SUPLEMEN PA MAMRE GBKP TGL. 21 - 27 APRIL 2024

Pdt. Larena Sinuhadji (Nd. ReyRapha Tarigan)

Teks : Lukas 10:25-37

Tema : ERKUAH ATE RAS NAMPATI

Tujun : Gelah Mamre :

- Meteh kerna palas kalak Samaria si erkuah ate ras nampati

- Terus ngelumbaken nehken kekelengen man kalak si perlu isampati

Penaruh

Lit dua istilah jaman gundari kerna kininggiten guna nampati kalak si deban (keinginan untuk menolong orang lain) e me empati ras altruisme. Adi empati akap kami enggo rusur sibegi, tapi altruisme mungkin lit denga kita si mbaru denga megisa. Altruisme i bas erti si sederhana e me perilaku menolong orang lain yang didasari oleh keinginan untuk menolong dan dilakukan tanpa pamrih. Istilah altruisme ras empati enda akap kami ilitken erkiteken potensi guna nampati kalak si deban lit i bas diri manusia. Adi ngerana kita kerna nampati, entah pe sisampat-sampaten, labo hal si mbaru entah pe asing erkiteken enggo biasa i bas kegeluhenta si tep-tep wari, apai ka nampati enda merupaken sada bagin si penting i bas kinitekenta, ras memang arus terus-menerus itingkatken terlebih man kalak si deban si la sada kiniteken entah pe sada suku ras kita.

Mpebagesi Teks

Bahanta ibere judul “Perumpamaan kerna kalak Samaria si erkuah ate” (terj. TB 2, “Orang Samaria yang murah hati”). Ituriken reh sekalak guru Agama Jahudi (terj. TB 2, “Seorang Ahli Taurat”) guna ncubai Yesus, alu sada penungkunen, “O Guru kai arus kubahan gelah kualoken kegeluhen si rasa lalap?” Motivasina nungkun enggo la benar, e me mencobai Tuhan Yesus. Nina Yesus, “Kai kin si tersurat i bas Pustaka Si Badia, kai si iogendu i je?” Guru Undang-undang menjawab kerna Hukum Kasih, keleng ate man Dibata; kelengilah Tuhan Dibatandu asa ukurndu, asa tendindu dingen asa gegeh ras kepentarenndu lit (Ul. 6:5) ras kekelengen man manusia; kelengilah temanndu manusia bagi kam ngkelengi badanndu (Im. 19:18). “Payo jababndu e. Bahanlah bage gelah ialokenndu kegeluhen si rasa lalap.” Ertina, Guru Agama Yahudi ietehna kai pe kerna isi Undang-undang tapi la idalankenna.
Mulihi guna pebujur-bujur bana (terj. TB 2: “membenarkan dirinya”) maka nungkun ia man Yesus, “Ise kin temanku manusia?” Sebab man kalak Yahudi, sesamana e me si seri agamana, sada bangsa. Berbeda ras pandangen bage pe perbahanen Yesus. Yesus peduli man kalak musil - tidak berdaya (Luk. 4:18, “IsuruhNa Aku guna meritaken Berita Si Meriah man kalak musil, kalak si tertaban ipulahi, kalak pentang erpengidah”), bahkan i bas Luk. 6:27-28 Tuhan Yesus ngelumbakenca, engkelengi imbang, mehulilah perbahanenndu man kalak si ernembeh ate nandangi kam, pasu-pasu kalak si numpahi kam janah totokenlah kalak si la mehuli man bandu.

Penungkunen Guru Agama Yahudi e ijawab Yesus alu sada perumpaan kerna kalak Samaria si erkuah ate. Ija lit sekalak si ngincuah i Jerusalem nari ku Jeriho (turun dari Yerusalem ke Yeriko). Rikutken piga-piga literatur maka ia kalak Yahudi. I tengah dalan jumpa ia ras perampok, i ja la saja barang-barang irampukna tapi igudamina ia menam mate ras itadingkenna i je. I bas perumpaan e, Yesus nempatken kalak si irampok e sebage kalak si arus isampati. Kalak si pemena mentas e me Imam. Kenca idahna kalak si enggo ampar e, isilahkenna je nari iteruskenna perdalanenna. Bage pe mentas kalak Lewi, kenca idahna ia pe nilah jenari iteruskenna perdalanenna. Duana kalak e Pejabat Rumah Pertoton (Bait Allah) si arus tetap menjaga kekudusenna. Sabab adi enggo kena dareh la nari badia, enggo najis. Tapi mentas kalak si peteluken e me kalak Samaria si mekuah atena, idahna kalak si ampar e. Ibenaken alu mekuah ate (terj. TB 2: “Tergeraklah hatinya oleh belas kasihan”) ras iumputi alu erbage tindaken kekelengen. I deherina, itamakenna minak ras anggur ku luka-lukana dingen ibalutina pe. Kenca bage iangkatna ku datas keldena, ibabana ku ingan penginapen guna itambari. Pepagina i berekenna ka dua duit pirak (dua wari upah kalak erdahin) man si empu penginapen. Janah nina, “Tambari ia janah adi la bias enda kutambahi pagi asum aku reh mulihken.”

Engkai icidahken Tuhan Yesus, kalak Samaria sebage kalak si mentas si peteluken? Sabab enggo seh kel dekahna kalak Yahudi ras kalak Samaria ermusuhen etnis ras agama. Kalak Samaria muncul sekitar thn. 400 SM erkiteken perkawinen campur kalak Yahudi ras bangsa-bangsa si deban erkiteken perang. Arah si enda me, kalak Yahudi erpengakap maka kalak Samaria keduduken lebih rendah asangken bangsa Yahudi. Kalak Kafir. Bahkan melala aturen si ngatakenca adi bersentuhen, bergaul, bahkan make barang bekas kalak Samaria e ianggap najis.

Emaka guna ngujungi percakapen ras Guru Agama Yahudi e Yesus nungkun, ‘Si apai nge iakapndu i bas si telu e jadi teman manusia kalak si irampok e?” Ras ijawab Guru Undang-undang e nina, “Kalak si enggo nampati ia.” Untuk mengatakan orang Samaria pe, anti kel iakapna (gensi). Emaka itutup Yesus alu perkataan, “Kam pe laweslah, janah bahanlah bage.”

Versi Audio silahkan klik : https://youtu.be/bnDCHNPjlN8

Pengkenaina

Tema ras tujun i bas PA-ta sendah ngajuk Mamre gelah semakin ergiah-giah i bas nampati. Orat nggeluh nampati i jenda jelas palasna e me keleng ate. Tuhan Yesus mengasihi kerina kalak ras kerina bangsa. Bagi si ilakoken kalak Samaria maka ia langsung nampati kalak si irampok aminna itehna kalak Yahudi tapi erkiteken mekuah atena (tergerak hatinya oleh belas kasihan), maka minter isampatina. Pertolongan entah tindaken nampati si ilakoken kita arus melewati tembok-tembok primodial. La pe sada kiniteken ras suku, beda golongen adi perlu man sampaten arus sisampati.

Erkuah ate ras nampati enggo pasti menuntut pengorbanen, sabab lit si ndarat i bas dirinta nari subuk waktu, tenaga bage materi. Bagi kalak Samaria, iberekenna minak ras anggur ku luka-luka korban dingen ibalutina (minak ras anggur si kin guna ia). Waktuna enggo Sabat, enggo pasti pe ia kena dareh kalak si irampok ndai, si kin ihindari Imam ras kalak Lewi (ianggap najis). Ras ibabana ku ingan penginapen guna itambari lebih jauh. Dua duit pirak lebe iberekenna, ras erjanji ia iberekenna lebih adi la bias guna pengobaten kalak si irampok e. Adi Mamre siap guna erkuah ate ras nampati berarti siap berkorban waktu, tenaga, dana termasuk perasaan pe.

Arah perikop enda pe, banci sidat sada pelajaren si meherga, meteh Pustaka Si Badia saja, entah erdahin i bas Rumah Dibata (Serayan Tuhan entah pe Pengurus Gereja), lenga sada jaminen nggeluh i bas Kata Dibata. Banci saja sedekah enda Kata Dibata e terjeng jadi konsumsi itelektual guna bahan diskusi tapi tanpa aplikasi. Sederhana kel si ikataken Tuhan Yesus, si enggo sieteh kita arus itindaklanjuti alu perbahanen (“bahanlah bage” ay. 28, 37).