SUPLEMEN PA MORIA GBKP TGL. 3 - 9 NOVEMBER 2024

Pdt. Larena Sinuhadji (Nd. ReyRapha Tarigan)

Moria Visioner

Si Man Ogen : Hakim-Hakim 4:17-24

Tema : MORIA SI VISIONER

Tujun : Gelah Moria :

- Niksiki sura-sura Yael nandangi bangsa Israel

- Pentar muat keputusen guna masa depan

Penaruh

Menurut KBBI (Kamus Besar Bahasa Indonesia), visioner adalah orang yang memiliki pandangan atau wawasan ke masa depan. Adi rikutken ringkasen Gemini AI (baca: e-ai) i bas Google nari ikataken maka sekalak si visioner lit i bas ia kebeluhen guna: 1) Merancang strategi yang tepat untuk langkah-langkah yang akan diambil ke depan. 2) Membaca potensi yang ada dan menyinergikannya. 3) Membuat keputusan yang tepat. 4) Memberikan motivasi tentang hal yang sebaiknya dilakukan di masa depan.

I bas kesempaten enda erlajar kita kerna Moria si visioner erpalasken si man ogenta sendah.  

Mpebagesi Si Man Ogen

Kitab Hakim-hakim e nuriken kerna tokoh-tokoh si iangkat ras ipilih Dibata guna banci jadi pemimpin Israel si banci mulahi bangsa Israel i bas penindasen bangsa-bangsa i sekelewet Israel. Jumlahna lit 13 kalak hakim. Tugasna e me ndungi persoalen bangsa Israel, mpeseh sura-sura Dibata man bangsaNa gelah bangsa Israel nggeluh rikutken si ngena ate Dibata dingen jadi panglima perang Israel si ipake Dibata guna mulahi Israel i bas tekanen entah pe penindasen bangsa si deban. Salah sada hakim i bas 13 hakim e me Debora, sekalak hakim diberu.

Perikopta ibere judul “Debora ras Barak,” e me turin-turin kerna kemenangen si ibereken Tuhan man bangsa Israel melawan bangsa Kanaan. Kisah enda menarik sebab ipake Tuhan piga-piga kalak si berperan mereken kemenangen. Ituriken maka kenca Ehud mate, bangsa Israel erdosa ka man Tuhan. Erkiteken si e, ibereken Tuhan maka Jabin, raja Kanaan engkuasai Israel. Puanglima perangna, Sisera gelarna ras ia tading i Haroset-Hagoyim. Iperentahna bangsa Israel alu kejam selama dua puluh tahun. E maka erlebuh bangsa Isreal mindo penampat man Tuhan.

Paksa si e, Debora, sekalak nabiah sekaligus hakim si ngerunggui bangsa Israel. Emaka iperentahkenna Barak guna erperang ngelawan Sisera alu maba sepuluh ribu kalak i bas suku Naptali ras Sebulon nari, ras enda merupaken perentah Tuhan. Ipetetap Tuhan ukur Barak alu ngatakenca, “Kubereken man bandu kemenangan melawan ia” (ay. 7c). Tapi Barak la nggit berkat adi la ikut Debora. Sebalikna, tetap kel ukurna adi Debora banci ikut erperang. Maka respon Debora banci ia ikut ras Barak. Tapi lit kata-kata si ibelasken Debora si banci menunjuk ku bas dirina sendiri entah Yael, sekalak diberu si kedungenna membunuh Sisera. “Bage-bage ikut aku lawes ras kam. Tapi la kam dat kehamaten i bas kemenangen e, erkiteken Tuhan ngendesken Sisera ku bas tan sekalak diberu.” (la sieteh ise simaksudken Debora, apakah dirina sendiri, ntah Yael rikutken visi Tuhan bana). I bas peperangen e, Tuhan mereken kemenangen man bangsa Israel, i ja ihuntakken Tuhan Sisera ras gereta perang besina bage pe tenterana kerina. Ibunuhna kerina tentera Sisera, sekalak pe la lit tading seakatan Sisera.

Sisera kiam menyelamatken diri ku kemah Yael, ndehara Heber bangsa Keni erkiteken raja Jabin i Hasor nari erteman ras keluarga Heber. Ialo-alo Yael Sisera alu mehuli, “Mari tuan, mari ku kemahku. Ola mbiar. Ibunikenna Sisera i balik kire-kire. Ras iberekenna lau inemen susu erkiteken muas kel Sisera. Janah Sisera pe enggo mindo man Yael gelah banci Yael tedis i lebe pintun kemah, janah adi lit kalak reh nungkun entah lit sekalak i jenda maka Yael arus erkata la lit. Erkiteken latih kel iakap Sisera maka minter entabeh pertunduhna. I je alu cepat, ibuat Yael martel ras pantuk-pantuk kemah, ideherina Sisera alu manjar-anjar, kenca bage ibunuhna alu mekpek pantuk-pantuk ndai alu martel arah pipi Sisera pultak ku taneh. Kenca si e, ituduhken Yael man Barak maka kalak si idaramina enggo mate. Kenca si e, reh dekahna reh tambahna gegeh kalak Israel naluken Jabin.

Yael (ertina: kambing liar). I bas Pustaka Si Badia hanya 6 kali lit gelarna isebutken. Kai nge sebabna, lit turah pikirenna membunuh Sisera? Sedekah enda tehna nge, maka Jabin raja Kanaan erteman ras keluarga Heber, perbulangenna. Apakah si nilakokenna dalam rangka guna mereken rasa aman ras keselamaten man sukuna e me Suku Keni, suku pengembara? Sabab banci kataken, perbahanen Yael kejam kel/sadis. Sabab awalna mehuli pangalo-ngalona man Sisera tapi dalam sekejap minter ibunuhna alu patok-patok kemah ras martel. Kai si ilakoken Yael, sada sisi la payo sebab melanggar adab i bas mereken tumpangen. Ensiklopedia Alkitab mengatakan, apa yang dilakukan Yael adalah menginjak-injak etika baik pada jaman ini maupun pada jaman sekarang. Yael bersalah sebab melanggar adab memberi tumpangan, licik, berkhianat.

Tapi i bas dampar si deban, Yael pe itehna maka sedekah bangsa Kanaan memerintah selama dua puluh tahun nandangi Israel, mesui kel ate bangsa Israel ibahanna. Banci jadi si ilakokenna dalam rangka ndalanken sura-sura Tuhan guna nelamatken bangsa Israel (bdk. Kai si ilakoken Rahab, asum mbuniken dua kalak mata-mata Isreal - Josua 2:8). Maka asum reh Barak ndarami Sisera, minter ituduhken Yael, e me Sisera si enggo ampar i babo taneh janah enggo mate. Termasuk pe, kai si ilakoken Yael guna njagai sukuna gelah tetap ijagai bangsa Isael sabab ia suku pengembara. Bahkan i bas enden-enden Debora ras Barak, gelar Yael diabadikan (Hak. 5:24-27). Keputusen si ibahan Yael paksa si e sangat luar biasa, cepat-tepat ras ukurna ndauh ku lebe e me guna sukuna ras keselamaten bangsa Israel si enggo mesui ibahan bangsa Kanaan.

Versi Audio silahkan klik : https://youtu.be/6IfA6_FC8Rk

Pengkenaina

Tema ras tujun i bas PA-ta sendah, ngajuk kita kerina Moria gelah erlajar jadi Moria-moria si visioner bagi Yael. Amin pe tentuna labo bagi si ilakoken Yael, sebab konteks geluhta genduari berbeda ras si ialami Yael. Kerna tujun si pemena PA-ta sendah akap kami enggo jelas i bas uraian mpebagesi ogen i datas. Enggo ndauh iukurken Yael kerna konsekuensi perbahanenna, si mehuli akap kami, labo dirina ras sukuna ngenca si iukurken Yael, tapi iukurkenna pe nasib bangsana adi tetap ikuasai bangsa Kanaan. Tapi memang labo ituriken i bas ogenta uga nge situhuna kegeluhen Yael. Apakah geluh erkemalangen man Dibata entah uga? Tapi amin bage gia, adi enggo masuk ku bas syair ende-enden kemenangan Debora ras Barak i bas bindu 5, tek kita maka Yael e me sekalak diberu si erkemalangen man Dibata.

Tujun si peduaken PA-ta sendah ngajuk kita kerina Moria gelah pentar muat keputusen guna masa depan. Uga carana? Si pemena, tetap nggeluh erkemalangen man Tuhan Dibata, sebab bena-bena kepentaren e me erkemalangen man Tuhan. Si peduaken, pindolah man Dibata nari kepentaren arah pertotonta (bdk. Jak. 1:5). Arah si e, ipengasup Tuhan kita pentar guna rukur ras erbahan keputusen guna masa depan. Ertina, labo hanya jangka pendek, tapi jauh ku lebe pe enggo siukurken (bdk. visioner: orang yang memiliki pandangan atau wawasan ke masa depan). Sekalak Moria si visoner e me Moria si rukur ndauh ku lebe kerna kiniulin ras kemajuan jabu, gereja ras lingkungen masyarakatna. Mampu melihat kelebihan bas dirina ras kalak si deban ras ipakeken guna kiniulin ras-ras. Sebage contoh, sekalak ibu rumah tangga, aminna pe sedekah enda perbulangenna si erdahin ncukupken kebutuhen keluarga, tetap ia ikut nampati alu erbahan usaha rumahan (cattering). Kepeken, berjalan waktu dilo Dibata perbulangenna. Situasi enda labo erbahanca ia panik ras mbiar sebab sedekah enda pe enggo lit usahana ras reh majuna pe. Kai si ibahanna nampati geluh keluargana termasuk kalak si deban si erdahin ras ia. Contoh si deban si sederhana banci silakoken: mengelola keuangan dengan baik, mendidik anak-anakta alu sikap ras mehuli, rsd.  Pindolah tetap gegeh ras kepentaren i bas Dibata nari gelah kita jadi Moria-moria visioner si pentar muat keputusen guna masa depan si lebih baik. Dibata si mpengasup kerina kita Moria GBKP.