SUPLEMEN PA MORIA GBKP TGL. 10 - 16 NOV. 2024

Pdt. Larena Sinuhadji (Nd. ReyRapha Tarigan)

Dewasa Menerima Perbedaan (Tema Tahun 2025)

Si Man Ogen : Galati 3:26-29

Tema : SADA I BAS KRISTUS YESUS

Tujun : Gelah Moria :

- Nuriken maka kerina manusia pe erbage-bage tapi sada i bas Kristus

- Ngkuhi kinierbagen i bas agama, suku, pendahin, tingkat perekonomian ras si deban

Metode PA : Studi Kasus

Penaruh

Perbedaan akap kami Dibata si njadikenca. Dilaki ijadiken berbeda ras diberu. Setiap jelma lit i bas ia karakteristik si unik, si berbeda ras si debanna. Lit ribuan jenis sinuan-sinuan bage pe rubia-rubia si berbeda sada ras si debanna. Si e kerina ijadiken Dibata guna saling melengkapi sada ras si debanna. Lit ka perbedaan si ibahan manusia, umpamana: jenis pendahin entah pe profesi, tingkat pendidiken, kelas-kelas sosial, rsd.-na. Bedana ras Dibata, manusia rusur ibahanna pembedaan-pembedaan si erbahanca turah diskriminasi, kekerasan, perubaten, perjengilen, bage pe peperangan. I bas kesempaten enda radu ras kita erlajar ngergaken perbedaan erpalasken keleng ate Kristus.

Mpebagesi Si Man Ogen

Si man ogenta sendah e me Surat Rasul Paulus man perpulungen kalak si tek i kota Galati. Bagi umumna surat-surat Rasul Paulus, tujun utama surat enda e me gelah perpulungen kalak si tek i kota Galati megegeh janah kinitekenna pe reh paguhna amin pe melala tantangen si man hadapen erkiteken kinitekenna man Yesus Kristus. Umumna lit dua tantangen si man hadapen, si pemena tantangen arah darat nari, e me arah masyarakat si la senang nandangi kelompok Kristen si berbeda gaya hidupna. Si peduaken, e me tantangen arah bas nari, umpamana, arah litna ajaren-ajaren si papak si mewajibken perpulungen gelah ngelakoken undang-undang gelah terkelin. Bage pe, arah litna kelompok-kelompok tertentu si rusur erbahanca kiniersadan i bas perpulungen terganggu. Bagem kira-kira perbeben si ihadapi Rasul Paulus i bas ngarak-ngarak perpulungen kalak si tek paksa si e.

Si man ogenta sendah lit i teruh judul perikop “Tujun Undang-undang.” I bas terj. BIMK nina “Peranan hukum agama.” Terj. TB-LAI ibenaken ay. 15 nari nina “Hukum Taurat atau janji.” I bas perikop enda teridah pengaruh ajaren-ajaren si papak si ngajuk perpulungen gelah ngelakoken Undang-undang (Taurat) sebage syarat keselamatan. Palas ajaren si papak enda salah sadana e me erkiteken lit pembedaan antara kalak Yahudi ras kalak Non-Yahudi. Umumna kalak Yahudi lit rasa bangga i bas dirina erkiteken merasa diri sebage bangsa pilihen Dibata, bangsa kelas sada, sedangken bangsa-bangsa si deban e me bangsa kelas dua, bangsa kafir. Sikap nggeluh si bagenda rupana ibabana denga amin pe enggo jadi kalak Kristen. Rasul Paulus ngingetkenca maka sikap nggeluh si bagenda rupana labo benar.

Si benar, nina Paulus, arah kiniteken me maka kam kerina jadi anak-anak Dibata i bas persadanndu ras Kristus Yesus. Kam enggo ipersada ras Kristus arah lakon peridin, e maka enggo lit i bas kam biak-biak Kristus e. Adi kam sikerajangen Kristus, kesusuren Abraham me kam, janah ialokenndu me kai si enggo ipadanken Dibata. E maka konsekuensina nina Paulus i bas ay. 28, “Dage lanai bo erndobah kalak Yahudi entah kalak Yunani, budak entah kalak bebas, dilaki ras diberu. Sebab kerina nge kam sada i bas Kristus Yesus.” Intina, kerina kalak si tek enggo ipersadaken i bas Yesus Kristus. I bas Kristus enggo lanai lit batasen-batasen, pembedaan-pembedaan erpalasken suku bangsa, gender, ras status sosial.

Versi Audio silahkan klik : https://youtu.be/aBuwqm3ceTs

Pengkenaina

PA-ta sendah e me PA terakhir i bas tahun 2024. Sikataken bujur man Dibata erkiteken enggo iarak-arakNa kita ngelakoken PA Moria sedekah tahun 2024. Tentu melala denga kekurangen i bas kita er-PA Moria. I bas si e marilah sipekena si man pekenan, sitingkatken kualitas ras kuantitas pelayanen gelah Moria GBKP reh paguna i bas erkiniteken, tuhu-tuhu nggeluh erkemalangen man Dibata.

I bas PA-ta si terakhir enda radu ras kita iajuk gelah reh dewasana menerina perbedaan si lit i sekelewetta. Si pemena lebe harus lit i bas kita pemahamen si positif nandangi kerina perbedaan si lit i sekelewetta. Amin pe mungkin perbedaan e manusia si erbahanca, tapi adi pusuh perukurenta positif maka lit kininggiten i bas dirinta guna mengelola perbedaan e alu mehuli. Rasul Paulus mereken teladan man banta i bas ia mengelola perbedaan si lit i tengah-tengah perpulungen kalak si tek paksa si e. Palas i bas sikap positif i bas diri Paulus e me kinitekenna si tuhu-tuhu man Yesus Kristus. Emaka kita pe iajuk gelah tutus erkiniteken man Kristus. Kiniersadan i bas Kristus harus jadi palas i bas kita bersikap positif terhadap perbedaan, gelah ipengasup Kesah Si Badia kita mengelola perbedaan alu mehuli guna kiniulin perpulungen.

Si peduaken marilah sibeneken sifat-sifat primordial, diskriminatif, pilih-pilih, bage pe pembedaan-pembedaan berdasarkan gender, SARA, tingkat pendidikan, jenis pendahin, tingkat ekonomi, kelas-kelas sosial, rsd.-na. Apai ka latar belakang Gerejanta e me kesukuan si situhuna rentan terjadi pembedaan-pembedaan. Tapi akap kami GBKP enggo semakin terbuka menerima senina turangta si la sada suku. Enda akap kami merupaken hasil nggeluh erkiniteken sedekah 134 tahun sehna Berita Si Meriah. Tahun si reh bengket kita ku bas tema tahun pelayanan GBKP 2025 e me “Dewasa Menerima Perbedaan.” Enda akap kami banci semakin mpebagesi pengangkanta kerna perbedaan-perbedaan si lit i bas Gerejanta bage pe si lit i sekelewetta. Uga caranta mengelola perbedaan-perbedaan si lit guna kemajun Gerejanta bage pe kiniulin masyarakat si lit i sekelewetta. Tentuna ibenaken i bas diri sendiri bage pe i bas jabuta masing-masing. Marilah sitanamken nilai-nilai persahabatan, merayakan perbedaan sebage kekayaan si banci saling melengkapi bage pe mpeteguhi kinitekenta man Dibata i bas Yesus Kristus. Selamat memasuki masa-masa Adven, perayaan Natal ras Tahun Baru. Dibata si masu-masu kita kerina.