
Invocationta e me kata-kata motivasi si ibereken Paulus man anak rohanina Timotius gelah tetap semangat ndalanken tugas pelayanenna. Usia si nguda denga ula sempat jadi penghambat i bas ndahiken dahin-dahin pelayanen. Salah sada pengajaren Paulus man Timotius e me jadi teladan man kalak si tek, subuk i bas pengerana, i bas lagu langkah, i bas nehken keleng ate, i bas kiniteken, bage pe i bas ukur si bujur. Enda akap kami salah sada metode pengajaren Paulus man kalak si nguda denga, si banci siusih kita. Mereken pengajaren si sue ras usia anak rohanina. Kai si iajarken Paulus e tuhu-tuhu memperlengkapi Timotius i bas pelayanenna.
Ogenta ngerana kerna tujun itulisken Kitab Kuan-kuanen. Tujunna e me mereken pengajaren si mehuli man kalak si lenga erpengalamen gelah cerdik, man kalak si nguda denga gelah pantas dingen pentar, man kalak si pentar gelah tambah kepentarenna. Ertina pengajaren-pengajaren kerna kepentaren i bas Dibata nari harus mencakup kerina golongen usia.
Pengkenaina
Pelayanen i bas Gereja biasana ibahan rikutken kategori tertentu. Kategori usia umpamana: anak, remaja, pemuda, dewasa, orang tua ras lansia. Kategori gender umpamana: kelompok diberu, kelompok dilaki, pernanden, perbapan. Kategori profesi umpamana: tenaga medis, ASN, pedagang, rsd. Pelayanen rikutken kategori tertentu enda tujunna gelah Kata Dibata tuhu-tuhu banci iangkai kalak rikutken konteks usiana, konteks geluhna, konteks profesina, rsd.-na. Pelayanen man anak ras remaja i bas konteks Gerejanta enggo ilakoken alu litna Lembaga Kategorial KAKR. Lit kebaktin khusus man anak ras remaja si labo seri ras kebaktin kalak si enggo dewasa. Tujunna gelah Kata Dibata e tuhu-tuhu iangkai anak ras remaja alu bahasa anak ras remaja.
Tema si seh man banta i bas Pekan Kebaktin Keluarga wari si peduaken enda e me “Pelepas danak-danak sebage danak-danak” ertina danak-danak la banci iperseri ras kategori usia dewasa. Harus lit ruangen khusus, bahan pengajaren si khusus, guru-guru entah pe pengajar si khusus ikuasaina metode mengajar man anak-anak. Bahan renungenta sendah mereken teladan man banta i ja Yesus mereken pengajaren man anak-anak alu cara entah pe metode si sue ras dunia anak-anak. La gedang ngerana, adi ngerana pe labo si mberat-mberat, berpelukan, mungkin lit ka je senda-gurau, kalimat pasu-pasu si ibelasken Yesus pe mungkin si murah iangkai anak-anak. Invocatio bage pe ogenta sendah encidahken maka i bas Alkitab memang lit pengajaren khusus erpalasken kategori usia. Amin pe bahasa Alkitab labo bahasa anak-anak, tapi melala turi-turin si nurikenca pendidikan iman man anak-anak. Ertina tugas kita bage pe Gereja guna menterjemahken pengajaren-pengajaren i bas Alkitab nari ku bas bahasa anak-anak rikutken konteks geluhna gundari enda. Erlajar kita arah orang tua si naruhken anak-anakna gelah ipasu-pasu Yesus. Marilah sibaba anak-anakta, benaken i bas bertin nari jumpa ras Yesus.
WARI PETELUKEN, SELASA 19 NOVEMBER 2024
Invocatio : “Orang tua gedang atena ngenen kempuna, kemegahen anak-anak e me kap orang tuana” (Kuan. 17:6)
Ogen : Epesus 4:29-32
Renungen : Ulangen 6:4-9
Tema : Ajarken Kata Dibata Man Anak
Penaruh
Rikutken teori perkembangan iman i bas sekalak psikolog nari si tergelar James W. Fowler, ikataken maka anak enggo benaken erlajar erkiniteken i bas umur 4 tahun nari secara intuitif dengan cara meniru. Tapi akap kami benaken i bas bertin nari pe sekalak anak enggo banci erlajar erkiniteken, bagi si ialami Elisabet nande Yohanes peridiken i bas Luk. 1:44, “Sebab kenca kubegi sorandu, minter kemuit anak si lit i bas bertinku alu meriah ukur.” Ertina pengajaren kerna Kata Dibata enggo banci sibereken asum anak lit i bas bertin denga.
Mpebagesi Kata Dibata
Si jadi bahan renungenta sendah biasa isebut “syema” i bas bahasa Heber nari e me pengakun kiniteken kalak Israel kerna TUHAN Dibata si sada (esa). Kata “syema” i bas Alkitab TB-LAI iterjemahken “dengarlah”, i bas Alkitab BIMK iterjemahken “ingatlah,” i bas Pustaka Si Badia iterjemahken “ingetlah,” maknana pengakun kiniteken e labo terjeng iteh, sibegiken ras siinget, tapi tuhu-tuhu sitamaken ku bas pusuh perukuren janah arus lit buktina alu perbahanen (kerja entah pe karya) si nyata i bas kegeluhen si tep-tep wari. E maka i bas ay. 5-6 ikataken Musa nina, “Kelengilah (kata kerja aktif) TUHAN Dibatandu asa ukurndu, asa tendindu, asa gegehndu lit. Ola ndigan pe lupaken (seri ertina ras “ingetlah” e pe kata kerja aktif) kerina perentah-perentah si kubereken sendah man bandu.”
Pengakun kiniteken kerna TUHAN Dibata si sada enda harus siwarisken orang tua man anak-anakna alu ngajarkenca ras ngingetkenca rusur (berulang-ulang) setiap wari (ay. 7). Secara praktis pengakun kiniteken enda harus isuratken (dituliskan) i bas kertas kitik si itamaken ku bas kotak kitik (bhs. Ibr. “tefilim”) si iiketken bas tan si kawes ras perdempaken (“phylactery” : tali sembahyang), janah harus ka isuratken i bas binangun pintun rumah ras i babo pintu gerbang gelah tuhu-tuhu jadi persinget (ay. 8-9). I bas perkembangen selanjutna terjadi degradasi makna i bas pesan awal si isehken Dibata nari arah Musa man bangsa Israel, piah dungna pengakun kiniteken enda terjeng kebiasaan menghafal ngenca si la lit pengaruhna ku bas pusuh ras perbahanen bangsa Israel. Yesus Kristus i bas Mat. 22:34-40; Mrk. 12:29-30; Luk. 10:25-37 mpelimbarui makna pengakun kiniteken enda alu penekanen si utamana e me i bas ngkelengi (kata kerja aktif) Dibata (Ul. 6:5) ras ngkelengi manusia (Im. 19:18), “kerina Undang-undang Agama si ibereken Musa ras nabi-nabi erpalasken duana perentah enda ndai kap,” nina Yesus.
Ogenta sendah e me persinget Rasul Paulus man Perp. Epesus gelah tuhu-tuhu nggeluh i bas kegeluhen si mbaru i bas Kristus. Kegeluhen si mbaru e harus teridah arah pengkebet geluh si tep-tep wari. I bas pengerana belaskenlah kata-kata si erguna si banci nampati kalak si deban rikutken perluna, gelah kata-kata si ibelasken e maba kiniulin man si megisa. Bahanlah Kesah Dibata ngenca si jadi penampat, entah pe ingan penggurun i bas kai pe. Melias dingen mesayanglah sapih-sapih perpulungen, janah sialem-alemenlah bagi Dibata enggo ngalemi perpulungen.
Invocatio e me renungen penulis kitab enda maka lit ulih si mehuli man orang tua si mereken pengajaren nandangi anak-anakna erpalasken kepentaren i bas Dibata nari. Bage pe sebalikna, lit ulih si mehuli man anak-anak si ngikutken pedah-pedah i bas orang tuana nari. I bas terj. BIMK nina, “Kebanggaan orang yang sudah tua adalah anak cucunya; kebanggaan anak adalah orang tuanya.”
Pengkenaina
Tema si seh man banta i bas wari peteluken Pekan Kebaktin Keluarga ngajuk kita kerina orang tua gelah ngajarken Kata Dibata man anak-anakta kitik-kitik nari. Lit kuan-kuan si ngatakenca, “Sekolah pertama dan utama bagi anak adalah keluarga, guru pertama dan utama bagi anak adalah orang tua.” Enda akap kami harus siakuken lebe, sebab melala orang tua si la mediate nandangi pengajaren man anak-anakna. Iakapna adi enggo sisekolahken i sekolah-sekolah unggulan enggo dung tugas orang tua. Adi enggo sitaruhken ku KAKR entah pe Sekolah Minggu enggo dung tugas orang tua. Lang! Guru pertama dan utama adalah orang tua! Khusuna si berkaiten ras pendidikan religius, spiritualias, budi pekerti, tata krama, sopan santun, rsd.
Tradisi kalak Israel akap kami banci jadi usihen i bas ngelakoken proses internalisasi nilai-nilai religius man anak-anak erpalasken kinitekenna man Dibata. I bas si e man banta orang tua, si pemena, harus mbages lebe penandaita kerna Dibata si isembah kita i bas Yesus Kristus. Adi lenga sigejapken uga belinna keleng ate Dibata man banta tentu la banci kita ngajarken Kata Dibata man anak-anakta. Si peduaken, harus nggit kita erlajar kerna Alkitab ras pokok-pokok iman Kristen gelah banci situriken man anak-anakta kerna Alkitab, kai saja isina, ise saja tokoh-tokoh utamana, rsd.-na. Si peteluken, erpalasken ogenta sendah bage pe invocationta, sicidahken buah-buah kinitekenta arah pengerana, pola pikir, karakter, tingkah laku, ketutusen ertoto ras ngoge Pustaka, reh ku kegiaten-kegiaten Gereja, rsd.-na. Gelah iidah anak-anakta ulih erlajar kerna Kata Dibata bage pe kegeluhen erkiniteken man Yesus Kristus. Si peempatken, ertotolah la erngadi-ngadi guna keselamaten anak-anakta, sebab selaku orang tua gegehta terbatas. Tek kita adi tutus kita ertoto man Dibata, ipengasup Dibata kita arah KesahNa i bas mendidik anak-anakta sue ras peraten Dibata.
WARI PEEMPATKEN, RABU 20 NOVEMBER 2024
Invocatio : “Dage kiniteken rehna arah megi Berita e, janah isi Berita e, e me Kata kerna Kristus” (Rm. 10:17)
Ogen : 2 Timotius 3:10-17
Renungen : Kuan-kuanen 2:1-8
Tema : Ingan Ndarami Pemeteh Ras Pengertin
Penaruh
I bas jaman si semakin canggih enda melala mesin-mesin pintar si iciptaken manusia. Salah sadana si ikembangken Google e me Gemini AI (baca: e-ay). Sungkuni saja kai pe i bas Gemini AI ndai mis isampatina kita meteh kai pe. Lenga ka ChatGPT (baca: cet-jipiti) i ja enggo melala anak-anak jaman gundari enda si curhat man ChatGPT enda sebab melala pemetehna. I bas kinitekenta ingan pemeteh ras pengertin si tuhu-tuhu e me Dibata i bas Yesus Kristus. I bas kesempaten enda radu ras kita isingetken maka ingan ndarami pemeteh ras pengertin e me Dibata i bas Yesus Kristus si salah sada sumberna lit i bas Pustaka Si Badia.
Mpebagesi Kata Dibata
Kitab Kuan-kuanen berisi nasehat, pedah gelah manusia banci nggeluh alu mehuli. Bentuk ajarenna praktis man segala umur, mulai anak-anak nari seh orang tua, si ipeseh kalak berhikmat. Secara khusus i bas perikopta, ngerana kerna pengajaren orang tua man anak, janah uga ketutusen anak e i bas megiken ajar orang tua. Banci jadi enda pengalamen raja Salomo.
Secara khusus bindu 2 si ibere judul “Guna kepentaren” e me pengajaren orang tua man anak. Piga-piga hal si banci siidah i bas perikop enda :
- Tanggung jawab orang tua e me mereken pengajaren, nasehat, didiken si mehuli man anak-anak. Ras orang tua e me unsur utama ras pertama i bas mereken pengajaren e. Jadi labo Sekolah Minggu entah pe sekolahna, tapi i tengah-tengah keluarga. Enggo pasti labo hanya ajaren si mehuli, tapi orang tua pe harus jadi teladan.
- Tanggung jawab anak e me merespon alu mehuli pengajaren si enggo isehken orang tua. Kata kata si itekanken i bas perikopta: “pelajari si kukataken” (1); megermet nandangi kepentaren ras ncubakenca ngantusisa (2). Pengajaren orang tua umumna mehuli, janah anak-anak harus mperdiatekennca alu sikap. Ula anggap remeh ras masa bodoh.
- Usaha guna ndatken pengertin ras pemeteh. Guna ndatken pemeteh harus sungguh-sungguh, la banci setengah hati. Pindolah pemeteh, sek-sekilah ndatken pengertinNa. Idarami desken ndarami erta si meherga e me emas ras erta terbuni. Ndarami erta si meherga, ndarami emas la banci santai-santai tapi harus bekerja keras. Bagem iandingken i bas kita ndarami pengertin ras pemeteh. Enda pe nuduhkenca, pentingna pengertin ras pemeteh. Salomo mpersingeti kita maka kepentaren, pengertin e me pemere i bas Dibata nari si iberekenNa man kalak si ndaramisa alu sungguh-sungguh.
Janah perikop enda iujungi alu janji, maka kalak si tetap nggeluh i bas kepentaren ras pengertin, ibereken Tuhan penampat ras ampang-ampang, janah ikawali Tuhan kegeluhenna.
I bas pengogen si pemena, Paulus mereken nasehat man Timotius anak rohani uga pentingna keteladanen ras erkuasana firman Tuhan. Timotius pembelajar ras itedalanina kegeluhen Paulus. Jelas nina Paulus ndai, enggo ikutkenndu kai si ku ajarken ras kai si ku bahan. Enggo iperdiatekenna, uga kiniteken, kesabaren, kekelengen ras kinigenggengen Paulus. Bahkan Timotius pe enggo ngidah kiniseran si ialami Paulus ras tangkas pe man Timotius maka Tuhan tetap nampati. Paulus mpersingeti Timotius gelah tetap ndalanken kebenaren si kin enggo iajarkenna man Timotius. Bahkan benaken kitik-kitik nari Timotius nggeluh i bas Kata Dibata. Kata Dibata me si membentuk karakter Timotius dingen si mereken kepentaren man bana. Teks enda ipake sebage penguaten karakter man Timotius sebagai penerus estafet pelayanen. Paulus menekankan pentingnya memegang teguh ajaran yang benar dan tidak terpengaruh kepada ajaran-ajaran yang sesat. Firman Tuhan menjadi pondasi i bas rukur, ngerana, ersikap ras muat erbage-bage keputusen seh makana tetap si mehuli si ngena ate Tuhan silakoken. Kepentaren si tuhu-tuhu rehna labo arah tren dunia entah ajaren popular, filsafat modern tapi arah erkemalangen man Tuhan ras tetap sipakeken firman Tuhan.
Pengkenaina
Melala kalak si ndarami kesuksesan i bas geluhna alu ngelakoken cara-cara si la mehuli, subuk kecurangen, membayar petugas, erbintuas suari ras berngi seh makana melala si nikorbankenna, termasuk keluarga. Tapi la sitik tokoh dunia si pakena firman Tuhan sebage pedoman kegeluhenna. Salah sadana e me, Presiden AS ke-16, Abraham Lincoln. Lincoln sangat mengandalkan Alkitab, menyerahkan semua pergumulannya dalam doa dan kebiasaanya membaca Alkitab. Semua pemikiran, keputusan dan kebijaksanaannya sangat dipengaruhi oleh nilai-nilai Alkitabiah. Seh makana muncul pernyataan Abraham Lincoln si terkenal kerna kesanna nandangi Alkitab. Nina, “Mengenai kitab besar ini, aku hanya mengatakan, ini adalah pemberian terbaik yang sudah diberikan Tuhan kepada manusia. Semua kebaikan yang diberikan Juruselamat kepada manusia dikomunikasikan melalui buku ini. Semua hal yang paling diinginkan bagi kesejahteraan manusia untuk saat ini dan selanjutnya, bisa ditemukan di dalamnya.” Abraham Lincoln tetap setia erdalan i bas dalan Tuhan, ras berhasil asum jadi Presiden AS.
Tema si seh man banta e me “Ingan ndarami pemeteh ras pengertin.” I ja kin inganna ndarami pemeteh ras pengertin? Enggo pasti i bas keluarga lebe, orang tua ertanggung jawab mereken pengertin ras pemeteh man anak. Orang tua menjadi teladan si mehuli ras alu tutus mereken pengajaren si mehuli man anakna. Jadikan firman Tuhan sebage pedoman kegeluhen. Emaka, biasakan lit ibadah keluarga, i ja ras-ras keluarga ngaloken pengajaren Kata Dibata nari.
Gereja ras ibadah KAKR menjadi sarana, ingan pulung man anak-anakta si banci mabai sukacita ras membentuk karakterna. Bandingken invocatio: “Dage kiniteken rehna arah megi berita e, janah isi berita e, e me kata kerna Kristus” (Roma 10:17). SDM (guru & para pengajar) harus terus di-update ras fasilitas pengajaren harus ilengkapi wari-wari, gelah anak-anakta nyaman ras tertole-tolen ia mengikuti kebaktin tiap wari Minggu. Janah la kalah pentingna, orang tua sedini mungkin mabai anak-anak ku Gereja i bas kelas batita, balita, anak kecil, tanggung seh ku remaja. Benaken kitik-kitik nari anak-anakta enggo terbiasa megiken Kata Dibata ras ngendeken ende-enden pujin man Tuhan maka i bas tumbuh kembangna pe iarapken menjadi anak si erkemalangen man Tuhan.
WARI PELIMAKEN, KAMIS 21 NOVEMBER 2024
Invocatio : “Janah pasar-pasarna dem alu danak-danak dilaki ras diberu erguro-guro (Zak. 8:5)
Ogen : Hakim-Hakim 11:1-8
Renungen : Lukas 19:1-10
Tema : Ingan Ndatken Kegeluhen Si Payo
Penaruh
Kegeluhen si payo biasana ilakoken sekalak si enggo bertobat, jera i bas dosa-dosana nari. Terjadi perobahen i bas kegeluhenna 180 derajat. Itadingkenna kegeluhenna si male, bengket ia ku kegeluhen si mbaru i bas Kristus, janah geluh ia i bas kegeluhen si payo sue ras Kata Dibata. I bas kesempaten enda radu ras kita erlajar kerna kegeluhen si payo erpalasken Kata Dibata si enggo iaturken.
Mpebagesi Kata Dibata
Si jadi bahan renungenta sendah akap kami enggo semal man banta, e me turi-turin kerna perjumpan Sakeus ras Yesus. Sakeus e me sekalak bayak, mungkin erkiteken pendahinna sebage kepala pengalo cuke. Melala kalak si la senang man bana erkiteken pendahinna e. I bas sada paksa, mungkin enggo ndekah ibegina berita kerna Yesus, sekalak Rabi si luar biasa si ngasup mpepalem kalak si sakit, si pentang erpengidah, si enggo mate ipekeke, ras melala tanda-tanda sengget si deban si ibahan Yesus. E maka kenca enggo ibegina reh Yesus ku kutana, mis ia berkat, sebab merincuh kel Sakeus ngidah Yesus. Kerincuhen i jenda mungkin erkiteken igejapken Sakeus maka geluhna e hambar amin pe melala ertana. La pernah inanamina kegeluhen si payo si dem alu dame sejahtera ras sukacita si tuhu-tuhu.
Kenca enggo ikataken Yesus maka kesilang ate Yesus i rumahna, mis ialo-alona Yesus alu ermeriah ukur. Kenca enggo itandaina Yesus, mis terjadi perobahen si radikal i bas kegeluhen Sakeus. Enda tandana Sakeus enggo jera, bertobat, kenca enggo ia jumpa ras nandai ise Yesus. Ikatakenna, “Setengah i bas erta-ertangku ku bereken man kalak musil; janah adi lit kalak si enggo ku tipu, ku ulihken man bana empat kali lipat.” Terjadi pemulihan si luar biasa i bas kegeluhen Sakeus. Ipehulina atena hubungenna ras kerina kalak si lit i sekelewetna termasuk ras keluargana. E maka nina Yesus, “I bas wari enda enggo reh keselamaten man isi jabu enda.” Keselamaten si enggo ialoken Sakeus pe ialoken keluargana.
Invocatiota sendah e me sada bagin i bas perikop alu judul “TUHAN erpadan pekena Yerusalem mulihi.” Enda sada nubuaten Dibata si isehken man Nabi Sakaria kerna pemulihan Yerusalem kenca mulih bangsa Israel i bas pembuangen nari. Salah sada keadaan si ipulihken e me danak-danak datken jaminen keamanen ras kenyamanen. Sebab memang biasana adi i bas kondisi perang, danak-danak salah sada si jadi korban. Tapi Dibata si njaminisa maka danak-danak pe idatkenna mulihi hak-hak geluhna.
Ogenta nuriken kerna Jepta sekalak hakim si mulahi bangsa Israel i bas ancamen bangsa Amon nari. Adi sikaitken ras tema bage pe bahan renungan ras invocatio, mungkin arahna ku pemulihan hubungen Jepta ras keluargana bage pe bangsana, amin pe pemulihan e terjadi secara terpaksa. Kalak Israel enggo iserang bangsa Amon, janah la lit ise pe si pang ngelawan bangsa Amon selain Jepta. Tapi Jepta enggo terlanjur ipelawes keluargana. Emaka idilo mulihi Jepta guna mimpin bangsa Israel ngadapi bangsa Amon.
Pengkenaina
Tema si seh man banta i bas kesempaten enda ngingetken kita maka selaku kalak si enggo ngaloken keselamaten i bas Yesus Kristus, maka tugas tanggung jawabta e me nggeluh i bas kegeluhen si payo sue ras peraten Dibata. Yesus ngenca ingan kegeluhen si payo (Joh. 14:6, “Akulah jalan dan kebenaran dan hidup. Tidak ada seorang pun yang datang kepada Bapa, kalau tidak melalui Aku”). Gelah banci kita geluh i bas kegeluhen si payo, maka harus lit proses pertobaten, jera kita i bas dosa-dosa nari, e dalanna maka terjadi perobahen si radikal, terjadi pemulihan hubungan dengan Allah dan manusia. Erkiteken fokusta i bas kebaktin enda keluarga, emaka pemulihan di dalam keluarga e me hal si penting. Melala kasus-kasus pastoral i ja anak-anak menyimpan kemarahan man orang tuana, bage pe sebalikna, orang tua menyimpan sakit hati man anak-anakna. Relasi si la mehuli i bas keluarga erbahanca kegeluhen si payo e la banci ilakoken. Kuncina e me pemulihan, saling mengakui kesalahan dan saling mengampuni. Tuhan si mpengasup kita nggeluh i bas kegeluhen si payo.
WARI PEENEMKEN, JUMAT 22 NOVEMBER 2024
Invocatio : “Tapi adi aku ras isi jabungku, Tuhan saja ngenca isembah kami” (Jos. 24:15b)
Ogen : Epesus 5:18-20
Renungen : Masmur 128:1-6
Tema : Jabu Si Dem Alu Kesangapen
Penaruh
Lit kuan-kuan kalak hedonis si ngatkenca bagenda nina, “Kecil bahagia, muda foya-foya, tua kaya raya, mati masuk surga.” I bas kuan-kuan enda teridah maka sura-sura kalak hedonis lalap atena datken kebahagiaan, tubuhna nari seh ku kematenna. Enda akap kami la sue ras realita geluh i doni enda si labo saja kebahagiaan si banci inanami kita, lit perbeben, perjuangan, kiniseran, ceda ate, kebiaren, rsd.-na. Tapi ratana kita tentu erpala-pala guna meraih kebahagiaan i tengah-tengah doni enda. I bas kesempaten enda radu ras kita erlajar kerna jabu si dem alu kebahagiaan entah pe kesangapen erpalasken Kata Dibata si enggo iaturken i bas Kebaktin Pekan Keluarga wari pelimaken enda.
Mpebagesi Kata Dibata
Masmur 128 e me salah sada ende-enden ziarah si iendeken tupung bangsa Israel berkat ku Rumah Pertoton Tuhan i Jerusalem. Masmur 128 e me ende-nden kerna pasu-pasu Tuhan man isi jabu. Sada ketedehen ate, kalak si berkat ersembah man Tuhan ku Jerusalem ndatken pasu-pasu i bas Tuhan nari i bas jabuna. Masmur 128 enda ncidahkenca maka jabu e me unsur si penting si jadi pondasi bangsa Israel. I bas Masmur 128 enda icidahken kegeluhen jabu si ideal sue ras peraten Dibata. Adi mehuli geluh perjabun kalak Israel enggo pasti bangsa e pe ipasu-pasu Dibata.
Inti i bas perikop enda e me sangap kalak si malang man Tuhan si nggeluh ngikutken kerina perentahNa (Bhs. Ind.: “Berbahagialah setiap orang yang takut akan TUHAN, yang hidup menurut jalan yang ditunjukkanNya”). Ayat enda iulihi sekali nari i bas ay. 4, “Bage me pasu-pasu Tuhan man kalak si malang man baNa” (Bhs. Ind.: “Sesungguhnya demikianlah akan diberkati orang laki-laki yang takut akan TUHAN”). Ertina kesangapen (kebahagiaan) i bas jabu ibenaken i bas sekalak perbapan si malang man Tuhan, si nggeluh ngikutken perentah Tuhan. Dalan Tuhan si ikutken labo dalanta. Adi kita, kadang pintas, instan, cepat, la nggit susah, labo siakap masalah la sentudu bagi si ngena ate Tuhan, si penting berhasil, sukses.
Kai saja dage kebahagiaan (kesangapen) man kalak si malang man Tuhan, entah pe ulih kalak si nggeluh ngikutken perentah Tuhan? Piga-piga hal icidahken i jenda, si pemena, ipanna me ulihna latih, sangap nggeluh mehuli sikerajangenna (“Apabila engkau memakan hasil jerih payah tanganmu, berbahagialah engkau dan baiklah keadaanmu”). Tuhu-tuhu ternikmatisa ulih latih e ras tuhu-tuhu maba kinulin, maba kemalemen ate. Secara tersirat lit i je ungkapen pengataken bujur ras erlajar mencukupken diri arah ulih latih bekas Tuhan si merekenca, seh makana tuhu-tuhu maba sukacita, maba kiniulin arah kai si enggo ibereken Tuhan i bas kinilatihen erdahin. Si peduaken, ndeharana bali ras anggur si meramis i sekelewet mejana. Anggur e me sada buah si cukup penting i Israel. Sada inemen si ibutuhken dingen mereken keriahen. Bage me iarapken ndehara si tuhu-tuhu jadi penolong, mereken keriahen kempak perbulangen ras seisi jabu. Si peteluken, anak-anakna bali ras tunas batang saitun. Buah saitun jadi pangan dingen minakna jadi tambar, minak penangkuhen man imam, banci jadi parfum, rsd. Ertina, anak-anakna tuhu-tuhu mereken kebahagiaan man keluarga sebab tuhu-tuhu erguna kehadirenna bas jabu e. Cawir metua, maka sempat siidah kempu-kempu.
Ogenta e me persinget Rasul Paulus man Perp. Epesus gelah nggeluh i bas terang. Nggeluh i bas terang ertina ngusih Dibata, nggeluh erpalasken keleng ate bagi Kristus enggo engkelengi perpulungen. Secara khusus si jadi fokus i bas ogenta sendah e me nggeluh alu idemi Kesah Si Badia, gelah pusuh perukuren idemi alu ende-enden pujin man Dibata. Alu bage cakap si ibelasken pe dem alu masmur pujian dem alu pengataken bujur. Janah amin kai pe si terjadi i bas kegeluhen, tetap ngataken bujur katawari paksa pe man Dibata i bas Yesus Kristus.
Invocatio ngerana kerna pengakun kiniteken Josua ras isi jabuna maka Tuhan ngenca si isembahna. Josua bagi si radu ras iteh kita maka ia sekalak tokoh Alkitab si menam sempurna, tutus erkemalangen man Dibata. La lit sitik pe ituriken i bas Pustaka Si Badia kesalahen si ilakoken Josua. Ertina adi ipadankenna Tuhan ngenca si isembahna, memang tuhu payo enggo ibuktikenna segedang geluhna.
Pengkenaina
Tema si seh man banta i bas Kebaktin Pekan Keluarga wari si peenemken enda ngajuk kerina kita jabu-jabu kalak si tek gelah nggeluh i bas kesangapen. Rikutken bahan renungenta, mulihi kita isingetken gelah nggeluh erkemalangen man Dibata si ibenaken orang tua (perbulangen) gelah iusih anak-anak bage pe kerina isi jabunta. Nggeluh erkemalangen man Dibata erbahanca jabu-jabu kalak si tek ngenanami kesangapen si tuhu-tuhu. Bagi si enggo ijelasken i datas, bentuk-bentuk konkrit kesangapen e me si pemena kai pe si idahiken kita tuhu-tuhu ternikmati, maba kemalemen ate ras kiniulin. Si peduaken, ndehara tuhu-tuhu jadi penolong, mereken keriahen kempak perbulangen ras seisi jabu. Si peteluken, anak-anak tuhu-tuhu mereken kebahagiaan man keluarga sebab tuhu-tuhu erguna kehadirenna bas jabu e. Cawir metua, maka sempat siidah kempu-kempu.
Bahan ogen bage pe invocatio ngingetken kita maka kesangapen si tuhu-tuhu banci sinanami adi isi jabu nggeluh i bas terang, idemi Kesah Si Badia, bage pe tetap berkomitmen i bas jabu maka Dibata i bas Yesus Kristus ngenca si isembah. Dibata si mpengasup kita guna jadi jabu-jabu si dem alu kesangapen.
WARI PEPITUKEN, SABTU 23 NOVEMBER 2024
Invocatio : “Anak si kitik denga la kena kai pe, aminna erguro-guro pe ia deherken nipe si erbisa” (Jes. 11:8)
Ogen : Pilipi 4:8-9
Renungen : Masmur 119:97-104
Tema : Entebu Kal Engkelengi Tuhan
Penaruh
I bas tradisi Yahudi kuno, mpetandaken firman Tuhan man anak-anak seh kel pentingna ilakoken setiap keluarga. Enda ilakoken secara simbolis ras penuh makna. Salah sada hal si terkenal e me asum anak Yahudi mbenaken erlajar Taurat, maka Sang Guru menetesken madu i bas halaman kitab e, ras ipindona guna ndilatisa. Tindakan enda tuhu-tuhu mereken makna si mbages kel, maka firman Tuhan e entebu kel, bahkan tebun asangken tengkuli. Arah si e, menaken kitik-kitik nari anak-anak enggo ibabai mencintai firman Tuhan. Tradisi enda penting silakoken i bas paksa genduari, sebage keluarga Kristen, uga kita mpetandaken Pustaka Si Badia man anak-anakta. Genduari enggo melala cerita Alkitab si ikemas menarik seh makana anak-anak pe senang ngoge, nonton, entah pe megi firman Tuhan. Hal enda harus menjadi kebiasan. Sebab kemajun jaman i bas paksa genduari e me tekhnologi infomasi, gadget, game, sosial media, mekatep enggo mengambil alih perhatian keluarga ras anak-anakta, dari berkumpul bersama keluarga, ibadah keluarga ras membaca firman.
E maka i bas wari terakhir enda, radu ras kita erlajar ras muat komitmen maka firman Tuhan arus menjadi siutama i bas geluh jabunta.
Mpebagesi Kata Dibata
Bahan renungenta, Masmur 119, e me masmur si ngerana kerna undang-undang Tuhan. Masmur si cukup gedang lit 176 ayat. Judul i bas perikop enda “Kekelengen nandangi undang-undang Tuhan” e me pernyataan cinta si tulus nandangi firman Tuhan. “La nai tanggung keleng ateku nandangi undang-undangNdu.” Ras e icidahkenna (ibutikenna) arah firman Tuhan e ikusur-kusurna i bas ukurna segedang gedang wari (lit dua kali isingetken, ay.97b ras ay. 99b). Enggo pasti firman Tuhan iogena entah pe ibegikenna lebe, je nari irenungkenna (ipekusur-kusurna bas ukurna). Labo terjeng je saja, firman Tuhan e pe iingetna (ay. 98) ras iikutkenna (idalankenna - ay. 100b, 101b). Ertina, asum ngelakoken entah mutusken kai pe, firman Tuhan jadi palas kegeluhenna.
Ras ulih i bas ia engkelengi firman Tuhan mbue kel hal si positif si banci ilakokenna :
- Pentaren ia asangken imbang-imbangna.
- Pengertinna ngelebihi pengertin guna si ngajari ia.
- Beliden kepentarenna asangken orang tua.
- Ngasup ia nilahken perbahanen si jahat.
- Ciga atena kata la tuhu. Ertina, rirman Tuhan mampu membentengi Pemasmur i bas ia menolak perbahanen si la mehuli ras iusahakenna ndalaken si mehuli.
Paulus i bas ogen si pemena mpersingeti pentingna mengelola pikiren. Sebab pikirenta e me pusat segala sesuatu. Ukurilah kerna si mehuli e me si bujur, si mulia, benar, bersih, mejile ras kerna kerina si patut ipuji. Ras selaku Rasul Tuhan, Paulus enggo leben ndalanken si e. Maka pang ia ngatakenca, dalankenlah kai si enggo ipelajarindu dingen ialokenndu i bas aku nari, subuk arah pengeranangku bage pe arah perbahanenku. Pikiren si positif mpengasup kita ngerana alu positif. Pengerananta positif mabai kita bertindak positif. Adi enggo terbiasa kita ngelakoken tindaken alu positif maka kedungenna enggo menjadi karakterta (biak nggeluh).
I bas invocatio, sioge sebuah gambaren kerna anak-anak si nggeluh tanpa rasa takut, “Anak si kitik denga la kena kai pe, aminna erguro-guro pe ia deherken nipe si erbisa.” Enda merupaken sada gambaren simbolis nandangi doni si aman, anak-anak la perlu nari mbiar aminna pe mbue tantangen ras godaan bas doni enda. Ertina, keluarga si tetap nggeluh i bas Kata Dibata tetap ngaloken perlindungen bas Dibata nari. Anak-anak ngasup mbedaken apa si mehuli ras lang, dingen ndalanken si mehuli si ngena ate Tuhan. Firman Tuhan menjadi pedoman ras pegangan si mengasup anak-anak ngalaken tantangen, godaan ras perbeben geluh. Tapi sebalikna, adi keluarga e la nggeluh i bas Kata Dibata, maka rentan nandangi serangen dunia si dem alu godaan ras kejahaten.
Pengkenaina
Tema i bas wari terakhir Kebaktin Pekan Keluarganta e me “Entebu kel engkelengi Tuhan” (manisnya mengasihi Tuhan). Adi rikutken penjelasen bahan renungen e me entebu kel engkelengi firman Tuhan. Kai pesan firman Tuhan si banci jadi gelementa?
Bagi Pemasmur, arus lit kesadarenta maka perlu kel kita firman Tuhan sebage penuntun geluhta. Kesadaren e mabai kita tuhu-tuhu membutuhken firman Tuhan. La nari siakap terpaksa kita ngoge ras megiken Kata Dibata tapi enggo jadi kesenangen banta. Alu bage la nari terpaksa, beban entah setengah hati i bas kita ngoge ras pekusur-kusur firman Tuhan. Komitmenken man keluarga untuk membacakan firman Tuhan sope tunduh. Adi anak-anakta enggo remaja - dewasa, enggo ibiasakenna erbahan saat teduh sendiri. Lit lagu si mabai kita keleng ateta man Tuhan njemba kita nggeluh i bas kataNa. Bagenda nina: “Aku mengasihi Engkau Yesus dengan segenap hatiku. Aku mengasihi Engkau Yesus dengan segenap jiwaku. Ku renungkan firmanMu siang dan malam, ku pegang p’rintahMu dan ku lakukan. Engkau tahu ya Tuhan tujuan hidupku, hanyalah untuk menyenangkan hatiMu.”
Orang tua menjadi role model i bas ndalanken si mehuli man anak-anak. Bagi Paulus ngasup ia ngajarken ras mereken usihen si mehuli man Perp. Pilipi. Satu ajaran si mehuli lebih berarti daripada begitu banyak pengajaren si mehuli sibereken tapi kita la banci jadi usihen. Ajarken untuk berpikir positif, ngerana alu positif ras bertindak alu positif. Dibata si mpengasup kita kerina.
Tidak ada komentar:
Posting Komentar