SUPLEMEN PJJ GBKP TGL. 10 - 16 NOVEMBER 2024

Pdt. Larena Sinuhadji (Nd. ReyRapha Tarigan)

SINALSAL SI ERKINAR - Jesaya 9:1-7

(Advent & Natal)

Penaruh

La tergejap PJJ sendah e me PJJ si terakhir i bas tahun 2024. Kentisik nari radu ras kita bengket ku bas Minggu-minggu Adven. Adven ertina kedatangan. E maka i bas Minggu-minggu Adven biasana kita ersikap guna ngalo-ngalo kerehen Mesias, Yesus Kristus Juruselamat, si tubuh i Betlehem. Tapi masa Adven labo terjeng ngenehen ku masa lalu, ersikap guna mperingeti wari ketubuhen Yesus, masa Adven pe mengacu ku masa depan. Radu ras kita ersikap ngalo-ngalo kerehen Tuhan Yesus si peduakaliken. I bas PJJ si terakhir i bas tahun 2024 enda, radu ras kita ersikap guna bengket ku bas masa Adven ras Natal.

Mpebagesi Ogen

Jesaya ertina “Tuhan (YHWH) menyelamatkan.” Nabi Jesaya ertugas sebage nabi cukup ndekah i tengah-tengah bangsa Israel kira-kira 112 tahun, ibenaken sekitar tahun 742 SM seh kematenna i bas tahun 630 SM. Kitab Jesaya rusur isebut Kitab Mesianik erkiteken melala nubuaten-nubuaten i bas kitab enda si meritaken kerehen Mesias ku tengah-tengah bangsa Israel, janah rusur jadi referensi i bas Padan Si Mbaru, khususna i bas Kitab Injil.

Ogenta sendah lit i teruh judul “Raja si reh pagin,” i bas Alkitab TB-LAI nina, “Kelahiran Raja Damai.” Ay. 1 (Jes. 8:23 i bas Alkitab TB-LAI) nuduhkenca situasi si terjadi i Kerajan Juda i teruh Raja Ahas si sangana lit i bas kesusahen ras kepiceten si mesangat erkiteken ancamen Kerajan Assur si bakal reh naluken Kerajan Juda (Jes. 8:5-10). I bas situasi si bagenda rupana, Dibata arah nabi Jesaya nehken penghiburen ras pengarapen. Labo kepiceten saja si bakal ialami bangsa e. Alu kata-kata si puitis nabi Jesaya nehken nubuaten kerna kerehen sekalak Penampat si bakal mulahi bangsaNa i bas kesusahen ras kepiceten nari. Penampat e igambarken alu “sinalsal si erkinar,” “terang si harhar” (ay. 2). Penampat si reh e bakal mabai keriahen si mbelin ras kemalemen ate (ay. 3). Penampat si reh e bakal mulahi bangsaNa i bas kerina baban si mberat ras kinisuin, nasapken penindasen ras peperangen (ay. 4,5). Penampat si reh e bakal jadi peminpin si igelari “Penampat si meganjangna,” “Dibata si Mada Kuasa,” “Bapa si rasa lalap,” ras “Raja dame” (ay. 6). Kuasana mbelang, mabai kedamen, merentah erpalasken kebenaren ras kebujuren seh rasa lalap. Si e kerina bakal jadi sabab bage kap sura-sura Tuhan (ay. 7).

Ay. 1 i bas perikop ogenta sendah jadi referensi i bas Luk. 1:79, janah ay. 6 jadi referensi i bas Luk. 1:32-33. Si intina nurikenca maka kerina si inubuatken i bas Jesaya bindu 9 igenepi i bas Yesus Kristus. Yesus me Raja si reh pagin e, Yesus Raja Damai si enggo tubuh i Betlehem. Janah si jadi fokus i bas PJJ-ta sendah e me “sinalsal si erkinar,” si akap kami ibuat i bas ay. 2 nari. I bas terj. Bhs. Ind. nina, “terang yang besar” entah pe “sinar yang cemerlang.” Terang entah pe sinalsal, rusur ipake i bas Pustaka Si Badia guna nuriken kerna kemulian Dibata. Rikutken ensiklopedia i bas situs Alkitab Sabda nari, terang dipakai untuk menandakan kehadiran Allah dan kasih Allah. Terang juga dipakai berkaitan dengan sukacita, beroleh berkat dan hidup. I bas Injil Johanes ikataken maka Yesus e me terang dunia (Yoh. 8:12; 9:5; 12:46). Janah kerina kalak si tek isebut anak-anak terang (Yoh. 12:36; Ef. 5:8; 1 Tes. 5:5). 

Versi Audio silahkan klik : https://youtu.be/tm2rrzaKLho

Pengkenaina

Sinalsal si erkinar erpalasken ogenta sendah enggo pasti si imaksudken e me Dibata i bas Yesus Kristus si wari ketubuhenna siperingeti kentisik nari. Yesus Kristus e me Penampat si mabai keriahen si mbelin ras kemalemen ate. Yesus Kristus e me Penampat si mulahi bangsaNa i bas kerina baban si mberat ras kinisuin, nasapken penindasen ras peperangen. Yesus Kristus me si igelari “Penampat si meganjangna,” “Dibata si Mada Kuasa,” “Bapa si rasa lalap,” ras “Raja dame.” KuasaNa mbelang, mabai kedamen, merentah erpalasken kebenaren ras kebujuren seh rasa lalap. I bas si e akap kami enggo tangkas man banta janah kita pe ngakukenca maka Dibata si isembah kita i bas Yesus Kristus tuhu-tuhu sinalsal si erkinar, Penampat si meganjangna, Dibata si mada kuasa, Bapa si rasa lalap, ras Raja dame.

Kai enda konsekuensina man banta selaku kalak si enggo ngaloken keselamaten i bas Yesus Kristus? Rikutken Mat. 5:14-16, iajuk Yesus kita kerina kalak si tek, si enggo ngaloken keselamaten, gelah ersinalsal terangta i lebe-lebe kalak si enterem gelah adi idahna perbahanenta si mehuli, ipujina Dibata, Bapanta si ni surga. Ertina kita pe iutus guna jadi sinalsal si erkinar i bas kegeluhenta si tep-tep wari. Sinalsal si erkinar e labo ngadi i bas Yesus Kristus ngenca, sinalsal si erkinar e me kerina kita kalak si tek, si enggo ngaloken keselamaten. Sinalsal e labo terjeng ersinalsal, tapi erkinar. I bas bhs. Ind., nina “terang yang besar” entah pe “cahaya yang cemerlang.” Ertina iajuk kita gelah lebih proaktif encidahken identitas dirinta selaku kalak si tek man Yesus Kristus, arah perukurenta, pengerananta, bage pe arah perbahanenta, i bas kegeluhenta si tep-tep wari, kapan pun dan di mana pun kita berada.

Secara khusus i bas kita menyambut masa Adven ras Natal. Marilah sipakeken masa Adven tahun enda guna merenung, mengevaluasi diri, enggo nge sedekah tahun 2024 enda kita jadi sinalsal si erkinar i japa pe kita ringan? Adi rikutken liturgi masa Adven, iajuk kita gelah nggeluh alu saber dingen megenggeng. Iajuk kita gelah banci nikapken dirinta alu encidahken persikapenta subuk arah perukuren, pengerana ras perbahanenta i bas kegeluhenta. Iajuk kita gelah reh tutusna erpengarapen nandangi kempak kegeluhen si rasa lalap i bas Kristus. I bas si e, idilo Dibata kita gelah tetap nggeluh selaku anak-anak kinirajan surga si enggo iselamatken Dibata, si teridah arah perukuren, pengerana ras perbahanenta. Dibata si mpengasup kita jadi sinalsal si erkinar.