PJJ GBKP Tgl. 20 - 26 Oktober 2019

PJJ GBKP TGL. 20 - 26 OKTOBER 2019

Pdt. Larena br. Sinuhadji (Nd. Rey Rapha Tarigan)

Tema : MPERMAKANI BIRI-BIRI DIBATA (1 Petrus 5:2-4)

(Ngataken Bujur I Bas Enggo Dungna Perdalinen Pemilihen Pertua Diaken)

Sikataken bujur man Tuhan, Pemilihen Pertua Diaken Periode 2019 - 2024 i belang-belang GBKP enggo erdalan alu mehuli. Ras Penangkuhen rikut pengukuhen pe enggo ka banci terlaksana i bas Runggun masing-masing alu lancar. Tading genduari komitmen Serayan Tuhan rikutken perpadanen asum itangkuhken ras ikukuhken tetap idalanken alu ketutusen ras kesetian i bas mpermakani perpulungen ni Tuhan.

Ogenta ibere judul “Rarasen biri-biri Dibata” (TB-LAI, “Gembalakanlah kawanan domba Allah”). E me kerna nasehat Rasul Petrus man Pertua si melayani i tengah-tengah perpulungen si sangana mengalami kiniseran erkiteken kinitekenna man Yesus Kristus si erbahanca arus merap marpar pertadingna. Banci jadi lit perpulungen e enggo kote, labuh kiniteken, erkiteken buena perbeben, tapi lit ka si tetap paguh kinitekenna. Emaka i jenda ipindoken Petrus maka kehadiren serayan tuhu-tuhu min ernanam man Pertua Diaken e. Piga-piga poin si ipindoken Petrus man Pertua-pertua gelah idalankenna :

- Mpermakani rarasen biri-biri si enggo ibereken Dibata. I bas gambaren si rusur lit bas Pustaka Si Badia (Mas. 23; Yeh. 34; Joh. 10), maka permakan e tuhu-tuhu mperdiateken biri-birina. Daramina mbal-mbal si meratah ras lau si teneng pemalerna. Icukupina kebutuhen biri-biri e. Si sakit itambari, adi lit biri-biri si papak perdalanen idarami seh ngayak dat. Bage me iarapken kehadiren Serayan Tuhan nandangi perpulungen e, tuhu-tuhu banci mperdiateken kegeluhen jemaatna. Si sakit idahi ras itotoken, si ceda ate ras kote iapuli ras ipegegehi, si monce-once kiniteken ipetetap ukurna, si kurang mehuli la tehna tanggung jawabna ipersingeti, rsd. Ertina Serayan Tuhan hadir guna perpulungenna.

- Kep-kep alu ukur meriah bagi si ngena ate Dibata, ula alu ukur mberat, ula erdandanken mata duiten, tapi erdandanken ukurta ersuruh guna ngelayani. Pelayanen si ilakoken Serayan Tuhan e, idalanken alu dem keriahen ukur, la erayo-ayo, labo erkiteken duit, tapi erkiteken ukur si ersuruh sabab sigejapken e tanggung jawabta. Sabab adi berat ukur ndalanken pelayanen enggo pasti labo maba kemalemen ate, tapi jungut-jungut.

- Ula jadi bos entah pe merentah saja dahinta nandangi perpulungen e, tapi arus kita jadi usihen. Arus pertu-pertua e jadi contoh man perpulungen Tuhan gelah alu bage kehadirenna banci mpengaruhi man perpulungen.

Enggo pasti labo lit kita si serta i bas ndalanken tanggung jawab si ibereken Tuhan guna mpermakani perpulungen e. Sabab terkadang lit ka rusur tantangen si ialami kita, subuk arah dirinta (keluarga) i bas litna perbeben bage pe bas eksternal nari (teman-teman Serayan ras perpulungen jine si mbue curak erbagena). Tapi adi tetap kita erpengendes lalap man Tuhan si mada dahin e, pasti ibereken tetap gegeh ras kepentaren man banta guna banci ndahikenca alu dem keriahen ukur. Adi enggo Dibata milih kita, pasti iperlengkapiNa kita alu erbage si mehuli, asal kita pe nggit berbenah diri ras mperlengkapi dirinta (pengendesen pribadi, rajin Sermon, ikut pembinaan, rsd.). Selain si e arus tetap kita membangun kiniersadan si mehuli antar sesama Serayan, saling menopang ras mperlengkapi.

Meriah ukurta adi arah pelayanenta enterem jemaat si bertumbuh kinitekenna ras tersampati baban geluhna. La kepeken sia-sia kehadirenta selaku Serayan Tuhan. Emaka adi lit denga biak-biak pencitraan, ndarami pujian si sea-sea, la jadi contoh si mehuli, ndarami duit, ilayani ngenca atena kurang nggit ngelai si e nge si perlu ipelimbarui. Labo soal gedangna kita melayani (seh piga-piga periode), tapi kualitas pelayanen si ilakoken kita sedekah kita melayani. Rikutken Firman Tuhan, labo doni enda saja sialoken kemalemen ate, tapi asum reh Permakan si tuhu-tuhu sialoken me rudang-rudang tanda kehormaten si mulia, si la ermelus-melus si enggo isikapken Dibata man banta.