SUPLEMEN PA MAMRE GBKP TGL. 10 - 16 NOVEMBER 2024

Pdt. Larena Sinuhadji (Nd. ReyRapha Tarigan)

Teks : Lukas 1:26-38

Tema : LA LIT SI METAHAT I BAS DIBATA

Tujun : Gelah Mamre :

1) Meteh kuasa Dibata erdahin i bas Maria ras Elisabet

2) Ngendesken dirina sepenuhna man Tuhan i bas kerina dampar geluhna

Penaruh

Melala penelitian si ngatakenca maka dilaki cenderung makeken logikana asangken perasaan. Sedangken sebalikna, diberu lebih cenderung makeken perasaan asangken logikana. Kalak si iutamakenna logikana biasana kurang tek nandangi mujisat, keajaiban, entah pe tanda-tanda sengget, sebab la masuk akal iakapna. Berpikir logis akap kami labo salah, saja ngenca adi erkaiten ras nggeluh erkiniteken man Dibata, akal pikirenta harus dibarengi dengan iman. Sebab Dibata si isembah kita e me Dibata si erkuasa ngelakoken kai pe si la terantusi akal pikirenta. I bas kesempaten enda radu ras kita erlajar kerna kuasa Dibata si la terbatas i bas kegeluhenta.  

Mpebagesi Teks

Si jadi teks ogenta sendah akap kami enggo semal sibegiken entah pe sioge, khususna i bas masa-masa Adven bage pe Natal. Ogenta sendah lit i teruh judul perikop “Berita ketubuhen Yesus.” I bas terj. TB-LAI nina, “Pemberitahuan tentang kelahiran Yesus.” I bas judul perikop enda enggo jelas kai si ituriken i bas ogenta sendah.

Ituriken maka reh Malekat Tuhan man Maria guna mpetetap ukurna, i ja ibereken Tuhan perkuah ateNa, guna jadi nande Juruselamat. Situasi paksa si e, Maria singuda-nguda denga, tapi nina Malekat Tuhan, tik nari mehuli kula Maria, janah ipupusna kari sekalak Anak dilaki si harus ibahan gelarNa Yesus. Ipertegas Malekat maka Anakna e pagi jadi kalak si mbelin dingen igelari pe Anak Dibata si meganjangna kel. Si ikataken Malekat Tuhan tuhu-tuhu erbahanca Maria sengget, e maka nina, “Kuga e jadi man bangku, sabab aku singuda-nguda denga?” Ipetetap Malekat Tuhan maka Kesah Si Badia pagi nusur ku babona, janah kuasa Dibata ringan i bas Maria. Ertina, i bas Maria ngaloken perkuah ate Tuhan e, amin sekali mberat, Dibata arah Kesah Si Badia tetap engkawali Maria. Guna mpetetap ukur Maria, ituriken Malekat Tuhan kerna kerna kai si bakal jadi nandangi Elisabet, kade-kadena, si enggo peenambulanken natang tuah. Amin pe enggo metua ras ikataken kalak maka la nari banci mupus. “La lit si metahat i bas Tuhan,” nina Malekat Tuhan. Je nari, alu dem ketaatan ialoken Maria perkuah ate Tuhan ndai, amin sekali secara manusia mberat ngalakenca. Tapi tek Maria, maka Tuhan tetap nemani ras masu-masu kegeluhenna.

Adi sioge seterusna Injil Lukas maka kai si ikataken Malekat Tuhan ndai tuhu-tuhu terbukti. Yohanes Peridiken tubuh, ilakokenna tugas tanggung jawabna selaku kalak si nikapken dalan guna kerehen sekalak Mesias si tergelar Yesus Kristus. Labo ndekah kenca Yohanes tubuh, Yesus Kristus pe tubuh. Kenca enggo iperidiken Yohanes sebage tanda ibenakenNa pelayanenNa i tengah-tengah bangsa Israel, Yesus sebage Anak Dibata tuhu-tuhu ndalanken tugas tanggung jawabna sebage Juruselamat. IlakokenNa pelayanen si mehuli i tengah-tengah bangsa Israel. IbahanNa tanda-tanda sengget. IajarkeNa kerna keselamaten, kinirajan Dibata, keleng ate Dibata, rsd.-na. Kenca enggo ngenanami kiniseran ras mate i kayu persilang, i bas wari peteluken keke i bas si mate nari, janah la ndekahsa nangkih ku surga. Kerehen Yesus Kristus ku tengah-tengah doni enda tuhu-tuhu encidahken kuasa Dibata si luar biasa si la terantusi akal pikirenta. Seh asa gundari pe Dibata masih tetap encidahken kuasaNa i kegeluhenta si tep-tep wari. 

Versi Audio silahkan klik : https://youtu.be/dmbuM73cWp0

Pengkenaina

Tema si seh man banta i bas PA-ta sendah ibuat i bas ay. 37 nari, nina Malekat man Maria, “Sabab la lit si metahat i bas Dibata.” Terj. TB-LAI nina, “Sebab bagi Allah tidak ada yang mustahil.” Tema enda rusur ijadiken ende-enden rohani populer si biasa iendeken kita: “Mujizat itu nyata,” “Bagi Tuhan tak ada yang mustahil,” “Ajaib Kau Tuhan,” rsd.-na. Ende-enden pujin e akap kami labo terjeng mejile sibegiken, tapi tek kita maka ende-enden pujin ndai iciptaken erpalasken pengalamen pribadi si terjadi i bas kegeluhen si tep-tep wari kerna kuasa Dibata si luar biasa, si ngasup erbahan kai pe si la terantusi akal pikirenta. La lit si metahat i bas Dibata. Ertina i bas kesempaten enda iajuk kam kerina Mamre gelah tek nandangi kuasa Dibata si luar biasa i bas kegeluhenndu. Kuasa Dibata tetap seri nai-nai nari, gundari, seh rasa lalap.

Erbage-bage pergumulen, perbeben, terjadi i bas kegeluhenta: sakit-pinakit, persoalen ekonomi, lenga dat tuah, konflik rumah tangga, persoalen anak-anak, tantangen i bas pendahin, kiniseran, perbeben si mberat, rsd.-na. I bas si e kerina erpengendeslah kam man Dibata, pindolah gegeh ras kepentaren i bas ndalanisa, sebab iteh Dibata kai si terbaik i bas kegeluhenta. Tetaplah tek maka la lit si metahat i bas Dibata. Alu cara ras waktu Dibata si tepat, isampatiNa kita, iberekenNa si terbaik man banta.

Sendah e me PA Mamre si terakhir i bas tahun 2024. Bujur sikataken man Tuhan erkiteken kerina bahan PA Mamre banci isehken alu mehuli i bas runggunta masing-masing. Melala hal si banci jadi bahan evaluasi, labo saja i bas pelaksanaan PA, tapi pe i bas kerina program si enggo ilaksanaken sedekah tahun 2024. Tentu harus lit tekad i bas dirinta guna semakin meningkatkan kualitas pelayanen i bas tahun 2025. I bas si e marilah sipekena si man pekenan, sitingkatken kualitas ras kuantitas pelayanen gelah Mamre GBKP semakin paguh i bas erkiniteken, geluh erkemalangen man Dibata, janah i bas situasi si lenga jelas i bas tahun 2025, iajuk kam kerina gelah semakin erpengendes man Dibata, sebab bagi tema PA-ta sendah, la lit si metahat i bas Dibata.