PJJ GBKP Tgl. 6 - 12 Oktober 2019

PJJ GBKP TGL. 6 - 12 OKTOBER 2019

Pdt. Larena br. Sinuhadji (Nd. Rey Rapha Tarigan)

Tema : PASU-PASU TUHAN MAN NANDE / MORIA (1 Samuel 2:18-21)

(HUT MORIA KE - 62)

Ketedehen ate tiap jabu me ndatken sinusur? Lenga iakap kuh (sempurna) jabu e adi lenga lit sinusur. Emaka melala ilakoken usaha guna banci lit min tuah ku tengah-tengah jabu, subuk arah tambar kuta, bayi tabung, deba nengget, bahkan lit deba adopsi. Payo entah kurang payo carana, lit deba la nari iukurina. Banci jadi jabu e ersada denga nge arihna, tapi keluarga kedua belah pihak nge si kuskas ras sibuk ngukurisa. Piah lit jabu sirang entah erkidua adi lalap lenga jumpa tuah.

Bage me siidah perjuangen Hana i bas kitab 1 Samuel enda. Getem kel pusuhna sabab lenga ibereken tuah man bana, sedangken kiduana Penina enggo lit anakna. Rusur isaling-saling kiduana ia. Hana nggejapken maka la ia erguna perban lenga ibereken Tuhan tuah man bana. Saja Hana selaku kalak si tek, tetap ku Tuhan saja penalemenna. Asum keluarga enda ku Silo, i je me itungkasken Hana ukurna man Tuhan, ceda atena isehkenna man Tuhan. Ibegiken Tuhan pertotonna, ipasu-pasu Tuhan Hana jadi sekalak si banci i lebuh “nande”, ras tubuh sekalak anak dilaki si gelarna Samuel. Sue ras nasarna man Tuhan, maka iserahkenna anak e man Tuhan, radu ras imam Eli ia tading i Silo ngelai dahin Tuhan. Pasu-pasu si enggo ialokenna i bas Dibata nari ipepalerna ka man si deban arah iberekenna anakna jadi pelayan Tuhan i bas segedang umur geluhna.

Rikutken perikopta, maka kenca enggo ngadi minem itaruhken orang tuana ia ku Rumah Pertoton i Silo. Sekali setahun reh orang tua ndahisa, ibabana paken si kitik, kain lenan (Kel. 28, bagian uis imam). Emaka ijumpaina anakna Samuel si idapetina anak e jadi Imam Kecil, si melayani i Rumah Tuhan ngikut-ngikut Imam Eli. Samuel terus erdahin ndahiken dahin TUHAN dingen pakenna baju si badia si ibahan i bas linen nari. Bage me pertumbuhen Samuel i Rumah Pertoton, terdidik alu mehuli, sabab ia ipindo i bas ulih pertoton kalak si tek ras ipebelin-belin i bas keluarga kalak si tek. Waktu si singkat si ipakeken Hana ras Elkana tapi tuhu-tuhu berkualitas kel perjumpanna ras anakna e, emaka aminna pe singkat waktuna tapi erkiteken mbages isina tuhu-tuhu jadi kenangen si tersuan i bas diri Samuel kerna kiniulin nandena secara khusus.  Mendidik anak gelah ietehna mehuli labo ban buena waktunta ras ia, tapi tuhu-tuhu banci berkualitas perjumpanta ras ia dingen kehadirenta tuhu-tuhu jadi usihen man banta (quality time).

Imam Eli masu-masu Elkana ras Hana gelah i bas perkuah ate Tuhan ndatken tole anak ku tengah-tenah jabuna, ras ibegiken Tuhan pertoton e i ja itambahi Tuhan ka lima anak ku tengah-tengah jabuna, telu kalak dilaki ras dua kalak diberu. Berekenna sada man Tuhan, iulihken Tuhan ka lima anak ku jabuna. Alu e ipetangkas man banta maka Tuhan ngasup mereken pasu-pasu si luar biasa man kalak si tetap erkemalangen man baNa.

Tema i bas PJJ-ta “Pasu-pasu Tuhan man Nande/Moria” ngingetken maka keleng Tuhan man pernanden GBKP si tergelar Moria enggo genep umurna 62 tahun i bas tahun enda. Moria jadi kekuaten i bas GBKP enda sabab ‘di kune lemah Moria i bas sada Gereja, maka sangat mempengaruhi ku kategorial si deban bage pe Gereja secara institusi. Termasuk i tengah jabu, ‘di kenca sakit saja nande e, maka enggo agak latih sitik i bas perdalanen jabu e, apai ka adi enggo lawes pernanden e ngadap ku Tuhan, maka melala perbapan si kedungenna empo ka erkiteken la ngasup ngurus dirina sekalak. Moria sebage nande e me “tiang jabu”, si ngasup erbahan mehaga bapa tengah jabu ras malem ate anak-anakna (Kuan-kuanen 31:10-31). Malem kel ate sekalak nande, sabab arah tanna mbelin anak-anakna, pentar anak-anakna, meriah iakap perbulangenna, geluhna jadi berkat man kalak si nterem ras melala denga si deban si banci ilokeken. Pasu-pasu si enggo sialoken Moria arus ngasup Moria mpepalersa man si deban. Jadilah “Wonder Nande”, “Wonder Moria”. Selamat HUT Moria pe-62-tahunken.