PA Kategorial GBKP Tgl. 6 - 12 Oktober 2019

PA MORIA GBKP TGL. 6 - 12 OKTOBER 2019

Pdt. Larena br. Sinuhadji (Nd. Rey Rapha Tarigan)

CIRI-CIRI SEHAT JIWA

Ogen : Kejadin 41:14-32

Tema : NGIDAH SI MEHULI I BAS DIRINTA

Tujun : Gelah Moria : 1) Ngidah maka Jusuf meteh lit si mehuli i bas dirina ras igejapna Dibata makeken ia ngelakoken si mehuli. 2) Ngasup ngelakoken si mehuli si lit i bas dirinta alu dem persikapen.

Metode PA : Study Kasus

Sejahat-jahatna jelma pasti lit sisi si mehuli i bas dirina, si banci jadi la nari teridah erkiteken rusurna kejahaten si ilakokenna. Sebab memang manusia itepa Dibata alu mehuli, lit tempas Dibata i bas diri manusia. Terlebih selaku kita kalak si tek si enggo itebus Tuhan dosa-dosanta maka biak si mehuli e nge si arus tetap lebih menonjol, biak si male ambah warina reh benena. Bagi nina Paulus, “Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh” (2 Kor. 5:17).

Bahan PA Moriata sekali enda nuriken kerna tokoh Jusuf, bahan si enggo mekatep sibahas, ertina mbue hal si banci sidat arah turin-turin Jusuf anak Jakub (benaken Kej. 37-50). Fitnah ndehara Potifar ingan Jusuf erdahin erbahanca ia itamaken i penjara. Amin bage gia, Tuhan la pernah nandingken Jusuf, iarak-arak Tuhan Jusuf dingen ipasu-pasuNa si erbahanca ngena ate penjaga rumah tutupen e man Jusuf. I bas tutupen Jusuf jumpa ras juru makanan ras juru minuman raja Firaun, si duana pernah ernipi dingen iterangken Jusuf nipina (Kej. 40). Dingen kenca iterangken Jusuf juru inemen raja si isina ia bakal ibebasken ras erdahin ka dengo sebage juru inemen raja maka i je Jusuf enggo bermohon gelah iinget juru inemen ras nuriken kerna kecibal Jusuf man raja Firaun si situhuna la lit kesalahenna, ras mindo tolong gelah banci ia ndarat i bas rumah tutupen nari. Tapi kenca enggo bebas juru inemen raja la nari ingetna padanna man Jusuf.

Manusia banci melupaken kita rikut ras jasa-jasanta tapi Dibata la pernah ngelupaken kita. Dua tahun kenca si e raja Firuan ernipi dingen la ise pe banci ngantusi nipi raja e, ras i je me iinget juru inemen raja. Idilo raja Firaun me Jusuf ras isuruhna nerangken antusen nipi raja. Ras banci siidah spiritualitas Jusuf asum isuruh raja, la ia menyombongken diri tapi tetap meteruk ukurna alu ngataken, “labo terantusi aku o Raja, tapi Dibata banci mereken antusen si mehuli”. Kenca dung ituriken raja nipina, maka iterangken Jusuf antusen nipi raja ndai. Duana nipi raja seri antusenna subuk kerna lembu si mbur ras kertang, bage pe pitu ruhi page si perngis ras pitu ruhi page si lambang. Maka Dibata enggo nuduhken kai ateNa ibahanna e me pitu tahun masa riba-iba ras pitu tahun masa kelihen. Labo terjeng antusen nipi raja iterangken Jusuf tapi pe Jusuf mereken solusi gelah raja memilih kalak si erpemeteh ras pentar guna ngaturken negeri Mesir, rikut ngangkat pegawai-pegawai si deban guna mpepulung seperlima i bas ulih peranin tupung paksa nakan riba-iba si pitu tahun, guna lit persedian i bas masa kelihen. Ras kedungenna itunjuk raja Firaun me Jusuf sebage wakil raja, sabab pengakun raja sendiri i bas Jusuf lit Kesah Dibata.

Melala hal si positif si banci sipelajari arah tokoh Jusuf khususna bas perikop enda : 1) Nggejapken maka kuasa Dibata si erdahin i bas kegeluhenna, si erbahanca tetap ia erkemalangen man Tuhan. 2) La perbenceng, tapi tapi tetap sabar. Sebab lit deba kalak la nari inget kalak i bas perbahanen si mehuli si enggo silakoken banci ia mbenceng, iperkuanken pe la nari nggit. Tapi Jusuf tetap menyambut alu mehuli juru inemen raja walaupe enggo ndekah maka ingetna Jusuf. 3) I bas kiniseran sialamina, la ia nalahken kalak, malah tetap ia erbahan positif, si mehuli (Kej. 39:22-23). 4) Percaya diri alu nuriken antusen nipi raja dingen mereken solusi si mehuli. 5) I bas perjumpanna ras raja la ia nggit meros tapi tuhu-tuhu ia ersikap, lebe secara fisik (ercukur ras ganti uis). Sabab lit deba kalak enggo pesimis erkiteken buena perbeben la nari diatena kerna keberadaan dirina.

Tema i bas PA-nta sekali enda “Ngidah si mehuli i bas dirinta”. Konsep diri si mehuli (konsep diri si positif) kerna dirinta njemba kita guna erbahan si mehuli ras sangat mendukung guna masa depan si mehuli i bas dirinta. Melala kalak la nari ngidah si mehuli i bas dirina (konsep diri negatif). Biasana kalak si bage pesimis, selalu menyalahkan orang lain entah pe Tuhan i bas kiniseran si ialamina, reaktif asum lit kritik bas kalak si deban nari. Kebalikenna kalak si memiliki konsep diri si mehuli, maka tuhu-tuhu igejapkenna ia tinepa Dibata si enggo itepa Dibata alu mehuli, lit tempas Dibata i bas dirina bahkan dareh Kristus mengalir i bas ia, maka si mehuli lalap ipikirkenna. Lit pe kritik kalak guna dirinta selalu inehenna alu kaca mata positif, tanda keleng ate kalak banna dingen gelah i bas banci berkembang lebih baik. Ciri kalak si mehuli konsep dirina :

- Mengenal potensi dirina guna banci ipergunaken alu mehuli.

- Ngasup mengelola stress entah perbeben alu mehuli, seh makana la murah putus asa tapi tetap bersyukur i bas kerina dampar geluhna. Ngasup ia ngalaken kerina keadaan erkiteken kuasa si ibereken Dibata baNa. Maka tetap ia erkemalangen man Tuhan.

- Produktif (bukan kontra produktif).

- Berguna bagi orang ras masyarakat.

- Optimis.

Itepa Dibata kita gelah banci jadi mandatarisNa, gelah geluhta erguna man kalak si deban. E maka berusahalah terus positif kita ngenehen dirinta ras cidahken hal-hal si mehuli e i bas kegeluhenta. Bage pe i bas relasinta ras kalak si deban, teklah kita maka bas temanta pe lit si mehuli bas ia, e maka ola kita sepele ras menganggap rendah kalak si deban. Adi banci kehadirenta memotivasi, membangun kalak si deban si lit isekelewetta. Kerina kita meherga i lebe-lebe Dibata.