SUPLEMEN PA MAMRE GBKP TGL. 3 - 9 NOVEMBER 2024

Pdt. Larena Sinuhadji (Nd. ReyRapha Tarigan)

Teks : Maleaki 3:1-5

Tema : ERSIKAP NGALO-NGALO KEREHEN TUHAN

Tujun : Gelah Mamre :

1) Meteh kerna kerehen Tuhan (eskatologi)

2) Nikapken dirina alu biak-biak si mehuli bas ngalo-ngalo kerehen Tuhan

Penaruh

Sekalak motivator si pernah viral piga-piga tahun si lepas, Mario Teguh, ngatakenca bagenda, “Menunggu adalah pekerjaan yang membosankan, dan lebih membosankan lagi jika tidak ada yang ditunggu. Menunggu yang tidak jelas apa yang ditunggu adalah penderitaan.” Kerina kalak si tek man Yesus Kristus, gundari lit i bas keadaan nimai kerehen Tuhan Yesus si peduakaliken. Ertina ise si itimai enggo jelas lit, kerna kerehenNa enggo pasti reh, saja ngenca la lit ise pe si meteh ndigan Tuhan e reh. Enda akap kami si jadi perbebenta.

I bas kesempaten enda radu ras kita erlajar kerna ersikap ngalo-ngalo kerehen Tuhan, khususna i bas kita bengket ku Minggu-minggu Adven bage pe Natal i bas tahun 2024.

Mpebagesi Ogen

Maleaki e me kitab si terakhir i bas Padan Si Ndekah. Rikutken AlkiPEDIA, ikataken maka Maleaki (ertina: utusen Dibata) melayani i tengah-tengah bangsa Israel sebage sekalak nabi sekitar tahun 430 - 420 SM (Sebelum Masehi) kenca enggo bangsa e mulih i pembuangen nari. Nabi Maleakhi radu ras melayani ras Nehemia. Paksa Nabi Maleaki ras Nehemia melayani terjadi kemunduren i bas kegeluhen erkiniteken bangsa Israel. Imam-iman ngelakoken korupsi (Mal. 1:6-2:9; Neh.13:1-9). Bangsa e enggo lanai nehken persepuluhen bage pe persembahen-persembahen si debanna (Mal. 3:7-12; Neh. 13:10-13). Melala geluh perjabun si hancur erkiteken perselingkuhan (Mal. 2:10-16; Neh. 13:23-28), entah pe banci itafsirken bangsa e enggo nembah dibata-dibata si deban. I bas konteks si bagenda rupana Nabi Maleaki melayani i tengah-tengah bangsa Israel. Emaka enggo lanai jadi penungkunen engkai makana lit berita entah pe nubuaten kerna ukumen man bangsa Israel.  

Ogenta sendah akap kami lanjuten bindu 2:17 si lit i teruh judul perikop “Wari ukumen enggo ndeher.” I bas terj. TB-LAI nina, “TUHAN datang untuk menghukum.” Arah judul enda nari enggo banci sisimpulken kai si jadi fokus i bas perikop enda, e me kerna ukumen Dibata man bangsa Israel si enggo lanai nggeluh erkiniteken man Dibata. Inubuatken maka i bas paksana pagi reh sekalak persuruhen Dibata si nikapken dalan guna kerehen TUHAN. Persuruhen Dibata enda banci itafsirken nabi-nabi si enggo reh ku tengah-tengah bangsa Israel. Kenca enggo iberitaken persuruhen e ndai kerna kerehen TUHAN, maka i bas paksana reh TUHAN maba ukumen. Lit sitik cataten i jenda sebab ay. 3 i bas terj. BIMK ras Alkitab Bhs. Karo seakan-akan si nehken ukumen e sekalak persuruhen. Sedangken i bas Alkitab terj. TB-LAI Ed. II, ikataken je maka si ngukum e Dibata sendiri labo persuruhenNa. I bas si e, kami ngikutken Alkitab terj. TB-LAI Ed. II.

Ukumen i jenda adi rikutken ay. 2-4, labo i bas rangka membunuh, menghancurkan, entah pe memusnahkan bangsa Israel, tapi i bas rangka membersihkan, memurnikan, entah pe mentahirkan bangsa e i bas dosa-dosa entah kejahaten nari. Tapi  lit ka kelompok kalak si la mbiar man Dibata. Enggo pe ipersingeti, tetap denga ngelakoken kejahaten. Man kalak si bage rupana, Dibata mereken ukumen. I bas ay. 5 ikataken maka kerina kalak si la mbiar man Dibata, bagi guru-guru pertendung, perlua-lua, saksi palsu, kalak penipu, kalak si nindas diberu balu-balu, anak melumang ras kalak pertandang, bakal iadili ras datken ukumen i bas Dibata nari.

Perikop si jadi ogenta sendah rusur itafsirken sebage nubuaten kerna kerehen sekalak persuruhen Dibata e me Yohanes Peridiken, si nikapken dalan guna kerehen Yesus Kristus, Mesias, Juruselamat, entah pe si maba keselamaten man doni enda.

Pengkenaina

La tergejap, kentisik nari enggo bengket kita ku minggu-minggu Adven, enggo lanai ndekah radu ras kita ngerayaken Natal i bas tahun 2024 enda. I bas rangka mperingeti wari ketubuhen Yesus biasana ibenai alu minggu-minggu Adven. Janah minggu si reh PA-PA Kategorial bage pe PJJ enggo dung. Sope bengket ku Minggu-minggu Adven, ilakoken Pekan Kebaktin Keluarga.

Piga-piga ayat i bas Padan Si Baru ngatakenca maka wari Tuhan e reh bagi penangko, si la ise pe meteh ndigan penangko e reh (1 Tes. 5:2; 2 Pet. 3:10; Ket. 16:15; rsd.-na). Enda akap kami si jadi perbebenta kalak si tek. Adi umpamana enggo siteh ndigan Tuhan Yesus reh si peduakaliken, tentu kita pe banci tuhu-tuhu ersikap. Tapi amin bage gia, iajuk kita kerina gelah tetap ersikap i bas ngalo-ngalo kerehen Tuhan kata wari paksa pe. I bas rangka menyambut Natal tahun enda, akap kami kerina kita enggo ersikap, baik secara pribadi bage pe secara kelembagaan. Panitia Natal enggo sibentuk janah gundari sangana erdahin guna nikapken kerina kebaktin bage pe perayaan Natal tahun enda. Kerna persikapenta guna ngalo-ngalo kerehen Tuhan si peduakaliken akap kami labo kerina kita enggo tuhu-tuhu ersikap. Melala denga kita si nggeluh berkubang i bas erbage-bage dosa. Melala denga kita si la makeken waktu si lit alu mehuli. Melala denga kita si la erkemalangen man Dibata, amin pe tercatat sebage anggota Gereja. Melala denga kita si kisat ertoto, kisat ngoge Pustaka, kisat reh ku bas kegiaten-kegiaten Gereja. Ras melala denga si deban.

I bas kesempaten enda mulihi kita ipersingeti maka kerehen Dibata banci terjadi secara tiba-tiba, banci ka leben kita si ngadap man Dibata i bas kematenta. Emaka marilah sipergunaken waktu ras kesempaten si lit guna ngelakoken kerina si jadi peraten Dibata. I bas nandangi keri tahun enda, tentu banci menjadi bahan evaluasi man bandu Mamre kami bage pe man banta kerina, enggo nge sipergunaken waktu ras kesempaten si lit i bas tahun 2024 enda guna ngelakoken kerina si mehuli si sue ras peraten Dibata? Adi enggo, kataken bujurlah man Dibata, perban enggo ipengasup Dibata kam guna nggeluh berkualitas. Adina lenga, marilah kita ertekad mpelimbarui diri ku si mehuli. Dibata si mpengasup kam kerina Mamre kami.