SUPLEMEN PJJ GBKP TGL. 14 - 20 APRIL 2024

Pdt. Larena Sinuhadji (Nd. ReyRapha Tarigan)

KATA TUHAN REH MBARNA (Perb. Rasul 13:44-52)

[HUT Kategorial - Peringeten 134 Sehna Berita Si Meriah]

Penaruh

Tahun enda radu ras kita mperingeti sehna Berita Si Meriah ku tengah-tengah masyarakat Karo si pe-134-ken. Puji Tuhan ninta man Dibata erkiteken alu perkuah ateNa, berita keselamaten i bas Yesus Kristus enggo banci seh ku tengah-tengah masyarakat Karo. Amin pe usiana enggo 134 tahun, tapi rikutken hasil penelitian Litbang GBKP, kurang lebih 40% denga anggota GBKP si aktif muat bagin i bas dahin-dahin pelayanen. I bas sada sisi tentu enda menjadi keprihatinenta bersama, tapi i bas sisi si deban tetap kita harus ngataken bujur man Dibata erkiteken iarak-arakNa denga GBKP mentasi erbage-bage pergumulen sedekah 134 tahun.

Mpebagesi Ogen

Judul perikop ogenta sendah e me, “Barnabas ras Saul ipilih dingen iutus Perpulungen Antiokhia.” Lit dua Antiokhia i bas kitab Perb. Rasul. Si pemena e me Antiokhia i Siria i ja tangtangna perpulungen kalak si tek si labo kalak Yahudi ipajekken (Perb. Rasul 11:19-30). Janah i Antiokhia Siria enda tangtangna kalak si tek man Dibata i bas Yesus Kristus igelari “Kristen.” Perpulungen i Antiokhia Siria enda si milih ras ngutus Barnabas ras Saul guna er-Berita Si Meriah. Si peduaken e me Antiokhia si letakna i Psidia. Ogenta sendah nuriken kerna dahin er-Berita Si Meriah si ilakoken Barnabas ras Saul i Antiokhia Psidia. Dahin er-Berita Si Meriah enda termasuk ku bas perdalanen misi Rasul Paulus si pemena, sekitar tahun 46-49. Benaken bindu 13:9 ku seterusna Saul igelari Paulus.

I bas ogenta sendah teridah uga carana Paulus ras Barnabas er-Berita Si Meriah. i bas sari Sabat, reh kalak enda duana ku rumah persembahen (BIMK, rumah ibadat) kalak Yahudi, janah nuriken kerna sejarah keselamaten i bas Yesus Kristus erpalasken kitab Taurat ras nabi-nabi. Si reh ku bas rumah persembahen tep-tep wari Sabat e labo terjeng kalak Yahudi, tapi enterem si reh kalak i bas bangsa-bangsa si deban nari. Kenca enggo sekali ituriken Paulus kerna sejarah keselamaten ndai, ipindoken kalak si enterem e gelah reh ka ia i bas wari Sabat berikutna guna nuriken kerna sejarah keselamaten i bas Yesus Kristus ndai. Ertina meriah iakap kalak si enterem ndai megiken kerna Berita Si Meriah.

I bas wari Sabat berikutna, ituriken i bas ay. 44 maka menam kerina anak kuta e reh megiken kerna Berita Si Meriah si iberitaken Rasul Paulus. Erkiteken reh teremna kalak si reh guna megiken pengajaren Paulus, cian ate pemimpin-pemimpin agama Yahudi, ikatakenna maka kai si ikataken Paulus e lebo tuhu, ihinana rasul e (ay. 45), janah ihasutna pembesar-pembesar kuta e ras diberu-diberu si tergolong ihamati kalak, gelah ilawanna Paulus ras Barnabas. I bas ay. 50 ituriken maka ipelawes kalak enda ndai Paulus ras Barnabas i bas Antiokhia nari. Tapi amin pe melala hambaten i bas er-Berita Si Meriah, Paulus ras Barnabas labo ngadi, alu la mbiar-mbiar tetap iberitakenna Berita Si Meriah.

I bas dahin-dahin er-Berita Si Meriah si ilakoken Paulus ras Barnabas i Antiokhia, Kesah Si Badia erdahin, erbahanca reh enteremna kalak si lenga itandaina Dibata i bas Yesus Kristus, ngaloken keselamaten. I bas ay. 49 ituriken maka Kata Tuhan mbar ku belang-belang daerah e. Kerina kalak si enggo ngaloken keselamaten i bas Yesus Kristus i Antiokhia, ipujina Tuhan (ay. 48), janah perpulungen kalak si tek i je idemi alu keriahen dingen Kesah Si Badia (ay. 52).

Versi Audio silahkan klik : https://youtu.be/oV8EJoS1w1I

Pengkenaina

I bas kita mperingeti sehna Berita Si Meriah si pe-134 tahun-ken i bas tgl. 18 April 2024 enda, kai saja si banci jadi renungenta? Si pemena lebe, e me kerna militansi pelayanen bagi si enggo ilakoken Paulus ras Barnabas, walaupe mbue tantangen tapi harus tetap jalan terus. Serayan Tuhan: Pdt., Pt., Dk., Em.; Pengurus PJJ bage pe Kategorial, Tim-tim Pelayanen si lit bas gereja termasuk kerina perpulungen si enggo setia ras tutus ngikutken Tuhan Yesus, aminna pe mbue tantangen si ialami kita, ula kendor semangat pelayanenta. Kita arus tetap militan (bersemangat tinggi - penuh gairah) i bas melayani Tuhan, sabab la pernah sia-sia dahin si idahiken kita i bas Tuhan.

Si peduaken, kerna kedewasaan i bas erkiniteken. Rikutken penelitian Litbang si enggo isingetken arah lebe ndai, 40% denga anggota GBKP si peduli, aktif muat bagin i bas dahin-dahin pelayanen. Tapi i bas si 40% enda ndai apakah kerinana enggo dewasa secara kiniteken? Sebab banci saja i bas si 40% e reh ku GBKP labo erkiteken nggit ia bertumbuh i bas Kristus, tapi erkiteken iketen budaya, ras motivasi-motivasi si deban si sifatna guna kepentingen dirina sendiri. I bas si e, kerina kita si sangana megiken renungen enda entah pe si sangana ngoge suplemen PJJ enda, ras-ras kita mengkoreksi diri, mengevaluasi diri sendiri, apakah kita termasuk kalak si nggit robah sue ras peraten Dibata i bas Pustaka Si Badia? Adi nggit kita, amin pe melala denga kekurangen, puji Tuhan! Adi lenga, mari radu ras kita ertoto gelah ipengasup Dibata kita jadi anak-anakNa si patuh. Man banta 

Si peteluken, PJJ-ta sendah sekaligus mperingeti HUT Kategorial KAKR. KAKR e me lembaga kategorial si pemenana i bas gerejanta. Enggo nge sidukung KAKR si lit i bas gerejanta masing-masing? Generasi muda i bas gerejanta, khususna anak ras remaja, e me kategori usia si harus tuhu-tuhu datken perhatian i bas jaman gundari enda. Melala pengaruh-pengaruh si la mehuli i bas dunia media sosial. Enda tentuna perlu perhatianta gelah ula sempat anak-anakta ndabuh ku bas hal-hal si la mehuli. Kai saja si banci silakoken? Mari siperdiateken sarana-sarana pendidiken i bas KAKR-ta. Enggo me cukup mbelin anggaren Runggun guna KAKR? Enggo kin lit gedung khusus ras kelas-kelasna? Adi enggo, apakah kerina kelengkapenna enggo lit? Adi enggo, apakah kualitas ras kuantitas guru-guru KAKR enggo siperdiateken alu ngelitken pembinaan-pembinaan si mutakhir rikutken perkembangen jaman gundari enda? Kari nari kira-kira? Mari radu ras kita peduli nandangi pembinaan iman anak-anakta. Man bandu Runggun Gereja pe harus lit kepedulianna ku je, sebab lit denga Runggun Gereja si lenga rukur kerna pentingna pembinaan man anak ras remaja. Dibata si mpengasup kita guna semakin meningkatkan kualitas ras kualitas pembinaan man anak ras remaja i bas GBKP si malem enda.