SUPLEMEN PA MAMRE GBKP TGL. 14 - 20 APRIL 2024

Pdt. Larena Sinuhadji (Nd. ReyRapha Tarigan)

Teks : Markus 10:13-16

Tema : NARUHKEN ANAK KU TUHAN YESUS

Tujun : Gelah Mamre :

1) Meteh maka Tuhan Yesus ngalo-ngalo ras masu-masu anak-anak.

2) Meteh kerna tanggung jawabna naruhken anakna ku Tuhan; jadi kesaksin nehken Berita Si Meriah

Bena Kata

Anak e me pemere Tuhan man banta si arus tuhu-tuhu siperdiateken ras sikelengi. Tapi i bas paksa genduari enda, melala orang tua si enggo abai ndalanken tanggung jawabna secara khusus naruhken ras mabai anak-anakna geluh erkemalangen man Tuhan. E maka, rikutken bahan PA Mamre sekali enda, ipersingeti mulihi gelah Mamre sebage imam i tengah jabu itehna ras iingetna tugas mulia si enggo iampeken Tuhan man bana tentuna raduken ras nande i tengah jabu. 

Mpebagesi Teks

Bahan ogenta sekali enda ngerana kerna perhatian Yesus nandangi anak-anak si berbanding terbalik ras ajar-ajarNa. Ituriken i bas ogen, maka lit me piga-piga kalak maba anak-anak man Yesus. Adi sibandingken ras Luk. 18:15 i je ikataken reh me piga-piga orang tua maba anak-anakna man Yesus. Ertina, kitab Injil Lukas lebih tegas ncidahken peran orang tua, e me kap bapa ras nande si ertanggung jawab nandangi anak-anakna. Orang tua si ngangkai maka anak-anak e benaken kitik-kitik nari arus nggeluh erkemalangen man Tuhan. Tapi kepeken lit ambaten bas ajar-ajar nari, merawa ajar-ajar man kalak ndai. Banci jadi la akapna penting kel anak-anak sabab biasa rusur ngganggui. Pelayanen Yesus hanya fokus man kalak dewasa labo man anak-anak.

Tapi justru sebaliknya, iidah Yesus perbahanen ajar-ajarNa merawa IA man ajar-ajarNa, “Pelepas anak-anak e reh ndahi aku, ola ambati, sabab kalak si bage kap empuna kinirajan surga.” Yesus mengapresiasi anak-anak selaku pewaris kinirajan Dibata. Sabab biak anak-anak umumna polos (apa adanya) la lit kemunafiken, bergantung (kepercayaanna) man orang tua si total. Je nari idakep Yesus anak-anak e sekalak-sekalak, itamakenNa tanNa ku babona ras ipasu-pasuNa. Ertina, kerina anak iidah Yesus seri ras la erdobahen. Setiap anak meherga ras penting, maka setiap anak idakep ras ipasu-pasu Yesus. Erbage-bage kondisi anak-anak si nibaba orang tuana, banci jadi lit si berkebutuhen khusus, lit si mbiring warna kulitna, lit si keriting bukna, tapi kerina seri ras meherga i lebe-lebe Yesus.

Versi Audio silahkan klik : https://youtu.be/CAoaO7dj_Kc

Pengkenaina

Bahan enda ilitken dalam rangka HUT KAKR si bersamaan waktuna ras Sehna Berita Si Meriah ku kalak Karo (18 April 1890 - 18 April 2024).  Sada lebe  pengidahta maka maka anak-anak e me kap masa depan keluarga, masa depan gereja ras masa depan bangsa. Tanggung jawab orang tua mabai anak-anak geluh erkemalangen man Yesus (Tema: “Naruhken anak ku Tuhan Yesus”). Kiniersadan arih bapa ras nande, maka anak e me kap pemere Dibata si tuhu meherga si arus tuhu-tuhu ikelengi, iperdiateken kebutuhenna secara utuh. Secara khusus kebutuhen pertendinna.

Mbue hal si banci silakoken, ngelitken ibadah keluarga, siajarken nilai-nilai kekristenan; kekelengen, meteruk ukur, ersada arih, mengampuni, dll. Labo terjeng ngajarken, tapi orang tua pe arus jadi usihen si mehuli. “Satu perbuatan lebih berarti daripada seribu kata-kata.” Genduari enda, melala orang tua (khususna Mamre) si abai nehken tanggung jawabna man anakna. Mbuen kari waktuna guna dirina, entah bermain Hp, games, entah pulung ras teman-temanna i Kedai Kopi. Tapi kurang waktuna, bahkan la lit man anakna. Subuk i bas mendampingi erlajar, bermain, rekreasi terlebih i bas mabai anak geluh erkemalangen man Tuhan. Si lebih parah, mbue genduari kekerasen si nilakoken orang tua ku anakna, subuk kekerasen fisik, kekerasen seksual, kekerasen ekonomi (kitik-kitik denga enggo ibabai guna ikut jadi peminta-minta, ngamen), kekerasen verbal rsd.

Jaman tentu berubah, nai ras genduari enggo pasti ndauh kel bedana. Secara khusus alu litna tekhnologi informasi si seh kel berkembangna. Tentu cara mendidik nai ras genduari pe berbeda. Tapi si tetap seri e me kekelengenta, bentuk perhatianta, pendampingenta si arus tetap silitken man anak-anakta. Sipindolah tetap gegeh man Tuhan gelah ngasup kita ndalanken bagi si ngena ateNa.