SUPLEMEN PJJ GBKP TGL. 3 - 9 NOVEMBER 2024

Pdt. Larena br. Sinuhadji (Nd. ReyRapha Trg.)

NDALANKEN KEBUJUREN - Ulangen 10:12-22

(Lembaga-lembaga Diakonia)

Penaruh

Adi ngerana kerna ndalanken kebujuren, akap kami kerina kita enggo pernah ndalanken kebujuren. I bas bahan-bahan PJJ, PA-PA Kategorial, Khotbah Minggu enggo rusur ilumbaken kerna ndalanken kebujuren. Apai ka i bas GBP GBKP Tahun Pelayanan 2021 - 2025, kebujuren termasuk i bas 5 Tata Nilai si harus jadi karakter nggeluh kerina kita anggota GBKP. Ertina adi ngerana kita kerna kebujuren enggo semal sibahas janah enggo silakoken i bas kegeluhenta si tep-tep wari. I bas PJJ-ta sendah mulihi kita erlajar kerna kebujuren si ikaitken ras karya-karya diakonia i bas konteks Gerejanta GBKP.  

Mpebagesi Ogen
 
Ogenta sendah lit i teruh judul perikop “Tuntuten Dibata,” i bas terj. TB-LAI nina, “Orang Israel diperingatkan supaya taat dan bersyukur.” Judul perikop terj. Bhs. Ind. nari akap kami lebih tepat, sebab merangkum kai si jadi pesan utama i bas perikop ogenta. Intina i bas ogenta, Tuhan mereken persinget man bangsa Israel erkelangken Musa, gelah bangsa e erkemalangen man Tuhan alu bulat ukur, ula nai mekeng. Dibata Israel e me Dibata si mbelin, ganjangen asangken kerina dibata-dibata si deban, ras gegehen asangken kerina kuasa-kuasa si deban. IA Dibata si mbelin dingen mbisa. Dibata si la erayo-ayo dingen la ngaloken sogok. Dibata jine setia ngelakoken man bangsaNa jine terlebih man anak melumang ras diberu mbalu-mbalu, bage pe kalak tandang-tandang. Jelas, Dibata pe mindo gelah bangsa enda tuhu-tuhu engkelengi Tuhan ras ngkelengi kalak si deban. Sada si arus iinget bangsa enda, maka marenda pe bangsa enda tandang i Mesir. Kai si ilakoken bangsa enda alu setia man Tuhan rikutken nehken kekelengen man manusia alu la erdobahen situhuna tujunna guna bangsa e jine, gelah kesangapen ras kejuah-juahen tetap jadi sikerajangenna (ay. 14).

I bas ogenta sendah jelas maka keleng ate Dibata si mbelin harus irespon bangsa Israel alu: nembah man baNa (takut akan Tuhan). Ndahiken kerina si iperentahkenNa (hidup menurut jalan yang ditunjukkanNya). Engkelengi Dibata si teridah arah ibadah si ilakoken alu bulat ukur (mengasihi Allah dan beribadah kepadaNya dengan segenap hati dan jiwa). Ngikutken kerina Undang-undangNa (berpegang pada perintah dan ketetapan Tuhan). Patuh ras erkemalangen man Dibata (taat dan menghormati Tuhan). Secara khusus si jadi fokusta sendah e me ay. 18-19, i ja bangsa Israel harus encidahken keleng ate man kalak si deban, khususna man anak-anak melumang, diberu balu-balu, ras kalak pertandang. Telu kelompok sosial enda si paksa si e sangat rentan, la iperdiateken, ianggap sampah masyarakat, janah rusur datken tindaken kekerasen, sebab la lit ise pe si melindungi. E maka telu kelompok sosial enda harus datken perhatin, perlindungen, penampat, bage pe keleng ate si lebihen asangken man kalak si deban. Palasna jelas, e me kap keleng ate Dibata si la rayo-ayo, janah Dibata pe enggo encidahken teladan alu ngelakoken kebujuren nandangi telu kelompok sosial si rentan ndai.

Versi Audio silahkan klik : https://youtu.be/m_EqEYyDcEo

Pengkenaina

Tema PJJ-ta sendah e me “Ndalanken Kebujuren.” Kebujuren i jenda akap kami ibuat i bas ay. 18 nari, i ja ikataken maka Dibata ndalanken kebujuren nandangi anak-anak melumang, diberu balu-balu, bage pe man kalak pertandang. I bas terj. BIMK kebujuren i jenda iterjemahken alu “membela hak yatim piatu dan janda supaya mereka diperlakukan dengan adil.” Enda akap kami sue ras erti bujur adi siterjemahken ku bhs. Ind. e me: jujur, tulus hati, adil, pantas. Jadi banci ikataken maka ndalanken kebujuren i jenda e me membela hak-hak kalak si lemah gelah datken keadilen. Membela hak-hak kalak si lemah i bas perkembangenna masuk ku bas dahin-dahin diakonia i bas Gereja. 

Secara kelembagaan GBKP enggo ngelakoken tindaken membela hak-hak kalak si lemah alu ilitkenna lembaga-lembaga entah pe unit-unit pelayanen diakonia, bagi umpamana PAK Gelora Kasih, YKPD Alpha Omega, PPOS, ras melala denga si deban. Janah adi ngerana kita kerna karya diakonia, GBKP akap kami enggo luar biasa. Salah sada karya diakonia GBKP si fenomenal e me sanga penanggulangan bencana Deleng Sinabung. Sidarami saja i bas google alu kata-kata kunci “karya diakonia GBKP dan Gunung Sinabung” enggo mis lit je melala artikel si meliput karya diakona GBKP i bas nampati kalak si terdampak bencana Deleng Sinabung. Tapi si jadi penungkunen, apakah kita sudah merasa cukup puas dengan pencapaian diakonia GBKP? Jawabenna tentu lang, sebab dahin pelayanan diakonia harus ngasup menjawab tantangen jaman si terus berubah. Ertina GBKP harus terus meningkatkan kualitas ras kuantitas pelayanan i bas bidang diakonia, gelah diakonia karitatif, reformatif ras transformatif banci ilakoken alu mehuli guna kemulian gelar Dibata.

Sebage anggota perpulungen kai si banci ilakoken kita? Akap kami sedekah enda pe enggo nge kerina kita ikut muat bagin i bas er-diakonia, baik secara pribadi, i bas runggunta masing-masing, bage pe i bas kita mendukung lembaga-lembaga entah pe unit-unit pelayanen diakonia GBKP, arah totonta bage pe dukungen dana. I bas kesempaten enda mulihi kita isingetken gelah semakin meningkatkan dukungenta. Menjelang akhir tahun biasana enterem kita si nehken penampat man senina turangta si lit i bas PAK Gelora Kasih, YKPD Alpha Omega, PPOS, ras ingan si debanna, raduken ras perayaan Natal Tahun Baru. Akap kami tradisi si bagenda harus terus ilitken gelah turah kesadaren perpulungenta i bas mendukung unit-unit pelayanen diakonia si lit i bas Gerejanta. Kai nari si banci silakoken? I bas tingkat Runggun akap kami kegiaten-kegiaten bagi perkunjungen ku Panti Asuhan, Rumah Sakit, bage pe Lapas, harus lit, sebab kegiaten-kegiaten e sangat Alkitabiah (Mat. 25:35-36). Dibata si mpengasup kita guna ngelakokenca.