Pdt. Larena Sinuhadji (Nd. ReyRapha Tarigan)
ERSADA UKUR RAS ERSADA SURA-SURA - 1 Korinti 1:10-17
(Sidang Majelis Sinode 2025)
Penaruh
Melala manfaat si idatken kita adi kita nggeluh ersada ras kalak si deban si lit i sekelewetta. Contoh i bas jabuta, adina perbapan ras pernanden ersada arihna, maka suasana i bas jabu pe dem alu dame, keriahen ras kejuah-juahen. Contoh si deban, sada kelompok masyarakat i bas sada RT, adi ersada arihna, melala hal positif si banci silakoken, kerja bakti mbersihken lingkungan ingan tading, saling tolong-menolong adi lit si sakit entah pe kemalangen, saling menjaga keamanan ras kenyamanan lingkungan ingan tading, rsd.
Nggeluh ersada secara teori memang murah mbelaskenca, tapi i bas kinatana mesera guna ngelakokenca erkiteken melala tantangen si man hadapen i bas kita mewujudken kiniersadan e. Emaka kiniersadan e me salah sada hal si harus terus-menerus siperjuangken. I bas PJJ sendah radu ras kita erlajar nggeluh ersada ukur ras ersada sura-sura sada ras si debanna i bas kula ni Kristus rikutken ogenta.
Mpebagesi Ogen
Ogenta sendah masuk ku bas bindu sada surat Rasul Paulus si pemena man Perpulungen Korinti, si secara garis besar isina rikutken judul-judul perikop e me, salam, pengataken bujur, perpecahen i tengah-tengah perpulungen, ras kerna kepentaren Dibata ras kepentaren doni. Arah judul perikop ogenta sendah teridah maka lit kinilaersadaan i bas Perpulungen Korinti, e maka i bas si e Paulus ngajuk perpulungen gelah ersada i bas kata, perukuren, ras sura-sura (ay. 10, “Seia sekata … erat bersatu dan sehati sepikir”)
Paulus ndatken informasi kerna perjengilen (pertengkaran) si terjadi i tengah-tengah Perpulungen Korinti arah piga-piga kalak i bas jabu Klue nari. Klue i jenda e me gelar sekalak diberu, mungkin sekalak bayak si terkenal paksa si e, i ja piga-piga anggota Perpulungen Korinti erdahin i bas ingan Klue enda ndai. I bas ay. 12 ituriken Paulus kai si jadi sumber masalah, e me lit perpulungen si erpihak-pihak, ibahanna kelompok-kelompok, lit kelompok Paulus, kelompok Apolos, kelompok Petrus, ras kelompok Kristus. I bas ay. 13 - 16 secara tersirat ituriken maka kelompok-kelompok enda erjengil (bertengkar) soal peridin (baptisan). Mungkin masing-masing kelompok erpengakap baptisen arah pemimpin kelompokna nari si sah, sedangken adi baptisen arah pemimpin kelompok si deban nari labo sah.
I bas si e Paulus ngatakenca maka kerina pemimpin e, baik Paulus, Apolos, ras Petrus, ersada kerinana sebab sada ngenca si isembah ras imuliaken e me Dibata i bas Yesus Kristus (ay. 13). I bas mperidiken pe ibahan gelar Dibata, Yesus Kristus ras Kesah Si Badia, labo i bas gelar Paulus, Apolos, entah Petrus. Janah tugas utama Paulus e me er-Berita Si Meriah alu kepentaren si rehna i bas Dibata nari (ay. 17). Ertina si mpersadaken kalak si tek e me Dibata i bas Yesus Kristus. Emaka mulihken ku pesan i bas ay. 10 i datas. Iajuk Paulus perpulungen gelah ersada i bas kata, perukuren, ras sura-sura (seia sekata, erat bersatu dan sehati sepikir). Amin pe labo hal si murah, tapi alu kuasa Kesah Si Badia, kiniersadaan i bas perpulungen kalak si tek banci iwujudken.
Pengkenaina
Sue ras tema PJJ-ta sendah, iajuk kita mulihi gelah ersada ukur ras ersada sura-sura. Ukurta harus idemi alu perukuren Kristus janah sura-suranta harus idemi alu sura-sura Dibata i bas Yesus Kristus. Ertina palas i bas kiniersadanta e me Dibata i bas Yesus Kristus, labo palas-palas si deban rikutken kerincuhen doni enda. Rikutken tafsiren Bob Utley, perjengilen si terjadi i bas ogenta sendah ipalasi alu kerincuhen doni enda, e me: saling iri hati terhadap karunia-karunia Roh yang berbeda. Pembedaan-pembedaan berdasarkan kaya - miskin, bodoh - terpelajar, tuan - budak, suku dan ras (Yahudi non-Yahudi), menikah - tidak menikah, rsd.
I bas si e marilah kita mengevaluasi diri sendiri. Apakah perukurenta enggo idemi alu perukuren Yesus Kristus? Apakah sura-suranta enggo idemi alu perukuren Dibata i bas Yesus Kristus? Entah masih denga palasta ku gereja e me guna kepentingen entah keuntungen pribadi? Pulung-pulung i gereja erkiteken enterem je kalak Karo? Reh kita ku gereja ndahiken dahin-dahin pelayanen gelah dat pengakuan ras puji-pujin? Kita ateta jadi ingan penggurun? I bas si e, marilah sipindo gegeh i bas Kesah Si Badia nari gelah ipengasupNa kita rukur ras ersura-sura bagi Kristus.
I bas PJJ-ta sendah, radu ras kita isingetken kerna Sidang Majelis Sinode i bas GBKP tahun si reh 2025. Mari radu ras sitotoken gelah Sidang Sinode enda tuhu-tuhu ipakeken guna semakin meningkatken kualitas ras kuantitas pelayanen alu palas ersembah man Dibata guna kemulian gelar Dibata. Sitotoken gelah kerina Serayan Tuhan, Pdt./Pt./Dk. ersada ukur ras ersada sura-surana, e me perukuren ras sura-sura Kristus.
Tidak ada komentar:
Posting Komentar